ഇരിങ്ങാലക്കുട : നാഷണൽ ഹയർ സെക്കൻ്ററി സ്കൂളിലെ വിരമിച്ച അധ്യാപക അനധ്യാപകരുടെ സൗഹൃദ സദസ്സ് സംഘടിപ്പിച്ചു.
സംഗമത്തിൽ തൊണ്ണൂറു വയസ്സിനടുത്ത് പ്രായമുള്ളവർ മുതൽ ഇക്കഴിഞ്ഞ വർഷം വിരമിച്ചവർ വരെ പങ്കെടുത്തു.
വിരമിച്ച ശേഷം വ്യക്തി ജീവിതത്തിലേക്ക് മടങ്ങിപ്പോയാലും സഹപ്രവർത്തകരുമായുള്ള സൗഹൃദവും ഇഴയടുപ്പവും തുടർന്നും നിലനിർത്തുക എന്നതാണ് ഈ സൗഹൃദ കൂട്ടായ്മയുടെ ഉദ്ദേശം.
അധ്യാപനത്തിന് ശേഷവും വ്യത്യസ്തങ്ങളായ പ്രവർത്തനങ്ങളിലൂടെ സമൂഹത്തിൽ സജീവമായ ഇടപെടലുകൾ നടത്തി തലമുറകൾക്ക് മാതൃകയായ സഹപ്രവർത്തകരെ സംഗമത്തിൽ പ്രോത്സാഹിപ്പിച്ചു.
80 വയസ്സ് കഴിഞ്ഞ മുൻ ഹെഡ്മാസ്റ്റർ അപ്പു, മുൻ ഹെഡ്മിസ്ട്രസ് റൂബി, എൽപി സ്കൂൾ ഹെഡ്മിസ്ട്രസ് ആയിരുന്നു വത്സല, വാസന്തി എന്നിവരെ ആദരിച്ചു.
റിട്ടയർമെൻ്റ് എന്നാൽ വിശ്രമജീവിതം എന്ന പൊതുബോധത്തോട് സമരസപ്പെടാതെ വിവിധങ്ങളായ സജീവ പ്രവർത്തനങ്ങളുടെ പുതിയൊരു ഘട്ടത്തിൻ്റെ തുടക്കം മാത്രമാണെന്ന വിശാലമായ കാഴ്ചപ്പാട് പങ്കുവെക്കുക കൂടിയാണ് ഈ ഒത്തുചേരലിൻ്റെ ലക്ഷ്യം.
റിട്ട. അധ്യാപകരായ അപ്പു, രാധ, ശ്രീദേവി, ഹരിദാസ്, റൂബി, വത്സല എന്നിവർ പ്രസംഗിച്ചു.
