ഇരിങ്ങാലക്കുട : ഇരിങ്ങാലക്കുട മണ്ഡലത്തിൽ സംഘടിപ്പിച്ച
വയോജനോത്സവത്തിന്റെ സമാപന സമ്മേളനം മന്ത്രി ഡോ. ആർ. ബിന്ദു ഉദ്ഘാടനം ചെയ്തു.
സാമൂഹ്യനീതി വകുപ്പ്, മന്ത്രി ഡോ. ആർ. ബിന്ദുവിന്റെ നേതൃത്വത്തിലാണ് ഇരിങ്ങാലക്കുടയിൽ വയോജനോത്സവം സംഘടിപ്പിച്ചത്.
ആരും ഈ ഭൂമിയിൽ തനിച്ചാകാൻ പാടില്ലെന്ന നിർബന്ധബുദ്ധിയോടു കൂടിയാണ് സാമൂഹ്യനീതി വകുപ്പ് പ്രവർത്തിക്കുന്നതെന്ന് മന്ത്രി ബിന്ദു പറഞ്ഞു.
വയോജനങ്ങൾക്ക് അവരുടെ വീട്ടുമുറ്റത്ത് തന്നെ സേവനങ്ങൾ ലഭിക്കാൻ കഴിയുന്ന സംവിധാനങ്ങൾ ഉണ്ടാക്കുക എന്നതാണ് സർക്കാരിന്റെ ലക്ഷ്യം. വയോജനങ്ങളുടെ അനുഭവസമ്പത്ത് സമൂഹത്തിന് വേണ്ടി ഉപയോഗിക്കാനാകണമെന്നും മന്ത്രി ആർ. ബിന്ദു പറഞ്ഞു.
സാമൂഹ്യനീതി വകുപ്പിന്റെ നേതൃത്വത്തിൽ രണ്ട് ദിവസമായി നടത്തിയ വയോജനോത്സവത്തിൽ വയോജനങ്ങൾക്കായുള്ള സൗജന്യ മെഡിക്കൽ ക്യാമ്പ്, ബോധവത്കരണ പരിപാടി, പോഷകാഹാര കിറ്റ് വിതരണം, അമ്മയ്ക്കായി ഒരു മരം നടൽ, കലാപരിപാടികൾ എന്നിവയുടെ സമാപന ഉദ്ഘാടനമാണ് മന്ത്രി ആർ. ബിന്ദു നിർവഹിച്ചത്.
വയോജനോത്സവത്തിൽ കലാപരിപാടികൾ അവതരിപ്പിച്ച വയോജനങ്ങൾക്ക് മന്ത്രി ഉപഹാരം സമർപ്പിച്ചു.
ഇരിങ്ങാലക്കുട മുൻസിപ്പൽ ടൗൺ ഹാളിൽ നടന്ന ചടങ്ങിൽ ജില്ലാ പഞ്ചായത്ത് അംഗം ജോസ് ജെ. ചിറ്റിലപ്പിള്ളി അധ്യക്ഷത വഹിച്ചു.
പടിയൂർ പഞ്ചായത്ത് പ്രസിഡന്റ് കെ.പി. കണ്ണൻ, മുരിയാട് പഞ്ചായത്ത് പ്രസിഡൻ്റ് സരള വിക്രമൻ, സംസ്ഥാന വയോജന കൗൺസിൽ കൺവീനർ അമരവിള രാമകൃഷ്ണൻ, ജില്ലാ സാമൂഹ്യനീതി ഓഫീസർ കെ.ആർ. പ്രദീപൻ, ജില്ലാ പ്രൊബേഷൻ ഓഫീസർ റോഷിനി, ഉദ്യോഗസ്ഥർ തുടങ്ങിയവർ പങ്കെടുത്തു.
Leave a Reply