IRINJALAKUDA TIMES
ഇരിങ്ങാലക്കുട : ഓൾ കേരള ഫോട്ടോഗ്രാഫഴ്സ് അസോസിയേഷൻ ഇരിങ്ങാലക്കുട ടൗൺ യൂണിറ്റ് ഐഡന്റിറ്റി കാർഡ് വിതരണം ചെയ്തു.
മേഖല പ്രസിഡന്റ് എൻ.എസ്. പ്രസാദ് ചടങ്ങ് ഉദ്ഘാടനം ചെയ്തു.
യൂണിറ്റ് പ്രസിഡന്റ് ഇഗ്നേഷ്യസ് അധ്യക്ഷത വഹിച്ചു.
സംസ്ഥാന കമ്മിറ്റി അംഗം എ.ഡി. ജോൺസൻ ഐഡൻ്റിറ്റി കാർഡ് വിതരണം നടത്തി.
മേഖല സെക്രട്ടറി ശരത്ത് ചന്ദ്രൻ, ജില്ലാ കമ്മിറ്റി അംഗങ്ങളായ സുരേഷ് കിഴുത്താണി, സജയൻ കാറളം, വേണു വെള്ളാങ്ങല്ലൂർ, രാധാകൃഷ്ണൻ ദൃശ്യ, കെ.വി. സഞ്ജു, വിജിൻ, സുധീർ, ജോജോ മാടവന എന്നിവർ പ്രസംഗിച്ചു.
ഇരിങ്ങാലക്കുട : അവിട്ടത്തൂർ മഹാദേവ ക്ഷേത്രത്തിലെ നവീകരണ കലശത്തിൻ്റെ പത്താം ദിനത്തിൽ പ്രതിഷ്ഠാ ചടങ്ങുകൾ നടന്നു.
അധിവാസവിടർത്തി പൂജ, ജീവകലശം, ശ്രീകോവിലിലേക്ക് എഴുന്നെള്ളിക്കൽ എന്നിവയ്ക്കു ശേഷം ഇടവം രാശി പുണർതം നക്ഷത്രത്തിൽ രാവിലെ ശിവലിംഗ പ്രതിഷ്ഠ നടന്നു.
തുടർന്ന് വിവിധ ചടങ്ങുകൾക്കു ശേഷം നടന്ന പ്രസാദ ഊട്ടിന് ധാരാളം ഭക്തജനങ്ങൾ പങ്കെടുത്തു.
വൈകീട്ട് ചലച്ചിത്ര പിന്നണി ഗായിക മീര രാംമോഹൻ്റെ സംഗീത സമന്വയം ഉണ്ടായിരുന്നു.
24ന് വൈകീട്ട് 7 മണിക്ക് ദുര്യോധന വധം കഥകളി അരങ്ങേറും.
നവീകരണ കലശം 26ന് സമാപിക്കും.
ഇരിങ്ങാലക്കുട : പി.എല്. തോമന് മെമ്മോറിയല് ചാരിറ്റബിള് ട്രസ്റ്റ്, കൊമ്പൊടിഞ്ഞാമാക്കല് ലയണ്സ് ക്ലബ്ബ് ഇന്റര്നാഷണല്, ഐ ഫൗണ്ടേഷന് ആശുപത്രി എന്നിവ സംയുക്തമായി 26ന് രാവിലെ 9 മണി മുതല് ഉച്ചയ്ക്ക് 12 മണി വരെ പ്രമേഹ രോഗനിര്ണയവും നേത്ര പരിശോധന തിമിര ശസ്ത്രക്രിയ ക്യാമ്പും പി.എല്. തോമന് മെമ്മോറിയല് ക്ലിനിക്കില് സംഘടിപ്പിക്കും.
ലയണ്സ് ക്ലബ് ഡിസ്ട്രിക്ട് ക്യാമ്പ് കോർഡിനേറ്റര് ജോണ്സന് കോലങ്കണ്ണി ക്യാമ്പ് ഉദ്ഘാടനം ചെയ്യും.
