IRINJALAKUDA TIMES
ഇരിങ്ങാലക്കുട : ക്രൈസ്റ്റ് കോളെജിൽ നടക്കുന്ന തൃശൂർ ജില്ലാ ഹോക്കി ലീഗ് മത്സരങ്ങൾ പുരോഗമിക്കുന്നു.
മത്സരം തൃശൂർ ജില്ലാ സ്പോർട്സ് കൗൺസിൽ പ്രസിഡന്റ് കെ ആർ സാംബശിവൻ ഉദ്ഘാടനം ചെയ്തു.
കോളെജ് മാനേജർ ഫാ ജോയ് പീണിക്കപ്പറമ്പിൽ മുഖ്യാതിഥിയായിരുന്നു.
കോളെജ് കായിക വിഭാഗം മേധാവി ഡോ ബിന്റു ടി കല്യാൺ, തൃശൂർ ജില്ലാ ഹോക്കി അസോസിയേഷൻ സെക്രട്ടറി എബിനൈസർ ജോസ്, ട്രഷറർ അരുൺ എന്നിവർ പങ്കെടുത്തു.
സബ് ജൂനിയർ, ജൂനിയർ, സീനിയർ വിഭാഗങ്ങളിലായാണ് മത്സരങ്ങൾ നടക്കുന്നത്.
19 ടീമുകൾ ടൂർണമെന്റിൽ പങ്കെടുക്കുന്നുണ്ട്.
ഇരിങ്ങാലക്കുട : മാള ഹോളി ഗ്രേസ് കോളെജിൽ നടക്കുന്ന കാലിക്കറ്റ് യൂണിവേഴ്സിറ്റി ഡി സോൺ കലോത്സവത്തിൽ ഇരിങ്ങാലക്കുട ക്രൈസ്റ്റ് കോളെജ് മുന്നേറ്റം തുടരുന്നു.
ഇരുന്നൂറോളം പോയിൻ്റുകൾ നേടി മേളയുടെ രണ്ടാം ദിനത്തിൽ ക്രൈസ്റ്റ് ഒന്നാം സ്ഥാനത്താണ്.
മാപ്പിള കലകളിൽ ക്രൈസ്റ്റിൻ്റെ ജൈത്ര യാത്രയാണ് കലാമേളയുടെ രണ്ടാം ദിനം കണ്ടത്.
ഒപ്പന, കോൽക്കളി, വട്ടപ്പാട്ട്, മാപ്പിളപ്പാട്ട് ( സിംഗിൾ ) എന്നിവയിൽ ഒന്നാം സ്ഥാനം നേടിയ ക്രൈസ്റ്റ് കോളെജ് അറബന മുട്ടിൽ രണ്ടാമതെത്തി.
ഇരിങ്ങാലക്കുട : പുല്ലൂറ്റ് ഗവ കെ കെ ടി എം കോളെജിലെ സുവോളജി വകുപ്പ്, റിസർച്ച് കമ്മിറ്റി, ഐ ക്യു എ സി എന്നിവയുടെ നേതൃത്വത്തിൽ അങ്കമാലി ആന്റൺസ് മെഡികോഡുമായി സഹകരിച്ച് “മെഡിക്കൽ കോഡിംഗ്, ബില്ലിംഗ്, ആശുപത്രി ഭരണ നിർവ്വഹണം, മെഡിക്കൽ ട്രാൻസ്ക്രിപ്ഷൻ, മെഡിക്കൽ സ്ക്രൈബിംഗ് എന്നീ മേഖലകളിലെ ഭാവി സാധ്യതകൾ” എന്ന വിഷയത്തെ ആധാരമാക്കി അവബോധ പരിപാടി സംഘടിപ്പിച്ചു.
പ്രിൻസിപ്പൽ പ്രൊഫ ഡോ ടി കെ ബിന്ദു ശർമിള ഉദ്ഘാടനം നിർവഹിച്ചു.
സുവോളജി വകുപ്പ് മേധാവി പ്രൊഫ ഡോ ഇ എം ഷാജി അധ്യക്ഷത വഹിച്ചു.
