ഇരിങ്ങാലക്കുട : ഐസിഎൽ “ഒന്നിച്ചോണം പൊന്നോണം” പരിപാടിയുടെ ഭാഗമായി വിപുലമായ സംഘാടക സമിതിയോഗം ആഗസ്റ്റ് 12ന് വൈകീട്ട് 4 മണിക്ക് ഇരിങ്ങാലക്കുട ടൗൺ ഹാളിൽ നടക്കും.
കഴിഞ്ഞ വർഷം ഐസിഎൽ ഫിൻകോർപ്പിൻ്റെ നേതൃത്വത്തിൽ ഒരുക്കിയ ഓണാഘോഷ പരിപാടിയായ “ഒന്നിച്ചോണം പൊന്നോണം” ജനമനസുകൾ കീഴടക്കിയിരുന്നു. ഇതിന് തുടർച്ചായി ഇത്തവണ സംസ്ഥാനതലത്തിൽ തന്നെ ശ്രദ്ധയാകർഷിക്കുന്ന തരത്തിലുള്ള പരിപാടികളാണ് ആസൂത്രണം ചെയ്തുവരുന്നത്. പുലിക്കളി, കുമ്മാട്ടി, തെയ്യം, തിറ, തിരുവാതിരക്കളി, കഥകളി തുടങ്ങി കേരള തനിമയുള്ള കലാരൂപങ്ങളെല്ലാം അണിനിരത്തി അതിഗംഭീര ഘോഷയാത്രയാണ് ഒരുക്കുന്നത്.
കൂടാതെ ഗിന്നസ് വേൾഡ് റെക്കോർഡ് കരസ്ഥമാക്കുന്നതിനുള്ള സാധ്യതകളും പരിശോധിക്കുന്നുണ്ട്. സ്കൂളുകൾ, കോളെജുകൾ എന്നിവ കേന്ദ്രീകരിച്ച് മത്സരങ്ങളും പരിപാടിയുടെ ഭാഗമായി സംഘടിപ്പിക്കാൻ തീരുമാനിച്ചിട്ടുണ്ട്.
2000ൽ അധികം പേർ ഉൾക്കൊള്ളുന്ന വിപുലമായ സംഘാടകസമിതിക്ക് ഇതിനകം രൂപം നൽകിയിട്ടുണ്ട്.
പരിപാടിയുടെ തുടർച്ചയായി ഇരിങ്ങാലക്കുട അയ്യങ്കാവ് മൈതാനിയിൽ നിരവധി സിനിമാതാരങ്ങൾ അണിനിരക്കുന്ന ബിഗ് സ്ക്രീൻ അവാർഡ് ഷോയും മെഗാ മ്യൂസിക്ക് ഡാൻസ് ഷോയും അരങ്ങേറും.
മഹാഘോഷയാത്രയുടെയും ആഘോഷ പരിപാടികളുടെയും സുഗമമായ നടത്തിപ്പിന് വേണ്ടിയുള്ള ഭാവി പരിപാടികൾ തീരുമാനിക്കുന്നതിനായി ചേരുന്ന സംഘാടക സമിതി യോഗത്തിലേക്ക് കക്ഷി രാഷ്ട്രീയ ഭേദമന്യേ മുഴുവൻ പൊതുജനങ്ങളെയും സ്വാഗതം ചെയ്യുന്നതായി ഐസിഎൽ ഫിൻകോർപ്പ് ചെയർമാൻ അഡ്വ. കെ.ജി. അനിൽകുമാർ അറിയിച്ചു.
Leave a Reply