ഇരിങ്ങാലക്കുട : മുരിയാട് വേഴക്കാട്ടുകര ശ്രീ കണ്ടംകുളങ്ങര ദുർഗ്ഗാ ഭഗവതി ക്ഷേത്രത്തിൽ ഫെബ്രുവരി 3, 4 തിയ്യതികളിൽ നടക്കുന്ന പ്രതിഷ്ഠാദിന മഹോത്സവത്തിനുള്ള ഒരുക്കങ്ങൾ പൂർത്തിയായതായി ക്ഷേത്ര സംരക്ഷണ സമിതി പ്രസിഡന്റ് അറിയിച്ചു.
തന്ത്രി നകരമണ്ണ് നീലകണ്ഠൻ നമ്പൂതിരി, മേൽശാന്തി മുരളീധരൻ നമ്പൂതിരി എന്നിവർ മുഖ്യകാർമ്മികത്വം വഹിക്കും.
ഫെബ്രുവരി 3ന് ഗണപതി ഹോമം, ഉദയാസ്തമന പൂജ, വൈകീട്ട് ബ്രാഹ്മണിപ്പാട്ട്, സമ്പൂർണ നെയ് ചുറ്റുവിളക്ക്, നിറമാല, ദീപാരാധന, തുടുർന്ന് 7.15ന് പ്രണവം കലാഗൃഹം ഒരുക്കുന്ന നൃത്തനൃത്യങ്ങൾ, തിരുവാതിരക്കളി എന്നിവ അരങ്ങേറും.
പ്രതിഷ്ഠാദിനമായ ഫെബ്രുവരി 4ന് രാവിലെ അഷ്ടദ്രവ്യ മഹാഗണപതി ഹോമം, നവാകം, പഞ്ചഗവ്യം, എഴുന്നള്ളിപ്പ് എന്നിവയും ഉച്ചക്ക് 12.30ന് പ്രസാദ ഊട്ടും ഉണ്ടായിരിക്കും.
വൈകീട്ട് 4.45ന് സർപ്പക്കാവിൽ പൂജ, 6.30ന് ചുറ്റുവിളക്ക്, നിറമാല, ദീപാരാധന, തുടുർന്ന് വേഴക്കാട്ടുകര എൻ എസ് എസ് കരയോഗം അവതരിപ്പിക്കുന്ന തിരുവാതിരക്കളി, ഭക്തിഗാനമേള എന്നിവയും ഉണ്ടായിരിക്കും.
ചടങ്ങുകൾക്ക് ക്ഷേത്ര സംരക്ഷണ സമിതി പ്രസിഡന്റ് മുട്ടത്തിൽ ഗോപാലനും സമിതി അംഗങ്ങളും നേതൃത്വം നൽകും.
