ഇരിങ്ങാലക്കുട : താളിയോലകളുടെ ഡിജിറ്റൈസേഷനും പ്രസിദ്ധീകരണത്തിനുമായി ഇൻഡിക്ക് ഡിജിറ്റൽ ആർക്കൈവ് ഫൗണ്ടേഷൻ്റെ ഭാഗമായ ഗ്രന്ഥപ്പുരയുമായി ചേർന്ന് ഇരിങ്ങാലക്കുട സെൻ്റ് ജോസഫ്സ് കോളെജിലെ പുരാരേഖാ ഗവേഷണകേന്ദ്രം പുതിയ സംരംഭത്തിന് തുടക്കം കുറിച്ചു.
നിരവധിയായ അമൂല്യ പുസ്തകങ്ങൾ, ആനുകാലികങ്ങൾ, നിഘണ്ടുക്കൾ, അപൂർവ രേഖകൾ, ഭൂപടങ്ങൾ, ശാസ്ത്രഗ്രന്ഥങ്ങൾ തുടങ്ങിയ രേഖകൾ കണ്ടെത്തി ഡിജിറ്റൈസ് ചെയ്ത് പൊതുജനങ്ങൾക്ക് ലഭ്യമാക്കുന്ന പ്രവർത്തനങ്ങൾ ചെയ്യുന്ന സംരംഭമാണ് ഗ്രന്ഥപ്പുര. അതോടൊപ്പം താളിയോലകളുടെ കൂടി ഡിജിറ്റൈസേഷനാണ് ഇപ്പോൾ തുടക്കം കുറിച്ചിരിക്കുന്നത്.
എഴുത്തുകാരൻ പി.കെ. രാജശേഖരൻ്റെ കുടുംബത്തിലെ താളിയോല ശേഖരമാണ് ആദ്യമായി പ്രസിദ്ധീകരണത്തിന് ഒരുങ്ങുന്നത്.
ഗ്രന്ഥപ്പുരയ്ക്കു വേണ്ടി ഷിജു അലക്സ്, കോളെജിനു വേണ്ടി പ്രിൻസിപ്പൽ ഡോ. സിസ്റ്റർ ബ്ലെസി, പുരാരേഖാ ഗവേഷണ കേന്ദ്രം ഡയറക്ടർ ക്യാപ്റ്റൻ ലിറ്റി ചാക്കോ എന്നിവർ ധാരണാപത്രത്തിൽ ഒപ്പുവച്ചു.
ചടങ്ങിൽ വൈദ്യരത്നം ഗ്രൂപ്പിന്റെ എച്ച്.ആർ.ഉം എഴുത്തുകാരനുമായ രമേശന് പൊയില്ത്താഴത്ത് പ്രൊജക്ട് ലോഞ്ചിംഗ് നിർവഹിച്ചു.
ഐ.ഡി.എ.എഫ്. ഡയറക്ടർ ജിസോ ജോസ് ഗ്രന്ഥപ്പുരയെക്കുറിച്ച് വിശദീകരിച്ചു.
വൈദ്യരത്നം ആയുർവേദ മ്യൂസിയം ക്യൂറേറ്റർ അനിൽ സന്നിഹിതനായിരുന്നു.
ഐ.ക്യു.എ.സി. കോർഡിനേറ്റർ ഡോ. ഷെറിൻ ജോസ് സ്വാഗതവും ക്യാപ്റ്റൻ ലിറ്റി ചാക്കോ നന്ദിയും പറഞ്ഞു.
Leave a Reply