ഇരിങ്ങാലക്കുട : ടൗൺ കോ- ഓപ്പറേറ്റീവ് ബാങ്കിലെ നിക്ഷേപകരുടെ നേതൃത്വത്തിൽ ഇരിങ്ങാലക്കുട ടൗൺ ബാങ്ക് ഡെപ്പോസിറ്റേഴ്സ് വെൽഫയർ അസോസിയേഷൻ എന്ന പേരിൽ രജിസ്ട്രേഡ് സംഘടന രൂപീകരിക്കാൻ തീരുമാനിച്ചു.
ബാങ്കിലെ സാമ്പത്തിക പ്രതിസന്ധി മൂലം നിക്ഷേപകർക്ക് പണം ലഭിക്കാതെ വന്നതോടെയാണ് ബാങ്ക് പുനരുദ്ധാരണ നടപടികൾക്കായി അസോസിയേഷൻ രൂപീകരിക്കാൻ യോഗം തീരുമാനിച്ചത്. അസോസിയേഷൻ ആദ്യമായി നിക്ഷേപ തുകയിൽ നിന്ന് ഒരു നിശ്ചിതഭാഗം ബാങ്കിൻ്റെ മൂലധനത്തിലേക്ക് വക മാറ്റി സംസ്ഥാന സർക്കാരിനെയും മറ്റു സഹകരണ ബാങ്കുകളെയും ഉൾപ്പെടുത്തി കൺസോർഷ്യം രൂപീകരിച്ച് മൂലധന നിക്ഷേപം നടത്താൻ ആവശ്യപ്പെടും. ഈ പ്രവർത്തികൾ പൂർത്തീകരിക്കുന്നതുവരെ ലിക്വിഡേഷൻ നടപടികൾ നിർത്തിവയ്ക്കാൻ ആർബിഐയുടെ ചെന്നൈ ജനറൽ മാനേജരോട് ആവശ്യപ്പെടാനും യോഗത്തിൽ തീരുമാനിച്ചു.
മാത്രമല്ല ബാങ്ക് പ്രതിസന്ധിക്ക് കാരണക്കാരായവർക്കെതിരെ നിയമനടപടി സ്വീകരിക്കാനും അവരുടെ സ്വത്തുക്കൾ കണ്ടു കെട്ടാനും ഇ.ഡി. ഉൾപ്പെടെയുള്ള അന്വേഷണ ഏജൻസികൾക്ക് പരാതി നൽകാനും യോഗത്തിൽ തീരുമാനിച്ചിട്ടുണ്ട്.
പ്രിൻസ് മാത്യു ചക്കാലക്കൽ (പ്രസിഡൻ്റ്), വിപിൻ ജോണി (വൈസ് പ്രസിഡൻ്റ്), ലിയോ പി. ആന്റോ (സെക്രട്ടറി), മോഹൻദാസ് വെങ്ങാശ്ശേരി (ജോയിൻ്റ് സെക്രട്ടറി), സഞ്ജീവൻ (ട്രഷറർ) എന്നിവരെയാണ് അസോസിയേഷൻ ഭാരവാഹികളായി തെരഞ്ഞെടുത്തിരിക്കുന്നത്.
തിരുവോണനാളിൽ ഇരിങ്ങാലക്കുടയിലെ ബാങ്ക് ഹെഡ് ഓഫീസിന് മുൻപിൽ പട്ടിണി സമരം നടത്താനാണ് നിക്ഷേപകരുടെ നീക്കം.
Leave a Reply