ക്ലബ് പ്രസിഡന്റ് അഡ്വ. എം.എസ്. രാജേഷ് അധ്യക്ഷത വഹിക്കും.
സെക്രട്ടറി എം.സി. പ്രദീപ്, ട്രഷറര് ജെയ്സണ് മൂഞ്ഞേലി, ആശുപത്രി കോര്ഡിനേറ്റര് ശിവന് നെന്മാറ എന്നിവര് പങ്കെടുക്കും.
കൂടുതല് വിവരങ്ങള്ക്ക് 9446540890 എന്ന നമ്പറില് ബന്ധപ്പെടണം.
ഇരിങ്ങാലക്കുട : കഴിഞ്ഞ വർഷം പൂരം നാളുകളിൽ നിർജ്ജലീകരണം മൂലവും മറ്റും മുന്നൂറോളം പേരാണ് ആരോഗ്യവകുപ്പിന്റെ പവലിയനിലിൽ വൈദ്യ സഹായം തേടി എത്തിയത്.
അതിൽ 150 പേർക്ക് കിടത്തി ചികിത്സ നൽകേണ്ട സാഹചര്യവും ഉണ്ടായി.
മുൻ വർഷത്തേക്കാൾ ചൂട് കൂടുതലുള്ള സാഹചര്യത്തിൽ പൂരത്തിൽ പങ്കെടുക്കുവാൻ ആഗ്രഹിക്കുന്നവർ നിർജ്ജലീകരണം ഒഴിവാക്കാൻ പ്രത്യേകമായി ശ്രദ്ധിക്കണമെന്ന് ജില്ലാ മെഡിക്കൽ ഓഫീസർ അറിയിച്ചു.
പൂരത്തിന് രണ്ടു ദിവസം മുൻപ് മുതലെങ്കിലും വെള്ളം ധാരാളമായി കുടിക്കേണ്ടതും ഭക്ഷണം ശരിയായി കഴിക്കേണ്ടതുമാണ്.
പൂരത്തിന് വരുന്ന ദിവസം രാവിലെ മുതൽ ഉപ്പിട്ട നാരങ്ങാവെള്ളം, കഞ്ഞിവെള്ളം ഉൾപ്പെടെ, 7 മുതൽ 10 ഗ്ലാസ് വരെ വെള്ളം പൂരപ്പറമ്പിൽ എത്തുന്നതിന് മുൻപ് കുടിക്കേണ്ടതാണ്. തുടർന്നും ഇടയ്ക്കിടെ വെള്ളം കുടിക്കുന്നത് നിർജ്ജലീകരണം തടയാൻ സഹായകമാവു.
വെള്ളം എല്ലായ്പ്പോഴും കൈയിൽ കരുതേണ്ടതാണ്.
കുട / തൊപ്പി ധരിക്കണം.
ജലാംശം കൂടുതലുള്ള തണ്ണിമത്തൻ പോലുള്ള പഴങ്ങൾ ധാരാളമായി കഴിക്കണം.
കഴിയുന്നതും തണലിൽ നിൽക്കണം. തുടർച്ചയയി വെയിൽ കൊള്ളുന്നത് നിർജ്ജലീകരണത്തിനും കുഴഞ്ഞു വീഴുന്നതിനും കാരണമാകും.
മദ്യപിച്ചിട്ടുണ്ടെങ്കിൽ നിർജ്ജലീകരണം കൂടാൻ സാധ്യതയുണ്ട്.
കടകളിൽ നിന്നും പാതയോരങ്ങളിൽ നിന്നും ജ്യൂസ് കുടിക്കുന്നവർ നല്ല വെള്ളവും ഐസ് ശുദ്ധജലത്തിൽ നിന്നുണ്ടാക്കിയതാണെന്നും ഉറപ്പ് വരുത്തണം.
