IRINJALAKUDA TIMES
മേരി
ഇരിങ്ങാലക്കുട : പരേതനായ ചിറ്റിലപ്പിള്ളി കോക്കാട്ട് ലോനപ്പൻ ഭാര്യ മേരി (95) നിര്യാതയായി.
സംസ്കാരം ബുധനാഴ്ച (ജനുവരി 7) ഉച്ചതിരിഞ്ഞ് 3 മണിക്ക് വല്ലക്കുന്ന് സെൻ്റ് അൽഫോൻസ ദേവാലയത്തിലെ തിരുകർമ്മങ്ങൾക്കു ശേഷം കല്ലേറ്റുംകര ഉണ്ണിമിശിഹാ ദേവാലയ സെമിത്തേരിയിൽ.
മക്കൾ : ഗ്രേസി, അൻസി, പരേതനായ പോൾസൺ, പരേതനായ ജോൺസൺ, വത്സ, ലിസി, ജെയ്മോൻ, സിന്ധു
മരുമക്കൾ : പരേതനായ ജോർജ്ജ്, മാത്യു, ലിജി, മോളി, പരേതനായ ജോർജ്ജ്, ബെർണാർഡ്, സയൻ, ബിനു
ഇരിങ്ങാലക്കുട :
ഭാരതീയ പരമ്പരാഗത വിജ്ഞാനവും ശാസ്ത്രീയ ചിന്തയും തമ്മിലുള്ള ബന്ധം വിശദീകരിക്കുന്ന ദേശീയ സെമിനാറിന്റെ രണ്ടാം ദിനത്തിൽ പത്മശ്രീ പുരസ്കാര ജേതാവും വയനാടൻ ഗോത്രകർഷകനുമായ ചെറുവയൽ രാമനുമായുള്ള സംവാദം മുഖ്യ ആകർഷണമായി.
“വിത്തുകളുടെ വൈവിധ്യവും സവിശേഷതകളും” എന്ന വിഷയത്തിൽ നടന്ന സംവാദത്തിൽ മണ്ണിന്റെയും വിത്തുകളുടെയും സംരക്ഷണത്തെ ആസ്പദമാക്കിയ തന്റെ ജീവിതാനുഭവങ്ങൾ അദ്ദേഹം പങ്കുവച്ചു.
കാലിക്കറ്റ് സർവകലാശാല സുവോളജി വിഭാഗം അസി. പ്രൊഫ. ഡോ. ഇ.എം. അനീഷ് നയിച്ച സംവാദത്തിൽ പരമ്പരാഗത കൃഷിജ്ഞാനത്തിന്റെ പ്രസക്തിയും പരിസ്ഥിതി സംരക്ഷണത്തിൽ അതിന്റെ പങ്കും ചർച്ചയായി.
വിദ്യാഭ്യാസം പാഠപുസ്തകങ്ങളിൽ മാത്രം ഒതുങ്ങുന്നതല്ല എന്ന് അഭിപ്രായപ്പെട്ട ചെറുവയൽ രാമൻ ആധുനിക വികസന മാതൃകകൾക്കിടയിൽ നഷ്ടമാകുന്ന നാട്ടറിവുകൾ സംരക്ഷിക്കേണ്ടതിന്റെ ആവശ്യകതയും ചൂണ്ടിക്കാട്ടി.
രാവിലെ ജൽഗോൺ (മഹാരാഷ്ട്ര) മൂൽജി ജൈതാ ഓട്ടോണമസ് കോളേജിലെ നോളെജ് റിസോഴ്സ് സെന്റർ ഡയറക്ടറായ ഡോ. വിജയ് ശ്രീനാഥ് കാഞ്ചി “വേദങ്ങളിലെ ശാസ്ത്രാന്വേഷണം” എന്ന വിഷയത്തിൽ പ്രഭാഷണം നടത്തി.
ഭാരതീയ വേദങ്ങളിലെ ശാസ്ത്രീയ ചിന്തയുടെ ആഴവും യുക്തിബോധവും അദ്ദേഹം വിശദീകരിച്ചു.
റിസർച്ച് സെമിനാർ ഹാളിൽ നടന്ന ക്ലാസ് സുവോളജിസ്റ്റും വൈൽഡ് ലൈഫ് ഫോട്ടോഗ്രാഫറുമായ ഡോ. സന്ദീപ് ദാസ് നയിച്ചു.
ജനകീയ വിജ്ഞാനവും ജൈവ വൈവിധ്യ സംരക്ഷണവും തമ്മിലുള്ള ബന്ധം അദ്ദേഹം അവതരിപ്പിച്ചു.
