IRINJALAKUDA TIMES
ഇരിങ്ങാലക്കുട : ലോക അർബുദ ദിനമായ ഫെബ്രുവരി 4ന് രാവിലെ 10 മണി മുതൽ ഉച്ചയ്ക്ക് 12 മണിവരെ മുരിയാട് എ.യു.പി. സ്കൂളിൽ വച്ച് ആനന്ദപുരം ഹെൽത്ത് സെൻ്ററിന്റെ സഹകരണത്തോടെ സൗജന്യ കാൻസർ രോഗനിർണയ ക്യാമ്പ് സംഘടിപ്പിക്കും.
ക്യാമ്പിൽ പങ്കെടുക്കാൻ ആഗ്രഹിക്കുന്നവർ 8086512814, 7592339465 എന്നീ നമ്പറുകളിൽ വിളിച്ച് രജിസ്റ്റർ ചെയ്യേണ്ടതാണ്.
ക്യാമ്പിൽ പങ്കെടുക്കാൻ എത്തുന്നവർ നിർബന്ധമായും ആധാർ കാർഡ് കൊണ്ടുവരണം.
ഇരിങ്ങാലക്കുട : ഭാരതീയ വിദ്യാഭവനിൽ അധ്യാപക രക്ഷാകർതൃദിനം ‘സമന്വയ’ വിപുലമായ പരിപാടികളോടെ ആഘോഷിച്ചു.
സിനിമ, ടെലിവിഷൻ താരം ജിതിൻ ബാബു ഉദ്ഘാടനം നിർവഹിച്ചു.
ചെയർമാൻ ടി. അപ്പുക്കുട്ടൻ നായർ അധ്യക്ഷത വഹിച്ചു.
എക്സിക്യൂട്ടീവ് വൈസ് ചെയർമാൻ സി. നന്ദകുമാർ, സെക്രട്ടറി വി. രാജൻ മേനോൻ, പ്രിൻസിപ്പൽ ബിജു ഗീവർഗ്ഗീസ്, വൈസ് പ്രിൻസിപ്പൽമാരായ സുജാത രാമനാഥൻ, ഗിരിജ മേനോൻ, പി.ടി.എ. പ്രസിഡന്റ് റാണി പ്രദീപ്കുമാർ, പി.ടി.എ. വൈസ് പ്രസിഡന്റ് എം.കെ. പരമേശ്വരൻ, പി.ടി.എ. ഭാരവാഹികൾ, അധ്യാപകർ തുടങ്ങിയവർ പങ്കെടുത്തു.
തുടർന്ന് രക്ഷിതാക്കളും അധ്യാപകരും അനധ്യാപകരും അവതരിപ്പിച്ച വിവിധ കലാപരിപാടികൾ അരങ്ങേറി.
ഇരിങ്ങാലക്കുട : ഇരിങ്ങാലക്കുട രൂപതയിലെ പൊറത്തിശ്ശേരി ഇടവകാംഗമായ റവ. ഫാ. ആൻ്റു ആലപ്പാടനെ ഇരിങ്ങാലക്കുട രൂപതയുടെ പുതിയ വികാരി ജനറാൾ (സിഞ്ചലൂസ്) ആയി ബിഷപ്പ് മാർ പോളി കണ്ണൂക്കാടൻ നിയമിച്ചു.
റവ. ഫാ. ആൻ്റു ആലപ്പാടൻ ചാലക്കുടി സെൻ്റ് ജെയിംസ് ഹോസ്പിറ്റലിന്റെ ഡയറക്ടർ ആയി സേവനം ചെയ്തു വരവേയാണ് ഈ പുതിയ നിയോഗം.
ആൻ്റു ആലപ്പാടൻ പൊറത്തിശ്ശേരി ആലപ്പാടൻ വീട്ടിൽ ആന്റണി, അന്നമ്മ ദമ്പതികളുടെ മകനാണ്.
ജോസ്, യോഹന്നാൻ, തോമസ്, വർഗ്ഗീസ്, മേരി, സെലീന, ഏലിയ എന്നിവരാണ് സഹോദരങ്ങൾ.
ഇരിങ്ങാലക്കുട നാഷണൽ ഹൈസ്കൂളിലാണ് സ്കൂൾ വിദ്യാഭ്യാസം പൂർത്തീകരിച്ചത്.
പ്രാഥമിക വൈദിക പരിശീലനം ഇരിങ്ങാലക്കുട സെൻ്റ് പോൾസ് മൈനർ സെമിനാരിയിലും ഫിലോസഫി- തിയോളജി പഠനങ്ങൾ ആലുവ, കാർമൽഗിരി, മംഗലപ്പുഴ സെമിനാരികളിലും പൂർത്തിയാക്കി.