ഏതെങ്കിലും തരത്തിലുള്ള ശാരീരിക / മാനസിക ബുദ്ധിമുട്ടുകൾ തോന്നുകയാണെങ്കിൽ ഉടൻ തന്നെ അടുത്തുള്ള മെഡിക്കൽ ടീം /ആംബുലൻസിൻ്റെ സേവനം പ്രയോജനപ്പെടുത്തണം.
ഇരിങ്ങാലക്കുട : സേവാഭാരതി ആരോഗ്യ വിഭാഗവും കൊമ്പൊടിഞ്ഞാമാക്കൽ ലയൺസ് ക്ലബ്ബും കൊച്ചിൻ ഐ ഫൗണ്ടേഷനും സംയുക്തമായി എല്ലാ മാസവും നടത്തിവരുന്ന സൗജന്യ നേത്ര തിമിര പരിശോധനാ ക്യാമ്പ് 25ന് രാവിലെ 9 മണി മുതൽ ഉച്ചയ്ക്ക് 1 മണി വരെ സേവാഭാരതി ഓഫീസിൽ സംഘടിപ്പിക്കും.
സേവാഭാരതി പ്രസിഡൻ്റ് നളിൻ ബാബു അധ്യക്ഷത വഹിക്കും.
കാറളം പഞ്ചായത്ത് മെമ്പർ പി. രാജൻ ക്യാമ്പ് ഉദ്ഘാടനം ചെയ്യും.
പ്രശസ്ത സാമൂഹ്യ പ്രവർത്തകനും ഡിസ്ട്രിക്ട് ലയൺസ് ക്ലബ്ബ് മെഡിക്കൽ ക്യാമ്പ് കോർഡിനേറ്ററുമായ ജോൺസൻ കോലങ്കണ്ണി മുഖ്യാതിഥിയാകും.
കൂടുതൽ വിവരങ്ങൾക്ക് 9496649657, 9961325645 എന്നീ നമ്പറുകളിൽ ബന്ധപ്പെടാവുന്നതാണ്.
ഇരിങ്ങാലക്കുട : കുട്ടൻകുളത്തിലെ സ്മാരക നിർമ്മാണത്തിനെതിരെ പ്രതിഷേധ ധർണ്ണ സംഘടിപ്പിച്ച് യുവമോർച്ച.
കുട്ടൻകുളത്തിൻ്റെ തെക്ക് കിഴക്കേ ഭാഗത്ത് പത്ത് അടി വീതിയിലും ഇരുപത് അടി നീളത്തിലും കരിങ്കൽ കൊണ്ട് കെട്ടിപ്പൊക്കി സ്മാരകം നിർമ്മിക്കാനുള്ള ദേവസ്വത്തിൻ്റെയും സർക്കാരിൻ്റെയും നടപടി
ക്ഷേത്ര വിശ്വാസങ്ങളെയും ക്ഷേത്ര ആചാരങ്ങളെയും നശിപ്പിക്കാനുള്ള ഗൂഢതന്ത്രമാണെന്ന് യുവമോർച്ച ഇരിങ്ങാലക്കുട മണ്ഡലം കമ്മിറ്റി അഭിപ്രായപ്പെട്ടു.
ബിജെപി ജില്ലാ ട്രഷറർ കെ.ആർ. വിദ്യാസാഗർ പ്രതിഷേധ ധർണ്ണ ഉദ്ഘാടനം ചെയ്തു.