അസി പ്രൊഫ ഡോ സീമ മേനോൻ സ്വാഗതവും അസി പ്രൊഫ ഡോ എസ് നിജ നന്ദിയും പറഞ്ഞു.
തുടർന്ന് ആന്റൺസ് മെഡികോഡ് എം ഡി നീതു വർഗീസ് വിഷയാവതരണം നടത്തി.
ഓരോ മേഖലയും ഉൾക്കൊള്ളുന്ന കൃത്യമായ പ്രവർത്തനങ്ങൾ, യോഗ്യതാ മാനദണ്ഡങ്ങൾ, വളർച്ചാ സാധ്യതകൾ എന്നിവയെക്കുറിച്ച് വിശദീകരിച്ചു.
ഇരുന്നൂറിലധികം വിദ്യാർഥികളും അധ്യാപകരും പരിപാടിയിൽ പങ്കെടുത്തു.
ഇരിങ്ങാലക്കുട : സെന്റ് ജോസഫ്സ് കോളെജിൽ ഫിസിക്‌സ് വിഭാഗത്തിൻ്റെ നേതൃത്വത്തിൽ ജനുവരി 22ന് ഇ – മാലിന്യ ശേഖരണ പരിപാടി സംഘടിപ്പിക്കും.
പരിസ്ഥിതി സംരക്ഷണത്തിന്റെ ഭാഗമായി ഇലക്ട്രോണിക് മാലിന്യങ്ങളുടെ ശരിയായ കൈമാറ്റം ഉറപ്പാക്കുക എന്ന ലക്ഷ്യത്തോടെയാണ് പരിപാടി സംഘടിപ്പിക്കുന്നത്.
പഴയ മൊബൈൽ ഫോണുകൾ, ലാപ്‌ടോപ്പുകൾ, ചാർജറുകൾ, മറ്റ് ഇലക്ട്രോണിക് ഉപകരണങ്ങൾ എന്നിവ ശേഖരിക്കുന്നതിനായി കോളെജിൽ പ്രത്യേക കേന്ദ്രം ഒരുക്കിയിട്ടുണ്ട്.
ട്യൂബ് ലൈറ്റുകളും, സി എഫ് എൽ ബൾബുകളും, ഇൻക്കൻഡാസെന്റ് ബൾബുകളും ശേഖരണത്തിൽ ഉൾപ്പെടുത്തുന്നില്ല.
ശേഖരിച്ച ഇ-മാലിന്യങ്ങൾ പരിസ്ഥിതി സൗഹൃദ രീതിയിൽ പുനരുപയോഗത്തിനും വിനിമയത്തിനും വിധേയമാക്കും.
വിദ്യാർഥികൾ, അധ്യാപകർ, നാട്ടുകാർ എന്നിവർ ഈ പ്രവർത്തനത്തിൽ സജീവമായി പങ്കാളികളാകണമെന്ന് കോളെജ് അധികൃതർ അറിയിച്ചു.
കൂടുതൽ വിവരങ്ങൾക്ക് സെന്റ് ജോസഫ്സ് കോളെജിലെ
ഫിസിക്‌സ് വിഭാഗവുമായോ 94008 26952 (അസി പ്രൊഫ സി എ മധു), 97453 28494 (അസി പ്രൊഫ മേരി ജിസ്ബി പൗലോസ്) എന്നീ നമ്പറുകളിലോ ബന്ധപ്പെടാവുന്നതാണ്.
ഇരിങ്ങാലക്കുട : മലപ്പുറം, പ്രിയദർശിനി ആർട്സ് ആൻഡ് സയൻസ് കോളെജ്, പ്രൊഫഷണൽ സോഷ്യൽ വർക്ക് അസോസിയേഷനുമായി സഹകരിച്ച് നടത്തിയ ”മെറാക്കി” എന്ന നാഷണൽ കോൺഫറൻസിലും സ്റ്റുഡൻ്റ്‌സ് മീറ്റിലും ഇരിങ്ങാലക്കുട ക്രൈസ്റ്റ് കോളെജ് സോഷ്യൽ വർക്ക് വിഭാഗം വിദ്യാർഥികൾ ഓവറോൾ ചാമ്പ്യൻഷിപ്പ് കരസ്ഥമാക്കി.
