ശാരദ
ഇരിങ്ങാലക്കുട : തേലപ്പിള്ളി മൂക്കാപ്പിള്ളി സുബ്രഹ്മണ്യൻ ഭാര്യ ശാരദ(79) നിര്യാതയായി.
സംസ്കാരം നടത്തി.
മക്കൾ : രമ, സുനന്ദ, രജനി പരേതയായ ഷീജ
മരുമക്കൾ : ഷാജി, ജോഷി, ജോജി.
പ്രതിബദ്ധത ജനങ്ങളോട് മാത്രം….
IRINJALAKUDA TIMES
ദില്ലിയിലെ റിപ്പബ്ലിക്ദിന പരേഡിൽ മാർച്ച് ചെയ്യാൻ സെൻ്റ് ജോസഫ്സ് കോളെജിലെ ആഗ്നസ് വിത്സനും
ഇരിങ്ങാലക്കുട : ജനുവരി 26ന് ദില്ലിയിൽ നടക്കുന്ന രാജ്യത്തിൻ്റെ 76-ാം റിപ്പബ്ലിക് ദിന പരേഡിൽ മാർച്ച് ചെയ്യാൻ സെൻ്റ് ജോസഫ്സ് കോളെജ് എൻ സി സി യൂണിറ്റിലെ അണ്ടർ ഓഫീസർ ആഗ്നസ് വിത്സനും ഉണ്ടായിരിക്കും.
വിവിധ സംസ്ഥാനങ്ങളിൽ നിന്നും നൂറോളം കേഡറ്റുകളെയാണ് ഇതിനായി തെരഞ്ഞെടുത്തിരിക്കുന്നത്.
ജനുവരി 26ന് ദില്ലിയിലെ കർത്തവ്യ പഥിൽ കേരള, ലക്ഷദ്വീപ് കണ്ടിൻജൻ്റിനു വേണ്ടി ആഗ്നസ് മാർച്ച് ചെയ്യും.
4 വർഷം മുമ്പ് അണ്ടർ ഓഫീസർ ഏയ്ഞ്ചൽ റീറ്റ, സർജൻ്റ് രമ്യ ദാസ് എന്നിവർ സെൻ്റ് ജോസഫ്സിൽ നിന്നും എൻ സി സിയുടെ കേരള ഘടകത്തെ പ്രതിനിധീകരിച്ച് പങ്കെടുത്തിരുന്നു.
അതിനു ശേഷം ഇപ്പോഴാണ് ഒരു ആർ ഡി കേഡറ്റ് ഇവിടെ നിന്നും ഉണ്ടാവുന്നത്.
മൂന്നാം വർഷ ഇംഗ്ലീഷ് ബിരുദ വിദ്യാർഥിനിയായ ആഗ്നസ് ഒരു ധീര ജവാൻ്റെ മകൾ കൂടിയാണ്.
ഈ നേട്ടത്തിനു വേണ്ടിയുള്ള എല്ലാ പരിശീലനങ്ങളും ആഗ്നസിനു ലഭ്യമാക്കിയത്
ഏഴാം കേരള ബറ്റാലിയൻ എൻ സി സി കമാൻ്റിംഗ് ഓഫീസർ കേണൽ രജീന്ദർ സിംഗ് സിദ്ദു, മുൻ കമാൻ്റിംഗ് ഓഫീസർ ലഫ്റ്റനൻ്റ് കേണൽ ബി ബിജോയ് എന്നിവരുടെ നേതൃത്വത്തിലുള്ള എൻ സി സി ടീം ആണെന്ന് പ്രിൻസിപ്പൽ ഡോ സിസ്റ്റർ ബ്ലെസി, എൻ സി സി ഓഫീസർ ക്യാപ്റ്റൻ ലിറ്റി ചാക്കോ എന്നിവർ അറിയിച്ചു.
നിര്യാതയായി
മോളി
ഇരിങ്ങാലക്കുട : മാമ്പിള്ളി ജോസ് ഭാര്യ മോളി (85) നിര്യാതയായി.
സംസ്കാരം നടത്തി.
