IRINJALAKUDA TIMES
ഇരിങ്ങാലക്കുട : 36-ാമത് ഇരിങ്ങാലക്കുട ഉപജില്ലാ കലോത്സവത്തിൽ എൽ.പി. വിഭാഗത്തിൽ 65 പോയിൻ്റോടെ ഫസ്റ്റ് ഓവറോൾ ചാമ്പ്യൻഷിപ്പ് കരസ്ഥമാക്കി കാറളം എ.എൽ.പി. സ്കൂൾ.
45 പോയിൻ്റോടെ അറബി ഫെസ്റ്റിലും ഓവറോൾ ചാമ്പ്യൻഷിപ്പ് കരസ്ഥമാക്കിയിട്ടുണ്ട് കാറളം എ.എൽ.പി. സ്കൂൾ.
ഇരിങ്ങാലക്കുട : മേരയുവ ഭാരത് തൃശൂരും ഇരിങ്ങാലക്കുട വിസ്ഡം ക്ലബ്ബും സംയുക്തമായി ക്രൈസ്റ്റ് കോളെജ് ഗ്രൗണ്ടിൽ സംഘടിപ്പിച്ച ഇരിങ്ങാലക്കുട, കൊടകര, ചാലക്കുടി ബ്ലോക്ക്തല കായിക മേള കോളെജ് മാനേജർ ഫാ. ജോയ് പീണിക്കപറമ്പിൽ ഉദ്ഘാടനം ചെയ്തു .
മേരയുവ ഭാരത് തൃശൂർ യൂത്ത് കോർഡിനേറ്റർ സി. ബിൻസി അധ്യക്ഷത വഹിച്ചു.
വാർഡ് കൗൺസിലർ ബിജുപോൾ അക്കരക്കാരൻ, രക്ഷാധികാരി വിക്ടറി തൊഴുത്തുംപറമ്പിൽ, പി. ഭരത്കുമാർ, ടി.വൈ. വാസിൽ എന്നിവർ ആശംസകൾ അർപ്പിച്ചു.
പ്രസിഡൻ്റ് വേണു തോട്ടുങ്ങൽ സ്വാഗതവും കൺവീനർ ഫിൻ്റോ പോൾസൺ നന്ദിയും പറഞ്ഞു.
തുടർന്ന് സെവൻസ് ഫുട്ബോൾ മത്സരങ്ങളും, വോളിബോൾ മാത്സരങ്ങളും, വടംവലി മത്സരങ്ങളും, 100 മീറ്റർ, 200 മീറ്റർ ഓട്ട മത്സരങ്ങളും, ഷട്ടിൽ ബാഡ്മിൻ്റൺ (സിംഗിൾസ്) മത്സരങ്ങളും വിവിധ വേദികളിൽ നടന്നു.
അനവധി ക്ലബ്ബുകൾ മത്സരങ്ങളിൽ പങ്കെടുത്തു.
വിജയികൾക്കുള്ള സമ്മാനദാനം ജൂനിയർ ഇന്നസെൻ്റ് നിർവഹിച്ചു.
ചടങ്ങിൽ പ്രസിഡൻ്റ് വേണു തോട്ടുങ്ങൽ അധ്യക്ഷത വഹിച്ചു.
കൺവീനർ പി. ഭരത് കുമാർ സ്വാഗതവും സെക്രട്ടറി ജിനേഷ് തൃത്താണി നന്ദിയും പറഞ്ഞു.
ഇരിങ്ങാലക്കുട : മെഡിസെപ്പ് പ്രീമിയത്തിൽ വരുത്തിയ വർധനവ് പിൻവലിക്കണമെന്ന് കേരള സ്റ്റേറ്റ് സർവ്വീസ് പെൻഷനേഴ്സ് അസോസിയേഷൻ ഇരിങ്ങാലക്കുട മണ്ഡലം സമ്മേളനം സർക്കാരിനോട് ആവശ്യപ്പെട്ടു.