കൂടൽമാണിക്യം ക്ഷേത്രവും കുട്ടൻകുളവും പള്ളിവേട്ട നടക്കുന്ന ആൽത്തറയും തമ്മിൽ അഭേദ്യമായ ബന്ധമാണുള്ളത്. ആൽത്തറയിൽ സന്ധ്യാവിളക്ക് വെച്ചാൽ ക്ഷേത്രത്തിന് അകത്തിരുന്നു കൊണ്ട് കൂടൽമാണിക്യസ്വാമിക്ക് ആൽത്തറയിലെ സന്ധ്യാവിളക്ക് നേരിട്ട് ദർശിക്കാവുന്ന രീതിയിലാണ് ക്ഷേത്രവും കുട്ടൻകുളവും ആൽത്തറയും നിലനിൽക്കുന്നത്. കുട്ടൻകുളത്തിൽ ഇങ്ങനെയൊരു സ്മാരകം ഉയരുമ്പോൾ ക്ഷേത്രാചാരങ്ങൾക്ക് ഭംഗം വരും എന്നുള്ള കാര്യത്തിൽ തർക്കമില്ലെന്ന് അദ്ദേഹം പറഞ്ഞു.
മണ്ഡലം പ്രസിഡൻ്റ് സുഖിൻ പടിയൂർ
അധ്യക്ഷത വഹിച്ചു.
യുവമോർച്ച ഇരിങ്ങാലക്കുട മണ്ഡലം ജനറൽ സെക്രട്ടറി കെ.പി. അമീഷ് സ്വാഗതം പറഞ്ഞു.
യുവമോർച്ച ജില്ലാ വൈസ് പ്രസിഡൻ്റ് ജിനു ഗിരിജൻ ആമുഖഭാഷണം നടത്തി.
ജില്ലാ ജനറൽ സെക്രട്ടറി എൻ.ആർ. ഹരിപ്രസാദ്, ബിജെപി പൊറത്തിശ്ശേരി പഞ്ചായത്ത് പ്രസിഡൻ്റ് സൂരജ് കടുങ്ങാടൻ, യുവമോർച്ച മണ്ഡലം സെക്രട്ടറി കീർത്തി എന്നിവർ പ്രസംഗിച്ചു.
ക്ഷേത്രാചാരങ്ങൾക്ക് തടസ്സം നിൽക്കുന്ന ഏതു നിർമാണങ്ങളെയും നടപടികളെയും എന്തു വിലയും കൊടുത്ത് തടയുമെന്ന് യുവമോർച്ച പ്രഖ്യാപിച്ചു.
ബിജെപി ജില്ലാ സെക്രട്ടറിമാരായ അജീഷ് പൈക്കാട്ട്, ശ്യാംജി, ബിജെപി മണ്ഡലം പ്രസിഡൻ്റ് ആർച്ച അനീഷ്, മണ്ഡലം ജനറൽ സെക്രട്ടറിമാരായ ഷൈജു കുറ്റിക്കാട്, യുവമോർച്ച ജില്ലാ വൈസ് പ്രസിഡൻ്റ് ആശിഷ ടി. രാജ്, മണ്ഡലം സെക്രട്ടറി നിധീഷ്, മണ്ഡലം വൈസ് പ്രസിഡൻ്റ് സന്തോഷ് പിഷാരടി എന്നിവർ നേതൃത്വം നൽകി.
ഇരിങ്ങാലക്കുട : മയക്കുമരുന്നുകളും ലഹരിവസ്തുക്കളും വിൽപ്പന നടത്തുന്ന ആളുകളെ പിറ്റ് എൻ.ഡി.പി.എസ്. ആക്ട് പ്രകാരം തടങ്കലിൽ ആക്കുന്നതിന്റെ ഭാഗമായി മൂന്ന് മയക്കുമരുന്ന് കടത്ത് കേസുകളിലെ പ്രതിയായ കൊരട്ടി പൊലീസ് സ്റ്റേഷൻ പരിധിയിൽ മേലൂർ വില്ലേജിൽ, കുന്നപ്പിള്ളി ദേശത്ത് പനങ്ങാടൻ വീട്ടിൽ അഭിനവ് ബിനോയ് (26) എന്നയാളെ തൃശൂർ റൂറൽ ജില്ലാ പൊലീസ് മേധാവിയുടെ നേതൃത്വത്തിലുള്ള പ്രത്യേക അന്വേഷണ സംഘം അറസ്റ്റ് ചെയ്തു.
