ഇരിങ്ങാലക്കുട : സൗഹൃദം ലിറ്റററി & കൾച്ചറൽ സൊസൈറ്റി മികച്ച സാഹിത്യകാരന്മാർക്ക് നൽകുന്ന സൗഹൃദം സാഹിത്യ അവാർഡിന് നാട്ടു വിജ്ഞാനത്തിൻ്റെയും ദേശചരിത്രത്തിൻ്റെയും പ്രയോക്താവും ഇരുപതോളം പുസ്തകങ്ങളുടെ കർത്താവുമായ വി.കെ. ശ്രീധരൻ (അണ്ണല്ലൂർ) അർഹനായി.
പ്രശസ്തി ഫലകവും ക്യാഷ് അവാർഡും ആഗസ്റ്റ് 2ന് രാവിലെ 10ന് വടക്കാഞ്ചേരി അമ്പിളി ഭവനിൽ നടത്തുന്ന സാഹിത്യ സമ്മേളനത്തിൽ ഡയറക്റ്റർ പ്രൊഫ. പുന്നക്കൽ നാരായണൻ സമ്മാനിക്കും.
സംസ്ഥാന സാക്ഷരത സമിതിയിൽ സബ് എഡിറ്ററായിരുന്നു വി.കെ. ശ്രീധരൻ. നവസാക്ഷര പുസ്തകങ്ങൾ, ആദിവാസി ഭാഷയിലുള്ള മലയാളം ലിങ്ക് പ്രൈമർ, കേരളത്തിലെ പട്ടിക വർഗ്ഗ പൈതൃകം ശേഖരിച്ച് തയ്യാറാക്കിയ ഗോത്ര സ്മൃതി തുടങ്ങിയവയുടെ പ്രസിദ്ധീകരണത്തിന് മുൻകൈയെടുത്തു.
സംഗീത നാടക അക്കാദമിയിൽ അസ്മിനിസ്ട്രേറ്റീവ് ഓഫീസറായിരുന്ന കാലയളവിൽ കേളി മാസികയുടെ ഏകോപനത്തിൻ പ്രധാന പങ്കുവഹിച്ചു.
തൃശൂർ ജില്ലാ പഞ്ചായത്തിൻ്റെ നാട്ടറിവിൻ്റെ നിറവ്, പുഴക്കൽ ബ്ലോക്കിൻ്റെ പൊലിക തുടങ്ങിയ പ്രസിദ്ധീകരണങ്ങളിലെ എഡിറ്റോറിയൽ ബോർഡ് മെമ്പറായിരുന്നു.
വാണിയംകുളം, തൃശൂർ കോർപ്പറേഷൻ ചരിത്ര രചനകളിൽ പങ്കാളിയായി.
അമ്മവഴികൾ, ശീലാന്തി, അതിരോലം, ആരാനുമല്ല കൂരാനുമല്ല, ന്യായാധിപൻ്റെ മകൻ, കുന്നുകൾ താണ്ടി, കുന്നിമണി തേടി എന്നിവയാണ് പ്രധാന രചനകൾ.
നാല് പതിറ്റാണ്ടായി നാട്ടറിവ് മേഖലയിൽ പ്രവർത്തിക്കുന്നു. കഴിഞ്ഞ 30 വർഷമായി തൃശൂർ നാട്ടറിവ് പഠന കേന്ദ്രത്തിൻ്റെ നിർവ്വാഹക സമിതിയംഗമാണ്. കേന്ദ്രം പ്രസിദ്ധീകരിച്ച 20 നാട്ടറിവ് പഠന ഗ്രന്ഥങ്ങളുടെ എഡിറ്റോറിയൽ അംഗമായിരുന്നു. എഡിറ്റ് ചെയ്ത ‘കൃഷിയുടെ നാട്ടറിവുകൾ’ എന്ന പുസ്തകത്തിൻ്റെ ഏഴു പതിപ്പുകൾ ഇറങ്ങിയിട്ടുണ്ട്.
Leave a Reply