1994 ഏപ്രിൽ 16ന് പൊറത്തിശ്ശേരി സെൻ്റ് സെബാസ്റ്റ്യൻ പള്ളിയിൽ വച്ച് മാർ ജെയിംസ് പഴയാറ്റിലിൽ നിന്ന് പൗരോഹിത്യം സ്വീകരിച്ചു.
അസിസ്റ്റൻ്റ് വികാരിയായി ആളൂർ, കല്ലേറ്റുംകര, എടത്തിരുത്തി ഫൊറോന ഇടവകകളിലും വികാരിയായി തച്ചുടപ്പറമ്പ്, വെള്ളാഞ്ചിറ, പാറേക്കാട്ടുകര, പുത്തൻചിറ ഫൊറോന, ഇരിങ്ങാലക്കുട കത്തീഡ്രൽ ഇടവകകളിലും അജപാലന ശുശ്രൂഷ നിർവഹിച്ചു.
റോമിലെ അഞ്ചേലിക്കും യൂണിവേഴ്സിറ്റിയിൽ നിന്നും ഡോക്ടറേറ്റ് കരസ്ഥമാക്കിയിട്ടുണ്ട്.
ഇരിങ്ങാലക്കുട രൂപതയിലെ സഹൃദയ കോളെജ് ഓഫ് എൻജിനീയറിങ്, സഹൃദയ കോളെജ് ഓഫ് അഡ്വാൻസ്ഡ് സ്റ്റഡീസ്, സഹൃദയ ഇൻസ്റ്റിറ്റ്യൂട്ട് ഓഫ് മാനേജ്മെൻ്റ് സ്റ്റഡീസ് എന്നിവയുടെ എക്സിക്യൂട്ടീവ് ഡയറക്ടറായും ചാലക്കുടി സെൻ്റ് ജെയിംസ് ഹോസ്പിറ്റൽ അസോസിയേറ്റ് ഡയറക്ടർ, അവാർഡ്, ഫിനാൻസ് ഓഫീസർ എന്നീ നിലകളിലും പ്രവർത്തിച്ചിട്ടുണ്ട്.
കൂടാതെ രൂപത പ്രസ്ബിറ്ററൽ കൗൺസിലിന്റെ സെക്രട്ടറിയായും കോളെജ് ഓഫ് കൺസൾട്ടേഴ്സ് മെമ്പറായും കത്തോലിക്ക കോൺഗ്രസിന്റെ ഡയറക്ടറായും സേവനം ചെയ്തിട്ടുണ്ട്.
നിലവിൽ ചാലക്കുടി സെൻ്റ് ജെയിംസ് ഹോസ്പിറ്റൽ ഡയറക്ടറാണ്.
വിവിധ ഭാഷകളിൽ പ്രാവീണ്യമുള്ള ആൻ്റു ആലപ്പാടൻ വചനപ്രഘോഷകനും മികച്ച സംഘാടകനും തികഞ്ഞ ഒരു അഡ്മിനിസ്ട്രേറ്ററുമാണ്.
ഇരിങ്ങാലക്കുട രൂപതയുടെ സുവർണ്ണ ജൂബിലി വർഷങ്ങളിൽ രൂപതയുടെ കർമ്മ പദ്ധതികൾ ആവിഷ്കരിച്ച് നടപ്പിലാക്കാനുള്ള ഉത്തരവാദിത്വത്തിൽ കൂടിയാണ് ആൻ്റു ആലപ്പാടൻ പങ്കുചേരുന്നത്.
മേഴ്സി
ഇരിങ്ങാലക്കുട : തെക്കിനിയത്ത് പരേതനായ പോൾ ഭാര്യ മേഴ്സി (77) നിര്യാതയായി.
പൊറത്തിശ്ശേരി മഹാത്മാ യു.പി. സ്കൂളിലെ റിട്ട. അധ്യാപികയാണ്.
സംസ്കാരം നടത്തി.
മക്കൾ : പരേതയായ ബിന്ദു പോൾ, രേഖ പോൾ
മരുമക്കൾ : ജോജി കെ. പല്ലൻ, ജിൻ്റോ തോമസ് ചിറയത്ത്
ഇരിങ്ങാലക്കുട : കൂടൽമാണിക്യം ക്ഷേത്രത്തിലെ കഴകം നിയമനവുമായി ബന്ധപ്പെട്ട് നടക്കുന്ന വിവാദങ്ങൾ തുടരുന്നു. കഴകം നിയമനവുമായി ബന്ധപ്പെട്ട ഹൈക്കോടതി വിധിക്കെതിരെ സുപ്രീം കോടതിയെ സമീപിച്ചിരിക്കുകയാണ് തന്ത്രിമാർ.