ഇതേ സെഷനിൽ മലപ്പുറം മഞ്ചേരി ഗവ. ഹയർ സെക്കൻഡറി സ്കൂൾ അധ്യാപകനായ പ്രമോദ് ഇരുമ്പുഴി “ഫോക്ലോറിൽ ഒളിപ്പിച്ചിരിക്കുന്ന ശാസ്ത്രം” എന്ന വിഷയത്തിൽ പ്രഭാഷണം നടത്തി.
കൂടാതെ മുൻ ഫെഡോ – ഫാക്ട് ചീഫ് എഞ്ചിനീയർ ഡോ. രാജശേഖർ പി. വൈക്കം “ഗണിതശാസ്ത്രവും ജ്യോതിശാസ്ത്രവും തമ്മിലുള്ള സവിശേഷ ബന്ധം” എന്ന വിഷയത്തിലും പത്മശ്രീ പ്രൊഫ. ശാരദ ശ്രീനിവാസൻ (ദേശീയ ഇൻസ്റ്റിറ്റ്യൂട്ട് ഓഫ് അഡ്വാൻസ്ഡ് സ്റ്റഡീസ്, ബാംഗ്ലൂർ) “ഇന്ത്യയിലെ ആർക്കിയോ മെറ്റലർജി” എന്ന വിഷയത്തിലും പ്രഭാഷണം നടത്തി.
വിദ്യാർഥികളും ഗവേഷകരും അധ്യാപകരും ഉൾപ്പെടെ വലിയൊരു സദസാണ് സെമിനാറിൽ പങ്കെടുത്തത്.
ഭാരതീയ ജ്ഞാന പരമ്പരകളെ ആധുനിക ചിന്തയുമായി ബന്ധിപ്പിക്കുന്ന സെമിനാർ അക്കാദമിക രംഗത്ത് ശ്രദ്ധേയമായി.
ഇരിങ്ങാലക്കുട : എസ്.എൻ.ഡി.പി. യോഗം ജനറൽ സെക്രട്ടറി വെള്ളാപ്പള്ളി നടേശനെതിരെ ചില സംഘടിത വിഭാഗങ്ങൾ നടത്തുന്ന ആക്രമണത്തിൽ എസ്.എൻ.ഡി.പി. യോഗം മുകുന്ദപുരം യൂണിയൻ പ്രതിഷേധിച്ചു.
ഇരിങ്ങാലക്കുട പൂതംകുളം മൈതാനിയിൽ നിന്നും ആരംഭിച്ച പ്രതിഷേധത്തെ തുടർന്ന് ആൽത്തറയ്ക്കൽ ചേർന്ന പ്രതിഷേധയോഗം യൂണിയൻ പ്രസിഡൻ്റ് സന്തോഷ് ചെറാക്കുളം ഉദ്ഘാടനം ചെയ്തു.
വെള്ളാപ്പള്ളി നടേശൻ വിളിച്ചു പറയുന്ന സമൂഹസത്യങ്ങൾ കേൾക്കുമ്പോൾ അദ്ദേഹത്തെ വർഗ്ഗീയ വാദിയാക്കി ചിത്രീകരിക്കുവാൻ ശ്രമിച്ചാൽ യോഗം പ്രവർത്തകർ ശക്തമായി പ്രതികരിക്കുമെന്ന് അദ്ദേഹം പറഞ്ഞു.
യൂണിയൻ സെക്രട്ടറി കെ.കെ. ചന്ദ്രൻ അധ്യക്ഷത വഹിച്ചു.
യോഗം കൗൺസിലർ പി.കെ. പ്രസന്നൻ, എസ്.എൻ.ബി.എസ്. സമാജം പ്രസിഡൻ്റ് കിഷോർ കുമാർ നടുവളപ്പിൽ, എസ്.എൻ.ഡി.പി. വൈദിക യോഗം സംസ്ഥാന വൈസ് പ്രസിഡൻ്റ് ശിവദാസ് ശാന്തി തുടങ്ങിയവർ പ്രസംഗിച്ചു.
പ്രതിഷേധ പ്രകടനത്തിന് യോഗം ഡയറക്ടർ സി.കെ. യുധി, യൂണിയൻ വൈസ് പ്രസിഡൻ്റ് സുബ്രഹ്മണ്യൻ മുതുപറമ്പിൽ, വനിതാസംഘം യൂണിയൻ പ്രസിഡൻ്റ് സജിത അനിൽകുമാർ, നമിത, യൂണിയൻ കൗൺസിലർമാരായ അനിഷ് പൂവ്വത്തുംകടവിൽ, എൻ.ബി. ബിജോയ്, സുഗതൻ തുടങ്ങിയവർ നേതൃത്വം നൽകി.
