ഇരിങ്ങാലക്കുട : കലയുടെയും കൃഷിയുടെയും സംഗമഭൂമിയായ ഇരിങ്ങാലക്കുടയിൽ ഞാറ്റുവേല മഹോത്സവത്തിനായി നടത്തുന്ന സാംസ്കാരികത തുളുമ്പുന്ന നഗരസഭയുടെ പ്രവർത്തനങ്ങൾ ഏറെ ശ്ലാഘനീയമെന്ന് പത്മശ്രീ പെരുവനം കുട്ടൻമാരാർ പറഞ്ഞു.
“കാർഷിക സമൃദ്ധിയിലേക്ക് നാടിനൊപ്പം” എന്ന ആപ്തവാക്യവുമായി നഗരസഭയുടെ ആഭിമുഖ്യത്തിൽ ജൂൺ 27 മുതൽ ജൂലായ് 6 വരെ അയ്യങ്കാവ് മൈതാനിയിൽ സംഘടിപ്പിക്കുന്ന ഞാറ്റുവേല മഹോത്സവത്തിൻ്റെ കാർഷിക സംഗമം ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.
നഗരസഭ ചെയർപേഴ്സൺ മേരികുട്ടി ജോയ് അധ്യക്ഷത വഹിച്ചു.
ചടങ്ങിൽ ഭാസ്കരൻ തൈവളപ്പിൽ, രാമകൃഷ്ണൻ തച്ചപ്പുള്ളി എന്നീ കർഷകരെ ആദരിച്ചു.
നഗരസഭ സ്റ്റാൻ്റിംഗ് കമ്മിറ്റി ചെയർമാൻമാരായ ഫെനി എബിൻ വെള്ളാനിക്കാരൻ,
അംബിക പള്ളിപ്പുറത്ത്, സി.സി. ഷിബിൻ, ജെയ്സൺ പാറേക്കാടൻ,
അഡ്വ. ജിഷ ജോബി, പാർലിമെൻ്ററി പാർട്ടി ലീഡർമാരായ സോണിയ ഗിരി, അഡ്വ. കെ.ആർ. വിജയ, അൽഫോൻസ തോമസ്, കൃഷി അസിസ്റ്റൻ്റ് ഡയറക്ടർ എസ്. മിനി, കൃഷി ഓഫീസർമാരായ കെ.പി. അഖിൽ, എം.ആർ. അജിത്കുമാർ എന്നിവർ ആശംസകൾ അർപ്പിച്ചു.
നഗരസഭ വൈസ് ചെയർമാൻ ബൈജു കുറ്റിക്കാടൻ സ്വാഗതവും സെക്രട്ടറി എം.എച്ച്. ഷാജിക്ക് നന്ദിയും പറഞ്ഞു.
ഉദ്ഘാടന സമ്മേളനത്തിന് മുന്നോടിയായി ഡോ. ചാന്ദ്നി സലീഷിൻ്റെ നേതൃത്വത്തിൽ മൂകാംബിക നാട്യകലാക്ഷേത്രത്തിലെ ഇരിങ്ങാലക്കുടയുടെ കലാകാരികൾ അവതരിപ്പിച്ച ഞാറ്റുവേല മഹോത്സവം തീം സോങ്ങിൻ്റെ ദൃശ്യാവിഷ്ക്കാരം അരങ്ങേറി.
ചടങ്ങിൽ കൗൺസിലർമാർ, ഉദ്യോഗസ്ഥർ, വിവിധ കമ്മിറ്റിയംഗങ്ങൾ, കർഷകർ എന്നിവർ പങ്കെടുത്തു.
തുടർന്ന് വജ്രജൂബിലി ഫെല്ലോഷിപ്പ് പദ്ധതിയുടെ ഭാഗമായി സംഗീതാർച്ചന, സംഗമസാഹിതി അവതരിപ്പിച്ച ഗാനസുധ, കാർഷിക സെമിനാറിൽ ഗാർഹിക മാലിന്യ നിയന്ത്രണ മാർഗ്ഗങ്ങളെ സംബന്ധിച്ച് നടന്ന ഡോ. ഗിരിജയുടെ അവതരണം, വിവിധ വിദ്യാലയങ്ങൾ പങ്കെടുത്ത സിനിമാറ്റിക് ഡാൻസ് മത്സരം, കരിങ്കാളി ആടാട് ടീമിൻ്റെ ഫോക്ക് ബാൻഡ് എന്നിവ അരങ്ങേറി.
