ഇരിങ്ങാലക്കുട : സംസ്ഥാന മൃഗസംരക്ഷണ വകുപ്പിൻ്റെ പുരസ്കാരം സ്വന്തമാക്കി ഇരിങ്ങാലക്കുട ക്രൈസ്റ്റ് കോളെജ്.
മൃഗപരിപാലനത്തിനും ഗവേഷണത്തിനും നൂതനരീതികൾ അവലംബിച്ച് ക്രൈസ്റ്റ് കോളെജിൽ തുടങ്ങിയ ‘ക്രൈസ്റ്റ് അഗ്രോ ഫാം’ ആണ് സംസ്ഥാന സർക്കാരിൻ്റെ ഈ അവാർഡിന് അർഹമായത്.
തൃശൂർ കലക്ടറേറ്റിൽ നടന്ന അവാർഡ്ദാന ചടങ്ങിൽ കോളെജിനുവേണ്ടി മാനേജർ ഫാ. ജോയ് പീണിക്കപറമ്പിൽ, പ്രിൻസിപ്പൽ ഫാ. ഡോ. ജോളി ആൻഡ്രൂസ്, ബർസാർ ഫാ. ഡോ. എൻ.എസ്. വിൻസെൻ്റ് എന്നിവർ ചേർന്ന് അവാർഡ് ഏറ്റുവാങ്ങി.
ഏകദേശം അഞ്ചേക്കറോളം സ്ഥലത്ത് വ്യാപിച്ചുകിടക്കുന്ന ക്രൈസ്റ്റ് അഗ്രോ ഫാമിൽ വിവിധയിനം പശുക്കൾ, ആടുകൾ, കോഴി, താറാവ്, മുയൽ, അലങ്കാര മത്സ്യങ്ങൾ എന്നിവയും വിവിധ ഇനത്തിലുള്ള കുതിരകൾ, കഴുതകൾ എന്നിവയും വളരുന്നു.
മത്സ്യ കൃഷിയും നൂതനരീതിയിലുള്ള ഫിഷ് ബ്രീഡിംഗ് സെൻ്ററും ഇവിടെയുണ്ട്.
കാർഷിക രംഗത്ത് നൂതന ഗവേഷണങ്ങൾക്ക് സഹായകരമായ ഇന്നൊവേഷൻ സെൻ്ററും ഇതിനോടനുബന്ധിച്ച് പ്രവർത്തിക്കുന്നു.
ചാണകം പൊടിച്ചുള്ള ജൈവവളം, മണ്ണിര കമ്പോസ്റ്റ് എന്നിവയുടെ നിർമാണവും ഉപയോഗവും ക്രൈസ്റ്റ് അഗ്രോ ഫാമിൻ്റെ പ്രത്യേകതയാണ്.
കന്നുകാലികൾക്കുള്ള തീറ്റപ്പുല്ല്, പച്ചക്കറി കൃഷി, കൂൺ കൃഷി, ഔഷധസസ്യ തോട്ടം, കരിമ്പു കൃഷി, മഞ്ഞൾ കൃഷി, ഇഞ്ചി കൃഷി, 68 ഓളം ഫലവൃക്ഷങ്ങൾ അടങ്ങിയ തോട്ടം എന്നിവയും ഫാമിൻ്റെ ആകർഷണങ്ങളാണ്.
സൗജന്യ കൃഷി പരിശീലനവും മൃഗപരിപാലന പരിശീലനവും വിദ്യാർഥികൾക്കും പൊതുജനങ്ങൾക്കും നൽകുന്നു.
കൂടാതെ സ്കൂൾ കുട്ടികൾക്കായുള്ള ‘കൃഷിപാഠം’ പദ്ധതിയും ഇതിനോടനുബന്ധിച്ച് നടത്തുന്നുണ്ട്.
ക്രൈസ്റ്റ് കോളെജ് ബർസാർ ഫാ. ഡോ. വിൻസെൻ്റ് നീലങ്കാവിൽ, അധ്യാപകനായ ഡോ. സുബിൻ കെ. ജോസ് എന്നിവരുടെ നേതൃത്വത്തിലാണ്
അഗ്രോഫാം പ്രവർത്തിക്കുന്നത്.
Leave a Reply