IRINJALAKUDA TIMES
തൃശൂർ : കൊടുങ്ങല്ലൂർ – ഗുരുവായൂർ റൂട്ടിലെ ബസ് സമരം പിൻവലിച്ചു.
തൃശൂർ എഡിഎമ്മിൻ്റെ സാന്നിദ്ധ്യത്തിൽ പ്രൈവറ്റ് ബസ് ഓപ്പറേറ്റേഴ്സ് അസോസിയേഷൻ ഭാരവാഹികളുമായി നടത്തിയ ചർച്ചയിലാണ് തീരുമാനമായത്.
മഴയായതിനാൽ റോഡ് ടാറിടൽ പെട്ടെന്ന് ചെയ്യാനാകില്ല. മഴ മാറിയ ശേഷം മൂന്നു മാസത്തിനുള്ളിൽ ടാറിടൽ നടത്തും. അതുവരെ താൽക്കാലികമായി കുഴിയടക്കുന്ന ജോലികൾ നടത്തുമെന്നും എഡിഎം ഉറപ്പ് നൽകിയതായും അസോസിയേഷൻ ഭാരവാഹികൾ പറഞ്ഞു.
ഈ ഉറപ്പ് കണക്കിലെടുത്ത് തങ്ങൾ സമരം പിൻവലിക്കുകയാണെന്നും നേതാക്കൾ അറിയിച്ചു.
ഇരിങ്ങാലക്കുട : നെൽകർഷകരോടുള്ള സംസ്ഥാന സർക്കാരിന്റെ മനോഭാവത്തിന് യാതൊരു മാറ്റവും ഉണ്ടായിട്ടില്ലെന്നും അവഗണന തുടരുകയാണെന്നും കേരള കോൺഗ്രസ് ഡെപ്യൂട്ടി ചെയർമാൻ അഡ്വ. തോമസ് ഉണ്ണിയാടൻ ചൂണ്ടിക്കാട്ടി.
കേരള കോൺഗ്രസ് മുരിയാട് മണ്ഡലം സമ്മേളനം ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.
സംഭരിച്ച നെല്ലിന്റെ പണം നാളുകൾ പിന്നിട്ടിട്ടും കർഷകർക്ക് കൊടുത്തു തീർക്കാൻ സർക്കാർ ഇപ്പോഴും തയ്യാറായിട്ടില്ല. കർഷകർ ഉയർത്തിയ പ്രശ്നങ്ങൾ പരിഹാരമില്ലാതെ നീളുകയാണ്. ഈ പ്രശ്നത്തിൽ കേരള കോൺഗ്രസ് നടത്തി വരുന്ന സമരം തുടരുമെന്നും തോമസ് ഉണ്ണിയാടൻ അറിയിച്ചു.
മണ്ഡലം പ്രസിഡന്റ് എൻ.ഡി. പോൾ നെരേപറമ്പിൽ അധ്യക്ഷത വഹിച്ചു.
സംസ്ഥാന ജനറൽ സെക്രട്ടറി മിനി മോഹൻദാസ്, നിയോജകമണ്ഡലം പ്രസിഡന്റ് റോക്കി ആളൂക്കാരൻ എന്നിവർ മുഖ്യപ്രഭാഷണം നടത്തി.
ഭാരവാഹികളായ സേതുമാധവൻ പറയംവളപ്പിൽ, സതീഷ് കാട്ടൂർ, തോമസ് ഇല്ലിക്കൽ, ഐ.പി. പോൾ, സുരേഷ് ബാബു, സലീഷ് കുഴിക്കാട്ടിപ്പുറത്ത്, കെ.പി. അരവിന്ദാക്ഷൻ, പ്രിൻഫിൻ പോൾ എന്നിവർ പ്രസംഗിച്ചു.
മുതിർന്ന നേതാക്കളായ കെ.കെ. അന്തോണി കിഴക്കൂടൻ, എൻ.കെ. ജോസ്, യോഹന്നാൻ നെരേപ്പറമ്പിൽ എന്നിവരെ സമ്മേളനത്തിൽ ആദരിച്ചു.
ഇരിങ്ങാലക്കുട : സെൻ്റ് ജോസഫ് കോളെജിൽ സംഘടിപ്പിച്ച “ഋതു” അന്താരാഷ്ട്ര പരിസ്ഥിതി ചലച്ചിത്രമേളയ്ക്ക് കൊടിയിറങ്ങി.
ചലച്ചിത്രമേളയിൽ ഏറെ ശ്രദ്ധ നേടി “അദ്രയി”യും “മണ്ണും”.