അസിസ്റ്റന്റ് പ്രൊഫസർമാരായ റോസ്മോൾ ഡാനി, ഡോ കെ ആർ വന്ദന എന്നിവർ ടീമിനെ നയിച്ചു.
”മാനസിക ആരോഗ്യ പ്രശ്നങ്ങളും ആത്മഹത്യ പ്രതിരോധവും : തിരിച്ച് വരവും സപ്പോർട്ട് സംവിധാനവും” എന്ന വിഷയത്തെ അടിസ്ഥാനമാക്കിയാണ് ദ്വിദിന സമ്മേളനം സംഘടിപ്പിച്ചത്.
ഇതിൽ ഇന്ത്യയിലുടനീളമുള്ള വിവിധ കോളെജുകൾ പങ്കെടുത്തു.
ക്രൈസ്റ്റ് കോളെജിലെ സോഷ്യൽ വർക്ക് വിദ്യാർഥികൾ വ്യത്യസ്ത വിഷയങ്ങളിൽ പ്രബന്ധങ്ങൾ അവതരിപ്പിച്ചു.
തീം ഡാൻസ്, തെരുവ് നാടകം, സ്പോട് ഡാൻസ് എന്നീ മത്സരങ്ങളിൽ ഒന്നാം സ്ഥാനവും, ഫോട്ടോ ഗ്രാഫി, എമെർജിങ് സോഷ്യൽ വർക്കർ എന്നീ മത്സരങ്ങളിൽ രണ്ടാം സ്ഥാനവും നേടിയാണ് ഓവറോൾ ചാമ്പ്യൻഷിപ്പ് നേടിയത്.
ഈ അക്കാഡമിക് വർഷത്തിൽ രണ്ടാമത്തെ ഓവറോൾ ചാമ്പ്യൻഷിപ്പാണ് സോഷ്യൽവർക്ക്‌ ഡിപ്പാർട്മെന്റ് നേടുന്നത്.
വിദ്യാർഥികളെ പ്രിൻസിപ്പൽ ഫാ ഡോ ജോളി ആൻഡ്രൂസ് അഭിനന്ദിച്ചു.
ഇരിങ്ങാലക്കുട : പുല്ലൂറ്റ് കെ കെ ടി എം ഗവ കോളെജിൻ്റെ ബിരുദദാന സമ്മേളനവും കിർഫ് റാങ്ക് നേട്ടത്തിൻ്റെ ആഘോഷവും മെറിറ്റ് ഡേയും മുസിരിസ് കൺവെൻഷൻ സെൻ്ററിൽ സംഘടിപ്പിച്ചു.
കേരള കലാമണ്ഡലം മുൻ വൈസ് ചാൻസിലർ ഡോ ടി കെ നാരായണൻ ഉദ്ഘാടനം ചെയ്തു.
ബിരുദം നിങ്ങളെ സാമൂഹിക പ്രതിബദ്ധതയുള്ളവരാക്കി മാറ്റണമെന്നും വിദ്യ കൊണ്ട് സ്വതന്ത്രരാവണമെന്നും മനുഷ്യത്വമുള്ള മനുഷ്യരായി മാറണമെന്നും അദ്ദേഹം പറഞ്ഞു.
ചടങ്ങിൽ ബിരുദ, ബിരുദാനന്തര വിഷയങ്ങളിൽ ഉന്നത വിജയം നേടിയ വിദ്യാർഥികൾക്ക് അദ്ദേഹം ബിരുദം സമ്മാനിച്ചു.
കോളെജ് പ്രിൻസിപ്പൽ പ്രൊഫ ഡോ ടി കെ ബിന്ദു ശർമിള അധ്യക്ഷത വഹിച്ചു.
ബിരുദദാന സമ്മേളനത്തിൽ കാലിക്കറ്റ് യൂണിവേഴ്സിറ്റി സെനറ്റ് മെമ്പർ ഡോ ഇ എസ് മാഗി ബിരുദ ബിരുദാനന്തര വിദ്യാർഥികൾക്ക് സത്യപ്രതിജ്ഞ ചൊല്ലിക്കൊടുത്തു.