നടപടി ക്രമങ്ങൾ പൂർത്തിയാക്കി പ്രതിയെ തിരുവനന്തപുരം സെൻട്രൽ ജയിലിൽ എത്തിച്ച് ഉത്തരവ് നടപ്പിലാക്കും.
മയക്ക് മരുന്ന് ലഹരിക്കേസുകളിൽ ഒന്നിലേറെ തവണ അറസ്റ്റിലാകുന്നവരെയും ഇവരെ സാമ്പത്തികയായി സഹായിക്കുന്നവരെയും വിചാരണ കൂടാതെ ജയിലിൽ കരുതൽ തടങ്കലിൽ വയ്ക്കാവുന്നതിനുമുള്ള നിയമമാണ് പിറ്റ് എൻ.ഡി.പി.എസ്. നിയമം.
അഭിനവ് കൊരട്ടി സ്റ്റേഷൻ പരിധിയിൽ കുട്ടികൾക്കും മറ്റും വിൽപ്പന നടത്താൻ സൂക്ഷിച്ച 1.155 കിലോഗ്രാം ഗഞ്ചാവുമായി അറസ്റ്റിലായ കേസിലും പാലക്കാട് ടൗൺ നോർത്ത് സ്റ്റേഷൻ പരിധിയിൽ 3.660 കിലോഗ്രാം ഗഞ്ചാവുമായി അറസ്റ്റിലായ കേസിലും അങ്കമാലി സ്റ്റേഷൻ പരിധിയിൽ വിൽപ്പനയ്ക്കായി സൂക്ഷിച്ച ഗഞ്ചാവുമായി അറസ്റ്റിലായ കേസിലും അടക്കം മൂന്ന് മയക്കുമരുന്നു കേസുകളിലെ പ്രതിയാണ്.
കൊരട്ടി സ്റ്റേഷൻ എസ്എച്ച്ഒ ഹബീബുള്ള, ജിഎസ്ഐ സതീശൻ, തൃശൂർ റൂറൽ ജില്ലാ പൊലീസ് മേധാവിയുടെ ഡാൻസാഫ് സംഘത്തിലെ ജിഎസ്ഐ മാരായ സതീശൻ മടപ്പാട്ടിൽ, പി.എം. മൂസ, ജിഎഎസ്ഐ മാരായ എ.യു. റെജി, ഷിജോ തോമസ്, എം.ജെ. ബിനു, സിപിഒ ഇ.എ. ശ്രീജിത്, എന്നിവർ പ്രതികളെ പിടികൂടുന്നതിലും നടപടിക്രമങ്ങൾ പൂർത്തീകരിക്കുന്നതിലും പ്രധാന പങ്ക് വഹിച്ചു.
ഇരിങ്ങാലക്കുട : നികുതി സമാഹരണത്തിൽ സ്തുത്യർഹ സേവനമനുഷ്ഠിക്കുന്ന രജിസ്ട്രേഡ് പ്രാക്ടീഷണർമാർക്ക് സർക്കാർ അംഗീകൃത തിരിച്ചറിയൽ കാർഡ് അനുവദിക്കണമെന്ന് കേരള ടാക്സ് പ്രാക്ടീഷണേഴ്സ് അസോസിയേഷൻ ജില്ലാ സമ്മേളനം പ്രമേയത്തിലൂടെ ആവശ്യപ്പെട്ടു.
സമ്മേളനം സംസ്ഥാന ജനറൽ സെകട്ടറി കെ.പി. ഹരീഷ് ഉദ്ഘാടനം ചെയ്തു.
ജില്ലാ പ്രസിഡൻ്റ് സി.എ. ബിജു അധ്യക്ഷനായി.
