ഇരിങ്ങാലക്കുട : വിദ്യാർഥികളും പൊലീസും തമ്മിലുള്ള സൗഹൃദപരമായ ആശയവിനിമയം ശക്തിപ്പെടുത്തുന്നതിനും യുവതലമുറ നേരിടുന്ന വിവിധ സാമൂഹിക പ്രശ്നങ്ങളെക്കുറിച്ച് തുറന്ന ചർച്ചകൾക്ക് വേദിയൊരുക്കുന്നതിനുമായി റൂറൽ പൊലീസ് നടപ്പാക്കുന്ന ‘കോഫി വിത്ത് ഡി.പി.സി. – ഇൻസ്പയറിംഗ് യങ് മൈൻഡ്സ്’ പരിപാടിയുടെ ഭാഗമായി ക്രൈസ്റ്റ് കോളെജിലെ വിദ്യാർഥികളുമായി റൂറൽ ജില്ലാ പൊലീസ് മേധാവി മുഹമ്മദ് നദീം നേരിട്ട് സംവദിച്ചു.
പരിപാടിയിൽ വിദ്യാർഥികൾക്ക് ജില്ലാ പൊലീസ് മേധാവിയുമായി സൗഹൃദാന്തരീക്ഷത്തിൽ നേരിട്ട് ആശയങ്ങൾ പങ്കുവയ്ക്കാനും ചോദ്യങ്ങൾ ചോദിക്കാനും തങ്ങളുടെ അഭിപ്രായങ്ങളും ആശങ്കകളും അവതരിപ്പിക്കാനും സാധിച്ചു.
പൊലീസ് ഉദ്യോഗസ്ഥരും വിദ്യാർഥികളും തമ്മിലുള്ള ആശയവിനിമയം കൂടുതൽ സൗഹൃദപരവും തുറന്നതുമാക്കുക എന്ന ലക്ഷ്യത്തോടെയാണ് ‘കോഫി വിത്ത് ഡി.പി.സി. – ഇൻസ്പയറിംഗ് യങ് മൈൻഡ്സ്’ എന്ന പരിപാടിക്ക് റൂറൽ ജില്ലയിൽ തുടക്കമിട്ടത്.
ഔപചാരികമായ ചോദ്യോത്തര രീതിക്ക് പകരം വിദ്യാർഥികളുടെ സ്വതന്ത്രമായ ഇടപെടലിനും അഭിപ്രായ പ്രകടനത്തിനും പ്രാധാന്യം നൽകിയാണ് പരിപാടി സംഘടിപ്പിച്ചത്.
യുവാക്കൾ നേരിടുന്ന സമകാലിക സാമൂഹിക പ്രശ്നങ്ങൾ പ്രധാനമായും ചർച്ച ചെയ്തു. പ്രത്യേകിച്ച് ലഹരിവസ്തുക്കളുടെ ഉപയോഗവും ലഹരിക്കെതിരായ യുവജനങ്ങളുടെ ഇടപെടലും വിശദമായി ചർച്ചയായി. ലഹരി ഉപയോഗത്തിന്റെ ദൂഷ്യഫലങ്ങൾ, യുവാക്കൾ ലഹരിയുടെ പിടിയിൽപ്പെടാതിരിക്കേണ്ടതിന്റെ ആവശ്യകത, ഇത്തരം സാഹചര്യങ്ങളിൽ സുഹൃത്തുക്കളുടെയും കുടുംബത്തിന്റെയും സമൂഹത്തിന്റെയും പിന്തുണയുടെ പ്രാധാന്യം എന്നിവ സംബന്ധിച്ച് സംവാദം നടന്നു.
ലഹരിക്കെതിരായ പ്രവർത്തനങ്ങളിൽ യുവാക്കൾക്ക് വഹിക്കാവുന്ന പ്രധാന പങ്കിനെക്കുറിച്ചും വിദ്യാർഥികളുമായി അദ്ദേഹം പങ്കുവച്ചു.
സൈബർ ലോകത്ത് വ്യക്തിഗത വിവരങ്ങൾ സംരക്ഷിക്കുന്നതിലും സംശയാസ്പദമായ ലിങ്കുകളും സന്ദേശങ്ങളും ഇടപാടുകളും ഒഴിവാക്കുന്നതിലും യുവാക്കൾ ജാഗ്രത പാലിക്കേണ്ടതിന്റെ ആവശ്യകതയും ചർച്ച ചെയ്തു. സൈബർ കുറ്റകൃത്യങ്ങൾ സംബന്ധിച്ച പരാതികൾ നൽകുന്നതിനുള്ള സംവിധാനങ്ങളെക്കുറിച്ചും വിദ്യാർഥികൾക്ക് അവബോധം നൽകുക എന്നതാണ് പരിപാടിയുടെ ലക്ഷ്യങ്ങളിലൊന്ന്.
വിദ്യാർഥികൾക്ക് ഏറെ പ്രസക്തമായ സൈബർ സുരക്ഷ, സൈബർ കുറ്റകൃത്യങ്ങൾ, ഓൺലൈൻ തട്ടിപ്പുകൾ, സോഷ്യൽ മീഡിയയുടെ ഉത്തരവാദിത്തപരമായ ഉപയോഗം, റോഡ് സുരക്ഷ, സ്ത്രീകളുടെയും കുട്ടികളുടെയും സുരക്ഷ, സോഷ്യൽ മീഡിയ ഉപയോഗവുമായി ബന്ധപ്പെട്ട ഉത്തരവാദിത്തങ്ങൾ, ഓൺലൈൻ തട്ടിപ്പുകൾക്കെതിരായ മുൻകരുതലുകൾ തുടങ്ങി യുവതലമുറയുമായി ബന്ധപ്പെട്ട വിവിധ വിഷയങ്ങളിലും ഭാവിയിൽ ഇത്തരം സംവാദങ്ങൾ കേന്ദ്രീകരിക്കും.
കെ.കെ. നിമിഷ, ഐ.എ. ശ്വേത, എം.എസ്. അനജ്, ഷാരോൺ ജോസ്, ഫിസ മറിയം, ആബേൽ സാജു, അശ്വന്ത് ബാബു, പ്രാർത്ഥന പ്രസാദ്, സി.എം. ദേവികൃഷ്ണ, സഫൽ മല്ലിക്, സജൽ മല്ലിക്, ജി.ആർ. രാം മോഹിത്, കെ.വി. കൃഷ്ണ, കെ.യു. നിരഞ്ജന, സാന്ദ്ര കെ.എസ്., അബിന ബിജു എന്നിവരടക്കമുള്ള വിദ്യാർഥികളാണ് പരിപാടിയിൽ പങ്കെടുത്തത്.
Leave a Reply