ഇരിങ്ങാലക്കുട : കേരളത്തിൻ്റെ സമഗ്രവികസനത്തോടൊപ്പം നവോത്ഥാനമൂല്യങ്ങൾ ചോർന്നുപോകാതെ സംരക്ഷിക്കാൻ ശക്തമായ സാംസ്കാരിക ഇടപെടൽ അനിവാര്യമെന്ന് മുൻ മന്ത്രി വി.എസ്. സുനിൽകുമാർ പറഞ്ഞു.
ആർട്ടിസ്റ്റ് മോഹൻദാസിൻ്റെ ചിത്രകലാലോകത്തെ സുവർണ്ണജൂബിലിയും യുവകലാസാഹിതി കെ.ഒ. വിൻസെൻ്റ് മാസ്റ്റർ പുരസ്കാരദാന ചടങ്ങും ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം.
ചിത്രകാരന്മാരായ രാധാകൃഷ്ണൻ കിഴുത്താണി, മഹേശ്വർ, മുൻ നഗരസഭ കൗൺസിലർ എം.സി. രമണൻ, സന്തോഷ് കൂനൻ ആൻ്റണി, കെ.ഒ. വിൻസെൻ്റ് മാസ്റ്റർ എന്നിവർ വരച്ച ചിത്രങ്ങളുടെ പ്രദർശനം നടന്നു.
വിവിധ ഗായകർ പങ്കെടുത്ത ഗാനമേളയും പി.എൻ. സുനിലിൻ്റെ കവിതയും അരങ്ങേറി.
തുടർന്ന് യുവകലാസാഹിതി മണ്ഡലം ജോയിൻ്റ് സെക്രട്ടറി റഷീദ് കാറളം, ടി.എസ്. സജീവ്, സിൽവി രാധാകൃഷ്ണൻ എന്നവരുടെ കഥകളി അരങ്ങേറ്റവും നടന്നു.
തൊഴിലാളികൾ, സർക്കാർ ജീവനക്കാർ, കലാകാരന്മാർ, സാംസ്കാരിക പ്രവർത്തകർ, അഭിഭാഷകർ, ഡോക്ടർമാർ, എഞ്ചിനീയർമാർ, ജനപ്രതിനിധികൾ, കച്ചവടക്കാർ, പത്രപ്രവർത്തകർ തുടങ്ങി സമൂഹത്തിൻ്റെ നാനാമേഖലയിലുള്ളവർ മോഹൻദാസിനെ ഹാരമർപ്പിച്ച് ആദരിച്ചത് വ്യത്യസ്തമായ അനുഭവമായി.
യോഗത്തിൽ അഡ്വ. രാജേഷ് തമ്പാൻ അധ്യക്ഷത വഹിച്ചു.
സോമൻ താമരക്കുളം, കെ. ശ്രീകുമാർ, വി.പി. അജിത്കുമാർ, അഡ്വ. ഇ.ജെ. ബാബുരാജ്, മേരിവിജയം, ആർട്ടിസ്റ്റ് മോഹൻദാസ് എന്നിവർ പ്രസംഗിച്ചു.
