ഇരിങ്ങാലക്കുട : 2024ലെ മുണ്ടക്കൈ, ചൂരൽമല മേഖലകളിലും താമരശ്ശേരി വിലങ്ങാട് മേഖലയിലും അതീവനാശം വിതച്ച ഉരുൾപൊട്ടലിൽ ഭവനങ്ങൾ നഷ്ടപ്പെട്ടവർക്ക് കെ.സി.ബി.സി.യുടെയും താമരശ്ശേരി രൂപതയുടെയും സഹകരണത്തോടെ ഇരിങ്ങാലക്കുട രൂപത നിർമ്മിച്ചു നൽകുന്ന 10 സാന്ത്വനഭവനങ്ങളിൽ 6 എണ്ണത്തിന്റെ ആശീർവാദ കർമ്മം ഇരിങ്ങാലക്കുട രൂപതയുടെ അധ്യക്ഷൻ ബിഷപ്പ് മാർ പോളി കണ്ണൂക്കാടനും താമരശ്ശേരി രൂപതാധ്യക്ഷൻ ബിഷപ്പ് മാർ റെമിജിയോസ് ഇഞ്ചനാനിയിലും ചേർന്ന് നിരവധി വൈദികരുടെയും അത്മായരുടെയും സാന്നിധ്യത്തിൽ നിർവഹിച്ചു.
ഇരിങ്ങാലക്കുട രൂപതയിലെ 141 ഇടവകകളും എല്ലാ സ്ഥാപനങ്ങളും ഒരുമിച്ചു കൈകോർത്തപ്പോൾ സമാഹരിച്ച ഒരു കോടി 25 ലക്ഷം രൂപയാണ് ഭവന നിർമ്മാണത്തിനായി ഉപയോഗപ്പെടുത്തിയത്.
കേരളത്തിലെ കത്തോലിക്കാ മെത്രാൻ സമിതിയുടെ സാമൂഹ്യ സേവന വിഭാഗം നിർമിച്ചു നൽകുന്ന 140 ഭവനങ്ങളിൽ 10 ഭവനങ്ങളാണ് ഇരിങ്ങാലക്കുട രൂപത സോഷ്യൽ ഫോറത്തിന്റെ നേതൃത്വത്തിൽ നിർമിച്ചു നൽകുന്നത്.
സോഷ്യൽ ഫോറം ഡയറക്ടർ ഫാ. തോമസ് നട്ടേക്കാടൻ, അസിസ്റ്റൻ്റ് ഡയറക്ടർ ഫാ. സാബു പയ്യപ്പിള്ളി എന്നിവരുടെ നേത്യത്വത്തിലുള്ള ഒരു വലിയ ടീം ആണ് എല്ലാ പ്രവർത്തനങ്ങൾക്കും ചുക്കാൻ പിടിച്ചത്.
Leave a Reply