മക്കൾ : ഷാം ജോസ്, ഷാജ് ജോസ്, ഷോബി ജോസ്, ഷിബു ജോസ്, ഷൈൻ ജോസ്
മരുമക്കൾ : ജാക്ക്ലിൻ ഷാം, ജയ്മോള്‍ ഷാജ്, അനീത ഷോബി, ലിൻ്റ ഷിബു, ജോൺ മഞ്ഞളി
സെന്റ് മേരീസ് സ്കൂൾ എൻ എസ് എസ് ക്യാമ്പ് സമാപിച്ചു
ഇരിങ്ങാലക്കുട : സെന്റ് മേരീസ് ഹയർ സെക്കന്ററി സ്കൂളിന്റെ എൻ എസ് എസ് സപ്തദിന ക്യാമ്പ് സമാപിച്ചു.
സമാപന സമ്മേളനം മുരിയാട് പഞ്ചായത്ത്‌ മെമ്പർ റോസ്മി ജയേഷ് ഉദ്ഘാടനം ചെയ്തു.
പ്രിൻസിപ്പൽ പി ആൻസൺ ഡൊമിനിക് അധ്യക്ഷത വഹിച്ചു.
ഫസ്റ്റ് അസിസ്റ്റന്റ് സി ഡി ഷീജ, പി ടി എ വൈസ് പ്രസിഡന്റ് സി എ ഷാജു, തുറവൻകാട് എൽ പി സ്കൂൾ പി ടി എ വൈസ് പ്രസിഡന്റ് ലിജോ മൂഞ്ഞേലി, പ്രോഗ്രാം കോഡിനേറ്റർ ബീന ചെറിയാൻ, തുറവൻകാട് എൽ പി സ്കൂൾ ഹെഡ്മിസ്ട്രസ് റവ സി ജെർമിൻ എന്നിവർ ആശംസകൾ നേർന്നു.
എൻ എസ് എസ് പ്രോഗ്രാം ഓഫീസർ ജുബി കെ ജോയ് സ്വാഗതവും എം എൻ നിഹാൽ റോഷൻ നന്ദിയും പറഞ്ഞു.
നാഷണൽ സ്കൂൾ എൻ എസ് എസ് ക്യാമ്പ് : റോഡ് സുരക്ഷയെ കുറിച്ച് ക്ലാസ് നൽകി
ഇരിങ്ങാലക്കുട : വടക്കുംകര ഗവ യു പി സ്കൂളിൽ നടക്കുന്ന നാഷണൽ ഹയർ സെക്കൻഡറി സ്കൂളിൻ്റെ യുവ സപ്തദിന സഹവാസ ക്യാമ്പിൽ വൊളൻ്റിയർമാർക്ക് ”സുരക്ഷിത മാർഗ്” പദ്ധതി പ്രവർത്തനങ്ങളുടെ ഭാഗമായി റോഡ് നിയമങ്ങളെക്കുറിച്ചും റോഡ് സുരക്ഷയെക്കുറിച്ചും എ എം വി സന്തോഷ് കുമാർ ക്ലാസ്സെടുത്തു.
എൻ എസ് എസ് പ്രോഗ്രാം ഓഫീസർ ടി ടി ഷേൽ, അധ്യാപകരായ പോൾ ദീപ, ഷിജി പൗലോസ് എന്നിവർ പങ്കെടുത്തു.
എം ടി യുടെ വിയോഗം : വർണ്ണക്കുടയുടെ സ്റ്റേജ് ഷോകൾ മാറ്റിവെച്ചു
ഇരിങ്ങാലക്കുട : മലയാളിയുടെ പ്രിയപ്പെട്ട എഴുത്തുകാരൻ എം ടി വാസുദേവൻ നായരുടെ വിയോഗത്തെ തുടർന്ന് ഇരിങ്ങാലക്കുടയുടെ സാംസ്കാരികോത്സവമായ വർണ്ണക്കുടയുടെ സ്റ്റേജ് ഷോകൾ മാറ്റിവെച്ചതായി മന്ത്രി ഡോ ആർ ബിന്ദു പത്രസമ്മേളനത്തിൽ അറിയിച്ചു.
മാറ്റി വെച്ച സ്റ്റേജ് പരിപാടികൾ 28, 29, 30 തിയ്യതികളിലായാണ് പുന:ക്രമീകരിച്ചിരിക്കുന്നത്.
നേരത്തെ നിശ്ചയിച്ച പ്രകാരം 28ന് സിത്താര കൃഷ്ണകുമാറിന്റെ സംഘം അവതരിപ്പിക്കുന്ന മ്യൂസിക് ബാൻഡ് അരങ്ങേറും. തുടർന്ന് 29ന് ആൽമരം മ്യൂസിക് ബാൻഡിന്റെ അവതരണവും 30ന് ഗൗരിലക്ഷ്മിയും സംഘവും അവതരിപ്പിക്കുന്ന ഡാൻസ് മ്യൂസിക് ബാൻഡും അരങ്ങേറും.