ഇരിങ്ങാലക്കുട : സെൻ്റ് തോമസ് കത്തീഡ്രൽ സി.എൽ.സി.യുടെ ആഭിമുഖ്യത്തിൽ ദനഹാ തിരുനാളിനോടനുബന്ധിച്ച് ജനുവരി 10ന് പിണ്ടി മത്സരം സംഘടിപ്പിക്കുമെന്ന് സംഘാടകർ അറിയിച്ചു.
10001 രൂപയും കടങ്ങോട്ട് ജോർജ്ജ് മെമ്മോറിയൽ എവർ റോളിംഗ് ട്രോഫിയുമാണ് ഒന്നാം സമ്മാനം.
രണ്ടാം സമ്മാനമായി 5001 രൂപയും പാറേക്കാടൻ ഇട്യാര- കൊച്ചന്നം മെമ്മോറിയൽ ട്രോഫിയും, മൂന്നാം സമ്മാനമായി 4001 രൂപയും കൈതാരം തോമസ് പൗലോസ് മെമ്മോറിയൽ ട്രോഫിയും, നാലാം സമ്മാനമായി 3001 രൂപയും കോമ്പാറ കരപറമ്പിൽ വാറുതുട്ടി ഔസേപ്പ് മെമ്മോറിയൽ ട്രോഫിയും, അഞ്ചാം സമ്മാനമായി 2001 രൂപയും ട്രോഫിയും ലഭിക്കും.
200 രൂപയാണ് രജിസ്ട്രേഷൻ ഫീസ്.
രജിസ്ട്രേഷനും കൂടുതൽ വിവരങ്ങൾക്കും 7560821596, 9061152603, 9995164937 എന്നീ നമ്പറുകളിൽ ബന്ധപ്പെടാവുന്നതാണ്.
തൃശൂർ : വിയ്യൂർ ജില്ലാ ജയിലിൽ “ധ്വനി” എന്ന പേരിൽ സംഘടിപ്പിച്ച ക്ഷേമ ദിനാഘോഷ പരിപാടികൾ ജില്ലാ നിയമ സേവന അതോറിറ്റി സെക്രട്ടറി സബ് ജഡ്ജ് സരിത രവീന്ദ്രൻ ഉദ്ഘാടനം ചെയ്തു.
സെൻട്രൽ ജയിൽ സൂപ്രണ്ട് കെ. അനിൽകുമാർ അധ്യക്ഷത വഹിച്ചു.
ജില്ലാ ആശുപത്രി സൂപ്രണ്ട് ഡോ. താജ്പോൾ പനയ്ക്കൽ മുഖ്യപ്രഭാഷണം നടത്തി.
ജില്ലാ ജയിൽ സൂപ്രണ്ട് രതീഷ്, വെൽഫയർ ഓഫീസർ സൂര്യ, സുരേഷ് കുമാർ, ശശികുമാർ എന്നിവർ പ്രസംഗിച്ചു.
ജില്ലാ ജയിലിലെ പുതുതായി നിർമ്മിച്ച സ്റ്റേജ് സെൻട്രൽ ജയിൽ സൂപ്രണ്ട് അനിൽകുമാർ നാട മുറിച്ച് ഉദ്ഘാടനം ചെയ്തു.
തുടർന്ന് വിവിധ കലാപരിപാടികളും അരങ്ങേറി.
ഇരിങ്ങാലക്കുട : തൃശൂർ റൂറൽ പൊലീസിന്റെ കുതിപ്പിന് വേഗം കൂട്ടാൻ പുതിയ നാല് വാഹനങ്ങൾ കൂടിയെത്തി.
സംസ്ഥാന സർക്കാരിന്റെ 2025-26 വർഷത്തെ പ്ലാൻ സ്കീമിൽ ഉൾപ്പെടുത്തി അനുവദിച്ച മഹീന്ദ്ര ബൊലേറൊ വാഹനങ്ങളാണ് റൂറൽ ജില്ലയ്ക്ക് ലഭിച്ചത്.
ജില്ലാ ക്രൈം ബ്രാഞ്ച് ഡിവൈഎസ്പിക്കും മൂന്ന് പൊലീസ് സ്റ്റേഷനുകൾക്കുമായാണ് പുതിയ വാഹനങ്ങൾ ലഭിച്ചത്.
കയ്പമംഗലം, വലപ്പാട്, കൊരട്ടി എന്നീ സ്റ്റേഷനുകൾക്ക് മഹീന്ദ്ര ബൊലേറൊ ബി4 മോഡൽ വാഹനങ്ങളും, ജില്ലാ ക്രൈം ബ്രാഞ്ച് ഡിവൈഎസ്പിക്ക് മഹീന്ദ്ര ബൊലേറൊ നിയോയുമാണ് ലഭിച്ചത്.