ജില്ലാ സെക്രട്ടറി എം.എ. ഗോവിന്ദൻ, പി.ഡി. സൈമൺ, ഫ്രാൻസൺ മൈക്കിൾ, പി.ആർ. വിത്സൻ, കെ.ആർ. മുരളീധരൻ, എം.എസ്. ദിലീപ്, പോളച്ചൻ തുടങ്ങിയവർ പ്രസംഗിച്ചു.
പി. ഉണ്ണികൃഷ്ണൻ പ്രമേയം അവതരിപ്പിച്ചു.
പി.എഫ്. ജോയ് സ്വാഗതവും എസ്.എം. വിജയകുമാർ നന്ദിയും പറഞ്ഞു.
ഇരിങ്ങാലക്കുട : പുരോഗമന കലാസാഹിത്യ സംഘം സംഘടിപ്പിക്കുന്ന ഇന്നസെൻ്റ് സ്മാരക അഖില കേരള അമേച്വർ നാടക മത്സരത്തിൻ്റെ സംഘാടക സമിതി ഓഫീസ് അയ്യങ്കാവ് മൈതാനിക്ക് സമീപമുള്ള പ്രിയ ഹാളിൽ മന്ത്രി ഡോ. ആർ. ബിന്ദു ഉദ്ഘാടനം ചെയ്തു.
ചടങ്ങിൽ സംഘാടക സമിതി ചെയർമാൻ വി.എ. മനോജ് കുമാർ അധ്യക്ഷത വഹിച്ചു.
അശോകൻ ചരുവിൽ, അമ്പാടത്ത് ബാലൻ, ഇരിങ്ങാലക്കുട ബ്ലോക്ക് പ്രസിഡൻ്റ് ടി.ജി. ശങ്കരനാരായണൻ, വെള്ളാങ്ങല്ലൂർ ബ്ലോക്ക് പ്രസിഡൻ്റ് വത്സല ബാബു, പഞ്ചായത്ത് പ്രസിഡൻ്റുമാരായ സരള വിക്രമൻ, പി.എസ്. മനു, കെ.കെ. ശിവൻകുട്ടി, ജില്ലാ പഞ്ചായത്തംഗം ജോസ് ജെ. ചിറ്റിലപ്പിള്ളി, കൂടൽമാണിക്യം ദേവസ്വം പ്രസിഡൻ്റ് അഡ്വ. സി.കെ. ഗോപി, ഖാദർ പട്ടപ്പാടം, ഡോ. കെ. രാജേന്ദ്രൻ, അഡ്വ. പി. മണികണ്ഠൻ, എ.എൻ. രാജൻ, ഡോ. സോണി ജോൺ എന്നിവർ പ്രസംഗിച്ചു.
ഇരിങ്ങാലക്കുട : പടിയൂർ പഞ്ചായത്തിന്റെ വിവിധ ഭാഗങ്ങളിൽ പ്രത്യേകിച്ച് തെക്കൻ മേഖലയിലെ വളവനങ്ങാടി, പണ്ടാരത്തറ, കെട്ടുചിറ, ചുള്ളിപ്പാലം, കൊങ്ങിണിപ്പറമ്പ്, മുഴുവഞ്ചേരി തുരുത്ത്, വാര്യാട് കോങ്ങാടൻ തുരുത്ത്, എസ്.എൻ.വി.എൽ.പി. സ്കൂൾ പരിസരം തുടങ്ങിയ ഇടങ്ങളിൽ ര കുടിവെള്ള ക്ഷാമം രൂക്ഷമായി.
പഞ്ചായത്തിലും വാട്ടർ അതോറിറ്റിയിലും പരാതിപ്പെട്ടിട്ടും കുടിവെള്ള ക്ഷാമത്തിന് പരിഹാരം ഉണ്ടായില്ലെന്നും, വിഷയം പഞ്ചായത്ത് കമ്മിറ്റിയിൽ ചർച്ച ചെയ്യാൻ പോലും തയ്യാറായില്ലെന്നും ചൂണ്ടിക്കാട്ടി പ്രതിഷേധ സൂചകമായി യുഡിഎഫ് അംഗങ്ങൾ പഞ്ചായത്ത് കമ്മിറ്റിയിൽ നിന്നും ഇറങ്ങിപ്പോയി.