പുതിയ ശമ്പള കമ്മീഷനെ ഉടൻ നിയമിക്കണമെന്നും യോഗം ആവശ്യപ്പെട്ടു.
ജില്ലാ ജോയിൻ്റ് സെക്രട്ടറി കെ.ബി. ശ്രീധരൻ സമ്മേളനം ഉദ്ഘാടനം ചെയ്തു.
മണ്ഡലം പ്രസിഡൻ്റ് ടി.കെ. ബഷീർ അധ്യക്ഷത വഹിച്ചു.
സംസ്ഥാന കൗൺസിൽ അംഗം എം. മുർഷിദ്, ജില്ലാ കമ്മിറ്റി അംഗം എ.സി. സുരേഷ്, നിയോജക മണ്ഡലം പ്രസിഡൻ്റ് കെ. കമലം, സെക്രട്ടറി വി.കെ. മണി , കോൺഗ്രസ് മണ്ഡലം പ്രസിഡൻ്റ് സി.എസ്. അബ്ദുൾ ഹഖ്, കെ. വേണുഗോപാൽ, സി.ജെ. ജോയ്, കെ. ഇന്ദിരാദേവി, ശശികല എന്നിവർ പ്രസംഗിച്ചു.
ഷൈലജ ബീഗം (പ്രസിഡൻ്റ്), പി. ഉണ്ണികൃഷ്ണൻ (സെക്രട്ടറി), വിജയലക്ഷമി (ട്രഷറർ) എന്നിവരെ പുതിയ ഭാരവാഹികളായി തെരഞ്ഞെടുത്തു.
ഇരിങ്ങാലക്കുട : നഗരസഭ 34-ാം വാർഡിൽ നിർമ്മാണത്തിലിരിക്കുന്ന പാറപ്പുറം സാംസ്കാരിക നിലയം നിർമ്മിക്കാൻ 2020ൽ 14,90,000 രൂപയും പട്ടികജാതി വികസന ഫണ്ടിൽ നിന്ന് നഗരസഭ വച്ച പ്രോജക്റ്റ് പ്രകാരം 2022ൽ 4 ലക്ഷം രൂപയും,
2023ൽ 10 ലക്ഷം രൂപയും, ഇലക്ട്രിക് വർക്കിന് 60000 രൂപയും ഫണ്ട് അനുവദിച്ചിട്ടും പല മുടന്തൻ ന്യായങ്ങളും പറഞ്ഞ് നഗരസഭ ഭരണപക്ഷവും ഉദ്യോഗസ്ഥരും ഉദ്ഘാടന ചടങ്ങ് നീട്ടിക്കൊണ്ടു പോകുന്നതിൽ പ്രതിഷേധിച്ച് പ്രതീകാത്മക ഉദ്ഘാടനം നടത്തി ബിജെപി.
വാർഡ് കൗൺസിലർ വിജയകുമാരി അനിലനാണ് പ്രതീകാത്മക ഉദ്ഘാടനം നിർവ്വഹിച്ചത്.
കൗൺസിലർ രേഖാമൂലം പരാതി നൽകിയിട്ടും നഗരസഭ അധികാരികൾ സാംസ്കാരിക നിലയത്തിന് കെട്ടിട നമ്പറും വൈദ്യുതിയും വെള്ളവും അനുവദിച്ചു തന്നില്ല. നഗരസഭയുടെ ഈ അനാസ്ഥ പട്ടികജാതി വിഭാഗങ്ങളോടുള്ള കനത്ത വെല്ലുവിളിയാണെന്ന് ബിജെപി കുറ്റപ്പെടുത്തി.
