IRINJALAKUDA TIMES
ഇരിങ്ങാലക്കുട : തുറവന്‍കാട് സെന്റ് ജോസഫ്‌സ് പള്ളി തിരുനാളിന്റെ ഭാഗമായി നടത്തിയ വിളംബര ജാഥ വികാരി ഫാ. സെബി കൂട്ടാലപ്പറമ്പില്‍ ഫ്ലാഗ് ഓഫ് ചെയ്തു.
മേയ് 3, 4 തീയതികളിലാണ് തിരുനാള്‍.
3ന് രാവിലെ 9.30ന് കുര്‍ബാന, 4ന് പ്രദക്ഷിണം, രാത്രി 7ന് ഫ്യൂഷന്‍ മ്യൂസിക് ഷോ എന്നിവ നടക്കും.
ജാഥയ്ക്ക് തിരുനാള്‍ കണ്‍വീനര്‍ ലിജോ മൂഞ്ഞേലി, വര്‍ഗീസ് ചെമ്പോട്ടി, തോമസ് കപ്പാറ, കൈക്കാരന്മാരായ ജോസഫ് അക്കരക്കാരന്‍, വര്‍ഗീസ് കൂനന്‍ എന്നിവര്‍ നേതൃത്വം നല്‍കി.
ഇരിങ്ങാലക്കുട: കെപിഎസ്ടിഎ ഇരിങ്ങാലക്കുട ”കെപിഎസ്ടിഎ – ടീച്ചേഴ്സ് നെസ്റ്റ്” എന്ന പേരിൽ നിർമ്മിക്കുന്ന വിദ്യാഭ്യാസ ജില്ലാ കമ്മിറ്റി ഓഫീസ് കെട്ടിടത്തിന് സംസ്ഥാന പ്രസിഡൻ്റ് കെ. അബ്ദുൾ മജീദ് തറക്കല്ലിട്ടു.
വിദ്യാഭ്യാസ ജില്ലാ പ്രസിഡന്റ് പ്രവീൺ എം. കുമാർ അധ്യക്ഷത വഹിച്ചു.
സംസ്ഥാന വൈസ് പ്രസിഡന്റ് സാജു ജോർജ്ജ്, സംസ്ഥാന എക്സിക്യൂട്ടീവ് അംഗങ്ങളായ എം.ജെ ഷാജി, ആൻ്റോ പി. തട്ടിൽ, തൃശ്ശൂർ റവന്യൂ ജില്ല പ്രസിഡന്റ് പി.സി. ശ്രീപത്മനാഭൻ, സംസ്ഥാന കമ്മിറ്റി അംഗങ്ങളായ സി.ജെ. ദാമു, ടി.എസ്. സുരേഷ് കുമാർ, ബി. ബിജു, എൻ.പി. രജനി, എം.ആർ. ആംസൺ, ഷിജി ശങ്കർ, സി. നിധിൻ ടോണി, പി. മെൽവിൻ ഡേവീസ്, വി. ഇന്ദുജ, കെ.വി. സുശീൽ എന്നിവർ പ്രസംഗിച്ചു.
ഇരിങ്ങാലക്കുട : കാരുമാത്ര വാത്യാട്ട് ധർമ്മദൈവ ക്ഷേത്രം കമ്മിറ്റിയുടെ ആഭിമുഖ്യത്തിൽ നടത്തിയ ചടങ്ങിൽ എൻ.ടി.എ. നടത്തിയ സെഷൻ 1 ജെഇഇ മെയിൻ പരീക്ഷയിൽ ഉന്നത വിജയം കൈവരിച്ച ഗൗതം സുരേഷ്, ഇൻ്റർനാഷണൽ ഫൗണ്ടേഷൻ ഫോർ സോഷ്യൽ എംപർമെൻ്റിൻ്റെ സ്വാഭാവിക വനം സംരക്ഷകനുള്ള ദേശീയ ബഹുമതി നേടിയ വി.കെ. ശീധരൻ എന്നിവരെ കമ്മിറ്റിയംഗം വി.ആർ. പുരുഷോത്തമൻ പൊന്നാട അണിയിച്ച് ആദരിച്ചു.