തിരുവനന്തപുരത്ത് നടന്ന ഔദ്യോഗിക ചടങ്ങിൽ ഏറ്റു വാങ്ങിയ വാഹനങ്ങൾ റൂറൽ ജില്ലാ പൊലീസ് ആസ്ഥാനമായ ഇരിങ്ങാലക്കുടയിൽ എത്തിച്ചു. തുടർന്ന് ബന്ധപ്പെട്ട ഉദ്യോഗസ്ഥർക്ക് വാഹനങ്ങൾ കൈമാറി.
സേനയുടെ കാര്യക്ഷമത വർദ്ധിപ്പിക്കുന്നതിനും അടിസ്ഥാന സൗകര്യങ്ങൾ മെച്ചപ്പെടുത്തുന്നതിനുമുള്ള സർക്കാരിന്റെ കർമ്മപദ്ധതിയുടെ ഭാഗമായാണ് വാഹനങ്ങൾ അനുവദിച്ചിരിക്കുന്നത്.
കാലഹരണപ്പെട്ട വാഹനങ്ങൾ ഘട്ടംഘട്ടമായി മാറ്റി പുതിയവ നിരത്തിലിറക്കുന്നതോടെ കുറ്റാന്വേഷണ രംഗത്തും ക്രമസമാധാന പാലനത്തിലും വലിയ മാറ്റമുണ്ടാകും.
പൊതുജനങ്ങൾക്ക് പൊലീസിന്റെ സേവനം കൂടുതൽ വേഗത്തിൽ എത്തിക്കാൻ ഈ വാഹനങ്ങൾ സഹായിക്കുമെന്ന് ജില്ലാ പൊലീസ് മേധാവി ബി. കൃഷ്ണകുമാർ പറഞ്ഞു.
ആധുനിക സജ്ജീകരണങ്ങളോടെയുള്ള വാഹനങ്ങൾ എത്തുന്നതോടെ റൂറൽ പൊലീസിന്റെ പ്രവർത്തന ക്ഷമത വർദ്ധിക്കുമെന്നും അദ്ദേഹം കൂട്ടിച്ചേർത്തു.
ഇരിങ്ങാലക്കുട : അമ്മന്നൂർ ഗുരുകുലത്തിൽ നടന്നു വരുന്ന കൂടിയാട്ട മഹോത്സവത്തിൻ്റെ ഭാഗമായി ഇന്ന് (ജനുവരി 6) വൈകീട്ട് 5 മണിക്ക് ജപ്പാനീസ് കലാകാരിയായ മിച്ചികൊ ഒനൊ അവതരിപ്പിക്കുന്ന ‘മധൂകശാപം’ നങ്ങ്യാർകൂത്ത് അരങ്ങേറും.
ഗുരുകുലത്തിലെ കലാകാരിയായ സരിത കൃഷ്ണകുമാറിൻ്റെ ശിഷ്യയാണ് മിച്ചികൊ.
ഈ അവതരണത്തിൻ്റെ മറ്റൊരു സവിശേഷത മിച്ചികൊയോടെപ്പം അരങ്ങിൽ മിഴാവ് കൊട്ടുന്നതും ശ്ലോകം ചൊല്ലുന്നതും ജപ്പാൻ വനിതകളാണ്.
തൊയോമി ഇവാത്തൊ എന്ന ജപ്പാൻ സ്വദേശിനി ചിട്ടയായ രീതിയിൽ മിഴാവ് അഭ്യസിച്ച് പരിപാടികളിൽ പങ്കെടുത്തിട്ടുണ്ട്.
അമ്മന്നൂർ ഗുരുകുലത്തിൻ്റെ ചരിത്രത്തിൽ ആദ്യമായി ഒരു വിദേശവനിത മിഴാവ് കൊട്ടുന്നു എന്ന പ്രത്യേകതയും ഈ അവതരണത്തിനുണ്ട്.
മറ്റൊരു ജപ്പാൻ വനിതയായ തൊമോയെ താര ഇറിനോ ആണ് അരങ്ങിൽ താളം പിടിക്കുകയും ശ്ലോകം ചൊല്ലുകയും ചെയ്യുന്നത്.
ഇരിങ്ങാലക്കുട : അക്ഷരബോധിനി സംസ്ഥാന പുരസ്കാരത്തിന് കൊടുങ്ങല്ലൂർ എറിയാട് ശിശു വിദ്യാപോഷിണി സ്കൂളിലെ പ്രധാന അധ്യാപിക കെ. സരിത അർഹയായി.
