IRINJALAKUDA TIMES
ഇരിങ്ങാലക്കുട : കുട്ടികളുടെ മാനസിക ഉല്ലാസത്തിനൊപ്പം വിജ്ഞാനവും വർദ്ധിപ്പിക്കുന്ന രീതിയിൽ രൂപകല്പന ചെയ്ത ലിറ്റിൽ ഫ്ലവർ എൽ പി സ്കൂളിലെ നവീകരിച്ച ഏദൻ പാർക്കിന്റെ ഉദ്ഘാടനം കെഎസ്ഇ ജനറൽ മാനേജർ അനിൽ നിർവഹിച്ചു.
പിടിഎ പ്രസിഡന്റ് തോംസൺ ചിരിയങ്കണ്ടത്ത് അധ്യക്ഷത വഹിച്ചു.
ഉദയ എഡ്യൂക്കേഷൻ കൗൺസിലർ സിസ്റ്റർ മരിയറ്റ് ആശംസകൾ അർപ്പിച്ചു.
മുൻ എഡ്യൂക്കേഷൻ കൗൺസിലർ സിസ്റ്റർ ടെസ്‌ലിൻ, കെ എസ് ഇ സെക്രട്ടറി ശ്രീവിദ്യ എന്നിവർ പ്രസംഗിച്ചു.
ഹെഡ്മിസ്ട്രസ് സിസ്റ്റർ റിനറ്റ് സ്വാഗതവും ഐ കെ ആലീസ് നന്ദിയും പറഞ്ഞു.
ഇരിങ്ങാലക്കുട : കൂടൽമാണിക്യം ക്ഷേത്രത്തിലെ കുലീപിനി തീർത്ഥക്കുളത്തിൽ കാട്ടൂർ പൊഞ്ഞനം ഭഗവതിയുടെ ആറാട്ട് നടന്നു.
കുംഭമാസത്തിൽ ഉത്രം ആറാട്ടായി വരുന്ന വിധത്തിൽ കൊടികയറി നടക്കുന്ന എട്ടു ദിവസത്തെ ഉത്സവത്തിൽ നാലാം ദിവസമാണ് കൂടൽമാണിക്യം ക്ഷേത്രത്തിലെ കുലീപിനി തീർത്ഥക്കുളത്തിൽ ആറാട്ട് നടത്തുന്നത്.
മറ്റു ദിവസങ്ങളിലെല്ലാം പൊഞ്ഞനം ക്ഷേത്രക്കുളത്തിൽ തന്നെ ആറാട്ട് നടക്കും.
രാവിലെ 7 മണിയോടെ ആനപ്പുറത്ത് വാദ്യമേളങ്ങളുടെ അകമ്പടിയോടെ ഭഗവതി കൂടൽമാണിക്യം ക്ഷേത്രത്തിൽ എത്തിച്ചേർന്നു. തുടർന്നാണ് ആറാട്ട് നടന്നത്.
ആറാട്ടിനു ശേഷം കിഴക്കേ നടപ്പുരയിൽ മേളം കൊട്ടി അവസാനിച്ച് അമ്പലം ചുറ്റി ഒരു പ്രദക്ഷിണവും നടത്തിയാണ് പൊഞ്ഞനം ഭഗവതി തിരിച്ചെഴുന്നള്ളിയത്.
കൂടൽമാണിക്യം ക്ഷേത്രത്തിലെ ആറാട്ട് പോലും ഇവിടെ നടത്താത്ത സന്ദർഭത്തിലാണ് പൊന്നനത്തമ്മയുടെ ആറാട്ട് കുലീപിനി തീർത്ഥ കുളത്തിൽ നടക്കുന്നത് എന്ന സവിശേഷതയുമുണ്ട് ഈ ചടങ്ങിന്.
ആറാട്ടിന് തന്ത്രി മണക്കാട് പരമേശ്വരൻ നമ്പൂതിരിപ്പാട് നേതൃത്വം നൽകി.
കൊച്ചിൻ ദേവസ്വം ബോർഡ് സ്പെഷ്യൽ കമ്മീഷണർ എസ് ആർ ഉദയകുമാർ, ഡെപ്യൂട്ടി കമ്മീഷണർ സുനിൽ കർത്ത, ദേവസ്വം ബോർഡ് സെക്രട്ടറി സി ബിന്ദു, പൊഞ്ഞനം ക്ഷേത്രം പ്രസിഡന്റ് തിലകൻ തെയ്യശ്ശേരി, സെക്രട്ടറി കെ സതീഷ്, കൂടൽമാണിക്യം ദേവസ്വം ചെയർമാൻ അഡ്വ സി കെ ഗോപി, ഭരണസമിതി അംഗങ്ങളായ അഡ്വ കെ ജി അജയകുമാർ, കെ ബിന്ദു തുടങ്ങിയവരും നിരവധി ഭക്തജനങ്ങളും ചടങ്ങിൽ പങ്കെടുത്തു.