മെഗാ ഇവന്റുകളോടൊപ്പം ഇരിങ്ങാലക്കുട മണ്ഡലത്തിലെ പ്രതിഭകളുടെ അവതരണങ്ങളും ഈ മൂന്ന് ദിവസങ്ങളിലായാണ് അരങ്ങേറുക.
നഗരസഭ ചെയർപേഴ്സൺ മേരിക്കുട്ടി ജോയ്, ജോസ് ജെ ചിറ്റിലപ്പിള്ളി, കെ എസ് തമ്പി, ലത ചന്ദ്രൻ എന്നിവരും പത്രസമ്മേളനത്തിൽ പങ്കെടുത്തു.
മാഞ്ഞു മലയാളത്തിൻ്റെ സുകൃതം ;എം ടി വിട പറഞ്ഞു
കോഴിക്കോട് : മലയാളത്തിന്റെ സ്വന്തം എം ടി വിട പറഞ്ഞു.
വാര്‍ധക്യ സഹജമായ അസുഖങ്ങളെ തുടര്‍ന്ന് കോഴിക്കോട്ടുള്ള സ്വകാര്യ ആശുപത്രിയില്‍ ചികിത്സയിലായിരുന്ന എം ടി വാസുദേവന്‍ നായരുടെ (91) അന്ത്യം ബുധനാഴ്ച്ച രാത്രി പത്ത് മണിയോടെയായിരുന്നു.
സാഹിത്യവും സിനിമയും പത്രപ്രവര്‍ത്തനവും അടക്കം തൊട്ടതെല്ലാം പൊന്നാക്കിയ സര്‍ഗ്ഗ പ്രതിഭയായിരുന്നു എം ടി.
പ്രശസ്ത നൃത്ത അധ്യാപിക കലാമണ്ഡലം സരസ്വതിയാണ് ഭാര്യ.
യു എസില്‍ ബിസിനസ്സ് എക്സിക്യുട്ടീവായ സിത്താര, നര്‍ത്തകിയും സംവിധായികയുമായ അശ്വതി എന്നിവര്‍ മക്കളാണ്.
മരുമക്കള്‍ : സഞ്ജയ് ഗിര്‍മേ, ശ്രീകാന്ത് നടരാജന്‍
സംസ്കാരം വ്യാഴാഴ്ച്ച കോഴിക്കോട് മാവൂര്‍
റോഡ് ശ്മശാനത്തില്‍ നടക്കും.
1933 ജൂലായ് 15ന് പൊന്നാനി താലൂക്കിലെ കൂടല്ലൂരിലായിരുന്നു എം ടി യുടെ ജനനം. പുന്നയൂര്‍ക്കുളം ടി നാരായണന്‍ നായരും അമ്മാളു അമ്മയുമാണ് മാതാപിതാക്കള്‍.
നാല് ആണ്‍മക്കളില്‍ ഇളയ മകന്‍. മലമക്കാവ് എലിമെന്ററി സ്‌കൂള്‍, കുമരനെല്ലൂര്‍ ഹൈസ്‌കൂള്‍ എന്നിവിടങ്ങളിലെ പ്രാഥമിക വിദ്യാഭ്യാസത്തിനു ശേഷം പാലക്കാട് വിക്ടോറിയ കോളേജില്‍നിന്ന് 1953-ല്‍ രസതന്ത്രത്തില്‍ ബിരുദം നേടി. കുറച്ചുകാലം അധ്യാപകന്‍. തുടര്‍ന്ന് 1956ല്‍ മാതൃഭൂമിയില്‍ സബ് എഡിറ്ററായി ഔദ്യോഗിക സേവനത്തിനു തുടക്കം.
സ്‌കൂള്‍ കാലംമുതല്‍ എഴുത്തില്‍ തല്പരനായിരുന്നു എം ടി. ആദ്യകഥ വിക്ടോറിയ കോളേജിലെ പഠനകാലത്ത് പ്രസിദ്ധീകരിച്ച “രക്തം പുരണ്ട മണ്‍തരികള്‍” ആണ്.
