ഇരിങ്ങാലക്കുട : കൂടൽമാണിക്യം ക്ഷേത്രത്തിൽ നടക്കുന്ന തിരുവുത്സവത്തിൻ്റെ വലിയ വിളക്ക് ദിവസമായ ഇന്നു രാത്രി പന്ത്രണ്ടു മണിക്ക് ക്ഷേത്രാങ്കണത്തിൽ അരങ്ങേറുന്ന “ശ്രീരാമ പട്ടാഭിഷേകം” കഥകളിയിൽ ഭരതനായി ഇക്കുറിയും കലാനിലയം രാഘവനാശാൻ അരങ്ങിലെത്തും.
കഴിഞ്ഞ 40 വർഷത്തിലേറെയായി ഭരതൻ്റെ വേഷം കെട്ടുന്ന രാഘവനാശാന് ഇപ്പോൾ പ്രായം 90.
ഇപ്പോഴും ഒരു യുവാവിൻ്റെ ചുറുചുറുക്കോടെ അരങ്ങിലെത്തുന്ന രാഘവനാശാൻ്റെ കൈകളിൽ ഭരതവേഷം എന്നും ഭദ്രം.
ഗുരുവായിരുന്ന കലാമണ്ഡലം കരുണാകരനാണ് ഉത്സവത്തിന് ഭരതൻ്റെ വേഷം കൈകാര്യം ചെയ്തിരുന്നത്. അദ്ദേഹത്തിന് ശേഷമാണ് ഈ വേഷം രാഘവനാശാൻ കെട്ടാൻ തുടങ്ങിയത്.
ഇരിങ്ങാലക്കുട ഉണ്ണായി വാര്യർ സ്മാരക കലാനിലയത്തിലെ ആദ്യ ബാച്ചിലെ വിദ്യാർഥി ആയിരുന്ന കലാനിലയം രാഘവനാശാൻ പിന്നീട് അവിടെ തന്നെ അധ്യാപകനും പ്രിൻസിപ്പലുമായി 1995ൽ വിരമിച്ചു.
വലിയ വിളക്ക് ദിവസം ശ്രീരാമപട്ടാഭിഷേകത്തിന് ഭരത വേഷത്തിലെത്തുക എന്നത് വലിയൊരു അനുഗ്രഹമാണെന്നാണ് രാഘവനാശാൻ കരുതുന്നത്.
രാഘവനാശാന്റെ ശിഷ്യനും മരുമകനുമായ കലാനിലയം ഗോപിയാണ് കഴിഞ്ഞ 30 വർഷത്തിലേറെയായി ശ്രീരാമ പട്ടാഭിഷേകത്തിൽ ഹനുമാൻ്റെ വേഷം ചെയ്യുന്നത്.
രാഘവനാശാന്റെ മകനും തിരുവനന്തപുരം റീജണൽ ക്യാൻസർ സെൻ്ററിലെ ഡോക്ടറുമായ രാജീവും, മകളായ ജയന്തിയും മികച്ച കഥകളി നടന്മാരാണ്.
രാഘവനാശാൻ്റെ ഭരതവേഷമാണ് ചിത്രത്തിൽ കാണുന്നത്.
Leave a Reply