ഇരിങ്ങാലക്കുട : കേരള ടാക്സ് പ്രാക്ടീഷണേഴ്സ് അസോസിയേഷൻ ട്രേഡ് യൂണിയൻ സംഘടന സാമൂഹിക പ്രതിബദ്ധതയുടെ ഭാഗമായി “പരിസരം നിർമ്മലം” എന്ന നവീന ആശയത്തിന് തുടക്കം കുറിക്കുകയാണെന്ന് ഭാരവാഹികൾ പത്രസമ്മേളനത്തിൽ അറിയിച്ചു.
കേരളത്തിലുടനീളമുള്ള ഓരോ ടാക്സ് പ്രാക്ടീഷണർമാരും അവരുടെ വീടിനോട് ചേർന്നുള്ള നടപ്പാതകളും റോഡരികും വൃത്തിയാക്കി സൂക്ഷിച്ചുകൊണ്ട് മറ്റുള്ളവർക്കും സമൂഹത്തിനും മാതൃകയാവുകയാണ് “പരിസരം നിർമ്മലം” പദ്ധതിയുടെ ലക്ഷ്യം.
വീടിനുമുന്നിൽ ചപ്പുചവറുകളോ കാടോ വളരാതെ സൂക്ഷിക്കുന്നത് കാൽനടയാത്രക്കാർക്കും റോഡിലൂടെ പോകുന്ന വാഹനങ്ങൾക്കും ഏറെ ഉപകാരപ്രദമാകും.
കേരള ടാക്സ് പ്രാക്ടീഷണേഴ്സ് അസോസിയേഷൻ ഇരിങ്ങാലക്കുട മേഖലയുടെ നേതൃത്വത്തിൽ ജനുവരി 1ന് ക്രൈസ്റ്റ് വിദ്യാനികേതൻ പരിസരത്തുള്ള സംസ്ഥാന നിർവാഹക സമിതി അംഗം ഫ്രാൻസൺ മൈക്കിളിന്റെ വസതിയുടെ പരിസരവും റോഡും വൃത്തിയാക്കിയാണ് പദ്ധതിക്ക് തുടക്കം കുറിക്കുന്നത്.
വൈകീട്ട് 4.30ന് നടക്കുന്ന ചടങ്ങിൽ കൗൺസിലർ വി.എസ്. അശ്വതി പദ്ധതിയുടെ ഉദ്ഘാടനം നിർവഹിക്കും.
സംസ്ഥാന സമിതി അംഗം ഫ്രാൻസൺ മൈക്കിൾ, മേഖല പ്രസിഡൻ്റ് കെ.ആർ. മുരളീധരൻ എന്നിവർ പത്രസമ്മേളനത്തിൽ പങ്കെടുത്തു.