1953ല്‍ ന്യൂയോര്‍ക്ക് ഹെറാള്‍ഡ് ട്രിബ്യൂണ്‍ സംഘടിപ്പിച്ച ലോകചെറുകഥാ മത്സരത്തിന്റെ ഭാഗമായി കേരളത്തില്‍ മാതൃഭൂമി നടത്തിയ കഥാമത്സരത്തില്‍ “വളര്‍ത്തു മൃഗങ്ങള്‍” എന്ന കഥ ഒന്നാം സ്ഥാനം നേടിയതോടെയാണ് എഴുത്തുകാരന്‍ എന്ന നിലയില്‍ ശ്രദ്ധിക്കപ്പെട്ടു തുടങ്ങിയത്.
ഇക്കാലത്ത് “പാതിരാവും പകല്‍വെളിച്ചവും” എന്ന ആദ്യനോവല്‍ മാതൃഭൂമി ആഴ്ചപ്പതിപ്പിൽ ഖണ്ഡഃശയായി പ്രസിദ്ധീകരിച്ചു.
1958ല്‍ പ്രസിദ്ധീകരിച്ച “നാലുകെട്ട്” ആണ് ആദ്യം പുസ്തകരൂപത്തില്‍ പ്രസിദ്ധീകരിച്ചത്. തകരുന്ന നായര്‍ തറവാടുകളെയും അതിലെ മനുഷ്യരുടെ അന്തഃക്ഷോഭങ്ങളെയും ആവിഷ്‌കരിച്ച ഈ കൃതി 1959ലെ കേരള സാഹിത്യ അക്കാദമി പുരസ്‌കാരം നേടി. അറുപതുകളോടെ എം ടി മലയാള സാഹിത്യത്തിലെ മുടിചൂടാമന്നനായി അംഗീകരിക്കപ്പെട്ടു.
1968ല്‍ മാതൃഭൂമി ആഴ്ചപ്പതിപ്പിന്റെ പത്രാധിപരായി. 1981ല്‍ ആ സ്ഥാനം രാജിവെച്ചു. 1989ല്‍ പീരിയോഡിക്കല്‍സ് എഡിറ്റര്‍ എന്ന പദവിയില്‍ തിരികെ മാതൃഭൂമിയിലെത്തി. 1999-ല്‍ മാതൃഭൂമിയില്‍ നിന്ന് വിരമിച്ചശേഷം കേരള സാഹിത്യ അക്കാദമിയുടെ അധ്യക്ഷനായി സേവനമനുഷ്ഠിച്ചു. നിലവില്‍ തുഞ്ചന്‍ സ്മാരക സമിതിയുടെ അധ്യക്ഷനാണ്.
“കാലം”, “അസുരവിത്ത്”, “വിലാപയാത്ര”, ‘”മഞ്ഞ്”, എന്‍ പി മുഹമ്മദുമായി ചേര്‍ന്നെഴുതിയ “അറബിപ്പൊന്ന്”, “രണ്ടാമൂഴം”, “വാരാണസി” തുടങ്ങിയ നോവലുകള്‍ കൂടാതെ ഒട്ടനവധി ചെറുകഥകളും നോവലെറ്റുകളും മലയാളികള്‍ ഹൃദയത്തില്‍ ഏറ്റുവാങ്ങി.
1984ലാണ് “രണ്ടാമൂഴം” പുറത്തു വരുന്നത്. ഭീമനെ കേന്ദ്രകഥാപാത്രമാക്കി, മഹാഭാരതത്തെ ഭീമന്റെ വീക്ഷണത്തില്‍ കാണുന്ന “രണ്ടാമൂഴം” എം ടിയുടെ മാസ്റ്റര്‍ പീസായി വിലയിരുത്തപ്പെടുന്നു.
സ്വന്തം കൃതിയായ “മുറപ്പെണ്ണി”ന് തിരക്കഥ എഴുതിയാണ് എം ടി ചലച്ചിത്ര ലോകത്തേക്ക് പ്രവേശിക്കുന്നത്. തുടര്‍ന്ന് തിരക്കഥാകൃത്ത്, സംവിധായകന്‍ എന്നിങ്ങനെ മലയാള ചലച്ചിത്ര ചരിത്രത്തിലെ നാഴികക്കല്ലുകളായി മാറിയ അന്‍പതിലേറെ ചലച്ചിത്രങ്ങളുടെ പിന്നണിയില്‍ അദ്ദേഹമുണ്ടായിരുന്നു. നിര്‍മ്മാല്യം (1973), ബന്ധനം (1978), മഞ്ഞ് (1982), വാരിക്കുഴി (1982), കടവ് (1991), ഒരു ചെറുപുഞ്ചിരി (2000) എന്നീ ചിത്രങ്ങള്‍ അദ്ദേഹം സംവിധാനം ചെയ്തു.
