ഇരിങ്ങാലക്കുട : വട്ടേക്കാട്ടുകരയിൽ പ്രവർത്തനരഹിതമായി കിടക്കുന്ന കുടുംബക്ഷേമ ഉപകേന്ദ്രം പൂർണതോതിൽ പ്രവർത്തന സജ്ജമാക്കുന്നതിനുള്ള സത്വര നടപടികൾ സ്വീകരിക്കണമെന്ന് വട്ടേക്കാട്ടുകര നാട്ടുകൂട്ടം വാർഷിക പൊതുയോഗം അധികൃതരോട് ആവശ്യപ്പെട്ടു.
പ്രസിഡൻ്റ് പി.പി. വിജയൻ്റെ അധ്യക്ഷതയിൽ ചേർന്ന യോഗം രക്ഷാധികാരി എം. സനൽകുമാർ ഉദ്ഘാടനം ചെയ്തു.
1998ൽ തൈവളപ്പിൽ അബ്ദുൽ ഖാദർ ഭാര്യ നഫീസ സൗജന്യമായി വിട്ടുകൊടുത്ത ഭൂമിയിലാണ് വെള്ളാങ്ങല്ലൂർ പഞ്ചായത്തിന്റെ 2000 – 2001 വർഷത്തെ ജനകീയാസൂത്രണ പദ്ധതിയിൽ ഉൾപ്പെടുത്തി കെട്ടിടനിർമ്മാണം പൂർത്തീകരിച്ചത്.
കാൽനൂറ്റാണ്ട് പിന്നിട്ടിട്ടും ഇവിടെ ദൈനംദിന പ്രവർത്തനം ആരംഭിക്കാൻ കഴിഞ്ഞിട്ടില്ല.
പിന്നോക്ക – ദുർബല ജനവിഭാഗങ്ങൾ തിങ്ങിപാർക്കുന്ന ഈ പ്രദേശത്തെ അടഞ്ഞു കിടക്കുന്ന ഈ ആരോഗ്യ കേന്ദ്രം എത്രയും വേഗം പൂർണ്ണ തോതിൽ പ്രവർത്തനസജ്ജമാക്കണമെന്ന് യോഗം ആവശ്യപ്പെട്ടു.
കെ.ആർ. ചന്ദ്രൻ, സി.എൻ. സന്തോഷ്, വി.പി. ഗോപാലകൃഷ്ണൻ, പി.എൻ. രാമചന്ദ്രൻ, പി.ബി. ജയചന്ദ്രൻ, ടി.എ. അസീസ്, അഡ്വ. കെ.സി. രാംദാസ് എന്നിവർ പ്രസംഗിച്ചു.
പുതിയ ഭാരവാഹികളായി എം. സനൽകുമാർ (രക്ഷാധികാരി), പി.പി. വിജയൻ (പ്രസിഡൻ്റ്), കെ.ടി. ഉണ്ണികൃഷ്ണൻ (വൈസ് പ്രസിഡൻ്റ്), സി.എൻ. സന്തോഷ് (സെക്രട്ടറി), അഡ്വ. കെ.സി. രാംദാസ് (ജോയിൻ്റ് സെക്രട്ടറി), കെ.ആർ. ചന്ദ്രൻ (ട്രഷറർ) എന്നിവരെ തിരഞ്ഞെടുത്തു.
