ഇരിങ്ങാലക്കുട : “കാൻസർ മുക്ത ഇരിങ്ങാലക്കുട നഗരസഭ” എന്ന മഹത്തായ ലക്ഷ്യവുമായി സേവാഭാരതി രംഗത്തിറങ്ങുകയാണെന്ന് പ്രസിഡൻ്റ് നളിൻ ബാബു എസ് മേനോനും, സെക്രട്ടറി സായിറാമും പത്രസമ്മേളനത്തിൽ അറിയിച്ചു.
ഇതിനായി നഗരസഭയിലെ 41 വാർഡുകളിലും തിരുവനന്തപുരം റീജണൽ കാൻസർ സെൻ്ററിൻ്റെ സഹായത്തോടെ കാൻസർ നിർണ്ണയ ക്യാമ്പുകൾ നടത്തും. ഇതിൻ്റെ ഉൽഘാടനവും, സൗത്ത്
ഇന്ത്യൻ ബാങ്ക് സേവാഭാരതിക്ക് അനുവദിച്ച ആംബുലൻസിൻ്റെ ഫ്ലാഗ് ഓഫും ഒക്ടോബർ 5ന് (ഞായറാഴ്ച്ച) വൈകീട്ട് 4 മണിക്ക് നഗരസഭാ ടൗൺ ഹാളിൽ ചേരുന്ന ചടങ്ങിൽ വെച്ച് ഗവർണർ രാജേന്ദ്ര വിശ്വനാഥ ആർലേക്കർ നിർവ്വഹിക്കും.
ആർ സി സിയിലെ ഇരിങ്ങാലക്കുട സ്വദേശിയായ ഡോ കെ ആർ രാജീവ്, ആറായിരത്തിൽ പരം മെഡിക്കൽ ക്യാമ്പുകൾ സംഘടിപ്പിച്ച് ആതുര സേവന രംഗത്ത് തനതായ വ്യക്തിമുദ്ര പതിപ്പിച്ച ജോൺസൻ കോലങ്കണ്ണി, കഴിഞ്ഞ 18 വർഷമായി സേവാഭാരതിയുടെ അന്നദാനത്തിന് നേതൃത്വം നൽകുന്ന രാമേട്ടൻ എന്നിവരെ ചടങ്ങിൽ ആദരിക്കും.
സേവാഭാരതി ട്രഷറർ ഐ രവീന്ദ്രൻ, മെഡിക്കൽ ക്യാമ്പ് കോർഡിനേറ്റർ ജോൺസൻ കോലങ്കണ്ണി എന്നിവരും പത്രസമ്മേളനത്തിൽ പങ്കെടുത്തു.
