ഇരിങ്ങാലക്കുട : സഹകരണ കാർഷിക ഗ്രാമവികസന ബാങ്കിൻ്റെ ഇരിങ്ങാലക്കുട, ആമ്പല്ലൂർ ബ്രാഞ്ചുകൾ മാർച്ച് 30, 31 ദിവസങ്ങളിലും പ്രവർത്തിക്കും.
കുടിശ്ശിക നിവാരണത്തിനും നിക്ഷേപ സമാഹരണത്തിനും ഈ ദിവസങ്ങൾ പരമാവധി ഉപയോഗപ്പെടുത്തണമെന്ന് സെക്രട്ടറി അറിയിച്ചു.
പ്രതിബദ്ധത ജനങ്ങളോട് മാത്രം….
IRINJALAKUDA TIMES
ഓൺലൈൻ സൈബർ തട്ടിപ്പിലൂടെ ലക്ഷങ്ങളുടെ തട്ടിപ്പ് നടത്തിയ സംഘത്തിലെ കണ്ണിയായ തമിഴ്നാട് സ്വദേശി പിടിയിൽ
ഇരിങ്ങാലക്കുട : ഓൺലൈൻ സൈബർ തട്ടിപ്പിലൂടെ ലക്ഷങ്ങൾ തട്ടിയ സംഘത്തിലെ കണ്ണിയായ തമിഴ്നാട് നെയ് വേലി ഇന്ദിരാനഗർ സ്വദേശി ചന്ദ്രശേഖറി(28)നെ ഇരിങ്ങാലക്കുട സൈബർ ക്രൈം പൊലീസ് ഇൻസ്പെക്ടറും സംഘവും അറസ്റ്റ് ചെയ്തു.
ഫേസ്ബുക്കിൽ നിമ്മി എന്ന വ്യാജ പ്രൊഫൈലിലൂടെ പരാതിക്കാരനുമായി പരിചയപ്പെട്ട്, വാട്ട്സാപ്പ് അക്കൗണ്ടുകൾ വഴി ചാറ്റും വോയ്സ് കോളുകളും ചെയ്ത് ബന്ധം പുലർത്തിയ ശേഷം ബാങ്ക് ഉദ്യോഗസ്ഥയാണെന്നും ഹൈദരാബാദിൽ ജോലി ചെയ്യുകയാണെന്നും പറഞ്ഞ് വിശ്വസിപ്പിച്ച് ജോലി സ്ഥിരപ്പെടുത്തുന്നതിനായി പണം ഡെപ്പോസിറ്റ് ചെയ്യുന്നതിനാണെന്ന് പറഞ്ഞാണ് പണം ആവശ്യപ്പെട്ട് തട്ടിപ്പ് നടത്തിയത്.
കുവൈറ്റിൽ ഷെഫായി ജോലി ചെയ്യുന്ന തൃശൂർ ചാലക്കുടി കുന്നപ്പിള്ളി സ്വദേശിയായ മാടത്തറ വീട്ടിൽ സന്ദീപിൽ നിന്ന് 3,15,000 രൂപ 2023 നവംബർ ആദ്യ വാരം മുതൽ 2024 ജനുവരി 31 വരെയുള്ള കാലയളവുകളിൽ പല തവണകളായി വിവിധ അക്കൗണ്ടുകളിലേക്ക് അയച്ച് വാങ്ങിയാണ് തട്ടിപ്പു നടത്തിയത്.
തട്ടിപ്പ് നടത്തിയ പണം ചന്ദ്രശേഖറിന്റെ സുഹൃത്തിന്റെ അക്കൗണ്ടിലേക്കാണ് അയപ്പിച്ചിരുന്നത്. ഇത് എടുത്തു കൊടുക്കുമ്പോൾ സുഹൃത്തിന് ചെറിയ തുക കമ്മീഷനായി നൽകുകയാണ് പതിവ്.
