കോന്തിപുലം പാടത്ത് സ്ഥിരം തടയണ നിർമ്മാണത്തിന് ഭരണാനുമതിയായി : മന്ത്രി ഡോ ആർ ബിന്ദു

ഇരിങ്ങാലക്കുട : കോന്തിപുലം പാടത്ത് സ്ഥിരം തടയണയെന്ന ദീർഘകാലത്തെ കർഷക സ്വപ്നം യാഥാർത്ഥ്യമാവുകയാണെന്ന് മന്ത്രി ഡോ ആർ ബിന്ദു പറഞ്ഞു.

പദ്ധതിക്കായി 12.21 കോടി രൂപയുടെ ഭരണാനുമതി ലഭിച്ചതായി മന്ത്രി അറിയിച്ചു.

പദ്ധതി യാഥാർത്ഥ്യമാകുന്നതോടെ മുരിയാട് കായലിലെ വെള്ളത്തിന്റെ ഒഴുക്ക് കൃഷിക്ക് അനുയോജ്യമായ രീതിയിൽ ക്രമീകരിക്കാനാകും.

മുരിയാട്, പൊറത്തിശ്ശേരി, പറപ്പൂക്കര മേഖലകളിലെ കർഷകർക്ക് പദ്ധതി ഗുണം ചെയ്യും.

കോന്തിപുലം പാടത്ത് സ്ഥിരം തടയണ സ്ഥാപിക്കാൻ സംസ്ഥാന സർക്കാർ 12.21 കോടി രൂപ 2023- 24 വർഷത്തെ ബജറ്റിൽ വകയിരുത്തിയിരുന്നു.
തുടർന്ന് വിശദമായ പദ്ധതി രേഖ സമർപ്പിച്ച് നടപടിക്രമങ്ങൾ ധൃതഗതിയിൽ പൂർത്തീകരിച്ചാണ് പദ്ധതിക്ക് ഏറ്റവും വേഗത്തിൽ ഭരണാനുമതി ലഭ്യമാക്കിയത് എന്ന് മന്ത്രി പറഞ്ഞു.

സാങ്കേതിക അനുമതിക്കാവശ്യമായ നടപടികളും ടെൻഡർ നടപടികളും പൂർത്തിയാക്കി നിർമ്മാണം ഉടൻ ആരംഭിക്കുമെന്നും മന്ത്രി ഡോ ആർ ബിന്ദു അറിയിച്ചു.