കതിർപ്പിള്ളി കുളം നവീകരണത്തിന് തുടക്കമായി

ഇരിങ്ങാലക്കുട : മുരിയാട് പഞ്ചായത്തിലെ ഊരകം വെസ്റ്റ് 11-ാം വാർഡിൽ പെട്ട കതിർപ്പിള്ളി
കുളം നവീകരണത്തിൻ്റെ പാതയിലേക്ക് .

37 വർഷങ്ങൾക്കു ശേഷമാണ് കതിർപ്പിള്ളി കുളം നവീകരിക്കുന്നത്. സർവ്വേ നടപടികൾ പൂർത്തീകരിച്ച് കുളം വൃത്തിയാക്കി കുളത്തിന് ചുറ്റും കരിങ്കൽ ഭിത്തികൾ ഉയർത്തി ആവശ്യമായ ലൈറ്റിങ്ങും നടപ്പാതയും റാംപും അടക്കമുള്ള പ്രവർത്തികളാണ് നവീകരണ പ്രവർത്തനത്തിൽ ഉൾപ്പെടുത്തിയിട്ടുള്ളത് .

ആദ്യഘട്ടത്തിൽ കുളത്തിനു ചുറ്റും കരിങ്കൽ ഭിത്തി കെട്ടി ഉയർത്തും. പിന്നീട് കുളം വൃത്തിയാക്കി റാംപ് നിർമ്മിക്കും.

രണ്ടാം ഘട്ടത്തിൽ പാത്ത് വേയും ലൈറ്റിങ്ങും അടക്കമുള്ള പ്രവർത്തനങ്ങൾ നടക്കും. നഗര സഞ്ചയിക പദ്ധതിയിൽ ഉൾപ്പെടുത്തിയാണ്
കുളം നവീകരിക്കുന്നത്.

നവീകരണ പ്രവർത്തനങ്ങളുടെ നിർമ്മാണ ഉൽഘാടനം പഞ്ചായത്ത് പ്രസിഡന്റ് ജോസ്.
ജെ. ചിറ്റിലപ്പിള്ളി നിർവ്വഹിച്ചു.

പുല്ലൂർ സർവ്വീസ് സഹകരണ ബാങ്ക് ഡയറക്ടർ ബോർഡ് മെമ്പർമാരായ ബാബു ചുക്കത്ത്, റിജു പോട്ടക്കാരൻ, പി ടി ജോയ്, ബെന്നി കാരേപറമ്പിൽ, ജേക്കബ്ബ് പട്ടത്ത്, രാജൻ തുടങ്ങിയവർ ചടങ്ങിൽ പങ്കെടുത്തു.

അസി. എഞ്ചിനിയർ സിമി സെബാസ്റ്റ്യൻ പദ്ധതി വിശദീകരിച്ചു.

68 നാൾ പിന്നിട്ട് ഇരിങ്ങാലക്കുട റെയിൽവേ സ്റ്റേഷൻ വികസനസമരം

ഇരിങ്ങാലക്കുട : കല്ലേറ്റുംകരയിലെ ഇരിങ്ങാലക്കുട റെയിൽവേ സ്റ്റേഷനോട് മൂന്നര പതിറ്റാണ്ടായി തുടരുന്ന അവഗണനയിൽ പ്രതിഷേധിച്ച് റെയിൽവേ സ്റ്റേഷൻ വികസന സമിതിയുടെ നേതൃത്വത്തിൽ ആരംഭിച്ച അനിശ്ചിതകാല സമരം 68 നാളുകൾ പിന്നിട്ടു.

68-ാം നാൾ നടന്ന സമരാഗ്നി ജ്വലനം പാസഞ്ചേഴ്സ് അസോസിയേഷൻ പ്രസിഡന്റ്‌ കെ.കെ. ബാബു ഉദ്ഘാടനം ചെയ്തു.

ഡേവിസ് തുളുവത്ത് അധ്യക്ഷനായി.

കെ.എഫ്. ജോസ് സമരസന്ദേശം നൽകി.

ഉണ്ണികൃഷ്ണൻ പുതുവീട്ടിൽ സ്വാഗതവും ഡേവിസ് ഇടപ്പിള്ളി നന്ദിയും പറഞ്ഞു.

വർഗ്ഗീസ് പന്തല്ലൂക്കാരൻ, സോമൻ ശാരദാലയം, കെ.വി. സുരേഷ് കൈതയിൽ, ജോസ് കുഴിവേലി, കുമാരൻ കൊട്ടാരത്തിൽ,
ജോയ് മാളിയേക്കൽ, എം.കെ. നസീർ,
പി.എം. സുൽത്താൻ എന്നിവർ നേതൃത്വം നൽകി.