വൈസ് പ്രിൻസിപ്പൽ ഡോ ജി ഉഷാകുമാരി, ഐ ക്യു എ സി മെമ്പർ ഡോ കൃഷ്ണകുമാർ, കോളെജ് ചെയർമാൻ എം സി ഋഷികേശ് ബാബു, പി ടി എ വൈസ് പ്രസിഡന്റ് എം ആർ സുനിൽ ദത്ത് എന്നിവർ ആശംസകൾ അർപ്പിച്ചു.
പി ടി എ സെക്രട്ടറി ഡോ എസ് വിനയശ്രീ സ്വാഗതവും ആർ രാഗ നന്ദിയും പറഞ്ഞു.
ഇരിങ്ങാലക്കുട : ക്രൈസ്റ്റ് കോളെജിലെ ഗവേഷക സംഘം നടത്തിയ പഠനത്തിൽ കേരളത്തിന്റെ വിവിധ ഭാഗങ്ങളിൽ നിന്നായി രണ്ട് അപൂർവ്വയിനം വലച്ചിറകന്മാരെ കണ്ടെത്തി.
“ഗ്ലീനോനോക്രൈസ സെയിലാനിക്ക” എന്ന ഹരിതവലച്ചിറകനെ കേരളത്തിലെ വയനാട് ജില്ലയിലെ മാനന്തവാടി, തിരുനെല്ലി എന്നീ പ്രദേശങ്ങളിൽ നിന്നുമാണ് കണ്ടെത്തിയിരിക്കുന്നത്.
ശ്രീലങ്കയിൽ മാത്രം കണ്ടുവരുന്ന ഇനമായി കരുതിയിരുന്ന ഈ ഹരിതവലച്ചിറകനെ 111 വർഷങ്ങൾക്ക് ശേഷം കേരളത്തിൽ നിന്നുമാണ് കണ്ടെത്തിയത്.
“ഇൻഡോഫെയിൻസ് ബാർബാറ’ എന്നറിയപ്പെടുന്ന മറ്റൊരു അപൂർവ്വയിനം കുഴിയാന വലച്ചിറകനെ തൃശൂർ ജില്ലയിലെ ഇരിങ്ങാലക്കുട, മനക്കൊടി, പാലക്കാട് ജില്ലയിലെ ചിറ്റൂർ, പുതുനഗരം, കുലുക്കിലിയാട്, കോഴിക്കോട് ജില്ലയിലെ ദേവഗിരി, ചാലിയം, കണ്ണൂരിലെ കൂത്തുപറമ്പ്, മലപ്പുറത്തെ അരൂർ, തിരുവനന്തപുരത്തെ പൊന്മുടി എന്നീ പ്രദേശങ്ങളിൽ നിന്നുമാണ് കണ്ടെത്തിയത്.
സാധാരണ കണ്ടുവരുന്ന തുമ്പികളുമായി കുഴിയാന വലച്ചിറകനെ തെറ്റിദ്ധരിക്കാറുണ്ട്. മുന്നോട്ടു നീണ്ടു നിൽക്കുന്ന സ്പർശനി ഉള്ളതാണ് സാധാരണ കാണപ്പെടുന്ന തുമ്പികളിൽ നിന്നും ഇവ വ്യത്യസ്തപ്പെടാനുള്ള പ്രധാന കാരണം.
ഈ ജീവികളുടെ സാന്നിധ്യവും, ഇതിൻ്റെ പൂർണ വിവരണവും അന്താരാഷ്ട്ര ശാസ്ത്ര മാസികകളായ ”ജേണൽ ഓഫ് എൻ്റമോളജിക്കൽ റിസർച്ച് സൊസൈറ്റി”, ”നാച്ചുറ സോമോഗിയൻസിസ്” എന്നിവയിലാണ് പ്രസിദ്ധീകരിച്ചിരിക്കുന്നത്.