തൃശൂർ റൂറൽ ജില്ലാ പൊലീസ് മേധാവി ബി. കൃഷ്ണകുമാർ ഐ.പി.എസിന്റെ നിർദ്ദേശപ്രകാരം ഡി.സി.ആർ.ബി. ഡി.വൈ.എസ്.പി എസ്.വൈ. സുരേഷ്, ക്രൈം ബ്രാഞ്ച് ഡി.വൈ.എസ്.പി. എം. ഉല്ലാസ് കുമാർ, ഇരിങ്ങാലക്കുട സൈബർ പൊലീസ് സ്റ്റേഷൻ ഇൻസ്പെക്ടർ എസ്.എച്ച്.ഒ. വർഗ്ഗീസ് അലക്സാണ്ടർ, എസ്.ഐ.മാരായ സൂരജ്, ടി.എൻ. അശോകൻ, സുകുമാർ, എസ്.പി.ഒ.മാരായ മനോജ്, അജിത്ത് കുമാർ, സി.പി.ഒ.മാരായ സച്ചിൻ, ശ്രീനാഥ് എന്നിവരാണ് അന്വേഷണ സംഘത്തിൽ ഉണ്ടായിരുന്നത്.
കോടതിയിൽ ഹാജരാക്കിയ ചന്ദ്രശേഖറിനെ റിമാൻഡ് ചെയ്തു.
ബോയ്സ് സ്കൂളിലെ വിദ്യാർഥികൾ നിർമ്മിച്ച മുന്നൂറോളം എൽഇഡി ബൾബുകൾ വിപണന കേന്ദ്രത്തിലേക്ക്
ഇരിങ്ങാലക്കുട : സംസ്ഥാന പൊതുവിദ്യാഭ്യാസ വകുപ്പിന്റെ പ്രവർത്തിപരിചയ പരിപാടിയുടെ ഭാഗമായി ജില്ലയിൽ പ്രൊഡക്ഷൻ സെന്റർ അനുവദിച്ച ഏക വിദ്യാലയമായ ഗവ. മോഡൽ ബോയ്സ് ഹയർ സെക്കൻഡറി സ്കൂളിലെ വിദ്യാർഥികൾ സ്കൂൾ പ്രൊഡക്ഷൻ സെന്ററിൽ നിർമിച്ച മുന്നൂറോളം എൽഇഡി ബൾബുകളുടെ വിതരണോദ്ഘാടനം മന്ത്രി ഡോ. ആർ. ബിന്ദു ഫ്രണ്ട്സ് ഇലക്ട്രിക്കൽ ഉടമ മനോഹരന് നൽകി നിർവഹിച്ചു.
നഗരസഭ ചെയർപേഴ്സൺ മേരിക്കുട്ടി ജോയ് അധ്യക്ഷത വഹിച്ചു.
വിദ്യാഭ്യാസ സ്റ്റാൻഡിങ് കമ്മിറ്റി ചെയർപേഴ്സൺ അഡ്വ. ജിഷ ജോബി, ഡി.ഇ.ഒ. ഷൈല, ഹയർ സെക്കൻഡറി വിഭാഗം പ്രിൻസിപ്പൽ എം.കെ. മുരളി, പി.ടി.എ. പ്രസിഡന്റ് വി. ഭക്തവത്സലൻ, എസ്.എം.സി. ചെയർമാൻ അഹമ്മദ് ഫസലുള്ള എന്നിവർ ആശംസകൾ അർപ്പിച്ചു.
പ്രധാന അധ്യാപിക ലത സ്വാഗതവും സീനിയർ അസിസ്റ്റന്റ് സുമൻ ജി. മുക്കുളത്ത് നന്ദിയും പറഞ്ഞു.
നേത്രചികിത്സ – തിമിര ശസ്ത്രക്രിയ ക്യാമ്പ് 30ന്
ഇരിങ്ങാലക്കുട : പി.എല്. തോമന് മെമ്മോറിയല് ചാരിറ്റബിള് ട്രസ്റ്റും, കൊമ്പൊടിഞ്ഞാമാക്കല് ലയണ്സ് ക്ലബ്ബ് ഇന്റര്നാഷണലും, ഐ ഫൗണ്ടേഷന് ആശുപത്രിയും സംയുക്തമായി പി.എല്. തോമന് മെമ്മോറിയല് ചാരിറ്റബിള് ക്ലിനിക്കില് നേത്ര പരിശോധന- തിമിര ശസ്ത്രക്രിയ ക്യാമ്പ് 30ന് സംഘടിപ്പിക്കും.
ലയണ്സ് ക്ലബ്ബ് ഡിസ്ട്രിക്ട് കോര്ഡിനേറ്റര് ജോണ്സന് കോലങ്കണ്ണി ക്യാമ്പ് ഉദ്ഘാടനം ചെയ്യും.