സ്വതന്ത്ര ഇന്ത്യയിലെ തന്നെ ആദ്യ പരിസ്ഥിതി സമരങ്ങളിലൊന്നായ ചാലിയാർ സമരത്തിൻ്റെ നായകനായ കെ.എ. റഹ്മാൻ്റെ ജീവചരിത്രം അടയാളപ്പെടുത്തുന്ന
“അദ്രയി” എഴുത്തുകാരി കൂടിയായ ഫർസാനയുടെ സൃഷ്ടിയാണ്.
മൂന്നാറിൽ ഭൂമിക്കും മണ്ണിനും അവകാശങ്ങൾക്കുമായി പെമ്പിളൈ ഒരുമൈയുടെ നേതൃത്വത്തിൽ നടന്ന പോരാട്ടങ്ങളിലൂടെ സഞ്ചരിക്കുന്ന രാംദാസ് കടവല്ലൂരിൻ്റെ “മണ്ണും” സെൻ്റ് ജോസഫ്സ് കോളെജിൽ നടന്ന മേളയുടെ പ്രധാന ആകർഷണമായി.
പ്രദർശനാനന്തരം നടന്ന സംവാദത്തിന് ശേഷം സംവിധായകൻ രാംദാസ് കടവല്ലൂർ, ഫോട്ടോഗ്രാഫർ പ്രതാപ് ജോസഫ് എന്നിവരെ തൃശൂർ കില കോളെജ് പ്രിൻസിപ്പൽ ഡോ. എസ്. ശ്രീകുമാർ ആദരിച്ചു.
രണ്ട് ദിവസങ്ങളിലായി നടന്ന പരിസ്ഥിതി മേളയിൽ പ്രദർശിപ്പിച്ച ചിത്രങ്ങളുടെ അണിയറ പ്രവർത്തകരായ അജയ് കോവൂർ, കെ. ബിനു, അരവിന്ദ് മോഹൻരാജ്, ഇ.ജി. ശ്രീകാന്ത്, കെ.വി. ബിനോജ് എന്നിവരും മേളയുടെ സാന്നിധ്യങ്ങളായി.
വൈകീട്ട് നടന്ന സമാപന ചടങ്ങിൽ കോളെജ് പ്രിൻസിപ്പൽ ഡോ. സിസ്റ്റർ ബെസ്സി, സംവിധായകൻ പ്രതാപ് ജോസഫ് എന്നിവർ ചേർന്ന് രണ്ടാമത് പരിസ്ഥിതി ചലച്ചിത്രമേളയുടെ കൊടിയിറക്കി.
തിരുവനന്തപുരം : ഓണത്തിന് മഞ്ഞ കാര്ഡുടമകള്ക്ക് ഓണ കിറ്റ് ലഭിക്കും. മഞ്ഞ റേഷൻ കാര്ഡുകളുള്ള ആറ് ലക്ഷം കുടുംബങ്ങള്ക്ക് 15 ഇനങ്ങളടങ്ങിയ ഓണക്കിറ്റ് സൗജന്യമായി നല്കുമെന്ന് സര്ക്കാര് അറിയിച്ചു.
ക്ഷേമസ്ഥാപനങ്ങളിലെ നാല് അംഗങ്ങള്ക്ക് ഒരു കിറ്റ് സൗജന്യമായി കിട്ടും. കിറ്റില് അര ലിറ്റര് വെളിച്ചെണ്ണ, അര കിലോ പഞ്ചസാര, ചെറുപയര് പരിപ്പ്, സേമിയ പായസം മിക്സ്, മില്മ നെയ്യ്, കശുവണ്ടിപ്പരിപ്പ്, സാമ്പാര്പൊടി, മുളകുപൊടി, മഞ്ഞള്പ്പൊടി, മല്ലിപ്പൊടി, തേയില, ചെറുപയര്, തുവരപ്പരിപ്പ്, പൊടിയുപ്പ്, തുണിസഞ്ചി എന്നിവ ഉള്പ്പെടും. റേഷന് കാര്ഡ് ഉടമകള്ക്ക് കുറഞ്ഞ നിരക്കില് അരിയും നല്കും.
നീല കാര്ഡുകാര്ക്ക് 10 കിലോയും വെള്ള കാര്ഡുകാര്ക്ക് 15 കിലോയും അരി 10.90 രൂപ നിരക്കില് ലഭ്യമാകും. 94 ലക്ഷം കാര്ഡുമകള്ക്ക് 10 കിലോ കെ-റൈസ് 25 രൂപ നിരക്കില് കിട്ടും. ഈ അരി നിലവില് 29 രൂപയ്ക്കാണ് നല്കുന്നത്.