ഇരിങ്ങാലക്കുട : ബിജെപി ഇരിങ്ങാലക്കുട മണ്ഡലം കമ്മറ്റിയുടെ നേതൃത്വത്തിൽ ദീനദയാൽ ഉപാധ്യായ ബലിദാന ദിനത്തോടനുബന്ധിച്ച് പുഷ്പാർച്ചനയും അനുസ്മരണ സമ്മേളനവും സംഘടിപ്പിച്ചു.
മണ്ഡലം പ്രസിഡന്റ് ആർച്ച അനീഷ് അധ്യക്ഷത വഹിച്ചു.
സംസ്ഥാന കമ്മറ്റിയംഗം സന്തോഷ് ചെറാക്കുളം ഉദ്ഘാടനം ചെയ്തു.
മുൻ പ്രസിഡന്റ് കൃപേഷ് ചെമ്മണ്ട, നേതാക്കളായ രമേഷ് അയ്യർ, രാജൻ കുഴുപ്പുള്ളി, ലിഷോൺ ജോസ്, മനു മഹാദേവ് എന്നിവർ പ്രസംഗിച്ചു.
ഇരിങ്ങാലക്കുട : ദേശീയപാത 66 മതിലകം പുതിയകാവിൽ കാറും ബൈക്കും കൂട്ടിയിടിച്ച് ബൈക്ക് യാത്രികൻ മരിച്ചു.
കയ്പമംഗലം സ്വദേശിയും ശ്രീനാരായണപുരത്ത് താമസക്കാരനുമായ നടക്കൽ രാമൻ്റെ മകൻ ജ്യോതി പ്രകാശനാ(63)ണ് മരിച്ചത്.
ചൊവ്വാഴ്ച രാവിലെ 8 മണിയോടെ പുതിയകാവ് മദ്രസയ്ക്ക് മുന്നിലായിരുന്നു അപകടം.
വടക്ക് ഭാഗത്ത് നിന്നും വന്നിരുന്ന കാർ എതിരെ വന്നിരുന്ന ബൈക്കിൽ ഇടിക്കുകയായിരുന്നു.
ഉടൻ തന്നെ ആക്ട്‌സ് പ്രവർത്തകർ ജ്യോതി പ്രകാശനെ കൊടുങ്ങല്ലൂരിലെ സ്വകാര്യ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല.
കയ്‌പമംഗലത്ത് നിർമ്മാണം നടക്കുന്ന സ്വന്തം വീട്ടിലേക്ക് പോകവെയാണ് അപകടമുണ്ടായത്.
മതിലകം പൊലീസ് മേൽ നടപടികൾ സ്വീകരിച്ചു.
ഇരിങ്ങാലക്കുട : അന്യം നിന്നു പോകുന്ന നാടൻകലകളെ പ്രോത്സാഹിപ്പിക്കുക എന്ന ഉദ്ദേശ്യത്തോടെ, ഭാരതീയ വിദ്യാഭവന്റെയും ഇൻഫോസിസ് ഫൗണ്ടേഷൻ്റെയും സംയുക്താഭിമുഖ്യത്തിൽ രാജ്യവ്യാപകമായി സംഘടിപ്പിക്കുന്ന കലാപ്രോത്സാഹന യജ്ഞത്തിന്റെ ഭാഗമായി ഇരിങ്ങാലക്കുട ഭാരതീയ വിദ്യാഭവനിൽ സംഘടിപ്പിച്ച കലാശില്പശാല ”കളമരങ്ങ്” വിദ്യാർഥികളിൽ കൗതുകമുണർത്തി.
കളമെഴുത്ത്, ഓട്ടൻതുള്ളൽ എന്നീ കലാരൂപങ്ങളെക്കുറിച്ച് പുതുതലമുറയ്ക്ക് അറിവു പകരാൻ ശില്പശാലയിലൂടെ അവസരമൊരുങ്ങി.
പ്രസിദ്ധ കളമെഴുത്ത് കലാകാരനും കേരള ഫോക്‌ലോർ അക്കാദമി അവാർഡ് ജേതാവുമായ കടന്നമണ്ണ ശ്രീനിവാസൻ, കേരള കലാമണ്ഡലം ഓട്ടൻതുള്ളൽ വിഭാഗം മേധാവിയും കേരള സംഗീത നാടക അക്കാദമി അവാർഡ് ജേതാവുമായ കലാമണ്ഡലം മോഹനകൃഷ്ണൻ എന്നിവരാണ് ശില്പശാല നയിച്ചത്.
