ഇരിങ്ങാലക്കുട : കേരളത്തിൻ്റെ സാമൂഹ്യ, സാംസ്കാരിക മണ്ഡലങ്ങളിൽ സജീവമായി ഇടപെടുന്ന സംഘടനകൾക്കുള്ള പ്രഥമ നവമലയാളി പുരസ്കാരം കുഴിക്കാട്ടുശ്ശേരിയിൽ വളരെക്കാലമായി പ്രവർത്തിച്ചു വരുന്ന “ഗ്രാമിക” കലാസാംസ്കാരിക സംഘടനയ്ക്ക് ലഭിച്ചു.
25000 രൂപയാണ് പുരസ്കാര തുക.
പി.എൻ. ഗോപീകൃഷ്ണൻ, കെ.എം. അബ്ദുൾ ഗഫൂർ, അഡ്വ. വി.എൻ. ഹരിദാസ്, ഷാനു ശ്രീധരൻ എന്നിവർ അടങ്ങിയ പുരസ്കാര സമിതിയാണ് പുരസ്കാര നിർണ്ണയം നിർവ്വഹിച്ചത്.
ഒരു ഗ്രാമപ്രദേശത്തെ സാംസ്കാരിക പ്രവർത്തനത്തിന് അവിടുത്തെ സാമൂഹികതയിൽ ആഴത്തിൽ ഇടപെടാനാകും എന്നതിൻ്റെ പ്രത്യക്ഷ ഉദാഹരണമാണ് “ഗ്രാമിക”യുടെ ഇതപര്യന്തമുള്ള പ്രവർത്തനം എന്ന് സമിതി ചൂണ്ടിക്കാട്ടി.
ഏഴാമത് നവമലയാളി പുരസ്കാരം കാർട്ടൂണിസ്റ്റ് ഇ.പി. ഉണ്ണിക്ക് നൽകാനും തീരുമാനിച്ചിട്ടുണ്ട്.
കെ.ജി.എസ്., ആനന്ദ്, സച്ചിദാനന്ദൻ, സക്കറിയ, അരുന്ധതി റോയ്, ശശികുമാർ എന്നിവരായിരുന്നു മുൻവർഷങ്ങളിലെ പുരസ്കാര ജേതാക്കൾ.
2025 ആഗസ്റ്റ് 16ന് തൃശൂരിൽ വെച്ചു നടക്കുന്ന ചടങ്ങിൽ പുരസ്കാരങ്ങൾ വിതരണം ചെയ്യും.
Leave a Reply