വൈസ് പ്രസിഡന്റ് വി.കെ. ധർമ്മൻ അധ്യക്ഷനായിരുന്നു.
ട്രഷറർ വി.യു. സജീവൻ, കമ്മിറ്റിയംഗം വി.പി. ഗോപാലൻ എന്നിവർ പ്രസംഗിച്ചു.
ഇരിങ്ങാലക്കുട : അരിപ്പാലം തോപ്പില്‍ കോമ്പരുപറമ്പില്‍ ഭദ്രകാളി ഭുവനേശ്വരി ക്ഷേത്രത്തിലെ ഭണ്ഡാരങ്ങള്‍ കുത്തി തുറന്ന് മോഷണം.
ഭദ്രകാളി, വിഷ്ണുമായ ക്ഷേത്രങ്ങള്‍ക്ക് മുന്നിലെ ഭണ്ഡാരങ്ങളാണ് പൂട്ടുപൊളിച്ച് മോഷണം നടന്നിരിക്കുന്നത്.
ഏപ്രില്‍ 25, 26 തിയ്യതികളിലായിരുന്നു ഉത്സവം. അതിനുശേഷം നടയടച്ച് മെയ് 2 വെള്ളിയാഴ്ച നടതുറപ്പിന് മുന്നോടിയായി വ്യാഴാഴ്ച രാവിലെ ഭാരവാഹികള്‍ ക്ഷേത്രത്തിലെത്തിയപ്പോഴാണ് മോഷണ വിവരം അറിഞ്ഞത്.
ഏകദേശം 25,000 രൂപയുടെ നഷ്ടമുണ്ടായിട്ടുണ്ടെന്നാണ് കരുതുന്നത്. കാട്ടൂര്‍ പൊലീസില്‍ പരാതി നല്‍കിയിട്ടുണ്ട്.
കഴിഞ്ഞ വര്‍ഷം ഉത്സവത്തിന് വിഷ്ണുമായയുടെ ഭണ്ഡാരം തുറന്നപ്പോള്‍ 16,500 രൂപ ലഭിച്ചിരുന്നു.
കഴിഞ്ഞ തവണത്തേക്കാളും ഇത്തവണ ഭണ്ഡാരവരവ് കൂടുതലാണെന്നും അതിനാല്‍ 20,000ത്തോളം രൂപ നഷ്ടപ്പെട്ടിട്ടുണ്ടെന്നും ഭാരവാഹികള്‍ പറഞ്ഞു.
ഭദ്രകാളിയുടെ ഭണ്ഡാരത്തില്‍ നിന്നും അയ്യായിരം രൂപയോളം പോയിട്ടുണ്ടെന്നാണ് കരുതുന്നത്.
സംഭവത്തെ തുടര്‍ന്ന് കാട്ടൂര്‍ പൊലീസ് സ്ഥലത്തെത്തി അന്വേഷണം നടത്തി.
ഭണ്ഡാരങ്ങള്‍ തുറക്കാനായി കൊണ്ടുവന്നുവെന്ന് കരുതുന്ന ഒരു താക്കോല്‍ കൂട്ടം ക്ഷേത്ര പരിസരത്തുനിന്നും ലഭിച്ചത് ഭാരവാഹികള്‍ പൊലീസിന് കൈമാറി.
ഇരിങ്ങാലക്കുട : 1.16 കോടി ചിലവിൽ നവീകരിക്കുന്ന ആളൂർ പഞ്ചായത്തിലെ 5 റോഡുകളുടെ നിർമ്മാണോദ്ഘാടനം മന്ത്രി ഡോ. ആർ. ബിന്ദു നിർവഹിച്ചു.
ഇരിങ്ങാലക്കുട നിയോജകമണ്ഡലത്തിലെ 7 പഞ്ചായത്തുകളിലും നഗരസഭയിലുമായി വിവിധ കാരണങ്ങളാൽ തകർന്ന 30 റോഡുകൾക്കായി 8.39 കോടി രൂപയാണ് പുനരുദ്ധാരണത്തിനായി മുഖ്യമന്ത്രിയുടെ തദ്ദേശ റോഡ് പുനരുദ്ധാരണ പദ്ധതി പ്രകാരം അനുവദിച്ചിട്ടുള്ളത്.