സെക്രട്ടറി അഡ്വ. എം.എസ്. രാജേഷ് അധ്യക്ഷത വഹിക്കും.
ക്യാമ്പിൽ പ്രദീപ്, ശിവന് നെന്മാറ എന്നിവര് പങ്കെടുക്കും.
കൂടുതല് വിവരങ്ങള്ക്കും രജിസ്ട്രേഷനും 9446540890, 9539343242 എന്നീ നമ്പറുകളില് ബന്ധപ്പെടാവുന്നതാണ്.
നിര്യാതനായി
വേലു
ഇരിങ്ങാലക്കുട : പൊറത്തിശ്ശേരി വീവൺ നഗറിൽ കണ്ണനാകുളം ശങ്കുണ്ണി മകൻ വേലു (82) നിര്യാതനായി.
സംസ്കാരം ശനിയാഴ്ച (മാർച്ച് 29) ഉച്ചയ്ക്ക് 12.30ന് തറവാട്ടുവളപ്പിൽ.
മക്കൾ : ബാബുരാജ്, സുരേഷ് കുമാർ, അജിത്ത് കുമാർ
മരുമക്കൾ : സുനിത, ബീന, ദിവ്യ
ഇരിങ്ങാലക്കുട നഗരസഭാ പരിധിയിൽ 20 ബോട്ടിൽ ബൂത്തുകൾ സ്ഥാപിച്ചു
ഇരിങ്ങാലക്കുട : മാലിന്യമുക്ത ഇരിങ്ങാലക്കുട നഗരസഭ എന്ന ലക്ഷ്യവുമായി നഗരസഭയിലെ വിവിധ പ്രദേശങ്ങളിൽ ഒഴിഞ്ഞ ബോട്ടിലുകൾ നിക്ഷേപിക്കുന്നതിനായി 20 ബോട്ടിൽ ബൂത്തുകൾ സ്ഥാപിച്ചു.
നഗരസഭ ചെയർപേഴ്സൺ മേരിക്കുട്ടി ജോയ് ഉദ്ഘാടനം ചെയ്തു.
വൈസ് ചെയർമാൻ ബൈജു കുറ്റിക്കാടൻ, സ്റ്റാൻഡിംഗ് കമ്മിറ്റി ചെയർമാൻമാർ, കൗൺസിലർമാർ, ഉദ്യോഗസ്ഥർ എന്നിവർ സന്നിഹിതരായിരുന്നു.
ആൾ കേരള ഫോട്ടോഗ്രാഫി അസോസിയേഷൻ : ഐഡി കാർഡ് വിതരണവും പൊതുസമ്മേളനവും നടത്തി
ഇരിങ്ങാലക്കുട : ആൾ കേരള ഫോട്ടോഗ്രാഫേഴ്സ് അസോസിയേഷന്റെ ആഭിമുഖ്യത്തിൽ പൊതുസമ്മേളനവും മെമ്പർമാരുടെ ഐഡി കാർഡ് വിതരണവും ഇരിങ്ങാലക്കുട പ്രിയ ഹാളിൽ സംഘടിപ്പിച്ചു.
മേഖലയിലെ ഓൾ കേരള ഫോട്ടോഗ്രാഫി അസോസിയേഷൻ മെമ്പർമാർക്കുള്ള ഐഡി കാർഡുകളുടെ വിതരണോദ്ഘാടനം ജില്ലാ പ്രസിഡന്റ് അനിൽ തുമ്പയിൽ മേഖലാ പ്രസിഡന്റ് എൻ.എസ്. പ്രസാദിന് നൽകി നിർവഹിച്ചു.
മേഖല പ്രസിഡന്റ് എൻ.എസ്. പ്രസാദ് അധ്യക്ഷത വഹിച്ചു.
സംസ്ഥാന പ്രസിഡന്റ് എ.സി. ജോൺസൺ മുഖ്യാതിഥിയായിരുന്നു.
സാന്ത്വനം പദ്ധതിയുടെ സംസ്ഥാന കോർഡിനേറ്ററും മേഖല ഇൻചാർജുമായ പി.വി. ഷിബു, ജില്ലാ സ്പോർട്സ് കോർഡിനേറ്റർ വേണു വെള്ളാങ്ങല്ലൂർ, ജില്ലാ കമ്മിറ്റിയംഗം സുരേഷ് കിഴുത്താണി എന്നിവർ പ്രസംഗിച്ചു.