“വേനൽക്കളിമ്പം” സാഹിത്യ പരിപാടി സമാപിച്ചു

ഇരിങ്ങാലക്കുട : എസ്.എൻ. പബ്ലിക് ലൈബ്രറിയിൽ ബാലവേദിയുടെ ആഭിമുഖ്യത്തിൽ 8 ആഴ്ചയിലായി നടന്നു കൊണ്ടിരുന്ന “വേനൽക്കളിമ്പം” സാഹിത്യ പരിപാടിയുടെ സമാപനം എസ്.എൻ. ചന്ദ്രിക എഡ്യുക്കേഷണൽ ട്രസ്റ്റ് ചെയർമാൻ ഡോ. സി.കെ. രവി ഉദ്ഘാടനം ചെയ്തു.

ലൈബ്രറി സെക്രട്ടറി പി.കെ. ഭരതൻ മാസ്റ്റർ അധ്യക്ഷത വഹിച്ചു.

കുട്ടികൾ വായിച്ച പുസ്തകങ്ങളുടെ അവതരണവും ചർച്ചയും നടന്നു.

കുട്ടികൾ വായിച്ചിരിക്കേണ്ട പുസ്തകങ്ങൾ തദവസരത്തിൽ പരിചയപ്പെടുത്തി.

യു.എസ്.എസ്. സ്കോളർഷിപ്പ് നേടിയ എസ്.എൻ. ഹൈസ്കൂൾ വിദ്യാർഥിനി ടി.എസ്. വേദയെ ചടങ്ങിൽ അഭിനന്ദിച്ചു.

ശ്രീനാരായണ ഗുരുവിൻ്റെ “പിണ്ഡനന്ദി” എന്ന കവിതയുടെ ആലാപനവും ആസ്വാദനവും പി.ആർ. രാജഗോപാൽ അവതരിപ്പിച്ചു.

എസ്.എൻ ഹയർ സെക്കൻഡറി സ്കൂൾ പ്രിൻസിപ്പൽ കെ.സി. അജിത, എസ്.എൻ. ഹൈസ്കൂൾ ഹെഡ്മിസ്ട്രസ്സ് പി.എം. അജിത, ടി.ഒ. ബീന, ഇ.എം. ഷീന, പി.ആർ. രചന, കെ.കെ. മഞ്ജുള, പി.കെ. അജയഘോഷ്, ധന്യ കെ. ഭരതൻ എന്നിവർ പ്രസംഗിച്ചു.

നിര്യാതനായി

വർഗീസ്

ഇരിങ്ങാലക്കുട : പുല്ലൂർ ഐനിക്കൽ കുഞ്ഞുവറീത് മകൻ വർഗീസ് (78) നിര്യാതനായി.

സംസ്കാരകർമ്മങ്ങൾ ഇന്ന് (വ്യാഴാഴ്ച) വൈകീട്ട് 4.30 ന് പുല്ലൂർ സെന്റ് സേവിയേഴ്സ് ദേവാലയ സെമിത്തേരിയിൽ.

ഭാര്യ : ആനി വർഗീസ്

മക്കൾ : നിമ്മി, സിമ്മി, ലിമ്മി, ലീന

മരുമക്കൾ : ജോസ്, ബാബു, ജോയ്, പോൾ

പുളിക്കലച്ചിറ പാലം നിർമ്മാണത്തിലെ അപാകത പരിഹരിക്കാൻ അധികൃതർക്ക് നിർദ്ദേശം നൽകി : മന്ത്രി ഡോ. ആർ. ബിന്ദു

ഇരിങ്ങാലക്കുട : നിർമ്മാണം നടക്കുന്ന പുളിക്കലച്ചിറ പാലത്തിൽ പൊതുമരാമത്ത് ഉദ്യോഗസ്ഥർ നടത്തിയ പരിശോധനയിൽ അപാകതകൾ കണ്ടെത്തിയ സാഹചര്യത്തിൽ അവ പരിഹരിച്ച് പുനർനിർമാണം ആരംഭിക്കാൻ ഉദ്യോഗസ്ഥർക്ക് കർശന നിർദേശം നൽകിയതായി മന്ത്രി ഡോ. ആർ. ബിന്ദു അറിയിച്ചു.