2005 ല്‍ രാജ്യം പത്മഭൂഷണ്‍ നല്‍കി എം ടി യെ ആദരിച്ചു.സാഹിത്യരംഗത്ത് ഭാരതത്തില്‍ നല്‍കപ്പെടുന്ന ഏറ്റവും ഉയര്‍ന്ന പുരസ്‌കാരമായ ജ്ഞാനപീഠം 1995 ല്‍ ലഭിച്ചു. കേന്ദ്ര സാഹിത്യ അക്കാദമി അവാര്‍ഡ് (കാലം), കേരള സാഹിത്യ അക്കാദമി അവാര്‍ഡ് (നാലുകെട്ട്), വയലാര്‍ അവാര്‍ഡ് (രണ്ടാമൂഴം), മാതൃഭൂമി പുരസ്‌കാരം, ഓടക്കുഴല്‍ അവാര്‍ഡ്, മുട്ടത്തുവര്‍ക്കി അവാര്‍ഡ്, പത്മരാജന്‍ പുരസ്‌കാരം എന്നിങ്ങനെ എണ്ണപ്പെട്ട ബഹുമതികള്‍ അദ്ദേഹത്തിന് ലഭിച്ചു. മലയാള സാഹിത്യത്തിന് നല്‍കിയ അമൂല്യ സംഭാവനകള്‍ കണക്കിലെടുത്ത് കോഴിക്കോട് സര്‍വ്വകലാശാലയും മഹാത്മാഗാന്ധി സര്‍വ്വകലാശാലയും എം ടി യെ ഡി ലിറ്റ് നല്‍കി ആദരിച്ചു.
എം ടി ആദ്യമായി സംവിധാനം ചെയ്ത “നിര്‍മ്മാല്യം” എന്ന ചിത്രം 1973 ലെ ഏറ്റവും നല്ല ചലച്ചിത്രത്തിനുള്ള ദേശീയ പുരസ്‌കാരം നേടി. ഇതിനു പുറമേ മുപ്പതിലേറെ ദേശീയ, സംസ്ഥാന അവാര്‍ഡുകളും അദ്ദേഹത്തിന് ലഭിച്ചിട്ടുണ്ട്.
മലയാളത്തിൻ്റെ സുകൃതം എം ടി യ്ക്കു വിട…🙏🙏
നിര്യാതനായി
വിജയരാജൻ മാസ്റ്റർ
ഇരിങ്ങാലക്കുട : പൊറത്തിശ്ശേരി തൈവളപ്പിൽ വിജയരാജൻ മാസ്റ്റർ(84)നിര്യാതനായി.
പൊറത്തിശ്ശേരി എം യു പി സ്കൂൾ റിട്ടയേർഡ് അധ്യാപകനാണ്.
സംസ്കാരം നടത്തി.
നിര്യാതയായി
ചന്ദ്രിക
ഇരിങ്ങാലക്കുട : എടതിരിഞ്ഞി പറപറമ്പിൽ ദിവാകരൻ ഭാര്യ ചന്ദ്രിക (78) നിര്യാതയായി.
സംസ്കാരം നടത്തി.
മകൻ : ദിലിഷ്
മരുമകൾ : രജിത
“വർണ്ണക്കുട” : സ്റ്റേജ് പ്രോഗ്രാമുകൾ 26 മുതൽ 29 വരെ
ഇരിങ്ങാലക്കുട : നാട്ടുത്സവമായ “വർണ്ണക്കുട” യോടനുബന്ധിച്ച് നടത്തുന്ന സ്റ്റേജ് ഷോകൾ ഡിസംബർ 26 മുതൽ 29 വരെ മുനിസിപ്പൽ മൈതാനിയിൽ നടക്കും.
ഡിസംബർ 26 വ്യാഴാഴ്ച രാവിലെ 11ന് ഫോട്ടോ പ്രദർശനം ഉദ്ഘാടനം. വൈകീട്ട് പൊതുസമ്മേളനത്തിന് മുന്നോടിയായി 4.30ന് സജു ചന്ദ്രന്റെ നേതൃത്വത്തിൽ താളവാദ്യോത്സവം അരങ്ങേറും. തുടർന്ന്
6 മണിക്ക് വർണ്ണക്കുട തീം സോംഗിന്റെ നൃത്താവിഷ്കാരത്തോടെ തദ്ദേശ സ്വയംഭരണ വകുപ്പു മന്ത്രി എം ബി രാജേഷ് വർണ്ണക്കുടയുടെ ഉദ്ഘാടനം നിർവ്വഹിക്കും.
