ഇരിങ്ങാലക്കുട : അംഗീകാരങ്ങൾ വാരിക്കൂട്ടിയ ”തടവ്”, ”ഫെമിനിച്ചി ഫാത്തിമ” എന്നീ ചിത്രങ്ങൾ ആറാമത് ഇരിങ്ങാലക്കുട അന്താരാഷ്ട്ര ചലച്ചിത്രമേളയിൽ പ്രദർശിപ്പിച്ചത് നിറഞ്ഞ സദസ്സിൽ.
മാസ് മൂവീസിൽ പ്രദർശനങ്ങൾക്കും ചർച്ചകൾക്കും ശേഷം നടന്ന ചടങ്ങിൽ “തടവി”ൻ്റെ സംവിധായകൻ ഫാസിൽ റസാഖിനെ സാമൂഹ്യ പ്രവർത്തകനായ ബാലൻ അമ്പാടത്തും, “ഫെമിനിച്ചി ഫാത്തിമ”യുടെ സംവിധായകനും ക്രൈസ്റ്റ് കോളെജിലെ പൂർവ്വ വിദ്യാർഥിയുമായ ഫാസിൽ മുഹമ്മദിനെ കോളെജ് മാനേജർ ഫാ. ജോയ് പീണിക്കപ്പറമ്പിലും ആദരിച്ചു.
അഡ്വ. ആശ ഉണ്ണിത്താൻ, പി.കെ. കിട്ടൻ മാസ്റ്റർ, കെ. ഹസ്സൻ കോയ, അഡ്വ. പി.കെ. നാരായണൻ തുടങ്ങിയവർ പ്രസംഗിച്ചു.
വൈകീട്ട് ഓർമ്മ ഹാളിൽ റഷ്യൻ ഡോക്യുമെൻ്ററിയായ ”ഇൻ്റർസെപ്റ്റഡ്” പ്രദർശിപ്പിച്ചു.
ചലച്ചിത്രമേളയുടെ എട്ടാം ദിവസമായ മാർച്ച് 15ന് മാസ് മൂവീസിൽ രാവിലെ 10 മണിക്ക് “സംഘർഷഘടന”, 12 മണിക്ക് “അരിക്” എന്നീ ചിത്രങ്ങളും വൈകീട്ട് 6ന് ഓർമ്മ ഹാളിൽ പാലസ്തീനിയൻ ഡോക്യുമെൻ്ററിയായ “ഫ്രം ഗ്രൗണ്ട് സീറോ- ദി അൺടോൾഡ് സ്റ്റോറീസ് ഫ്രം ഗാസ”യും പ്രദർശിപ്പിക്കും.