ആൾ കേരള ഫോട്ടോഗ്രാഫേഴ്സ് അസോസിയേഷനിലേക്ക് പുതിയതായി അംഗത്വം സ്വീകരിച്ച 13 മെമ്പർമാർക്ക് കൂടി ചടങ്ങിൽ ഐഡി കാർഡ് വിതരണം ചെയ്തു.
മേഖല സെക്രട്ടറി സജയൻ കാറളം സ്വാഗതവും ട്രഷറർ ടി.സി. ആന്റോ നന്ദിയും പറഞ്ഞു.
സി. അച്യുതമേനോൻ കൊമ്പൊടിച്ച ബ്രാഹ്മണ്യം വീണ്ടും തലപൊക്കാൻ ശ്രമിച്ചാൽ അനുവദിക്കില്ല : ഡോ. അമൽ സി. രാജൻ
ഇരിങ്ങാലക്കുട : തച്ചുടകൈമളുടെ ദുരധികാരം അവസാനിപ്പിച്ച സി. അച്യുതമേനോൻ കൊമ്പൊടിച്ച ബ്രാഹ്മണ്യം വീണ്ടും തലപൊക്കാൻ ശ്രമിച്ചാൽ അനുവദിക്കില്ലെന്ന് എഴുത്തുകാരനും പ്രഭാഷകനുമായ ഡോ. അമൽ സി. രാജൻ അഭിപ്രായപ്പെട്ടു.
കൂടൽമാണിക്യം ക്ഷേത്രത്തിലെ ജാതി വിവേചനത്തിനെതിരെ എ.ഐ.വൈ.എഫ്.- യുവകലാസാഹിതി- എ.ഐ.ഡി.ആർ.എം. ഇരിങ്ങാലക്കുട മണ്ഡലം കമ്മിറ്റികളുടെ നേതൃത്വത്തിൽ “ഇനിയും തീണ്ടൽ പലകകൾ ഉയരാൻ അനുവദിക്കില്ല” എന്ന മുദ്രാവാക്യമുയർത്തി കുട്ടംകുളം സമരഭൂമിയിൽ സംഘടിപ്പിച്ച പ്രതിഷേധ സദസ്സിൽ മുഖ്യപ്രഭാഷണം നടത്തുകയായിരുന്നു അദ്ദേഹം.
പ്രതിഷേധ സദസ്സ് എ.ഐ.വൈ.എഫ്. സംസ്ഥാന പ്രസിഡന്റ് എൻ. അരുൺ ഉദ്ഘാടനം ചെയ്തു.
ജാതി ഉച്ചനീചത്വങ്ങൾക്ക് വഴങ്ങിക്കൊടുത്താൽ അത് ചരിത്രത്തെ നൂറ്റാണ്ടിൻ്റെ പുറകിലേക്ക് വലിച്ചെറിയലാകുമെന്ന് എൻ. അരുൺ പറഞ്ഞു.
യുവകലാസാഹിതി മണ്ഡലം സെക്രട്ടറി അഡ്വ. രാജേഷ് തമ്പാൻ അധ്യക്ഷത വഹിച്ചു.
എ.ഐ.വൈ.എഫ്. ജില്ല പ്രസിഡന്റ് ബിനോയ് ഷബീർ, യുവകലാസാഹിതി ജില്ല സെക്രട്ടറി സോമൻ താമരക്കുളം, എ.ഐ.ഡി.ആർ.എം. സംസ്ഥാന ട്രഷറർ ബാബു ചിങ്ങാരത്ത്, സി.പി.ഐ. ജില്ല എക്സിക്യൂട്ടീവ് അംഗങ്ങളായ ടി.കെ സുധീഷ്, കെ.എസ്. ജയ, സി.പി.ഐ. മണ്ഡലം അസി. സെക്രട്ടറി എൻ.കെ. ഉദയപ്രകാശ്, സി.പി.ഐ. മുതിർന്ന നേതാവ് കെ. ശ്രീകുമാർ എന്നിവർ പ്രസംഗിച്ചു.