നിർമ്മാണം നടന്നുവരുന്ന പൈൽ കാപ്പിന്റെ കോൺക്രീറ്റ് പരിശോധനയിലാണ് അപാകതകൾ കണ്ടെത്തിയത്. ഉടൻതന്നെ പൊതുമരാമത്ത് വകുപ്പ് ഉദ്യോഗസ്ഥരും ജനപ്രതിനിധികളും അടങ്ങുന്ന യോഗം വിളിച്ചുചേർത്ത് സ്ഥിതിഗതികൾ വിലയിരുത്തി. അപാകതകൾ കണ്ടെത്തിയ ഭാഗം പൊളിച്ചുമാറ്റി പുനർ നിർമ്മിക്കുന്നതിനും നിർദ്ദേശം നൽകി.

അപ്രകാരം ചെയ്യാത്ത പക്ഷം കരാറുകാരനെതിരെ നടപടി സ്വീകരിക്കുന്നതിനും പൊതുമരാമത്ത് വകുപ്പിന് നിർദ്ദേശം നൽകി.

ഇതോടൊപ്പം നാലമ്പല തീർത്ഥാടന കാലത്ത് ഭക്തജനങ്ങൾക്ക് യാത്രയ്ക്ക് അസൗകര്യം ഉണ്ടാകാതിരിക്കുന്നതിന് വേണ്ടി ബദൽ യാത്രാ മാർഗം ഉറപ്പാക്കുന്നതിനും നടപടികൾ സ്വീകരിച്ചിട്ടുണ്ട്.

ഇതിനായി നിലവിലുള്ള സമാന്തര പാലം കൂടുതൽ ശക്തിപ്പെടുത്തുന്നതിന് നടപടികൾ സ്വീകരിക്കും.

പൊതുമരാമത്ത് വകുപ്പിലെ ഉന്നതല ഉദ്യോഗസ്ഥർ സ്ഥലം സന്ദർശിച്ച്
പ്രാരംഭ നടപടികൾ ആരംഭിച്ചതായും മന്ത്രി അറിയിച്ചു.

നിര്യാതയായി

വള്ളിയമ്മ

ഇരിങ്ങാലക്കുട : മുരിയാട് പഞ്ചായത്ത് 14-ാം വാർഡ് പുല്ലൂർ ചെർപ്പുക്കുന്ന് വെള്ളാരംകണ്ണിൽ വീട്ടിൽ വിജയൻ്റെ ഭാര്യ വള്ളിയമ്മ (67) നിര്യാതയായി. കെട്ടിട നിർമ്മാണ തൊഴിലാളി യുണിയൻ അംഗമാണ്.

സംസ്കാരം വ്യാഴാഴ്ച്ച രാവിലെ 11 മണിക്ക് മുക്തിസ്ഥാനിൽ.

മക്കൾ : വി വി പ്രേംകുമാർ, വി വി സുധികുമാര്‍. (സി.പി.ഐ. (എം) പുല്ലൂർ ബ്രാഞ്ച് അംഗങ്ങൾ)

അതിഥി അധ്യാപക ഒഴിവ്

ഇരിങ്ങാലക്കുട : അവിട്ടത്തൂർ ലാൽ ബഹാദൂർ ശാസ്ത്രി മെമ്മോറിയൽ ഹയർ സെക്കണ്ടറി സ്കൂളിൽ സൈക്കോളജി തസ്തിക എച്ച്.എസ്.എസ്.ടി. ജൂനിയർ താൽക്കാലിക ഒഴിവുണ്ട്.

യോഗ്യതയുള്ളവർ മെയ് 24 ശനിയാഴ്ച ഉച്ചതിരിഞ്ഞ് 3 മണിക്ക് അസ്സൽ രേഖകൾ സഹിതം നേരിട്ട് ഹാജരാകേണ്ടതാണെന്ന് പ്രിൻസിപ്പൽ അറിയിച്ചു.

കൂടുതൽ വിവരങ്ങൾക്ക് 9446023878 എന്ന നമ്പറിൽ ബന്ധപ്പെടാവുന്നതാണ്.

രാജീവ്ഗാന്ധി രക്തസാക്ഷിത്വ ദിനം ആചരിച്ച് മുരിയാട് മണ്ഡലം കോൺഗ്രസ്

ഇരിങ്ങാലക്കുട : മുൻ പ്രധാനമന്ത്രി രാജീവ്ഗാന്ധിയുടെ രക്തസാക്ഷിത്വ ദിനം മുരിയാട് മണ്ഡലത്തിൽ വിവിധ വാർഡ് കോൺഗ്രസ് കമ്മിറ്റികളുടെ നേതൃത്വത്തിൽ സമുചിതമായി ആചരിച്ചു.