ആലപ്പുഴയിലെ ചെങ്ങന്നൂർ ബോധിനിയാണ് ഈ പുരസ്കാരം (10001 രൂപ) ഏർപ്പെടുത്തിയിട്ടുള്ളത്.
ഭാഷ, സന്നദ്ധ സേവനം എന്നീ മേഖലകളെ പരിഗണിച്ചുകൊണ്ടാണ് പുരസ്കാരം നൽകുന്നത്.
ജനുവരി 30ന് ആലപ്പുഴയിൽ വച്ച് നടക്കുന്ന ചടങ്ങിൽ പുരസ്കാരം സമ്മാനിക്കും.
ഇരിങ്ങാലക്കുട : ബിജെപി ഇരിങ്ങാലക്കുട മണ്ഡലം ഓഫീസ് തുറന്ന് പ്രവർത്തനം ആരംഭിച്ചു.
കാട്ടൂർ റോഡിൽ നാഷണൽ സ്കൂളിന് സമീപം കാരന്തറത്ത് ലക്ഷ്മിക്കുട്ടി അമ്മ മെമ്മോറിയൽ ബിൽഡിംഗിൻ്റെ രണ്ടാം നിലയിലാണ് ഓഫീസ് തുറന്ന് പ്രവർത്തനം ആരംഭിച്ചത്.
ബിജെപി സൗത്ത് ജില്ല ജനറൽ സെക്രട്ടറി കെ.പി. ഉണ്ണികൃഷ്ണൻ ഉദ്ഘാടനം ചെയ്തു.
മധുരം നൽകിയ ശേഷം മണ്ഡലം നേതൃയോഗം നടന്നു.
മണ്ഡലം പ്രസിഡൻ്റ് ആർച്ച അനീഷ് അധ്യക്ഷത വഹിച്ചു.
സംസ്ഥാന സമിതി അംഗം സന്തോഷ് ചെറാക്കുളം, സംസ്ഥാന കൗൺസിൽ അംഗങ്ങളായ വേണു മാസ്റ്റർ, സന്തോഷ് ബോബൻ, കാറളം ബ്ലോക്ക് മെമ്പർ അജയൻ തറയിൽ, സൗത്ത് ജില്ല സെക്രട്ടറി വിപിൻ പാറമേക്കാട്ടിൽ എന്നിവർ ആശംസകൾ നേർന്നു.
മണ്ഡലം ജനറൽ സെക്രട്ടറിമാരായ ഷൈജു കുറ്റിക്കാട്ട് സ്വാഗതവും വി.സി. രമേഷ് നന്ദിയും പറഞ്ഞു.
മണ്ഡലം ഭാരവാഹികളായ രമേശ് അയ്യർ, രാമചന്ദ്രൻ കോവിൽപറമ്പിൽ, അമ്പിളി ജയൻ, മായ അജയൻ, സരിത വിനോദ്, നഗരസഭ കൗൺസിലർമാർ,
ജില്ലാ സെക്രട്ടറിമാരായ ശ്യാംജി മാടത്തിങ്കൽ, രിമ പ്രകാശൻ, അജീഷ് പൈക്കാട്ട്, ശ്രീജേഷ്, ആളൂർ മണ്ഡലം പ്രസിഡൻ്റ് കെ.എസ്.
സുബീഷ്, ഏരിയ പഞ്ചായത്ത് പ്രസിഡൻ്റുമാരായ ലിഷോൺ ജോസ്, സൂരജ് കടുങ്ങാടൻ, ബിനോയ് കോലാന്ത്ര എന്നിവർ നേതൃത്വം നൽകി.
ഇരിങ്ങാലക്കുട : കൊടുങ്ങല്ലൂർ – ഷൊർണൂർ റോഡിൽ കെ.എസ്.ടി.പി. റോഡ് നിർമ്മാണത്തിനിടെ പൂതംകുളം ജംഗ്ഷനിൽ പൈപ്പ് ലീക്ക് ആയതിനാൽ ഇരിങ്ങാലക്കുട ഹൈ ലെവൽ ഭാഗത്തേക്കുള്ള ജലവിതരണം നിർത്തി വെച്ചു.
വർക്ക് പൂർത്തീകരിച്ചതിനു ശേഷം മാത്രമേ ജലവിതരണം ആരംഭിക്കുകയുള്ളൂ എന്ന് വാട്ടർ അതോറിറ്റി അസിസ്റ്റന്റ് എഞ്ചിനീയർ അറിയിച്ചു.