ക്ഷേത്രത്തിലെ കഴകം ജോലി “ആത്മീയവും മതപരവും” ആണെന്ന് കാണിച്ചാണ് തന്ത്രിമാർ സുപ്രീം കോടതിയെ സമീപിച്ചിരിക്കുന്നത്.
ക്ഷേത്രത്തിലെ മൂർത്തിക്ക് ചാർത്തേണ്ട മാലയുൾപ്പെടെ തയാറാക്കുന്നത് പാരമ്പര്യമായി കഴകം ചെയ്യുന്നവരാണ്. തെക്കേ വാര്യം കുടുംബത്തിലുള്ളവർക്കായിരുന്നു ഇതുവരെയും അതിനുള്ള അവകാശമെന്നും ഹർജിയിൽ ചൂണ്ടിക്കാണിച്ചിട്ടുണ്ട്.
ഹൈക്കോടതി വിധി പാരമ്പര്യമായി തങ്ങളുടെ കുടുംബത്തിന് ലഭിച്ച അവകാശത്തിലേക്കുള്ള കടന്നുകയറ്റം ആണെന്നും സുപ്രീംകോടതിയിൽ ഫയൽ ചെയ്ത ഹർജിയിൽ പ്രതിപാദിച്ചിട്ടുണ്ട്.
ഈ കാര്യങ്ങൾ പരിഗണിച്ച് ഹൈക്കോടതി വിധി അടിയന്തരമായി സ്റ്റേ ചെയ്യണമെന്നാണ് തന്ത്രിമാർ ആവശ്യപ്പെട്ടിരിക്കുന്നത്.
ക്ഷേത്രത്തിലെ നിയമനം നടത്തുന്ന സമിതിയിൽ തന്ത്രി അംഗമായിരിക്കണം എന്ന നിയമം കാറ്റിൽപറത്തിയാണ് കഴകം നിയമനം നടത്തിയിരിക്കുന്നതെന്നും ഹർജിയിൽ ആരോപിച്ചിട്ടുണ്ട്. ക്ഷേത്രത്തിലെ അഞ്ച് തന്ത്രിമാരാണ് ഹർജി ഫയൽ ചെയ്തിരിക്കുന്നത്.
ദേവസ്വം റിക്രൂട്ട്മെന്റ് ബോർഡ് തയാറാക്കിയ റാങ്ക് ലിസ്റ്റ് പ്രകാരം ഒന്നാം റാങ്കുകാരനായ ബി.എ. ബാലു രാജി വെച്ച ഒഴിവിൽ ചേർത്തല സ്വദേശിയായ കെ.എസ് . അനുരാഗിനെ കഴകം ജോലിയിൽ നിയമിച്ചിരുന്നു. ഈ നിയമനവും റദ്ദാക്കണമെന്നാണ് തന്ത്രിമാരുടെ ആവശ്യം.
ഇരിങ്ങാലക്കുട : മഹാത്മാഗാന്ധി റീഡിംഗ് റൂം & ലൈബ്രറിയുടെ ആഭിമുഖ്യത്തിൽ സ്കൂൾ വിദ്യാർഥികൾക്കായി ഫെബ്രുവരി 7ന് ചിത്രരചന, പോസ്റ്റർ ഡിസൈൻ മത്സരങ്ങൾ സംഘടിപ്പിക്കും.
ലൈബ്രറി ഹാളിൽ വെച്ച് സംഘടിപ്പിക്കുന്ന മത്സരങ്ങളിൽ പങ്കെടുക്കുവാൻ ആഗ്രഹിക്കുന്നവർ ഫെബ്രുവരി 4ന് വൈകീട്ട് 5 മണിക്ക് മുൻപായി ലൈബ്രറിയിൽ നേരിട്ടോ താഴെ കാണുന്ന നമ്പറിലോ വിളിച്ച് പേർ രജിസ്റ്റർ ചെയ്യേണ്ടതാണ്.
5 വയസ്സ് മുതൽ 10 വയസ്സ് വരെ, 11 വയസ്സ് മുതൽ 15 വയസ്സ് വരെ എന്നിങ്ങനെ രണ്ട് വിഭാഗങ്ങളിലായാണ് മത്സരം സംഘടിപ്പിക്കുന്നത്.
10 വയസ്സ് മുതൽ 15 വയസ്സ് വരെയുള്ള കുട്ടികൾക്കായി ക്വിസ് മത്സരവും സംഘടിപ്പിക്കുന്നുണ്ട്.
വിശദ വിവരങ്ങൾക്ക് :
ഫോൺ : 0480 – 2826005, 0480 – 2823737, 80861 02481
തോമസ്
ഇരിങ്ങാലക്കുട : നടവരമ്പ് പാറേക്കാടൻ കുഞ്ഞിവാറു മകൻ തോമസ് (91) നിര്യാതനായി.
