ഇരിങ്ങാലക്കുട : കൂടൽമാണിക്യം ദേവസ്വത്തിൻ്റെ ആഭിമുഖ്യത്തിൽ ക്ഷേത്രത്തിലെ കൂത്തമ്പലത്തിൽ വച്ച് വർഷം തോറും നടത്തിവരുന്ന കൂടിയാട്ട മഹോത്സവം ആഗസ്റ്റ് 1 വെള്ളിയാഴ്ച മുതൽ ആഗസ്റ്റ് 4 തിങ്കളാഴ്ച വരെ നടത്തുമെന്ന് അഡ്മിനിസ്ട്രേറ്റർ അറിയിച്ചു.
ഇത്തവണ വിശ്വപ്രസിദ്ധ സംസ്കൃത കവിയായ ഭാസനാൽ വിരചിതമാണെന്ന് കണക്കാക്കപ്പെടുന്ന അഭിഷേക നാടകത്തിലെ രണ്ടാമങ്കമായ ഹനുമദ്ദൂതാങ്കം കൂടിയാട്ടം നിർവഹണസഹിതം കൂത്തമ്പലത്തിൽ അവതരിപ്പിക്കും.
നാട്യ കലാനിധി പത്മഭൂഷൻ ഡോ. അമ്മന്നൂർ മാധവ ചാക്യാരാണ് ഈ കൂടിയാട്ടം ചിട്ടപ്പെടുത്തി സംവിധാനം ചെയ്ത് രംഗത്ത് അവതരിപ്പിച്ചത്.
പാരമ്പര്യ അവകാശികളായ അമ്മന്നൂർ കുടുംബത്തിലെ ഗുരു അമ്മന്നൂർ കുട്ടൻ ചാക്യാരുടെ നേതൃത്വത്തിലാണ് കൂടിയാട്ടം കൂത്തമ്പലത്തിൽ അരങ്ങേറുക.
നാല് ദിവസങ്ങളിലായി ഹനുമാന്റെ പുറപ്പാട്, ഹനുമാന്റെ നിർവഹണം, കൂടിയാട്ടം ഒന്നാം ദിവസം അഴകിയ രാവണന്റെ പ്രവേശനം, കൂടിയാട്ടം രണ്ടാം ദിവസം സീത ഹനുമദ്ദർശനം അംഗുലീയകപ്രദാനം എന്നിങ്ങനെ അരങ്ങേറും.
Leave a Reply