ഇരിങ്ങാലക്കുട : മന്ത്രി ഡോ. ആർ. ബിന്ദു ഇരിങ്ങാലക്കുട നിയോജകമണ്ഡലത്തിൽ നടപ്പിലാക്കുന്ന സ്നേഹക്കൂട് ഭവന നിർമ്മാണ പദ്ധതിയിലെ ഏഴാമത്തെ വീടിൻ്റെ നിർമ്മാണം എടക്കുളത്ത് ആരംഭിച്ചു.
ഇരിങ്ങാലക്കുട ക്രൈസ്റ്റ് കോളെജ് എൻ.എസ്.എസ്. യൂണിറ്റാണ് നിർമ്മാണപ്രവർത്തികൾക്ക് നേതൃത്വം നൽകുന്നത്.
സാങ്കേതിക കാരണങ്ങളാൽ സർക്കാരിന്റെ ഭവന പദ്ധതികളിൽ ഉൾപ്പെടാതെ പോയ ഭവനരഹിതരായ നിർധനർക്ക് വേണ്ടി നടപ്പിലാക്കുന്ന പദ്ധതിയാണ് സ്നേഹക്കൂട്. പദ്ധതിയിൽ ഉൾപ്പെടുത്തി അഞ്ച് വീടുകൾ ഗുണഭോക്താക്കൾക്ക് കൈമാറി. ആറാമത്തെ വീടിന്റെ നിർമ്മാണം ആളൂരിൽ അവസാനഘട്ടത്തിലാണ്.
എടക്കുളം സ്വദേശി കാളത്തുപറമ്പിൽ പ്രകാശനും കുടുംബത്തിനും നൽകുന്ന വീടിന്റെ നിർമ്മാണോദ്ഘാടനം മന്ത്രി ഡോ. ആർ. ബിന്ദു നിർവഹിച്ചു.
എൻ.എസ്.എസ്. യൂണിറ്റുകൾ, സന്നദ്ധ സംഘടനകൾ, പൊതുജനങ്ങൾ തുടങ്ങിയവരുടെയെല്ലാം സഹകരണത്തോടെയാണ് സ്നേഹക്കൂട് പദ്ധതി നടപ്പിലാക്കുന്നത്.
ചടങ്ങിൽ പൂമംഗലം പഞ്ചായത്ത് പ്രസിഡന്റ് കെ.എസ്. തമ്പി അധ്യക്ഷത വഹിച്ചു.
ക്രൈസ്റ്റ് കോളെജ് പ്രിൻസിപ്പൽ ഫാ. ജോളി ആൻഡ്രൂസ് മുഖ്യാതിഥിയായിരുന്നു.
കാലിക്കറ്റ് യൂണിവേഴ്സിറ്റി എൻ.എസ്.എസ്. കോർഡിനേറ്റർ ഡോ.എൻ. ഷിഹാബ്, പഞ്ചായത്ത് വൈസ് പ്രസിഡന്റ് കവിത സുരേഷ്, സി.പി. ശൈലനാഥൻ, കെ.വി. ജിനരാജദാസൻ, പി. ഗോപിനാഥ്, ക്രൈസ്റ്റ് കോളെജ് എൻ.എസ്.എസ്. പ്രോഗ്രാം ഓഫീസർ അനുഷ മാത്യു തുടങ്ങിയവർ പ്രസംഗിച്ചു.
Leave a Reply