ഇരിങ്ങാലക്കുട : സെന്റ് ജോസഫ് കോളെജ് മലയാള വിഭാഗം അധ്യാപിക ലിറ്റി ചാക്കോ എഴുതി നാഷണൽ ബുക്ക് ട്രസ്റ്റ് ഇന്ത്യ പ്രസിദ്ധീകരിച്ച ”സംഗമഗ്രാമ മാധവൻ്റെ രണ്ടു കൃതികൾ” എന്ന പുസ്തകം ദില്ലി വേൾഡ് ബുക്ക് ഫെയറിൽ നടന്ന ചടങ്ങിൽ പ്രകാശനം ചെയ്തു.
കേന്ദ്രമന്ത്രി ധർമ്മേന്ദ്ര പ്രധാൻ, യു ജി സി ചെയർമാൻ പ്രൊഫ എം ജഗദേഷ് കുമാർ, ത്രിപുര ഗവർണർ എൻ ഇന്ദ്രസേന റെഡ്ഡി, ദേശീയ ഹയർ എഡ്യൂക്കേഷൻ സെക്രട്ടറി വിനീത് ജോഷി, ദേശീയ സ്കൂൾ വിദ്യാഭ്യാസ സെക്രട്ടറി സഞ്ജയ് കുമാർ, എൻ ബി ടി ചെയർമാൻ പ്രൊഫ മിളിന്ദ് സുധാകർ മറാത്തെ, എൻ ബി ടി ഡയറക്ടർ യുവരാജ് മാലിക് എന്നിവർ ചേർന്നാണ് പ്രകാശനകർമ്മം നിർവ്വഹിച്ചത്.
എൻ ഡി ആർ എഫ് അഥവാ വേൾഡ് ബുക്ക് ഫെയറിൻ്റെ പ്രൗഢമായ തീം പവലിയനിലായിരുന്നു പ്രകാശനം നടന്നത്.
ഭാരതത്തിൻ്റെ ശാസ്ത്ര പാരമ്പര്യത്തിന് നട്ടെല്ലു നിവർത്തി നിൽക്കാൻ കഴിയുന്ന സംഭാവനകൾ നൽകിയ വ്യക്തിത്വമാണ് സംഗമഗ്രാമ മാധവൻ എന്നും ഇത്തരം പഠനങ്ങൾ ഭാരതീയ ജ്ഞാന പരമ്പരയുടെ വീണ്ടെടുപ്പുകളാണെന്നും മന്ത്രി പറഞ്ഞു.
ഭാരതത്തിൽ താളിയോലകളിലും മറ്റും ഉൾക്കൊള്ളുന്ന ഇത്തരം അറിവുകളുടെ ആർക്കൈവൽ സംരക്ഷണത്തിനായി കേന്ദ്രസർക്കാർ ബജറ്റിൽ 60 കോടി രൂപ വകയിരുത്തിയിട്ടുള്ളതായും അദ്ദേഹം കൂട്ടിച്ചേർത്തു.
സംഗമഗ്രാമ മാധവനെ കുറിച്ചുള്ള പഠനവും മാധവൻ്റെ അപ്രകാശിതവും അലഭ്യവുമായിരുന്ന കൃതികളും ഉൾപ്പെടുത്തിയിട്ടുള്ളതാണ് ”സംഗമഗ്രാമ മാധവൻ്റെ രണ്ടു കൃതികൾ” എന്ന ലിറ്റി ചാക്കോയുടെ പുസ്തകം.
സംഗമഗ്രാമ മാധവനെ കുറിച്ച് കഴിഞ്ഞ രണ്ടു പതിറ്റാണ്ടോളം കാലത്തെ ഇവരുടെ ഗവേഷണത്തിൻ്റെ ഫലം കൂടിയാണിത്.
തികച്ചും അക്കാദമികമായി ഈ വിഷയത്തെ സമീപിക്കുന്നവർക്ക് ഉപകാരപ്രദമാണ് ഈ പുസ്തകം. പുസ്തകത്തിൻ്റെ ഇംഗ്ലീഷ് പതിപ്പ് ഉടൻ ലഭ്യമാകുമെന്ന് എൻ ബി ടി അറിയിച്ചു.
ലോകത്തിലെ തന്നെ ശ്രദ്ധേയമായ പുസ്തകോത്സവമായ എൻ ഡി ഡബ്ല്യു ബി എഫ് – ൻ്റെ വേദിയിൽ നടന്ന പ്രകാശനച്ചടങ്ങിൽ പങ്കെടുക്കാൻ കഴിഞ്ഞതിൽ സന്തോഷമുണ്ടെന്ന് പ്രിൻസിപ്പൽ ഡോ സിസ്റ്റർ ബ്ലെസി പറഞ്ഞു. കലാലയത്തിൽ നിന്നും സിസ്റ്റർ സങ്കീർത്തനയും ചടങ്ങിൽ പങ്കെടുത്തു.
കേരളീയ ഗണിത സരണിയുടെ മുഴുവനും പൈതൃകവും അനാവരണം ചെയ്യുന്ന പുതിയ പുസ്തകത്തിൻ്റെ പണിപ്പുരയിലാണ് ലിറ്റി ചാക്കോ.
40 രാജ്യങ്ങളിൽ നിന്നായി ആയിരത്തിലധികം പ്രസാധകരാണ് രണ്ടായിരത്തിലധികം സ്റ്റാളുകളിലായി എൻ ബി ടി നേതൃത്വം നൽകുന്ന വിശ്വ പുസ്തകമേളയിൽ പങ്കെടുക്കുന്നത്.