ഉദ്ഘാടനവേളയിൽ സൗത്ത് ജില്ലാ ജനറൽ സെക്രട്ടറി കെ.പി. ഉണ്ണികൃഷ്ണൻ,
പൊറത്തിശ്ശേരി ഏരിയ പ്രസിഡൻ്റ് സൂരജ് കടുങ്ങാടൻ, മഹിള മോർച്ച ജില്ലാ ജനറൽ സെക്രട്ടറി സിന്ധു സതീഷ് എന്നിവർ ആശംസകൾ നേർന്നു.
വാർഡ് കൺവീനർ വിപിൻ രാജ് സ്വാഗതവും സുനിൽ കമലദളം നന്ദിയും പറഞ്ഞു.
ജില്ലാ സെക്രട്ടറിമാരായ അഖിലാഷ് വിശ്വനാഥൻ, അജീഷ് പൈക്കാട്ട്, മണ്ഡലം ജനറൽ സെക്രട്ടറി വി.സി. രമേഷ്, കൗൺസിലർമാരായ അമ്പിളി ജയൻ, സ്മിത കൃഷ്ണകുമാർ, മണ്ഡലം ട്രഷറർ ജോജൻ കൊല്ലാട്ടിൽ, കർഷക മോർച്ച മണ്ഡലം ജനറൽ സെക്രട്ടറി സുശിതാംബരൻ, ഏരിയ കമ്മിറ്റി അംഗങ്ങളായ കെ.കെ. സുരേഷ്, ടി.വി. ഉണ്ണികൃഷ്ണൻ, വാർഡ് വികസന ടീം ദശരഥൻ, രഘുനന്ദൻ, കണ്ണൻ നാരാട്ടിൽ, രാജു, വിനോജ് ഹരിത, കാർത്തിക എന്നിവർ നേതൃത്വം നൽകി.
ഇരിങ്ങാലക്കുട : സിപിഐ കാറളം ലോക്കൽ പാർട്ടി ജനറൽ ബോഡി യോഗവും കുടുംബസംഗമവും സംഘടിപ്പിച്ചു.
സിപിഐ ജില്ലാ അസിസ്റ്റൻ്റ് സെക്രട്ടറി ഇ.എം. സതീശൻ ഉദ്ഘാടനം ചെയ്തു.
മുൻ സംസ്ഥാന കൗൺസിൽ അംഗവും കേരള ഫീഡ്സ്
ചെയർമാനുമായ കെ. ശ്രീകുമാർ, സിപിഐ മണ്ഡലം സെക്രട്ടറി എൻ.കെ. ഉദയപ്രകാശ്, മണ്ഡലം സെക്രട്ടേറിയറ്റ് അംഗം കെ.എസ്. ബൈജു, ലോക്കൽ സെക്രട്ടറി എം. സുധീർദാസ്, ജില്ലാ പഞ്ചായത്ത് അംഗം ഷീല അജയഘോഷ്, കാറളം പഞ്ചായത്ത് പ്രസിഡന്റ് ബിന്ദു പ്രദീപ്, ഇരിങ്ങാലക്കുട ബ്ലോക്ക് പഞ്ചായത്ത് മുൻ വൈസ് പ്രസിഡന്റ് മോഹനൻ വലിയാട്ടിൽ, ലോക്കൽ അസി. സെക്രട്ടറി സി.കെ. ആരോമൽ തുടങ്ങിയവർ പ്രസംഗിച്ചു.
ചടങ്ങിൽ പാർട്ടിയിലെ മുതിർന്ന അംഗങ്ങളെയും വിദ്യാഭ്യാസ മേഖലയിൽ ഉന്നത വിജയം കരസ്ഥമാക്കിയവരെയും ആദരിച്ചു.
തുടർന്ന് വിവിധ കലാപരിപാടികൾ അരങ്ങേറി.
ഇരിങ്ങാലക്കുട : കയ്പമംഗലം അയിരൂർ റസിഡൻ്റ്സ് അസോസിയേഷൻ രണ്ടാം വാർഷികം ആഘോഷിച്ചു.
