പ്രതിബദ്ധത ജനങ്ങളോട് മാത്രം….
IRINJALAKUDA TIMES
നിര്യാതനായി
ഇബ്രാഹിം കുട്ടി
ഇരിങ്ങാലക്കുട : കാട്ടൂർ ഇല്ലിക്കാട് പാലക്കൽ കാദർകുഞ്ഞി മകൻ ഇബ്രാഹിംകുട്ടി (82) നിര്യാതനായി.
ഖബറടക്കം നടത്തി.
ഭാര്യ : നബീസ
മക്കൾ : ജമീല, ഷെമീറ, അബ്ദുൾ കാദർ
മരുമക്കൾ : സെയ്തു മുഹമ്മദ്, അബ്ദുൾ കാദർ, ഷൈല
എടതിരിഞ്ഞി – തേക്കുംമൂല റോഡിൽ കാനകൾ നിർമ്മിക്കണം : സി പി ഐ
ഇരിങ്ങാലക്കുട : എടതിരിഞ്ഞി ചെട്ടിയാൽ മുതൽ കാട്ടൂർ വരെയുള്ള റോഡ് റീ ടാറിങ്ങിന് മുൻപ് റോഡിൻ്റെ ഇരുവശത്തും താമസിക്കുന്നവർക്ക് മഴക്കാലത്ത് അനുഭവപ്പെടുന്ന വെള്ളക്കെട്ടിന് ശാശ്വതമായ പരിഹാരം കാണുന്നതിനായി കാന നിർമ്മിക്കണമെന്ന് സി പി എ വടക്കുമുറി ബ്രാഞ്ച് സമ്മേളനം ആവശ്യപ്പെട്ടു.
കെ കെ രാജൻ്റെ അധ്യക്ഷതയിൽ ചേർന്ന സമ്മേളനം സി പി ഐ ജില്ലാ സെക്രട്ടറി കെ കെ വത്സരാജ് ഉദ്ഘാടനം ചെയ്തു.
ജില്ലാ കമ്മിറ്റി അംഗം അനിത രാധാകൃഷ്ണൻ, ലോക്കൽ സെക്രട്ടറി വി ആർ രമേഷ്, പഞ്ചായത്ത് വൈസ് പ്രസിഡന്റ് കെ എം വത്സൻ, കെ എസ് രാധാകൃഷ്ണൻ, ലതിക ഉല്ലാസ്, ബിനോയ് കിഴക്കൂട്ട് എന്നിവർ പ്രസംഗിച്ചു.
കൊലപാതക ശ്രമ കേസിലെ പിടികിട്ടാപ്പുളളി അറസ്റ്റിൽ
ഇരിങ്ങാലക്കുട : മതിലകം പൊലീസ് സ്റ്റേഷൻ പരിധിയിൽ പെട്ട മൂന്നുപീടികയിലെ ബാറിൽ വെച്ചുണ്ടായ വഴക്കിനെ തുടർന്നുള്ള വിരോധത്തിൽ 2018ൽ അർസൽ തിണ്ടിക്കൽ എന്നയാളെ വധിക്കാൻ ശ്രമിച്ച കേസിൽ ഒളിവിൽ കഴിഞ്ഞിരുന്ന പ്രതി കണ്ണനാംകുളം മുന്നാക്കപറമ്പിൽ വീട്ടിൽ മൂസ മകൻ നൗഷാദിനെ പോലീസ് അറസ്റ്റ് ചെയ്തു.
റൂറൽ ജില്ലാ പൊലീസ് മേധാവി ബി കൃഷ്ണകുമാർ ഐ പി എസ്സിൻ്റെ നിർദ്ദേശാനുസരണം പിടികിട്ടാപ്പുള്ളികൾക്കെതിരെ നടന്നുവരുന്ന സ്പെഷ്യൽ ഡ്രൈവിനോടനുബന്ധിച്ച് നടത്തിയ അന്വേഷണത്തിനിടയിലാണ് നൗഷാദിനെ പിടികൂടിയത്.