വിഷയം ചർച്ച ചെയ്യാനോ കുടിവെള്ളം എത്തിക്കുന്നതിന് വാഹനം ലഭ്യമാക്കുന്നതിനോ പഞ്ചായത്ത് ഭരണസമിതി തയ്യാറാകാതിരുന്നതിനെ തുടർന്നാണ് യുഡിഎഫ് അംഗങ്ങളായ ടി.ഡി. ദശോബ്, ഹാജിറ റഷീദ്, ബീന ജെയിംസ് എന്നിവർ കമ്മിറ്റിയിൽ നിന്ന് ഇറങ്ങിപ്പോക്ക് നടത്തിയത്.
ഇപ്പോൾ വാർഡ് അംഗങ്ങൾ സ്വന്തം നിലയ്ക്ക് എത്തിക്കുന്ന കുടിവെള്ള വിതരണം അപര്യാപ്തമാണ് എന്നതിനാൽ പഞ്ചായത്ത് ഭരണകൂടം എത്രയും വേഗം നടപടി സ്വീകരിക്കണമെന്നാണ് യുഡിഎഫ് അംഗങ്ങളുടെ ആവശ്യം.
കുടിവെള്ളക്ഷാമം രൂക്ഷമായ പ്രദേശങ്ങളെല്ലാം പുഴയോട് ചേർന്ന് കിടക്കുന്നതിനാൽ പൈപ്പ് വെള്ളമാണ് പ്രദേശവാസികളുടെ ഏക ആശ്രയം. പഞ്ചായത്തിൽ ആകെയുള്ളത് രണ്ടു വാട്ടർ ടാങ്കുകളാണ്. ഇപ്പോൾ പഞ്ചായത്തിലെ മറ്റു പ്രദേശങ്ങളിൽ വെള്ളം കിട്ടുമ്പോഴും ഈ ഭാഗത്തേക്ക് വെള്ളം ലഭിക്കുന്നില്ല.
പഞ്ചായത്തിന്റെ വിവിധ ഭാഗങ്ങളിലേക്ക് വെള്ളം തിരിച്ചുവിടുന്ന വാൽവുകൾ ക്രമീകരിച്ചാൽ മാത്രമേ എല്ലായിടത്തും ഒരു പോലെ വെള്ളം ലഭിക്കുകയുള്ളൂ. അതുവരെയും വണ്ടി സൗകര്യം ഏർപ്പെടുത്തുകയാണെങ്കിൽ വെള്ളം നൽകാമെന്ന് വാട്ടർ അതോറിറ്റി അറിയിച്ചിട്ടുണ്ട്. ഇതു പോലും ചർച്ച ചെയ്യാൻ പഞ്ചായത്ത് കമ്മിറ്റി തയ്യാറായില്ലെന്നാണ് യുഡിഎഫ് അംഗങ്ങളുടെ ആരോപണം.
പെരുമാറ്റച്ചട്ടം നിലനിൽക്കുന്നതിനാൽ അടിയന്തര സാഹചര്യം കണക്കിലെടുത്ത് കുടിവെള്ള വിതരണത്തിന് പ്രത്യേകം ഫണ്ട് അനുവദിക്കണമെന്ന് ആവശ്യപ്പെട്ട് ജില്ലാ കളക്ടർക്ക് അപേക്ഷ നൽകിയിട്ടുണ്ടെന്നും വിഷയം ചർച്ച ചെയ്യാൻ വ്യാഴാഴ്ച അടിയന്തര യോഗം ചേരുമെന്നും പഞ്ചായത്ത് പ്രസിഡൻ്റ് കെ.പി. കണ്ണൻ പറഞ്ഞു.