ഇരിങ്ങാലക്കുട : വർത്തമാനകാലത്ത് സാധാരണക്കാർക്ക് ഏറ്റവും വെല്ലുവിളിയായി മാറി കൊണ്ടിരിക്കുന്ന ഡയപ്പർ മാലിന്യ സംസ്കരണത്തിന് ശാശ്വത പരിഹാരവുമായി ഇരിങ്ങാലക്കുട നഗരസഭ രംഗത്ത്.
നഗരസഭയും ആക്രി ഏജൻസിയും ചേർന്നാണ് പൊതുജനങ്ങളിൽ നിന്ന് ആപ്പ് വഴി ഡയപ്പർ ശേഖരിച്ച് സംസ്കരിക്കാനുള്ള പദ്ധതി ആവിഷ്കരിച്ചിരിക്കുന്നത്.
പ്ലേസ്റ്റോറിൽ നിന്ന് “ആക്രി ആപ്പ്” ഡൗൺലോഡ് ചെയ്ത് അതിൽ വാർഡ് നമ്പറും അഡ്രസ്സും നൽകിയാൽ ഏതു ദിവസമാണ് ഡയപ്പർ മാലിന്യം ശേഖരിക്കാൻ ബന്ധപ്പെട്ടവർ വീടുകളിലേക്ക് എത്തുക എന്ന വിവരം ലഭിക്കും.
ഒരു കിലോയ്ക്ക് 45 രൂപയും 12% ജി.എസ്.ടി.യും ആണ് ഇതിനായി ഉപഭോക്താക്കൾ നൽകേണ്ടത്.
ഡയപ്പർ മാലിന്യങ്ങൾ സംസ്കരിക്കുന്നതിനായി ശേഖരിക്കുന്ന സേവന വണ്ടിയുടെ ഫ്ലാഗ് ഓഫ് കർമ്മം നഗരസഭ ചെയർപേഴ്സൺ മേരിക്കുട്ടി ജോയ് നിർവഹിച്ചു.
മാലിന്യമുക്ത നവകേരളം എന്ന ലക്ഷ്യം മുന്നിൽ കണ്ടാണ് ഈ പ്രവർത്തനം ചെയ്യുന്നതെന്നും നമ്മൾ നേരിട്ടു കൊണ്ടിരിക്കുന്ന ഏറ്റവും വലിയ വെല്ലുവിളിയാണ് ഡയപ്പർ സംസ്കരണം എന്നതിനാൽ എല്ലാ കൗൺസിലർമാരും അതാത് വാർഡുകളിലെ ജനങ്ങൾക്ക് ആക്രി ആപ്പ് ഉപയോഗിച്ച് ഡയപ്പർ സംസ്കരണം നടത്തുന്നതിനുള്ള കൃത്യമായ നിർദ്ദേശങ്ങൾ നൽകണമെന്നും ചെയർപേഴ്സൺ പറഞ്ഞു.
ഇരിങ്ങാലക്കുട : പടിയൂർ മണ്ഡലം കോൺഗ്രസിന്റെ നേതൃത്വത്തിൽ എടതിരിഞ്ഞിയിൽ മുൻ മുഖ്യമന്ത്രി ഉമ്മൻ ചാണ്ടിയുടെ രണ്ടാം ചരമ വാർഷിക അനുസ്മരണവും ഭക്ഷ്യ കിറ്റ് വിതരണവും നടത്തി.
മണ്ഡലം പ്രസിഡൻ്റ് എ.ഐ. സിദ്ധാർത്ഥൻ അധ്യക്ഷത വഹിച്ചു.
അനുസ്മരണ സമ്മേളനം ഡി.സി.സി. സെക്രട്ടറി സോണിയ ഗിരി ഉദ്ഘാടനം ചെയ്തു.
പഞ്ചായത്ത് മെമ്പർ സുനന്ദ ഉണ്ണികൃഷ്ണൻ സ്വാഗതം പറഞ്ഞു.
കാട്ടൂർ ബ്ലോക്ക് കോൺഗ്രസ് കമ്മിറ്റി സെക്രട്ടറി കെ.കെ. ഷൗക്കത്തലി, മുൻ മണ്ഡലം പ്രസിഡൻ്റ് കെ.ആർ. പ്രഭാകരൻ, മണ്ഡലം സെക്രട്ടറി കെ.ആർ. ഔസേപ്പ്, പഞ്ചായത്ത് മെമ്പർ ജോയ്സി ആന്റണി, മുൻ ബ്ലോക്ക് പഞ്ചായത്ത് വൈസ് പ്രസിഡൻ്റ് സി.എം. ഉണ്ണികൃഷ്ണൻ തുടങ്ങിയവർ പ്രസംഗിച്ചു.