കേരള കലാമണ്ഡലത്തിൽ നിന്നുള്ള ഐശ്വര്യ എസ് കുമാർ, അനിരുദ്ധ്, അദ്വൈത ആനന്ദ് എന്നീ വിദ്യാർഥികളും ശില്പശാലയിൽ പങ്കുചേർന്നു.
ഉദ്ഘാടന സമ്മേളനത്തിൽ ചെയർമാൻ അപ്പുക്കുട്ടൻ നായർ, സെക്രട്ടറി വി രാജൻ, മാനേജ്മെന്റ് കമ്മിറ്റി അംഗങ്ങളായ പി എൻ മേനോൻ, വിവേകാനന്ദൻ, പ്രിൻസിപ്പൽ ബിജു ഗീവർഗീസ്, വൈസ് പ്രിൻസിപ്പൽ ശോഭ ശിവാനന്ദരാജൻ, മലയാള വിഭാഗം മേധാവി ബിന്ദുമതി എന്നിവർ പങ്കെടുത്തു.
സ്കൂളിലെ മലയാളം വിഭാഗമാണ് പരിപാടികൾ ഏകോപിപ്പിച്ചത്.
ഇരിങ്ങാലക്കുട : കേരള വ്യാപാരി വ്യവസായി ഏകോപനസമിതി മുൻ സംസ്ഥാന പ്രസിഡന്റ് ടി നസിറുദ്ദീന്റെ ഓർമ്മദിനം വ്യാപാരഭവനിൽ ആചരിച്ചു.
ഇരിങ്ങാലക്കുട മേഖല പ്രസിഡന്റ് ഷാജു പാറേക്കാടൻ അനുസ്മരണയോഗം ഉദ്ഘാടനം ചെയ്തു
ജനറൽ സെക്രട്ടറി എബിൻ വെള്ളാനിക്കാരൻ, ട്രഷറർ വി കെ അനിൽകുമാർ എന്നിവർ പ്രസംഗിച്ചു.
ലിഷോൺ ജോസ്, ഷൈജോ ജോസ്, കെ ആർ ബൈജു, ഡീൻ ഷഹീദ് എന്നിവർ നേതൃത്വം നൽകി.
ഇരിങ്ങാലക്കുട : സീനിയർ യൂത്ത്, മാകെയർ ഡയഗ്നോസ്റ്റിക്സ് എന്നിവർ സംയുക്തമായി സംഘടിപ്പിക്കുന്ന സൗജന്യ മെഡിക്കൽ ക്യാമ്പ് ഫെബ്രുവരി 16ന് രാവിലെ 9.30 മുതൽ 12.30 വരെ പൊറത്തിശ്ശേരി സെന്റ് സെബാസ്റ്റ്യൻസ് പള്ളി പാരീഷ് ഹാളിൽ സംഘടിപ്പിക്കും.
പള്ളി വികാരി ഫാ സെബാസ്റ്റ്യൻ നടവരമ്പൻ ക്യാമ്പ് ഉദ്ഘാടനം ചെയ്യും.
ക്യാമ്പിൽ കാഴ്ച പരിശോധന, ദന്ത പരിശോധന, ബ്ലഡ് പ്രഷർ, ബ്ലഡ് ഷുഗർ, പൾസ് തുടങ്ങിയ പരിശോധനകൾ സൗജന്യമായിരിക്കും.
ക്യാമ്പിൽ പങ്കെടുക്കുന്നവർക്ക് തിമിര ശസ്ത്രക്രിയ സൗജന്യമായി ചെയ്തു നൽകും.
ഇരിങ്ങാലക്കുട : മൂര്‍ക്കനാട് സെന്റ് ആന്റണീസ് എല്‍ പി സ്‌കൂളിന്റെ 101-ാം വാര്‍ഷികം നഗരസഭ കൗണ്‍സിലര്‍ നസീമ കുഞ്ഞുമോന്‍ ഉദ്ഘാടനം ചെയ്തു.
സ്‌കൂള്‍ മാനേജര്‍ ഫാ സിന്റോ മാടവന അധ്യക്ഷത വഹിച്ചു.
രൂപത കോര്‍പ്പറേറ്റ് മാനേജര്‍ ഫാ സീജോ ഇരിമ്പന്‍ സമ്മാനദാനം നിര്‍വഹിച്ചു.
കെ ഐ റീന, ഹീര ഫ്രാന്‍സിസ് ആലപ്പാട്ട്, ജെറി വര്‍ഗീസ്, ഫിന്റോ പി പോള്‍, എം ഡി ചാക്കോ, കെ വി റിന്‍സി, എം എസ് ദേവശ്രീകൃഷ്ണ, കെ എം ഷെബീന, അധ്യാപകരായ റീജ ജോസഫ്, സി സി ആനി റോസ് എന്നിവര്‍ പ്രസംഗിച്ചു.
