ഇരിങ്ങാലക്കുട : നഗരത്തിലെ പല പ്രദേശങ്ങളിലേക്കും ആഴ്ചകളോളം കുടിവെള്ള വിതരണം നടക്കുന്നില്ലെന്ന പരാതി ശക്തമാണെന്നും കുടിവെള്ളക്ഷാമം ഉടൻ പരിഹരിക്കണമെന്നും ബിജെപി ആവശ്യപ്പെട്ടു.
ഷണ്മുഖം കനാൽ പരിസരത്ത് കഴിഞ്ഞ 14 ദിവസങ്ങളായി കുടിവെള്ളം ലഭിക്കാത്തതിനാൽ ബിജെപി ജില്ലാ ഓഫീസിലേക്കും എംപി ഓഫീസിലേക്കും സമീപവാസികൾ പരാതി നൽകിയിരുന്നു.
പരാതിയെ തുടർന്ന് മണ്ഡലം നേതാക്കൾ ഷണ്മുഖം കനാൽ പരിസരത്ത് എത്തുകയും കുടിവെള്ളം കിട്ടാത്ത വീടുകളിൽ സന്ദർശനം നടത്തി അവരുടെ പരാതി കേൾക്കുകയും അടിസ്ഥാന ആവശ്യങ്ങൾക്കുള്ള വെള്ളം വിതരണം ചെയ്യുകയും ചെയ്തു.
15 വർഷക്കാലമായി കുടിവെള്ളക്ഷാമം ഇവിടെ തുടരുന്നതായി സ്ഥലവാസികൾ പറയുന്നു. ഇതിന് ഒരു ശാശ്വത പരിഹാരം കണ്ടെത്താൻ ഇവിടെ ഭരിച്ചുകൊണ്ടിരിക്കുന്ന ജനപ്രതിനിധികൾക്ക് കഴിഞ്ഞിട്ടില്ലെന്നത് ചൂണ്ടിക്കാട്ടിയാണ് പ്രദേശവാസികൾ കേന്ദ്രമന്ത്രി സുരേഷ് ഗോപിക്ക് പരാതി നൽകിയത്.
സമീപവാസികളെ കണ്ടതിനു ശേഷം മണ്ഡലം നേതാക്കൾ വാട്ടർ അതോറിറ്റി ഓഫീസിലെത്തി ഉദ്യോഗസ്ഥരുമായി ചർച്ച നടത്തി.
24 മണിക്കൂറിനുള്ളിൽ പ്രശ്നം പരിഹരിക്കാമെന്ന് ബിജെപി നേതാക്കൾക്ക് ഉദ്യോഗസ്ഥർ ഉറപ്പു നൽകി.
ബിജെപി മണ്ഡലം പ്രസിഡൻ്റ് ആർച്ച അനീഷ്, ജില്ലാ സെക്രട്ടറി അഖിലാഷ് വിശ്വനാഥൻ, സംസ്ഥാന കമ്മിറ്റി അംഗം പി.എസ്. സുബീഷ്, മണ്ഡലം ജനറൽ സെക്രട്ടറി ഷൈജു കുറ്റിക്കാട്ട്, മുൻസിപ്പൽ പ്രസിഡൻ്റ് ലിഷോൺ ജോസ്, ബാബുരാജ്, റീജ, രതീഷ്, ഹരി, അജിത്ത് തുടങ്ങിയവർ നേതൃത്വം നൽകി.
Leave a Reply