ഇരിങ്ങാലക്കുട : സി.ഐ.എസ്.സി.ഇ. സംഘടിപ്പിച്ച ദേശീയ ടേബിള് ടെന്നീസ് ചാമ്പ്യന്ഷിപ്പിന് ഇരിങ്ങാലക്കുട ഡോണ് ബോസ്കോ സെന്ട്രല് സ്കൂളിൽ സമാപനമായി.
രാജ്യത്തെ 16 റീജിയനുകളില് നിന്നായി 250ഓളം കായികതാരങ്ങള് പങ്കെടുത്ത ചാമ്പ്യന്ഷിപ്പിന്റെ സമാപനച്ചടങ്ങില് ഇരിങ്ങാലക്കുട ആര്.ഡി.ഒ. ഷിബു പോള് മുഖ്യാതിഥിയായി.
അണ്ടര് 14 വിഭാഗത്തില് മഹാരാഷ്ട്രയും അണ്ടര് 17 വിഭാഗത്തില് ഉത്തര്പ്രദേശും അണ്ടര് 19 വിഭാഗത്തില് വെസ്റ്റ് ബംഗാളും ഒന്നാം സ്ഥാനം കരസ്ഥമാക്കി.
അണ്ടര് 14, അണ്ടര് 17, അണ്ടര് 19 വിഭാഗങ്ങളില് തമിഴ്നാട്, പുതുച്ചേരി ആന്റ് ആന്ഡമാന് നിക്കോബാര് ഐലന്റ് രണ്ടാം സ്ഥാനത്ത് എത്തിയപ്പോള് അണ്ടര് 14, അണ്ടര് 17 വിഭാഗങ്ങളില് കര്ണാടക ആന്റ് ഗോവയും അണ്ടര് 19 വിഭാഗത്തില് ആന്ധ്രപ്രദേശും യഥാക്രമം മൂന്നാം സ്ഥാനം കരസ്ഥമാക്കി.
മികച്ച പ്രകടനത്തിലൂടെ 31 പോയിന്റുകള് നേടി തമിഴ്നാട്, പുതുച്ചേരി ആന്റ് ആന്ഡമാന് നിക്കോബാര് ഐലന്റ് റീജിയന് ഓവറോള് ചാമ്പ്യന്ഷിപ്പ് കരസ്ഥമാക്കി. ടീമുകള്ക്ക് ട്രോഫികളും മെഡലുകളും സമ്മാനിച്ചു.
അണ്ടര് 14 വ്യക്തിഗത വിഭാഗത്തില് മഹാരാഷ്ട്രയുടെ ധന്യശ്രീ ദത്താത്രേ താര്ഡേയും അണ്ടര് 17, അണ്ടര് 19 വിഭാഗങ്ങളില് തമിഴ്നാട്, പുതുച്ചേരി ആന്റ് ആന്ഡമാന് നിക്കോബാര് ഐലന്റ് റീജിയന്റെ ഇനിയയും, ഡോണിയയും വ്യക്തിഗത ചാമ്പ്യന്മാരായി.
മികച്ച പ്രകടനം കാഴ്ച വെച്ച താരങ്ങളെയും ടീമുകളെയും ചടങ്ങില് ആദരിച്ചു.
സി.ഐ.എസ്.സി.ഇ. കേരള റീജിയന് സ്പോര്ട്സ് കോര്ഡിനേറ്ററും എ.എസ്.ഐ.എസ്.സി. കേരള റീജണല് സെക്രട്ടറിയുമായ ഫാ. ഷിനോ കളപ്പുരയ്ക്കല്, ഡി.ബി.സി.എസ്. പ്രിൻസിപ്പൽ ഫാ. ജിതിന് മൈക്കിള്, അഡ്മിനിസ്ട്രേറ്റര് ഫാ. ഷിബു ഡേവിസ്, സ്പിരിച്വല് ആനിമേറ്റര് ഫാ. സെബാസ്റ്റ്യന് ഒറ്റപ്ലാക്കല്, ഡി.ബി.സി.എസ്. പി.ടി.എ. പ്രസിഡന്റ് ശാരിക ശിവപ്രസാദ്, അന്താരാഷ്ട്ര അമ്പയറും ചീഫ് റഫറിയുമായ എം.ടി. തോമസ്, ഡി.ബി.സി.എസ്. സ്പോര്ട്സ് കോർഡിനേറ്റര് ബിന്ദു ബാബു, ടേബിള് ടെന്നീസ് കോച്ച് സോമു ബാനര്ജി, കായികാധ്യാപകന് ജിതിന് രാജ് എന്നിവര് പങ്കെടുത്തു.
