ഇരിങ്ങാലക്കുട : ഉന്നത വിദ്യാഭ്യാസ സാമൂഹ്യനീതി വകുപ്പ് മന്ത്രിക്കായി ഓണാശംസാ കാർഡുകൾ ഒരുക്കി നൽകിയ നിപ്മറിലെ വിദ്യാർഥികൾക്ക് ഓണക്കോടിയും മധുരവും സമ്മാനിച്ച് മന്ത്രി ഡോ. ആർ. ബിന്ദു.
ചണം, വർണ്ണക്കടലാസുകൾ, മുത്തുമണികൾ എന്നിവ ഉപയോഗിച്ച് നിപ്മറിലെ എം-വൊക്ക് വിദ്യാർഥികൾ ആകർഷകമായ ആയിരം ആശംസാ കാർഡുകൾ നിർമ്മിച്ച് മന്ത്രിക്ക് സമ്മാനിച്ചിരുന്നു.
ഇത്തവണ മുഖ്യമന്ത്രി, മറ്റു മന്ത്രിമാർ, ജനപ്രതിനിധികൾ തുടങ്ങിയവർക്കെല്ലാം ഈ ആശംസാ കാർഡുകളാണ് മന്ത്രി ബിന്ദു അയച്ചത്. വിദ്യാർഥികളുടെ ഈ പ്രവൃത്തി പ്രത്യേകം പ്രശംസ നേടുകയും ചെയ്തിരുന്നു.
ഓണം മന്ത്രിയോടൊപ്പം ആഘോഷിക്കാൻ അവർ എത്തിയപ്പോൾ സ്നേഹ സമ്മാനമായി മന്ത്രി അവർക്ക് ഓണക്കോടിയും മധുരവും നൽകി.
ഭിന്നശേഷിക്കാരായ കുട്ടികളെ തൊഴിൽ പരിശീലനം നൽകി സ്വന്തം കാലിൽ നിൽക്കാൻ പ്രാപ്തരാക്കുന്ന പദ്ധതിയാണ് “എംപവർമെന്റ് ത്രൂ വൊക്കേഷണലൈസേഷൻ”. അതിലെ സർഗ്ഗാവിഷ്കാരമാണ് വിദ്യാർഥികളൊരുക്കിയ സുന്ദരങ്ങളായ കാർഡുകൾ.
വിദ്യാർഥികൾ മാവേലിയുടെയും വാമനന്റെയും വേഷത്തോടുകൂടിയാണ് മന്ത്രിയെ കാണാൻ എത്തിയത്. ഓണപ്പാട്ട് പാടിയും ഒത്തൊരുമയോടെ കളിച്ചും രസിച്ചും മന്ത്രി ആർ. ബിന്ദു അവരെ സ്വീകരിച്ചു.
നിപ്മർ ഡയറക്ടർ ചന്ദ്രബാബുവും അധ്യാപകരും കൂടെയുണ്ടായിരുന്നു.
Leave a Reply