എ.ഐ.വൈ.എഫ്. മണ്ഡലം സെക്രട്ടറി ടി.വി. വിബിൻ സ്വാഗതവും എ.ഐ.ഡി.ആർ.എം. നേതാവ് കെ.എസ്. പ്രസാദ് നന്ദിയും പറഞ്ഞു.
ആശാവർക്കർമാർക്കും അംഗൻവാടി ജീവനക്കാർക്കും ഐക്യദാർഢ്യവുമായി പൂമംഗലം മണ്ഡലം കോൺഗ്രസ്
ഇരിങ്ങാലക്കുട :
ആശാവർക്കർമാരുടെ സമരം ഒത്തു തീർപ്പാക്കുക, അംഗൻവാടി ജീവനക്കാർക്ക് അധികവേതനം നൽകുക എന്നീ ആവശ്യങ്ങൾ ഉന്നയിച്ചുകൊണ്ട് പൂമംഗലം മണ്ഡലം കോൺഗ്രസ് കമ്മിറ്റിയുടെ നേതൃത്വത്തിൽ പഞ്ചായത്ത് ഓഫീസിനു മുൻപിൽ കൂട്ട ധർണ്ണ നടത്തി.
ധർണ്ണ മുൻ പഞ്ചായത്ത് പ്രസിഡന്റ് അഡ്വ. ജോസ് മൂഞ്ഞേലി ഉദ്ഘാടനം ചെയ്തു.
മണ്ഡലം പ്രസിഡന്റ് എൻ. ശ്രീകുമാർ അധ്യക്ഷത വഹിച്ചു.
ബ്ലോക്ക് കോൺഗ്രസ് ജനറൽ സെക്രട്ടറിമാരായ ടി.ആർ. ഷാജു, ടി.ആർ. രാജേഷ്, ബ്ലോക്ക് ട്രഷറർ ടി.എസ്. പവിത്രൻ, മുൻ പഞ്ചായത്ത് വൈസ് പ്രസിഡന്റ് വി.ആർ. പ്രഭാകരൻ, പി.പി. ജോയ്, പഞ്ചായത്ത് മെമ്പർമാരായ കത്രീന ജോർജ്, ജൂലി ജോയ്, വി.ജി. അരുൺ, നിക്സൺ വർഗ്ഗീസ്, സോണി പാറക്കൽ എന്നിവർ പ്രസംഗിച്ചു.
ലാലി വർഗ്ഗീസ് സ്വാഗതവും, കെ.എസ്. അജി നന്ദിയും പറഞ്ഞു.
എസ്.എഫ്.ഐ. ഇരിങ്ങാലക്കുട ഏരിയ സമ്മേളനം : സംഘാടകസമിതി യോഗം ചേർന്നു
ഇരിങ്ങാലക്കുട : എസ്.എഫ്.ഐ ഇരിങ്ങാലക്കുട ഏരിയ സമ്മേളനത്തിന്റെ മുന്നോടിയായി സംഘാടകസമിതി യോഗം ചേർന്നു.
യോഗം സിപിഎം ഇരിങ്ങാലക്കുട ഏരിയ സെക്രട്ടറി വി.എ. മനോജ് കുമാർ ഉദ്ഘാടനം ചെയ്തു.
എസ്.എഫ്.ഐ. ഏരിയ പ്രസിഡന്റ് സിജിൻ അധ്യക്ഷത വഹിച്ചു.
സംസ്ഥാന കമ്മിറ്റി അംഗം വിഷ്ണു പ്രഭാകരൻ പ്രസംഗിച്ചു.
യോഗത്തിൽ ഏപ്രിൽ 12ന് കാട്ടൂരിൽ പ്രതിനിധി സമ്മേളനവും പൊതുസമ്മേളനവും നടത്താൻ തീരുമാനിച്ചു.
സി.പി.എം. കാട്ടൂർ ലോക്കൽ സെക്രട്ടറി ടി.വി. വിജീഷ് (ചെയർമാൻ), എസ്.എഫ്.ഐ. ഏരിയ സെക്രട്ടറി നവ്യകൃഷ്ണ (കൺവീനർ), പഞ്ചായത്ത് പ്രസിഡന്റ് ടി.വി. ലത (ട്രഷറർ) എന്നിവരെ തിരഞ്ഞെടുത്തു.
വിഷ്ണു സ്വാഗതവും അനുശ്രുതി നന്ദിയും പറഞ്ഞു.
