ഇരിങ്ങാലക്കുട : ഭവന നിർമ്മാണ മേഖലയ്ക്കും ഉത്പാദന മേഖലയ്ക്കും മാലിന്യ സംസ്കരണത്തിനും പ്രാധാന്യം നൽകി പടിയൂർ പഞ്ചായത്തിൻ്റെ 2026- 27 വാർഷിക ബഡ്ജറ്റ്.
പഞ്ചായത്ത് പ്രസിഡൻ്റ് കെ.പി. കണ്ണൻ്റെ അധ്യക്ഷതയിൽ ചേർന്ന യോഗത്തിൽ വൈസ് പ്രസിഡൻ്റ് ഷീജ ജോയ് ബഡ്ജറ്റ് അവതരിപ്പിച്ചു.
പാർപ്പിട മേഖലയ്ക്ക് 2.58 കോടി രൂപയും, ഉൽപാദന മേഖലയ്ക്ക് 1 കോടി രൂപയും, മാലിന്യ സംസ്കരണത്തിന് 60 ലക്ഷം രൂപയും ഉൾപ്പെടെ ആകെ 34.68 കോടി രൂപ വരവും, 34 കോടി രൂപ ചെലവും, 67 ലക്ഷം രൂപ മിച്ചവും വരുന്ന ബഡ്ജറ്റാണ് അവതരിപ്പിച്ചത്.
പഞ്ചായത്തിൻ്റെ സമഗ്ര വികസനം ലക്ഷ്യമിട്ടുകൊണ്ട് ദീർഘകാല ലക്ഷ്യങ്ങൾ കൈവരിക്കുന്നതിന് സാധ്യമാകുന്ന തരത്തിൽ സമഗ്ര മേഖലകളെയും പരിഗണിച്ചുകൊണ്ടുള്ള ബഡ്ജറ്റ് ആണ് അവതരിപ്പിച്ചതെന്ന് പ്രസിഡൻ്റ് കെ.പി. കണ്ണൻ പറഞ്ഞു.
പുതിയ പഞ്ചായത്ത് കെട്ടിട നിർമ്മാണം അടക്കമുള്ള പഞ്ചായത്തിന്റെ ദീർഘകാല ആവശ്യങ്ങൾ പൂർത്തീകരിക്കാൻ ആവശ്യമായ തുക ബഡ്ജറ്റിൽ ഉൾക്കൊള്ളിച്ചിട്ടുണ്ടെന്നും പ്രസിഡൻ്റ് അറിയിച്ചു.
സ്റ്റാൻഡിങ് കമ്മിറ്റി ചെയർമാൻമാരായ സുധ ദിലീപ്, കെ.വി. ഹജീഷ്, ഈശ്വരി ജയൻ, ജനപ്രതിനിധികൾ, പഞ്ചായത്ത് സെക്രട്ടറി എം.കെ. രജനി, വിവിധ നിർവഹണ ഉദ്യോഗസ്ഥർ എന്നിവർ പങ്കെടുത്തു.
Leave a Reply