ഇരിങ്ങാലക്കുട : ബൈപ്പാസ് റോഡ് ഉടൻ സഞ്ചാര യോഗ്യമാക്കുക, കുട്ടംകുളം മതിലിൻ്റെ പണി ഉടൻ ആരംഭിക്കുക, ഹൈക്കോടതിയിൽ കള്ള സത്യവാങ്മൂലം നൽകി പൂട്ടിച്ച ഈവനിംഗ് മാർക്കറ്റ് തുറക്കുക, ഗവ ആയുർവ്വേദ ആശുപത്രി വിപുലീകരിക്കുക തുടങ്ങിയ ആവശ്യങ്ങൾ ഉന്നയിച്ചു കൊണ്ട് ബി ജെ പി ഇരിങ്ങാലക്കുട മണ്ഡലം കമ്മിറ്റിയുടെ നേതൃത്വത്തിൽ ആൽത്തറയ്ക്കൽ പ്രതിഷേധ സമരം സംഘടിപ്പിച്ചു.
മണ്ഡലം പ്രസിഡന്റ് ആർച്ച അനീഷ് അധ്യക്ഷത വഹിച്ചു.
മുൻ ജില്ലാ കമ്മറ്റി അംഗം കെ പി ഉണ്ണികൃഷ്ണൻ സമരം ഉദ്ഘാടനം ചെയ്തു.
കൃപേഷ് ചെമ്മണ്ട, സന്തോഷ് ചെറാക്കുളം, ഷൈജു കുറ്റിക്കാട്ട്, കവിത ബിജു, സന്തോഷ് ബോബൻ, വി സി രമേഷ്, വിൻസെൻ്റ് ചിറ്റിലപ്പിള്ളി എന്നിവർ പ്രസംഗിച്ചു.
രാജൻ കുഴുപ്പുള്ളി, രമേഷ് അയ്യർ, അമ്പിളി ജയൻ, സുചിത ഷിനോബ്, ലീന ഗിരീഷ്, ടി ഡി സത്യദേവ്, ലിഷോൺ ജോസ്, അജയൻ തറയിൽ, വി ജി ഗോപാലകൃഷ്ണൻ, മായ അജയൻ, സരിത സുഭാഷ്, വിജയകുമാരി അനിലൻ, ഷാജുട്ടൻ, മനു മഹാദേവ്, സൂരജ് കടുങ്ങാടൻ, ബാബുരാജ് എന്നിവർ നേതൃത്വം നൽകി.
ഇരിങ്ങാലക്കുട : ചേലൂക്കാവ് ശ്രീകുരുംബ ഭഗവതി ക്ഷേത്രത്തിലെ താലപ്പൊലി മഹോത്സവം വിപുലമായ പരിപാടികളോടെ ഫെബ്രുവരി 12, 13 എന്നീ തീയ്യതികളിൽ ആഘോഷിക്കും.
12ന് വൈകീട്ട് 7.30ന് കരിന്തണ്ടൻ ഫോക്ക് ബാൻഡ് അവതരിപ്പിക്കുന്ന നാടൻപാട്ടും ദൃശ്യാവിഷ്കാരവും അരങ്ങേറും.
13ന് രാവിലെ 6.30ന് ആചാരപ്രകാരം 101 കതിനവെടി, തുടർന്ന് സോപാന സംഗീതം, ഉച്ചയ്ക്ക് 11 മുതൽ 1.30 വരെ അന്നദാനം എന്നിവ ഉണ്ടായിരിക്കും.
ഉച്ചതിരിഞ്ഞ് 2.30ന് അഞ്ച് ഗജവീരന്മാരെ അണിനിരത്തി പഞ്ചവാദ്യത്തിന്റെ അകമ്പടിയോടെ പുറത്തേക്ക് എഴുന്നള്ളിപ്പ് ആരംഭിക്കും.
സന്ധ്യയ്ക്ക് 7 മണിക്ക് അകത്തേക്ക് എഴുന്നള്ളിപ്പ്, തുടർന്ന് ദീപാരാധനയ്ക്കു ശേഷം വർണ്ണമഴ, 7.40ന് തായമ്പക, 8 മണി മുതൽ വിവിധ കലാപരിപാടികൾ, പുലർച്ചെ 2 മണിക്ക് പുറത്തേക്കും 4 മണിക്ക് അകത്തേക്കുമുള്ള എഴുന്നള്ളിപ്പുകൾ എന്നിവയും നടക്കും.