ഒളിവിലായിരുന്ന പ്രതിയെ ഇരിങ്ങാലക്കുട അഡീഷണൽ സെഷൻസ് കോടതി 2023 ഡിസംബറിൽ പിടികിട്ടാപ്പുളളിയായി വാറണ്ട് പുറപ്പെടുവിച്ചിരുന്നു.
മതിലകം പൊലീസ് സ്റ്റേഷൻ ഇൻസ്പെക്ടർ, എസ് എച്ച് ഒ ഷാജി, സബ്ബ് ഇൻസ്പെക്ടർ രമ്യ കാർത്തികേയൻ, അസിസ്റ്റന്റ് സബ്ബ് ഇൻസ്പെക്ടർമാരായ പ്രജീഷ്, ഷൈജു, സിവിൽ പൊലീസ് ഓഫീസർമാരായ വിപിൻദാസ്, സബീഷ് എന്നിവരാണ് അന്വേഷണ സംഘത്തിലുണ്ടായിരുന്നത്.
മാപ്പിള കലകളിൽ ക്രൈസ്റ്റിൻ്റെ തേരോട്ടം
ഇരിങ്ങാലക്കുട : മാള ഹോളി ഗ്രേസ് കോളെജിൽ നടക്കുന്ന കാലിക്കറ്റ് യൂണിവേഴ്സിറ്റി ഡി സോൺ കലോത്സവത്തിൽ ഇരിങ്ങാലക്കുട ക്രൈസ്റ്റ് കോളെജ് മുന്നേറ്റം തുടരുന്നു.
ഇരുന്നൂറോളം പോയിൻ്റുകൾ നേടി മേളയുടെ രണ്ടാം ദിനത്തിൽ ക്രൈസ്റ്റ് ഒന്നാം സ്ഥാനത്താണ്.
മാപ്പിള കലകളിൽ ക്രൈസ്റ്റിൻ്റെ ജൈത്ര യാത്രയാണ് കലാമേളയുടെ രണ്ടാം ദിനം കണ്ടത്.
ഒപ്പന, കോൽക്കളി, വട്ടപ്പാട്ട്, മാപ്പിളപ്പാട്ട് ( സിംഗിൾ ) എന്നിവയിൽ ഒന്നാം സ്ഥാനം നേടിയ ക്രൈസ്റ്റ് കോളെജ് അറബന മുട്ടിൽ രണ്ടാമതെത്തി.
ദീപം അംഗനവാടിക്ക് പുതിയ കെട്ടിടം ഉയരുന്നു.
ഇരിങ്ങാലക്കുട : മുരിയാട് പഞ്ചായത്തിലെ ഊരകം ഈസ്റ്റ് ദീപം അംഗനവാടിക്ക് പുതിയ കെട്ടിടം ഉയരുന്നു.
കെട്ടിടത്തിന്റെ നിർമ്മാണോദ്ഘാടനം മന്ത്രി ഡോ ആർ ബിന്ദു നിർവ്വഹിച്ചു.
പഞ്ചായത്ത് പ്രസിഡന്റ് ജോസ് ജെ ചിറ്റിലപ്പിള്ളി അധ്യക്ഷത വഹിച്ചു.
2018ലെ വെള്ളപ്പൊക്കത്തെ തുടർന്ന് അപകടാവസ്ഥയിലായിരുന്ന അംഗനവാടി കഴിഞ്ഞ 2 വർഷമായി വാടക കെട്ടിടത്തിലാണ് പ്രവർത്തിച്ചു വരുന്നത്.
ഇരിങ്ങാലക്കുട എം എൽ എ യും ഉന്നത വിദ്യഭ്യാസ- സാമൂഹ്യനീതി വകുപ്പ് മന്ത്രിയുമായ ഡോ ആർ ബിന്ദുവിൻ്റെ ആസ്തി വികസന ഫണ്ടിൽ നിന്നും 20 ലക്ഷം രൂപയും, പഞ്ചായത്തിൻ്റെയും എൻ ആർ ഇ ജി യുടേയും 6 ലക്ഷം രൂപയും വിനിയോഗിച്ചാണ് അങ്കനവാടി പുനർനിർമ്മിക്കുന്നത്.