മണ്ഡലം ഭാരവാഹികളായ വി.കെ. നൗഷാദ്, സി.കെ. ജമാൽ, പി.എസ്. ജയരാജൻ, എം.സി. നീലാംബരൻ, എ.എം. അശോകൻ, സുബ്രഹ്മണ്യൻ, അഷ്റഫ്, ടി.കെ. മോഹൻദാസ്, എസ്. സുധേഷ് എന്നിവർ നേതൃത്വം നൽകി
ഇരിങ്ങാലക്കുട : പൂമംഗലം മണ്ഡലം കോൺഗ്രസ് കമ്മിറ്റിയുടെ നേതൃത്വത്തിൽ മുൻ മുഖ്യമന്ത്രി ഉമ്മൻ ചാണ്ടിയുടെ രണ്ടാം ഓർമ്മദിനം വിവിധ പരിപാടികളോടെ ആചരിച്ചു.
അരിപ്പാലം സെന്ററിൽ നടന്ന അനുസ്മരണം മുൻ പഞ്ചായത്ത് പ്രസിഡന്റ് അഡ്വ. ജോസ് മൂഞ്ഞേലി ഉദ്ഘാടനം ചെയ്തു.
മണ്ഡലം പ്രസിഡന്റ് എൻ. ശ്രീകുമാർ അധ്യക്ഷത വഹിച്ചു.
മഹിളാ കോൺഗ്രസ് ജില്ലാ സെക്രട്ടറി രഞ്ജിനി ശ്രീകുമാർ, ബ്ലോക്ക് കോൺഗ്രസ് ഭാരവാഹികളായ ടി.ആർ. ഷാജു, ടി.ആർ. രാജേഷ്, ടി.എസ്. പവിത്രൻ, പഞ്ചായത്ത് മെമ്പർമാരായ കത്രീന ജോർജ്ജ്, ജൂലി ജോയ് എന്നിവർ പ്രസംഗിച്ചു.
പഞ്ചായത്ത് മെമ്പർ ലാലി വർഗ്ഗീസ് സ്വാഗതവും മണ്ഡലം വൈസ് പ്രസിഡന്റ് പ്രിൻസ് മാത്യു നന്ദിയും പറഞ്ഞു.
ഇരിങ്ങാലക്കുട : ജനപ്രിയ കോൺഗ്രസ് നേതാവ് മുൻമുഖ്യമന്ത്രി ഉമ്മൻ ചാണ്ടിയുടെ രണ്ടാം ചരമ വാർഷികത്തിൽ കോൺഗ്രസ് ഇരിങ്ങാലക്കുട ബ്ലോക്ക് കമ്മറ്റിയുടെ ആഭിമുഖ്യത്തിൽ പുഷ്പാർച്ചനയും അനുസ്മരണ സമ്മേളനവും സംഘടിപ്പിച്ചു.
കെ.പി.സി.സി. മുൻ ജനറൽ സെക്രട്ടറി എം.പി. ജാക്സൺ അനുസ്മരണ സമ്മേളനം ഉദ്ഘാടനം ചെയ്തു.
രാജീവ് ഗാന്ധി മന്ദിരത്തിൽ നടന്ന ചടങ്ങിൽ ബ്ലോക്ക് കോൺഗ്രസ് പ്രസിഡന്റ് സോമൻ ചിറ്റേത്ത് അധ്യക്ഷത വഹിച്ചു.
ഡിസിസി സെക്രട്ടറി ആന്റോ പെരുമ്പിള്ളി, നഗരസഭ ചെയർപേഴ്സൺ മേരിക്കുട്ടി ജോയ്, മുൻ വൈസ് ചെയർമാൻ ടി.വി. ചാർളി, മണ്ഡലം പ്രസിഡൻ്റുമാരായ സി.എസ്. അബ്ദുൾ ഹഖ്, സാജു പാറേക്കാടൻ, ബ്ലോക്ക് കോൺഗ്രസ് വൈസ് പ്രസിഡൻ്റുമാരായ ജോസഫ് ചാക്കോ, അസറുദ്ദീൻ കളക്കാട്ട്, സെക്രട്ടറിമാരായ എം.ആർ. ഷാജു, വി.സി. വർഗീസ്, ശ്രീജിത്ത് പട്ടത്ത്, സതീഷ് പുളിയത്ത്, നഗരസഭ കൗൺസിലർമാരായ ജെയ്സൺ പാറേക്കാടൻ, സിജു യോഹന്നാൻ, ജസ്റ്റിൻ ജോൺ, ബിജു പോൾ അക്കരക്കാരൻ, മിനി സണ്ണി, ഒ.എസ്. അവിനാഷ്, യൂത്ത് കോൺഗ്രസ് നിയോജക മണ്ഡലം പ്രസിഡന്റ് സനൽ കല്ലൂക്കാരൻ, മണ്ഡലം പ്രസിഡന്റ് ജോമോൻ മണാത്ത് തുടങ്ങിയവർ നേതൃത്വം നൽകി.