ആളൂർ പഞ്ചായത്തിലെ സെന്റ് ആന്റണീസ് റോഡ് 28 ലക്ഷം, റെയിൽവേ ഗേറ്റ് – പെരടിപ്പാടം റോഡ് (15 ലക്ഷം), വടക്കേക്കുന്ന് റോഡ് (20 ലക്ഷം), കണ്ണിക്കര – അത്ഭുതകുളങ്ങര അമ്പലം റോഡ് (31 ലക്ഷം), കണ്ണിക്കര കപ്പേള – എരണപ്പാടം റോഡ് (22 ലക്ഷം) എന്നീ തദ്ദേശ റോഡുകളുടെ പുനരുദ്ധാരണത്തിൻ്റെ നിർമ്മാണോദ്ഘാടനമാണ് മന്ത്രി ഡോ. ആർ. ബിന്ദു നിർവഹിച്ചത്.
കണ്ണിക്കര കപ്പേള പരിസരത്ത് നടന്ന ചടങ്ങിൽ പഞ്ചായത്ത് പ്രസിഡന്റ് കെ.ആർ. ജോജോ അധ്യക്ഷത വഹിച്ചു.
വൈസ് പ്രസിഡന്റ് രതി സുരേഷ്, മാള ബ്ലോക്ക്‌ ക്ഷേമകാര്യ ചെയർമാൻ ജോസ് മാഞ്ഞൂരാൻ, ആരോഗ്യ വിദ്യാഭ്യാസ സ്റ്റാൻഡിങ് കമ്മിറ്റി ചെയർമാൻ ബിന്ദു ഷാജു, ജനപ്രതിനിധികളായ ജുമൈല സഗീർ, ഷൈനി വർഗീസ് പൊതുപ്രവർത്തകരായ എം.സി. സന്ദീപ്, എം.ബി. ലത്തീഫ്, സി.ജെ. നിക്സൻ എന്നിവർ പ്രസംഗിച്ചു.
ഇരിങ്ങാലക്കുട : കൊരുമ്പിശ്ശേരി റസിഡൻ്റ്സ് അസോസിയേഷന്റെ ആഭിമുഖ്യത്തിൽ “സ്ത്രീ സൗഖ്യം ആയുർവേദത്തിലൂടെ” എന്ന വിഷയത്തെക്കുറിച്ച് സ്ത്രീകൾക്കായി ക്ലാസ്സ് സംഘടിപ്പിച്ചു.
യോഗത്തിൽ അസോസിയേഷൻ പ്രസിഡന്റ് രാജീവ് മുല്ലപ്പിള്ളി അധ്യക്ഷത വഹിച്ചു.
സഞ്ജീവനി ആയുർവേദ ക്ലിനിക്കിലെ ചീഫ് ഫിസിഷ്യൻ ഡോ. എം. ഇന്ദിരാദേവിയാണ് ക്ലാസ് നയിച്ചത്.
സെക്രട്ടറി കെ. ഗിരിജ സ്വാഗതവും ബിന്ദു ജിനൻ നന്ദിയും പറഞ്ഞു.
ഇരിങ്ങാലക്കുട : പൊതുഗതാഗത രംഗം ജനകീയ സൗഹൃദമാക്കുക എന്ന ലക്ഷ്യത്തോടെ മുരിയാട് പഞ്ചായത്ത് മൂന്നാം 100 ദിന കർമ്മപരിപാടിയുടെ ഭാഗമായി നടപ്പിലാക്കുന്ന ഗ്രാമവണ്ടി സർവീസിന് മേയ് 3ന് രാവിലെ 9 മണിക്ക് ആനന്ദപുരം എടയാറ്റുമുറിയിൽ മന്ത്രി ഡോ. ആർ. ബിന്ദു ഫ്ലാഗ് ഓഫ് ചെയ്യും.
മുകുന്ദപുരം താലൂക്കിലെ ആദ്യത്തേതും തൃശ്ശൂർ ജില്ലയിലെ രണ്ടാമത്തേതുമായ പഞ്ചായത്താണ് ഗ്രാമവണ്ടി എന്ന ആശയം നടപ്പിലാക്കുന്നത്.