ബ്ലോക്ക് പഞ്ചായത്ത് അംഗം മിനി വരിക്കശ്ശേരി, പഞ്ചായത്ത് അംഗങ്ങളായ തോമസ് തൊകലത്ത്, മണി സജയൻ, മനീഷ മനീഷ് തുടങ്ങിയവർ ചടങ്ങിൽ ആശംസകൾ അർപ്പിച്ചു.
ആരോഗ്യ വിദ്യഭ്യാസ സ്റ്റാൻ്റിംഗ് കമ്മിറ്റി ചെയർമാൻ കെ യു വിജയൻ സ്വാഗതവും ഐ സി ഡി എസ് സൂപ്പർവൈസർ അൻസ അബ്രഹാം നന്ദിയും പറഞ്ഞു.
പ്രതിഷ്ഠാദിനത്തിനൊരുങ്ങി കണ്ടംകുളങ്ങര ദുർഗ്ഗാ ഭഗവതി ക്ഷേത്രം
ഇരിങ്ങാലക്കുട : മുരിയാട് വേഴക്കാട്ടുകര ശ്രീ കണ്ടംകുളങ്ങര ദുർഗ്ഗാ ഭഗവതി ക്ഷേത്രത്തിൽ ഫെബ്രുവരി 3, 4 തിയ്യതികളിൽ നടക്കുന്ന പ്രതിഷ്ഠാദിന മഹോത്സവത്തിനുള്ള ഒരുക്കങ്ങൾ പൂർത്തിയായതായി ക്ഷേത്ര സംരക്ഷണ സമിതി പ്രസിഡന്റ് അറിയിച്ചു.
തന്ത്രി നകരമണ്ണ് നീലകണ്ഠൻ നമ്പൂതിരി, മേൽശാന്തി മുരളീധരൻ നമ്പൂതിരി എന്നിവർ മുഖ്യകാർമ്മികത്വം വഹിക്കും.
ഫെബ്രുവരി 3ന് ഗണപതി ഹോമം, ഉദയാസ്തമന പൂജ, വൈകീട്ട് ബ്രാഹ്മണിപ്പാട്ട്, സമ്പൂർണ നെയ് ചുറ്റുവിളക്ക്, നിറമാല, ദീപാരാധന, തുടുർന്ന് 7.15ന് പ്രണവം കലാഗൃഹം ഒരുക്കുന്ന നൃത്തനൃത്യങ്ങൾ, തിരുവാതിരക്കളി എന്നിവ അരങ്ങേറും.
പ്രതിഷ്ഠാദിനമായ ഫെബ്രുവരി 4ന് രാവിലെ അഷ്ടദ്രവ്യ മഹാഗണപതി ഹോമം, നവാകം, പഞ്ചഗവ്യം, എഴുന്നള്ളിപ്പ് എന്നിവയും ഉച്ചക്ക് 12.30ന് പ്രസാദ ഊട്ടും ഉണ്ടായിരിക്കും.
വൈകീട്ട് 4.45ന് സർപ്പക്കാവിൽ പൂജ, 6.30ന് ചുറ്റുവിളക്ക്, നിറമാല, ദീപാരാധന, തുടുർന്ന് വേഴക്കാട്ടുകര എൻ എസ് എസ് കരയോഗം അവതരിപ്പിക്കുന്ന തിരുവാതിരക്കളി, ഭക്തിഗാനമേള എന്നിവയും ഉണ്ടായിരിക്കും.
ചടങ്ങുകൾക്ക് ക്ഷേത്ര സംരക്ഷണ സമിതി പ്രസിഡന്റ് മുട്ടത്തിൽ ഗോപാലനും സമിതി അംഗങ്ങളും നേതൃത്വം നൽകും.