പ്രശസ്ത സിനിമ സീരിയൽ താരം അമ്പിളി ഔസേപ്പ് ഉദ്ഘാടനം ചെയ്തു.
അസോസിയേഷൻ പ്രസിഡന്റ് വിജയൻ കിഴക്കേപിഷാരം അധ്യക്ഷത വഹിച്ചു.
ഹേമചന്ദ്രൻ തറയിൽ അനുശോചനം രേഖപ്പെടുത്തി.
മിസ്സ് കേരള റണ്ണർ റപ്പ് അഞ്ജലി ഷെമീർ, ഗായിക റെജി ഭദ്രൻ എന്നിവർ വിശിഷ്ടാതിഥികളായി.
ശോഭന രവി, ബീന സുരേന്ദ്രൻ, ജയന്തി ടീച്ചർ, നൂറുൽ ഹുദാ എന്നിവർ ആശംസകൾ നേർന്നു.
ടി. മുരളീധരൻ, സീനിയ പ്രവീൺ എന്നിവർ റിപ്പോർട്ട് അവതരിപ്പിച്ചു.
മനോമോഹനൻ മഠത്തിൽ (പ്രസിഡൻ്റ്), വിജയൻ കിഴക്കേ പിഷാരത്ത് (സെക്രട്ടറി), സീനിയ പ്രവീൺ (ട്രഷറർ) എന്നിവരെ പുതിയ ഭാരവാഹികളായി തെരഞ്ഞെടുത്തു.
മനോമോഹനൻ മഠത്തിൽ സ്വാഗതവും രഞ്ജിത്ത് വിജയ് നന്ദിയും പറഞ്ഞു.
തുടർന്ന് വിവിധ കലാപരിപാടികൾ അരങ്ങേറി.
ഇരിങ്ങാലക്കുട : കൂടൽമാണിക്യം ഊരാഴ്മ യോഗം സമാദരണ സദസ്സ് തന്ത്രി മുഖ്യൻ നെടുമ്പിള്ളി തരണനെല്ലൂർ ഗോവിന്ദൻ നമ്പൂതിരിപ്പാട് ഉദ്ഘാടനം ചെയ്തു.
ഊരാഴ്മയോഗം ചെയർമാൻ കെ.എൻ. ഉണ്ണികൃഷ്ണൻ നമ്പൂതിരിപ്പാട് അധ്യക്ഷത വഹിച്ചു.
യോഗക്ഷേമസഭ സംസ്ഥാന പ്രസിഡൻ്റ് അഡ്വ. പി.എൻ.ഡി. നമ്പൂതിരി മുഖ്യപ്രഭാഷണം നടത്തി.
അഡ്വ. പി.എൻ.ഡി. നമ്പൂതിരിപ്പാട്, ജില്ലാ പ്രസിഡൻ്റ് മേലേടം ശ്രീകുമാർ, എടതിരിഞ്ഞി രാജീവ് നമ്പൂതിരി എന്നിവരെ യോഗം വൈസ് ചെയർമാൻ കെ.ഡി. ദാമോദരൻ നമ്പൂതിരി ഉപഹാരങ്ങൾ നൽകി ആദരിച്ചു.
ക്ഷേത്രം തന്ത്രി അണിമംഗലം നാരായണൻ നമ്പൂതിരി, സഭായോഗം സെക്രട്ടറി കല്ലേലി രാമൻ നമ്പൂതിരി, ജീവാമൃതം ഡയറക്ടർ ബോർഡ് അംഗം വയ്ക്കാക്കര നാരായണൻ നമ്പൂതിരി, മഴമംഗലം തരണനെല്ലൂർ രമേശൻ നമ്പൂതിരി എന്നിവർ അനുഗ്രഹ പ്രഭാഷണം നടത്തി.
ഊരാഴ്മ യോഗം ജനറൽ സെക്രട്ടറി എം.എസ്. കൃഷ്ണൻ നമ്പൂതിരി റിപ്പോർട്ട് അവതരിപ്പിച്ചു.