വളരെ സുപ്രധാനപ്പെട്ട ഈ കണ്ടെത്തലിലൂടെ കേരളത്തിലെയും ശ്രീലങ്കയിലെയും ജൈവ വൈവിധ്യ സവിശേഷതകൾക്ക് സാമ്യത ഉണ്ടെന്ന് സൂചനകൾ ലഭിക്കുന്നുണ്ട്.
ക്രൈസ്റ്റ് കോളെജിലെ ഷഡ്‌പദ എൻ്റമോളജി റിസർച്ച് ലാബ് ഗവേഷകൻ ടി ബി സൂര്യനാരായണൻ, എസ് ഇ ആർ എൽ മേധാവി ഡോ സി ബിജോയ് എന്നിവരാണ് ഇവയെ കണ്ടെത്തിയത്.
കേരളത്തിൽ നിന്നും റിപ്പോർട്ട് ചെയ്‌തിട്ടുള്ള പന്ത്രണ്ടാമത്തെ ഇനം ഹരിതവരച്ചിറകനും എട്ടാമത്തെ ഇനം കുഴിയാന വരച്ചിറകനും ആണ് ഈ ജീവികൾ.
കൗൺസിൽ ഫോർ സയൻ്റിഫിക്ക് ആൻഡ് ഇൻഡസ്ട്രിയൽ റിസർച്ച് (CSIR) ഗവേഷണ ഗ്രാൻ്റ് ഉപയോഗിച്ചാണ് പഠനം നടത്തിയത്.
ക്രൈസ്റ്റ് കോളെജിലെ ഷഡ്‌പദ എൻ്റമോളജി ഗവേഷണ കേന്ദ്രം (എസ് ഇ ആർ എൽ) ഇത്തരം ജീവികളുടെ ഗവേഷണത്തിനായി പ്രത്യേക ഊന്നൽ നൽകുന്നുണ്ട്.
ഇരിങ്ങാലക്കുട : സമഗ്ര ശിക്ഷ കേരള ബി ആർ സി ഇരിങ്ങാലക്കുട ബി ആർ സിയുടെ ആഭിമുഖ്യത്തിൽ ഭിന്നശേഷി കുട്ടികൾക്കായി പഠന ഉല്ലാസയാത്ര നടത്തി.
18 ഭിന്നശേഷി കുട്ടികൾ, രക്ഷിതാക്കൾ, സ്പെഷ്യൽ എഡ്യുക്കേറ്റർമാർ, ബി ആർ സി അംഗങ്ങൾ എന്നിവർ ചാവക്കാട് “ഫാം വില്ല”യിലേക്ക് നടത്തിയ ഉല്ലാസയാത്രയിൽ പങ്കെടുത്തു.
ബി ആർ സി ഇരിങ്ങാലക്കുടയിലെ ബി പി സി കെ ആർ സത്യപാലൻ യാത്ര ഫ്ലാഗ് ഓഫ് ചെയ്തു.
വിനോദ യാത്രയുടെ ചിലവ് സ്പോൺസർഷിപ്പിലൂടെയാണ് കണ്ടെത്തിയത്.
ഇരിങ്ങാലക്കുട : ക്രൈസ്റ്റ് കോളെജ് കമ്പ്യൂട്ടർ സയൻസ് ഡിപ്പാർട്ട്മെന്റിന്റെ നേതൃത്വത്തിൽ ജനുവരി 14 മുതൽ 17 വരെ ടെക്നിക്കൽ കോൺക്ലേവായ ”സെഫൈറസ് 6.0” സംഘടിപ്പിക്കുമെന്ന് പ്രിൻസിപ്പൽ ഡോ ഫാ ജോളി ആൻഡ്രൂസ് പത്രസമ്മേളനത്തിൽ അറിയിച്ചു.
സെൻട്രൽ യൂണിവേഴ്സിറ്റി ഓഫ് കേരള വൈസ് ചാൻസലർ പ്രൊഫ വിൻസെന്റ് മാത്യു ഉദ്ഘാടനം നിർവഹിക്കും.