വയലാർ അവാർഡ് ജേതാവ് അശോകൻ ചരുവിലിന് ജന്മനാടിന്റെ സ്നേഹാദരം ഉദ്ഘാടനച്ചടങ്ങിൽ അർപ്പിക്കും.
ഇരിങ്ങാലക്കുടയുടെ സർവ്വകാല അഭിമാനഭാജനങ്ങളായ അനശ്വര ചലച്ചിത്രപ്രതിഭകൾ ഇന്നസെന്റിനും മോഹനും,
സത്യൻ അന്തിക്കാടും കമലും സ്മരണാഞ്‌ജലിയർപ്പിക്കും.
ഉൽഘാടനചടങ്ങുകളെ തുടർന്ന് ശരണ്യ സഹസ്രയും സംഘവും അവതരിപ്പിക്കുന്ന കഥക് നൃത്തവും വൈകീട്ട് 7.30 ന് ആൽമരം മ്യൂസിക് ബാൻഡിന്റെ അവതരണവും ഉദ്ഘാടന വേദിയിൽ നടക്കും.
27 വെള്ളിയാഴ്ച്ച മുതൽ സായന്തനങ്ങൾ നൃത്തസന്ധ്യകളായി മാറും. 27ന് വൈകീട്ട് 4.30ന് ഫ്യൂഷൻ, 5ന് പടിയൂർ
ശ്രീ ശങ്കര നൃത്തവിദ്യാലയം, ഇരിങ്ങാലക്കുട ഓം നമഃശിവായ നൃത്ത കലാക്ഷേത്രം, എടക്കുളം ലാസ്യ പെർഫോമിംഗ് ആർട്ട്സ്, ഇരിങ്ങാലക്കുട നൃത്തതി നൃത്തക്ഷേത്ര, മൂർക്കനാട് ഭരതനാട്യ ഡാൻസ് വേൾഡ്, ചെട്ടിപ്പറമ്പ് ശ്രീശങ്കര നാട്യകലാക്ഷേത്ര, കരുവന്നൂർ നാട്യപ്രിയ കലാലയം എന്നിവരുടെ അവതരണങ്ങൾ നൃത്തസന്ധ്യയിൽ വിരിയും.
തുടർന്ന് സാംസ്കാരിക സമ്മേളനവും കൊറ്റനെല്ലൂർ സമയ കലാഭവന്റെ “നല്ലമ്മ” നാടൻ പാട്ട് നാടൻ കലാരൂപ അവതരണങ്ങളും നടക്കും.
28 ശനിയാഴ്ച്ച വൈകീട്ട് 5 മണിക്ക് നൃത്തസന്ധ്യ. നടവരമ്പ് മാണിക്യം കലാക്ഷേത്ര, കാട്ടൂർ അഭിനവ നാട്യകലാക്ഷേത്രം എന്നിവയുടെ അവതരണങ്ങൾ അരങ്ങേറും.
ഏഴു മണിക്ക് സാംസ്കാരിക സമ്മേളനം.
തുടർന്ന് സിത്താരാ കൃഷ്ണകുമാറിന്റെ സംഘം അവതരിപ്പിക്കുന്ന മ്യൂസിക് ബാൻഡും അരങ്ങേറും.
സമാപനദിനമായ 29 ഞായറാഴ്ച്ച വൈകീട്ട് 5 മണിക്ക്
നൃത്തസന്ധ്യയിൽ അവിട്ടത്തൂർ ചിലമ്പൊലി നൃത്തവിദ്യാലയവും, ഇരിങ്ങാലക്കുട ഭരത് വിദ്വത് മണ്ഡൽ നാട്യകളരിയും പരിപാടികൾ അവതരിപ്പിക്കും.
വൈകീട്ട് 7 മണിക്ക് സമാപന സമ്മേളനം.
ഗൗരിലക്ഷ്മിയും സംഘവും അവതരിപ്പിക്കുന്ന ഡാൻസ് മ്യൂസിക് ബാൻഡോടെയാവും പുതുവർഷത്തിന് സ്വാഗതമോതി വർണ്ണക്കുടക്ക് സമാപനമാവുക.