കേരള സ്റ്റേറ്റ് റോഡ് ട്രാൻസ്പോർട്ട് കോർപ്പറേഷനാണ് മുരിയാട് പഞ്ചായത്തിന് വേണ്ടി സർവ്വീസ് ആരംഭിക്കുന്നത്.
പഞ്ചായത്തിൻ്റെ വിവിധ പ്രദേശങ്ങളിൽ നിന്നും സിവിൽ സ്റ്റേഷൻ, പ്രൈവറ്റ് ബസ് സ്റ്റാൻഡ്, താലൂക്ക് ആശുപത്രി, മാർക്കറ്റ്, ദേശീയ പാത എന്നിവയെ ബന്ധിപ്പിക്കുന്നതും, പഞ്ചായത്ത് ഓഫീസ്, പഞ്ചായത്തിൻ്റെ വെറ്റിനറി, ഹോമിയോ, അലോപ്പതി ആശുപത്രികൾ, കൃഷിഭവൻ, സർക്കാർ സ്കൂൾ എന്നിവിടങ്ങളിലേക്ക് എത്തിപ്പെടാൻ പഞ്ചായത്തിലെ വിവിധ പ്രദേശങ്ങളിലെ ജനങ്ങൾക്ക് സൗകര്യം ലഭിക്കുന്ന തരത്തിൽ ഇരിങ്ങാലക്കുട മുതൽ നെല്ലായി വരെയാണ് ഗ്രാമവണ്ടി സൗകര്യം ഒരുക്കിയിരിക്കുന്നത്.
കെ.എസ്.ആർ.ടി.സി.യുമായി ധാരണാപത്രം ഒപ്പു വെച്ച് കഴിഞ്ഞു.
കെ.എസ്.ആർ.ടി.സി.യുടെ ബസ്സ് അലോക്കേഷനും റൂട്ടും അംഗീകരിക്കപ്പെട്ടു കഴിഞ്ഞു.
ഗ്രാമവണ്ടി എന്ന ആശയം നടപ്പിലാക്കുന്നതോടെ മുരിയാട് പഞ്ചായത്തിൽ പൊതുഗതാഗത സൗകര്യം എത്തിപ്പെടാത്ത ബഹുഭൂരിപക്ഷം മേഖലകളിലും ആളുകൾക്ക് പട്ടണത്തിലും വിവിധ സ്ഥാപനങ്ങളിലേക്കും എത്തിപ്പെടാൻ വലിയ അനുഗ്രഹമായിരിക്കുമെന്ന് പഞ്ചായത്ത് പ്രസിഡന്റ് ജോസ് ജെ. ചിറ്റിലപ്പിള്ളി പറഞ്ഞു.
സുനിൽ
ഇരിങ്ങാലക്കുട : പടിയൂർ വാര്യം റോഡ് പരിസരം അടിപ്പറമ്പിൽ പരേതനായ പത്മനാഭൻ മകൻ സുനിൽ (49) നിര്യാതനായി.
സംസ്കാരം നടത്തി.
ഭാര്യ : ജിഷ
മകൻ : ആദിത്യൻ.
ഇരിങ്ങാലക്കുട : കർക്കിടക മാസത്തിലെ അത്തം നാളിൽ നടക്കുന്ന കൂടൽമാണിക്യം ക്ഷേത്രത്തിലെ ഇല്ലംനിറയ്ക്ക് ആവശ്യമായ നെൽക്കതിർ ഉത്പാദിപ്പിക്കുന്നതിന്റെ വിത്തിടൽ ചടങ്ങ് ദേവസ്വം ചെയർമാൻ അഡ്വ. സി.കെ. ഗോപി ഉദ്ഘാടനം ചെയ്തു.
ഇപ്രാവശ്യം ജൂലൈ 30നാണ് ഇല്ലംനിറ.
കാർഷിക സർവകലാശാല വികസിപ്പിച്ചെടുത്ത മനുരത്ന നെൽവിത്തുകളാണ് ഇക്കുറി വിതച്ചിരിക്കുന്നത്.
90 ദിവസം മൂപ്പുള്ള നെൽവിത്തായതിനാൽ ജലസേചന സൗകര്യം കുറവുള്ള ഇടങ്ങളിലേക്ക് ഉത്തമമാണ്.
