ഇരിങ്ങാലക്കുട : ഡോ. കെ.എൻ. പിഷാരടി സ്മാരക കഥകളി ക്ലബ്ബിന്റെ സുവർണ്ണ ജൂബിലി സ്മരണികയായ ‘സുവർണ്ണരേഖ’യുടെ വിതരണവും സാംസ്കാരിക സംഗമവും ആഗസ്റ്റ് 16ന് വൈകീട്ട് 4 മണിക്ക് ഇരിങ്ങാലക്കുട അമ്മന്നൂർ ഗുരുകുലത്തിലെ മാധവനാട്യഭൂമിയിൽ നടക്കും.
കഥകളി ക്ലബ്ബിന്റെ സുവർണ്ണജൂബിലിയാഘോഷ പരമ്പരയിൽ ഒരു വർഷക്കാലം നീണ്ടുനിന്ന നൂറിലധികം രംഗാവതരണങ്ങളിൽ പങ്കെടുത്ത പ്രമുഖ കലാകാരന്മാർ, കലാനിരൂപകർ, ചിന്തകർ, പ്രഭാഷകർ തുടങ്ങിയവരുടെ തെരഞ്ഞെടുത്ത ലേഖനങ്ങൾ ഉൾപ്പെടുത്തിയാണ് ‘സുവർണ്ണരേഖ’ എന്ന സവിശേഷ സ്മരണിക തയ്യാറാക്കിയിരിക്കുന്നത്.
വൈകീട്ട് 4 മണിക്ക് ആരംഭിക്കുന്ന സാംസ്കാരിക ചടങ്ങിൽ സുവർണ്ണരേഖയുടെ ചെയർമാൻ അനിയൻ മംഗലശ്ശേരി പ്രവേശികയും, എഡിറ്റർ ദിലീപ്കുമാർ പീഠികയും അവതരിപ്പിക്കും.
ഡോ. എൻ. അജയ്കുമാർ, സജനീവ് ഇത്തിത്താനം എന്നിവർ സ്മരണികയെ കേന്ദ്രീകരിച്ച് പ്രഭാഷണം നടത്തും.
സ്മരണികയുടെ ആദ്യപ്രതി കേരള സംഗീത നാടക അക്കാദമി സെക്രട്ടറി ശുഭ വാസുദേവന് നൽകി വിതരണത്തിന് തുടക്കം കുറിക്കും.
സ്മരണികയുടെ മുഖചിത്രം രൂപകല്പന ചെയ്ത പ്രശസ്ത കാലിയോഗ്രാഫർ നാരായണ ഭട്ടതിരിയെയും സോവനീർ ഡിസൈനറായ അഷറഫിനേയും
തദവസരത്തിൽ അനുമോദിക്കും.
ശേഷം വൈകീട്ട് 6 മണിക്ക് ചെന്നൈ വിശ്വാസ് ഹരി നയിക്കുന്ന ‘തന്ത്രിധ്വനി’ മാൻഡോലിൻ സംഗീതസന്ധ്യ അരങ്ങേറും.
മൃദംഗത്തിൽ കൃപാൽ സായ്റാമും, ഘടത്തിൽ ശ്രീജിത്ത് വെള്ളാറ്റഞ്ഞൂരും അകമ്പടിയേകും.
Leave a Reply