വേഴേക്കാട്ടുകര സെൻ്ററിൽ നടന്ന അനുസ്മരണ സമ്മേളനം മണ്ഡലം കോൺഗ്രസ് പ്രസിഡന്റ് സാജു പാറേക്കാടൻ ഉദ്ഘാടനം ചെയ്തു.

വാർഡ് പ്രസിഡന്റ് കെ. ഗോപിനാഥ് നായർ അധ്യക്ഷത വഹിച്ചു.

ബ്ലോക്ക് സെക്രട്ടറി വിബിൻ വെള്ളയത്ത്, മഹിളാ കോൺഗ്രസ് ബ്ലോക്ക് പ്രസിഡന്റ് മോളി ജേക്കബ്, യൂത്ത് കോൺഗ്രസ് മണ്ഡലം പ്രസിഡന്റ് ജസ്റ്റിൻ ജോർജ്ജ്, നിയോജകമണ്ഡലം ജനറൽ സെക്രട്ടറി എബിൻ ജോൺ, മഹിളാ കോൺഗ്രസ് മണ്ഡലം, പ്രസിഡന്റ് തുഷം സൈമൺ, പഞ്ചായത്ത് അംഗങ്ങളായ നിത അർജുനൻ, ജിനി സതീശൻ, വാർഡ് പ്രസിഡൻ്റുമാരായ മുരളി തറയിൽ, ബേബി കൂനൻ, പി.വി. പ്രദീഷ്, നേതാക്കളായ ഫിജിൽ ജോൺ, വി.കെ. മണി, പ്രേമൻ കൂട്ടാല, ടി.ആർ. ദിനേശ്, വി.കെ. സുധീർ, വിലാസൻ തുമ്പരത്തി എന്നിവർ നേതൃത്വം നൽകി.

ബിജെപി തൃശൂർ സൗത്ത് ജില്ല നേതൃശില്പശാല നടത്തി

ഇരിങ്ങാലക്കുട : ബി.ജെ.പി. തൃശൂർ സൗത്ത് ജില്ല നേതൃ ശില്പശാല ആല ഗുരുദേവ ഹാളിൽ സംഘടിപ്പിച്ചു.

റവന്യൂ ജില്ല -ഇൻ-ചാർജ്ജ് പി.വി. ഗോപകുമാർ ഉദ്ഘാടനം ചെയ്തു.

പ്രസിഡന്റ് എ.ആർ. ശ്രീകുമാർ അധ്യക്ഷത വഹിച്ചു.

ജില്ലാ ജനറൽ സെക്രട്ടറിമാരായ കൃപേഷ് ചെമ്മണ്ട, കെ.പി. ഉണ്ണികൃഷ്ണൻ, കെ.പി. ജോർജ്ജ്, സംസ്ഥാന സമിതിയംഗം സന്തോഷ് ചെറാക്കുളം എന്നിവർ പ്രസംഗിച്ചു.

തുടർന്ന് വിവിധ വിഷയങ്ങളെ കുറിച്ച് ക്ലാസ്സുകൾ നടന്നു.

സംഗമേശ്വര റസിഡൻ്റ്സ് അസോസിയേഷൻ വാർഷിക പൊതുയോഗം നടത്തി

ഇരിങ്ങാലക്കുട : സംഗമേശ്വര റസിഡൻ്റ്സ് അസോസിയേഷന്റെ 21-ാമത് വാർഷിക പൊതുയോഗം നടത്തി.

ഹരികുമാർ തളിയക്കാട്ടിൽ (പ്രസിഡന്റ്), മണി ആന്തമ്പിള്ളി (സെക്രട്ടറി), ശിവദാസൻ നായർ (ട്രഷറർ) എന്നിവരെ പുതിയ ഭാരവാഹികളായി തിരഞ്ഞെടുത്തു.

നമ്പൂതിരീസ് കോളെജിൽ നടന്ന ചടങ്ങിൽ മുൻ പ്രസിഡന്റ് സേതുമാധവൻ നമ്പ്യാർ അധ്യക്ഷത വഹിച്ചു.

സെക്രട്ടറി മണി ആന്തമ്പിള്ളി പ്രവർത്തന റിപ്പോർട്ടും ട്രഷറർ ജയശങ്കർ പായ്ക്കാട്ട് വരവ് – ചെലവ് കണക്കുകളും അവതരിപ്പിച്ചു.

ഹരികുമാർ തളിയക്കാട്ടിൽ സ്വാഗതവും ശിവദാസൻ നായർ നന്ദിയും പറഞ്ഞു.