സിയോൺ വിശ്വാസികളുടെ തിരുനാൾ സമ്മാനം : മുരിയാട് പുതിയ റോഡ്
ഇരിങ്ങാലക്കുട : എംപറർ ഇമ്മാനുവൽ ചർച്ച് (സിയോൺ) വിശ്വാസികളുടെ ശ്രമഫലമായി മുരിയാട് കോൺവെന്റിന് സമീപം ടൈൽ വിരിച്ച് നവീകരിക്കപ്പെട്ട റോഡിന്റെ ഉദ്ഘാടന കർമ്മം മുരിയാട് പഞ്ചായത്ത് പ്രസിഡന്റ് ജോസ് ചിറ്റിലപ്പിള്ളി നിർവ്വഹിച്ചു.
സിയോൺ സഭാ ആസ്ഥാനത്ത് നടന്നു കൊണ്ടിരിക്കുന്ന കൂടാര തിരുനാൾ ആഘോഷങ്ങളുടെ ഭാഗമായി നാട്ടുകാർക്കുള്ള തിരുനാൾ സമ്മാനമായിട്ടാണ് ഒരു സംഘം സിയോൺ സഭാ വിശ്വാസികളുടെ മുൻകൈയ്യിൽ റോഡിന്റെ നിർമ്മാണം പൂർത്തിയായത്.
ചടങ്ങിൽ ഗ്രാമപഞ്ചായത്ത് ആരോഗ്യ സ്റ്റാൻഡിംഗ് കമ്മറ്റി ചെയർമാൻ വിജയൻ, വാർഡ് മെമ്പർ സരിത, എംപറർ ഇമ്മാനുവൽ ചർച്ച് പി ആർ ഒ ഡയസ് അച്ചാണ്ടി എന്നിവർ സംസാരിച്ചു.
2025 വർഷത്തെ സീയോൻ കൂടാര തിരുനാൾ ജനുവരി 18 മുതൽ 30 വരെയുള്ള തീയതികളിലായി മുരിയാടുള്ള സിയോൺ സഭാ ആസ്ഥാനത്ത് നടന്നു വരുന്നതിന്റെ ഭാഗമായാണ് പുതിയ റോഡ് നാടിന് സമർപ്പിക്കപ്പെട്ടത്.
ന്യായസൂത്രകാര്യശാല ആരംഭിച്ചു
ഇരിങ്ങാലക്കുട : ചെമ്മണ്ട ശാരദാ ഗുരുകുലത്തിൻ്റെയും, കേന്ദ്രീയ സംസ്കൃത സർവ്വകലാശാലയുടെയും സംയുക്താഭിമുഖ്യത്തിൽ ഭാരതീയ ദാർശനിക അനുസന്ധാന പരിഷത്തിൻ്റെ (ICPR) ധനസഹായത്തോടെ നടത്തുന്ന 11 ദിവസത്തെ ആവാസീയ ന്യായസൂത്ര കാര്യശാല ആരംഭിച്ചു.
ശാരദാ ഗുരുകുലത്തിൻ്റെ ശിക്ഷണവിഭാഗ അധ്യക്ഷയും എൻസിഇആർടി സംസ്കൃത പാഠപുസ്തകസമിതി അംഗവുമായ ജെ വന്ദന അധ്യക്ഷത വഹിച്ചു.
രാഷ്ട്രപതി പുരസ്കാരം ലഭിച്ച സംസ്കൃത പണ്ഡിതൻ പ്രൊഫ വി രാമകൃഷ്ണ ഭട്ട് ഭദ്രദീപം തെളിച്ച് ഉദ്ഘാടനം നിർവ്വഹിച്ചു.
ഫ്രെബുവരി 5ന് വൈകുന്നേരം 3 മണിക്കാണ് സമാപന സമ്മേളനം.
ഉത്തരകാശിയിൽ നിന്നും സമാഗതനായ ഹരിബ്രഹ്മേന്ദ്രാനന്ദ തീർഥസ്വാമികളാണ് മുഖ്യാചാര്യൻ.
കൂടുതൽ വിവരങ്ങൾക്ക് 9496794357 എന്ന നമ്പറിൽ ബന്ധപ്പെടാവുന്നതാണ്.