ഇരിങ്ങാലക്കുട : സ്വാതന്ത്ര്യ സമര സേനാനിയും കമ്മ്യൂണിസ്റ്റ് പാർട്ടി നേതാവും ട്രേഡ് യൂണിയൻ സംഘാടകനുമായിരുന്ന ടി.എൻ. നമ്പൂതിരിയുടെ 47-ാം ചരമവാർഷികം ആചരിച്ചു.
ഇരിങ്ങാലക്കുട പാർട്ടി ഓഫീസ് അങ്കണത്തിൽ സിപിഐ ജില്ലാ സെക്രട്ടറി
കെ.ജി. ശിവാനന്ദൻ ടി.എൻ. നമ്പൂതിരിയുടെ ഛായാചിത്രത്തിൽ പുഷ്പാർച്ചന നടത്തി.
ജില്ലാ കൗൺസിൽ അംഗം പി. മണി അധ്യക്ഷത വഹിച്ചു.
ജില്ലാ കൗൺസിൽ അംഗങ്ങളായ അഡ്വ. പി.ജെ. ജോബി, ബിനോയ് ഷബീർ, മണ്ഡലം കമ്മിറ്റി അംഗങ്ങളായ വി.ആർ. രമേഷ്, കെ.എസ്. പ്രസാദ്, വി.എസ്. ഉണ്ണികൃഷ്ണൻ, സെൻ്റർ ബ്രാഞ്ച് സെക്രട്ടറി വർധനൻ പുളിക്കൽ എന്നിവർ സന്നിഹിതരായിരുന്നു.
മണ്ഡലം സെക്രട്ടറി എൻ.കെ. ഉദയപ്രകാശ് സ്വാഗതവും ഇരിങ്ങാലക്കുട ടൗൺ ലോക്കൽ കമ്മറ്റി സെക്രട്ടറി
ബെന്നി വിൻസെൻ്റ് നന്ദിയും പറഞ്ഞു.
ഇരിങ്ങാലക്കുട : ആദ്യ കമ്മ്യൂണിസ്റ്റ് മന്ത്രിസഭയിൽ അംഗമായിരുന്ന പി.കെ. ചാത്തൻ മാസ്റ്ററുടെ അനുസ്മരണം നടത്തി.
അദ്ദേഹത്തിൻ്റെ സ്മൃതി മണ്ഡപത്തിൽ സിപിഐ തൃശ്ശൂർ ജില്ലാ സെക്രട്ടറി കെ.ജി. ശിവാനന്ദൻ പുഷ്പാർച്ചന നടത്തി.
പൊറത്തിശ്ശേരി ലോക്കൽ സെക്രട്ടറി പി.ആർ. രാജൻ അധ്യക്ഷത വഹിച്ചു.
സിപിഐ മുതിർന്ന നേതാവ് കെ. ശ്രീകുമാർ, ജില്ലാ കൗൺസിൽ അംഗങ്ങളായ പി. മണി, എൻ.കെ. ഉദയപ്രകാശ്, അഡ്വ. പി.ജെ ജോബി, ബിനോയ് ഷബീർ, എഐഎസ്എഫ് ജില്ലാ സെക്രട്ടറി മിഥുൻ പോട്ടക്കാരൻ, മണ്ഡലം കമ്മിറ്റി അംഗങ്ങളായ വി.ആർ. രമേഷ്, കെ.എസ്. പ്രസാദ്, വി.എസ്. ഉണ്ണികൃഷ്ണൻ എന്നിവർ സന്നിഹിതരായിരുന്നു.
മണ്ഡലം കമ്മറ്റി അംഗം അൽഫോൻസ തോമസ് സ്വാഗതവും ലോക്കൽ കമ്മിറ്റി അംഗം പി.സി. രഘു നന്ദിയും പറഞ്ഞു.
