ഇരിങ്ങാലക്കുട : സി.ഐ.എസ്.സി.ഇ. സ്പോർട്സ് ആൻഡ് ഗെയിംസിന്റെ ഭാഗമായി സംഘടിപ്പിക്കുന്ന ദേശീയതല പെൺകുട്ടികളുടെ ടേബിൾ ടെന്നീസ് ചാമ്പ്യൻഷിപ്പിന് ഇരിങ്ങാലക്കുട ഡോൺ ബോസ്കോ സെൻട്രൽ സ്കൂൾ വേദിയായി.
സ്കൂൾ ഓഡിറ്റോറിയത്തിൽ നടന്ന ചാമ്പ്യൻഷിപ്പ് മന്ത്രി കെ.എ. തുളസി ഉദ്ഘാടനം ചെയ്തു.
വിദ്യാഭ്യാസത്തോടൊപ്പം വിദ്യാർഥികളുടെ സമഗ്ര വ്യക്തിത്വവികസനത്തിനും കായികരംഗത്തെ പ്രോത്സാഹിപ്പിക്കുന്നതിനും സി.ഐ.എസ്.സി.ഇ. നൽകുന്ന പ്രാധാന്യം അഭിനന്ദനാർഹമാണെന്നും ടേബിൾ ടെന്നീസ് പോലുള്ള മത്സരങ്ങളിലൂടെ കുട്ടികളിലെ കായികപ്രതിഭ വളർത്താനും ദേശീയതലത്തിൽ അവരുടെ കഴിവുകൾ പ്രകടിപ്പിക്കാനും ഇത്തരം ചാമ്പ്യൻഷിപ്പുകൾ മികച്ച വേദിയൊരുക്കുന്നുവെന്നും മന്ത്രി പറഞ്ഞു.
സി.ഐ.എസ്.സി.ഇ. കേരള റീജിയൻ സ്പോർട്സ് കോർഡിനേറ്ററും എ.എസ്.ഐ.എസ്.സി. കേരള റീജിയൻ സെക്രട്ടറിയുമായ റവ. ഫാ. ഷിനോ കളപ്പുരയ്ക്കൽ അനുമോദന പ്രസംഗം നടത്തി.
ഡോൺ ബോസ്കോ സ്കൂളുകളുടെ റെക്ടറും മാനേജരുമായ റവ. ഫാ. ഇമ്മാനുവൽ വട്ടക്കുന്നേൽ എസ്.ഡി.ബി. സ്വാഗതവും ഡോൺ ബോസ്കോ സെൻട്രൽ സ്കൂൾ പ്രിൻസിപ്പൽ റവ. ഫാ. ജിതിൻ മൈക്കിൾ നന്ദിയും പറഞ്ഞു.
സ്പിരിച്വൽ ആനിമേറ്റർ റവ. ഫാ. സെബാസ്റ്റ്യൻ ഒറ്റപ്ലാക്കൽ, അഡ്മിനിസ്ട്രേറ്റർ റവ. ഫാ. ഷിബു ഡേവിസ്, അന്താരാഷ്ട്ര അമ്പയർ എം.ടി. തോമസ്, പി.ടി.എ. പ്രസിഡന്റ് ശാരിക ശിവപ്രസാദ്, പൂർവ്വ വിദ്യാർഥി സംഘടന വൈസ് പ്രസിഡന്റ് അലക്സ് സുരേഷ്, ഡോൺ ബോസ്കോ സെൻട്രൽ സ്കൂൾ ടേബിൾ ടെന്നീസ് കോച്ച് സോമു ബാനർജി, സ്കൂൾ സ്പോർട്സ് കോർഡിനേറ്റർ ബിന്ദു ബാബു എന്നിവർ പങ്കെടുത്തു.
ആഗസ്റ്റ് 31 വരെ നടക്കുന്ന ഈ ചാമ്പ്യൻഷിപ്പിൽ
രാജ്യത്തിന്റെ വിവിധ റീജിയനുകളിൽ നിന്നുള്ള മികച്ച യുവ ടേബിൾ ടെന്നീസ് താരങ്ങൾ മത്സരിക്കും.
ആഗസ്റ്റ് 31ന് നടക്കുന്ന സമാപന ചടങ്ങിൽ ഇരിങ്ങാലക്കുട ആർടിഒ ഷിബു പോൾ മുഖ്യാതിഥിയാകും.
Leave a Reply