എം.എസ്. ശങ്കരൻ നമ്പൂതിരി സ്വാഗതവും എം.എൻ. കൃഷ്ണൻ നമ്പൂതിരി നന്ദിയും പറഞ്ഞു.
ഇരിങ്ങാലക്കുട : ഹരിത കേരളം മിഷൻ
“ഒരു തൈ നടാം” ജനകീയ വൃക്ഷവത്കരണ പരിപാടിയിൽ മുരിയാട് പഞ്ചായത്തിന് ജില്ലയിൽ മൂന്നാം സ്ഥാനം.
അവാർഡ് തൃശൂർ ടൗൺഹാളിൽ വച്ച് നടന്ന ചടങ്ങിൽ റവന്യൂ മന്ത്രി കെ. രാജനിൽ നിന്നും പഞ്ചായത്ത് പ്രസിഡൻ്റ് ജോസ് ജെ. ചിറ്റിലപ്പിള്ളിയും സെക്രട്ടറി എം. ശാലിനിയും ഭരണസമിതി അംഗങ്ങളും ചേർന്ന് ഏറ്റുവാങ്ങി.
പഞ്ചായത്തിലെ തൊഴിലുറപ്പ് പദ്ധതിയിൽ ഉൾപ്പെടുത്തി രണ്ടാം വാർഡിലെ പാലക്കുഴിയിൽ 150ൽ പരം വ്യത്യസ്ത വൃക്ഷങ്ങളുടെ സംരക്ഷണവും, 18ൽ പരം വ്യത്യസ്ത മാവുകളുടെ മാന്തോപ്പ് സ്മൃതി ചൂതം പദ്ധതിയും, ഫലവൃക്ഷത്തൈകൾ തിരഞ്ഞെടുക്കപ്പെട്ട 100 പേർക്ക്
വിതരണം ചെയ്തുമാണ് പഞ്ചായത്തിനെ വൃക്ഷവത്കരണത്തിൽ മൂന്നാം സ്ഥാനത്തെത്തിച്ചത്.
ഇരിങ്ങാലക്കുട : ഒക്ടോബർ 14ന് വൈകീട്ട് 6.45ഓടെ കൊരട്ടി ജംഗ്ഷനു സമീപം വെച്ച് ദേശീയപാത മുറിച്ചു കടക്കുകയായിരുന്ന മുരിങ്ങൂർ ആറ്റപ്പാടം സ്വദേശി കൂട്ടാലപ്പറമ്പിൽ വീട്ടിൽ ഷാജുവിനെ (54) ഇടിച്ചിട്ട് നിർത്താതെ പോയ കേസിൽ വാഹനം ഓടിച്ച ആളും, ഇടിച്ച വാഹനവും പോലീസിൻ്റെ പിടിയിൽ.
ചാലക്കുടി ധന്വന്തരി മഠത്തിൽ വിഷ്ണു സായ് (25) എന്നയാളാണ് പിടിയിലായത്.
അപകടത്തിൽ വലതു കാൽമുട്ടിനു താഴെയും, വലതു നെഞ്ചിനു താഴെയും തലയിലും ഗുരുതരമായി പരിക്കേറ്റ ഷാജു മരണപ്പെട്ടിരുന്നു.
കൊരട്ടി സ്റ്റേഷൻ എസ്എച്ച്ഒ അമൃത് രംഗൻ, ഗ്രേഡ് എ എസ് ഐ പി.എൻ. ഷീബ, സിപിഒ അമൽ ആനന്ദ് എന്നിവരാണ് അന്വേഷണത്തിൽ ഉണ്ടായിരുന്നത്.