മുൻ ദേവസ്വം ചെയർമാൻ യു. പ്രദീപ് മേനോൻ, ഭരണസമിതി അംഗം ബിന്ദു എന്നിവർ പ്രസംഗിച്ചു.
ഭരണസമിതി അംഗങ്ങളായ അഡ്വ. കെ.ജി. അജയ് കുമാർ സ്വാഗതവും രാഘവൻ മുളങ്ങാടൻ നന്ദിയും പറഞ്ഞു.
ചടങ്ങിൽ ദേവസ്വം ജീവനക്കാരോടൊപ്പം ഒട്ടേറെ ഭക്തജനങ്ങളും പങ്കെടുത്തു.
ചാലക്കുടി : ഒറീസയിൽ നിന്നും വിൽപ്പനയ്ക്കായി രഹസ്യമായി കടത്തിക്കൊണ്ടു വന്ന 1.185 കിലോ ഗ്രാം കഞ്ചാവുമായി മാള സ്വദേശി പിടിയിൽ.
പൊലീസിൻ്റെ ഓപ്പറേഷൻ ഡി ഹണ്ടിൻ്റെ ഭാഗമായി നടത്തിയ പ്രത്യേക വാഹന പരിശോധനയിലാണ് മാള മടത്തുംപടി സ്വദേശി പയ്യപ്പിള്ളി വീട്ടിൽ ജസ്റ്റിനെ(25) അറസ്റ്റ് ചെയ്തത്.
തൃശൂർ റൂറൽ ജില്ലാ പൊലീസ് മേധാവി ബി. കൃഷ്ണകുമാർ ഐപിഎസിന് ലഭിച്ച രഹസ്യ വിവരത്തിന്റെ അടിസ്ഥാനത്തിൽ ചാലക്കുടി ഡിവൈഎസ്പി കെ. സുമേഷിന്റെ നേതൃത്വത്തിൽ ചാലക്കുടി കെ.എസ്.ആർ.ടി.സി. ബസ് സ്റ്റാൻഡ് പരിസരത്ത് വെച്ച് യാത്രക്കാരനായ ജസ്റ്റിൻ്റെ കയ്യിലുണ്ടായിരുന്ന ട്രാവൽബാഗിൽ ഭദ്രമായി പൊതിഞ്ഞു സൂക്ഷിച്ച നിലയിൽ കഞ്ചാവ് കണ്ടെത്തുകയായിരുന്നു.
ഒറീസയിൽ നിന്നും കഞ്ചാവ് കടത്തുന്നുവെന്ന രഹസ്യ വിവരത്തിൻ്റെ അടിസ്ഥാനത്തിലാണ് വാഹന പരിശോധന നടത്തിയത്.
കെ.എസ്.ആർ.ടി.സി. ബസ് സ്റ്റാൻ്റ് പരിസരത്ത് പൊലീസിന്റെ വാഹന പരിശോധന കണ്ട് യുവാവ് തഞ്ചത്തിൽ രക്ഷപെട്ടുപോകാൻ ശ്രമിച്ചെങ്കിലും പിന്തുടർന്ന് പിടികൂടി ചോദ്യം ചെയ്തപ്പോൾ പരസ്പരവിരുദ്ധമായി സംസാരിച്ചതിനെ തുടർന്നാണ് വിശദമായി പരിശോധിച്ചത്.
ചാലക്കുടി സർക്കിൾ ഇൻസ്പെക്ടർ എം.കെ. സജീവ്, റൂറൽ ജില്ലാ ഡാൻസാഫ് ടീം അംഗങ്ങൾ, ചാലക്കുടി പൊലീസ് സ്റ്റേഷൻ സബ് ഇൻസ്പെക്ടർ ഋഷിപ്രസാദ്, അഡീഷണൽ എസ്ഐമാരായ ഹരിശങ്കർ പ്രസാദ്, ജെയ്സൻ ജോസഫ്, സീനിയർ സിപിഒമാരായ പി.കെ. രതീഷ്, സി.ആർ. സുരേഷ്, എൻ. പ്രദീപ് എന്നിവരടങ്ങിയ സംഘമാണ് യുവാവിനെ പിടികൂടിയത്.