സാങ്കേതിക വിദ്യയുടെ വൈവിധ്യമാർന്ന മേഖലകളിലെ പുതുമകളും ആശയങ്ങളും പ്രോത്സാഹിപ്പിക്കുന്ന 4 ദിവസത്തെ പരിപാടി വിദ്യാർഥികളുടെ നേതൃത്വത്തിൽ, അക്കാദമിക് വിദഗ്‌ധർ, സാങ്കേതിക പ്രൊഫഷണലുകൾ, മറ്റ് പ്രമുഖ വ്യക്തികൾ എന്നിവരുടെ സജീവ പങ്കാളിത്തത്തോടെയാണ് സംഘടിപ്പിക്കുന്നത്.
”സെഫൈറസ് 6.0”യുടെ മുഖ്യ ആകർഷണമായ ടെക്നിക്കൽ എക്സ്പോയിൽ സാങ്കേതികവിദ്യകളായ സൈബർ സെക്യൂരിറ്റി, ആർട്ടിഫിഷ്യൽ ഇൻ്റലിജൻസ്, വിർച്വൽ റിയാലിറ്റി, ഐ ഒ ടി ഉപയോഗിച്ചുകൊണ്ടുള്ള തത്സമയ പ്രദർശനങ്ങൾ എന്നിവയും ഉണ്ടായിരിക്കും.
കൂടാതെ സാങ്കേതിക വിദഗ്‌ധരുടെയും മറ്റ് പ്രഗത്ഭ വ്യക്തികളുടെയും പാനൽ ചർച്ചകളും പ്രഭാഷണങ്ങളുമടങ്ങിയ കോൺക്ലേവ്, നൂതന സാങ്കേതിക ആശയങ്ങൾ അവതരിപ്പിക്കുന്ന ഐഡിയത്തോൺ, മത്സരാർത്ഥികൾക്ക് അവരുടെ പ്രോഗ്രാമിംഗ് കഴിവുകൾ തെളിയിക്കാനുള്ള ഹാക്കത്തോൺ, സാങ്കേതികവിദ്യയിൽ പരിശീലനം നൽകുന്ന വർക്ക്ഷോപ്പുകൾ എന്നിവയും അരങ്ങേറും.
ഓഗ്മെൻ്റഡ് റിയാലിറ്റി ഉപയോഗിച്ച് വ്യത്യസ്തമായി നടത്തുന്ന ട്രഷർ ഹണ്ട് മത്സരം പങ്കെടുക്കുന്നവർക്ക് പുതുമയാർന്ന അനുഭവം നൽകുന്ന വേദിയാകും.
ജനുവരി 15ന് ”കേരള ക്യാമ്പസ് ഫാഷൻ ഐക്കൺ 2025” ഫാഷൻ ഷോയും സംഘടിപ്പിക്കും.
ഹയർ സെക്കൻ്ററി, ഡിഗ്രി, പിജി തലങ്ങളിലെ വിദ്യാർഥികൾക്ക് ഈ മത്സരത്തിൽ പങ്കെടുക്കാം.
പരിപാടിയിൽ പങ്കെടുക്കാൻ ആഗ്രഹിക്കുന്നവർ ”സെഫൈറസ് 6.0” യുടെ ഔദ്യോഗിക വെബ്സൈറ്റ് (https://christcs.in/events/) സന്ദർശിച്ച് രജിസ്റ്റർ ചെയ്യേണ്ടതാണ്.
കൂടുതൽ വിവരങ്ങൾക്ക് വെബ്സൈറ്റ് വഴിയോ 7012715039, 7025104887 എന്നീ നമ്പറുകളിലോ ബന്ധപ്പെടാവുന്നതാണ്.
മാനേജർ ഫാ ജോയ് പീണിക്കപറമ്പിൽ, സ്റ്റാഫ് കോർഡിനേറ്റർ രശ്മി, കമ്പ്യൂട്ടർ സയൻസ് വിഭാഗം മേധാവി പ്രിയങ്ക, അസോസിയേഷൻ സെക്രട്ടറി അഖില, വിദ്യാർഥികളായ അരുൺ, അശ്വിൻ, ഫിദ എന്നിവരും പത്രസമ്മേളനത്തിൽ പങ്കെടുത്തു.