ഇരിങ്ങാലക്കുട : പ്രതിഭയും പ്രതിബദ്ധതയുമുള്ള കലാമുകുളങ്ങൾക്കായി ഡോ. കെ.എൻ. പിഷാരടി സ്മാരക കഥകളി ക്ലബ്ബിൻ്റെ ആഭിമുഖ്യത്തിൽ സംഘടിപ്പിക്കുന്ന “നവ്യം – യൗവനത്തിൻ കലൈയാട്ടം” കലാമേളയുടെ രണ്ടാം ദിനത്തിൽ കർണ്ണാടക സംഗീത ത്രിമൂർത്തികളിലെ അമൂല്യരത്നമായ മുത്തുസ്വാമി ദീക്ഷിതരുടെ 250-ാം ജന്മവാർഷികത്തോടനുബന്ധിച്ച് ദീക്ഷതർക്ക് പ്രണാമം അർപ്പിച്ചുകൊണ്ടായിരുന്നു തുടക്കം.
രാവിലെ മുത്തുസ്വാമി ദീക്ഷിതരുടെ പഞ്ചലിംഗസ്ഥല കീർത്തനാലാപനം യുവപ്രതിഭകൾ നടത്തിയത് സംഗീതാസ്വാദകർക്ക് അപൂർവ്വ അനുഭവമായി മാറി.
തുടർന്ന് ശ്രീലത നമ്പൂതിരി കമലാംബാ നവാവരണ കൃതികളുടെ ആഴത്തിലിറങ്ങികൊണ്ട് നടത്തിയ പ്രഭാഷണം ഏറെ ശ്രദ്ധേയമായി.
ശേഷം കർണ്ണാടസംഗീത രംഗത്തെ യുവപ്രതിഭയായ ആനന്ദ് കെ. രാജ് ദീക്ഷിതർ കൃതികളെ മാത്രം ഉൾക്കൊള്ളിച്ചുകൊണ്ട് കർണ്ണാടക സംഗീതക്കച്ചേരി അങ്ങേറി.
പാലക്കാട് കൈലാസപതി വയലിനിലും, വിഷ്ണു ചിന്താമണി മൃദംഗത്തിലും പക്കമേളമൊരുക്കി സംഗീതത്തിന് അകമ്പടിയേകി.
ഉച്ചതിരിഞ്ഞ് സംഗീതജ്ഞൻ കോട്ടയ്ക്കൽ രഞ്ജിത്ത് വാര്യർ
‘കർണ്ണാടകസംഗീതത്തിലെ കാലികമായ ഭാവുകത്വപരിണാമം’ എന്ന വിഷയത്തിൽ കച്ചേരിയിൽ പങ്കെടുത്ത കലാകാരന്മാരുമായി ചർച്ച നടത്തി.
ഉച്ചതിരിഞ്ഞ് ബാലിവധം കൂടിയാട്ടത്തിന്റെ ഘടനയിൽ ‘ഏകാഹാര്യരംഗാവതരണത്തിലെ സർഗ്ഗാത്മകത’ എന്ന വിഷയത്തിൽ ഡോ. അപർണ്ണ നങ്ങ്യാർ പ്രഭാഷണം നടത്തി.
തുടർന്ന് അമ്മന്നൂർ മാധവ് ചാക്യാർ സുഗ്രീവൻ്റെ നിർവ്വഹണം പ്രശ്നം വയ്ക്കൽ അരങ്ങത്ത് അവതരിപ്പിച്ചു.
വൈകീട്ട് “തായമ്പകയുടെ ഘടനാപരമായ അവതരണങ്ങളിൽ സർഗ്ഗാത്മകതയ്ക്കുള്ള സാധ്യതകളും പ്രാധാന്യവും – ഇന്ന്” എന്ന വിഷയത്തിൽ ഇരിങ്ങപ്പുറം ബാബുവിൻ്റെ പ്രഭാഷണം നടന്നു.
തുടർന്ന് അരങ്ങേറിയ മാർഗ്ഗി രഹിത കൃഷ്ണദാസിന്റെ തായമ്പക അത്യപൂർവ്വ വിരുന്നൊരുക്കി.
