ഇരിങ്ങാലക്കുട : ‘യെസ് ടു സ്പോർട്സ്, നോ ടു ഡ്രഗ്സ്’ എന്ന സന്ദേശവുമായി ലഹരിക്കെതിരായ ബോധവൽക്കരണം ശക്തമാക്കുന്നതിനും യുവാക്കളെ കായികരംഗത്തേക്ക് ആകർഷിക്കുന്നതിനുമായി ഓപ്പറേഷൻ തൂഫാന്റെ ഭാഗമായി സെപ്റ്റംബർ 5 മുതൽ 8 വരെ സംസ്ഥാനതലത്തിൽ കേരള പൊലീസ് സ്പോർട്സ് മാരത്തോൺ സംഘടിപ്പിക്കും.
ഇതിൻ്റെ ഭാഗമായി സ്പോർട്സ് മാരത്തോണിന് ഐക്യദാർഢ്യം പ്രഖ്യാപിച്ച് ഇരിങ്ങാലക്കുട സബ് ഡിവിഷനിൽ മെഗാ ടോർച്ച് മാരത്തോൺ സംഘടിപ്പിച്ചു.
ഇരിങ്ങാലക്കുട ഠാണാവിൽ നിന്ന് ഇരിങ്ങാലക്കുട പ്രൈവറ്റ് ബസ് സ്റ്റാൻഡ് വരെയാണ് മെഗാ ടോർച്ച് മാരത്തോൺ നടന്നത്.
നഗരസഭ ചെയർമാൻ എം.പി. ജാക്സൺ അധ്യക്ഷത വഹിച്ചു.
അഡ്വ. തോമസ് ഉണ്ണിയാടൻ എംഎൽഎ ഉദ്ഘാടനം ചെയ്തു.
റൂറൽ ജില്ലാ പൊലീസ് മേധാവി മുഹമ്മദ് നദീം മെഗാ ടോർച്ച് മാരത്തോണിന്റെ ദീപശിഖ കൈമാറി.
ക്രൈസ്റ്റ് കോളെജ് പ്രിൻസിപ്പൽ റവ. ഫാ. ഡോ. ജോളി ആൻഡ്രൂസ്, ക്രൈസ്റ്റ് കോളെജ് മാനേജർ റവ. ഫാ. ജോയ് പീണിക്കപറമ്പിൽ, ജില്ലാ പഞ്ചായത്ത് അംഗം ജോസ് ജെ. ചിറ്റിലപ്പിള്ളി, നഗരസഭ സ്റ്റാൻഡിങ് കമ്മിറ്റി അംഗം അഡ്വ. വി.സി. വർഗ്ഗീസ് എന്നിവർ ആശംസകൾ നേർന്നു.
ഇരിങ്ങാലക്കുട സബ് ഡിവിഷനിലെ പൊലീസ് ഉദ്യോഗസ്ഥർ, ക്രൈസ്റ്റ് കോളെജിലെ വിദ്യാർഥികൾ, സെന്റ് ജോസഫ് കോളെജിലെ വിദ്യാർഥികൾ എന്നിവർ മെഗാ ടോർച്ച് മാരത്തോണിൽ പങ്കെടുത്തു.
തുടർന്ന് ഇരിങ്ങാലക്കുട സെന്റ് ജോസഫ്സ് കോളെജിലെ വിദ്യാർഥികൾ ഇരിങ്ങാലക്കുട പ്രൈവറ്റ് ബസ് സ്റ്റാന്റിൽ ലഹരിക്കെതിരായ ഫ്ലാഷ് മോബും അവതരിപ്പിച്ചു.
ഡിവൈഎസ്പി എം.കെ. ഷാജി സ്വാഗതവും നാർക്കോട്ടിക് സെൽ ഡിവൈഎസ്പി എസ്. പ്രദീപ് നന്ദിയും പറഞ്ഞു.
ലഹരിക്കെതിരായ പോരാട്ടത്തിൽ കായികത്തെ ശക്തമായ ആയുധമാക്കുക എന്നതാണ് ഓപ്പറേഷൻ തൂഫാന്റെ ഭാഗമായി സംഘടിപ്പിക്കുന്ന ഇത്തരം പരിപാടികളുടെ പ്രധാന ലക്ഷ്യം. കായികരംഗത്തേക്ക് യുവാക്കളെ കൂടുതൽ ആകർഷിക്കുന്നതിലൂടെ ലഹരിയിൽ നിന്ന് അവരെ അകറ്റിനിർത്താനും ആരോഗ്യകരവും ക്രിയാത്മകവുമായ ജീവിതശൈലിയിലേക്ക് നയിക്കാനും സാധിക്കും.
ലഹരിക്കെതിരായ ബോധവൽക്കരണം പൊലീസിന്റെ മാത്രം ഉത്തരവാദിത്തമല്ലെന്നും വിദ്യാർഥികളും രക്ഷിതാക്കളും അധ്യാപകരും കായികതാരങ്ങളും പൊതുസമൂഹവും ഒരുമിച്ച് പ്രവർത്തിക്കേണ്ടതുണ്ടെന്നുമുള്ള സന്ദേശമാണ് പരിപാടിയിലൂടെ നൽകിയത്.
സംസ്ഥാനത്തെ 14 ജില്ലകളിലൂടെയും ദേശീയപാത 66 ഉൾപ്പെടെയുള്ള റോഡുകളിലൂടെയും ‘യെസ് ടു സ്പോർട്സ്, നോ ടു ഡ്രഗ്സ്’ എന്ന സന്ദേശമുയർത്തിയാണ് കേരള പൊലീസ് സ്പോർട്സ് മാരത്തോൺ സംഘടിപ്പിക്കുന്നത്.
Leave a Reply