സംസ്കാരം ചൊവ്വാഴ്ച (ഫെബ്രുവരി 3) രാവിലെ 10 മണിക്ക് നടവരമ്പ് സെൻ്റ് മേരീസ് അസംപ്ഷൻ ദൈവാലയ സെമിത്തേരിയിൽ.
മക്കൾ : സാജു, ജെയ്സൺ, റിൻസി
മരുമക്കൾ : ഡെയ്സി, ഉഷ, ജോണി
ഇരിങ്ങാലക്കുട : സമസ്ത കേരള വാര്യർ സമാജം സ്ഥാപിത ദിനമായ ഫെബ്രുവരി 2ന് പതാകദിനമായി ആചരിച്ചു.
ഇരിങ്ങാലക്കുട യൂണിറ്റ് ആസ്ഥാന മന്ദിരത്തിൽ പ്രസിഡൻ്റ് പി.വി. രുദ്രൻ വാര്യർ പതാക ഉയർത്തി.
മുൻ മധ്യമേഖല സെക്രട്ടറി എ.സി. സുരേഷ് സ്ഥാപിത സന്ദേശം നൽകി.
സെക്രട്ടറി എ. അച്യുതൻ, എസ്. കൃഷ്ണകുമാർ, ദേവദാസ്, ടി. പത്മാവതി, എ. ചന്ദ്രിക എന്നിവർ പ്രസംഗിച്ചു.
തുടർന്ന് മധുരം വിതരണം ചെയ്തു.
ഇരിങ്ങാലക്കുട : കേരള അഡ്മിനിസ്ട്രേറ്റീവ് സർവ്വീസ് പരീക്ഷയിൽ സ്ട്രീം രണ്ടിൽ മൂന്നാം റാങ്ക് കരസ്ഥമാക്കിയ ഇരിങ്ങാലക്കുട കാട്ടുങ്ങച്ചിറ സ്വദേശിനി നടുവിലകത്ത് അഫീന ഗുലാമിനെ മന്ത്രി ഡോ. ആർ. ബിന്ദു വീട്ടിൽ നേരിട്ടെത്തി പൊന്നാട അണിയിച്ച് അനുമോദിച്ചു.
കോഴിക്കോട് ബേപ്പൂരിൽ ഹാർബർ എൻജിനീയറിങ് വകുപ്പിൽ അസി. എൻജിനീയറായ അഫീന റിട്ട വി.എച്ച്.എസ്.ഇ. അധ്യാപകൻ കാട്ടുങ്ങച്ചിറ നടുവിലകത്ത് വീട്ടിൽ ഗുലാം മുഹമ്മദിന്റെയും തൃശൂർ ഗവ. മോഡൽ ഗേൾസ് വി.എച്ച്.എസ്.ഇ. പ്രിൻസിപ്പൽ അനിതയുടെയും മകളാണ്.
കെ.എ.എസ്. വലിയ ഒരു അവസരമാണെന്നും പൊതുസമൂഹത്തിൽ സാമൂഹിക പ്രതിബദ്ധതയോടെ ദുർബല വിഭാഗങ്ങളെയും അവശ്യക്കാരെയും സഹായിക്കാൻ അഫീന ഗുലാമിന് സാധിക്കട്ടെ എന്നും മന്ത്രി ആർ. ബിന്ദു ആശംസിച്ചു.
33-ാം വാർഡ് കൗൺസിലർ പി.എം. നന്ദുലാൽ മന്ത്രിയോടൊപ്പമുണ്ടായിരുന്നു.
ഇരിങ്ങാലക്കുട : കേരള അഡ്മിനിസ്ട്രേറ്റീവ് സർവ്വീസ് പരീക്ഷയിൽ സ്ട്രീം രണ്ടിൽ മൂന്നാം റാങ്ക് കരസ്ഥമാക്കിയ ഇരിങ്ങാലക്കുട കാട്ടുങ്ങച്ചിറ സ്വദേശിനി അഫീന ഗുലാമിനെ പുരോഗമന കലാസാഹിത്യ സംഘം ഭാരവാഹികൾ ആദരിച്ചു.
പു.ക.സ. മേഖല പ്രസിഡൻ്റ് ഖാദർ പട്ടേപ്പാടം, സെക്രട്ടറി
ഡോ. കെ. രാജേന്ദ്രൻ, വി.സി. പ്രഭാകരൻ, ടൗൺ പ്രസിഡൻ്റ് കെ.ജി. സുബ്രഹ്മണ്യൻ, ടൗൺ സെക്രട്ടറി കെ.എച്ച്. ഷെറിൻ അഹമ്മദ്, കെ. സതീശൻ, കെ. രവീന്ദ്രൻ എന്നിവർ ചടങ്ങിൽ സന്നിഹിതരായിരുന്നു.
