IRINJALAKUDA TIMES
ഇരിങ്ങാലക്കുട : സമഗ്ര ശിക്ഷ കേരളം ഇരിങ്ങാലക്കുട ബിആർസി യിലെ ഓട്ടിസം സെൻറർ ക്രിസ്മസ് ആഘോഷിച്ചു.
മുനിസിപ്പൽ വൈസ് ചെയർമാൻ ബൈജു കുറ്റിക്കാടൻ ഉദ്ഘാടനം ചെയ്തു.
ബിപിസി കെ ആർ സത്യപാലൻ സ്വാഗതം പറഞ്ഞു.
വിദ്യാഭ്യാസ സ്റ്റാൻഡിങ് കമ്മിറ്റി ചെയർപേഴ്സൺ അഡ്വ ജിഷ ജോബി അധ്യക്ഷത വഹിച്ചു.
കുട്ടികളും രക്ഷിതാക്കളും കേക്കുമുറിച്ചും സമ്മാനങ്ങൾ കൈമാറിയും ക്രിസ്തുമസ് ആഘോഷിച്ചു.
സ്പെഷ്യൽ എഡ്യൂക്കേറ്റർ മാരായ ആതിര രവീന്ദ്രൻ, നിഷ പോൾ എന്നിവർ നേതൃത്വം നൽകി.
ഇരിങ്ങാലക്കുട : ഭാരതീയ വിദ്യാഭവനിൽ ക്രിസ്തുമസ് ആഘോഷം വർണ്ണാഭമായ പരിപാടികളോടെ അരങ്ങേറി.
ഇരിങ്ങാലക്കുട സെന്റ് ജോസഫ്സ് കോളെജ് പ്രിൻസിപ്പൽ ഡോ സിസ്റ്റർ ബ്ലെസ്സി മുഖ്യാതിഥിയായി.
ചെയർമാൻ സി സുരേന്ദ്രൻ, വൈസ് ചെയർമാൻ സി നന്ദകുമാർ, സെക്രട്ടറി വി രാജൻ, മാനേജ്മെന്റ് കമ്മിറ്റി അംഗങ്ങളായ അപ്പുക്കുട്ടൻ നായർ, വിവേകാനന്ദൻ, ആനി മേരി ചാൾസ്, പ്രിൻസിപ്പൽ ബിജു ഗീവർഗീസ്, വൈസ് പ്രിൻസിപ്പൽ ശോഭ ശിവാനന്ദരാജൻ, പ്രൈമറി വിഭാഗം മേധാവി ബിന്ദുമതി, പിടിഎ പ്രസിഡന്റ് ഡോ ജീന ബൈജു എന്നിവർ പങ്കെടുത്തു.
തുടർന്ന് ക്രിസ്തുമസ് കരോൾ, ക്രിസ്തുമസ് നൃത്തങ്ങൾ തുടങ്ങിയ പരിപാടികൾ അരങ്ങേറി.
പുൽക്കൂട് നിർമ്മാണ മത്സരം, ക്രിസ്തുമസ് കാർഡ് നിർമ്മാണ മത്സരം, ബോട്ടിൽ ആർട്ട് മത്സരം, ക്രിസ്മസ് ട്രീ നിർമ്മാണ മത്സരം തുടങ്ങിയ പരിപാടികളോടെ ഒരാഴ്ചയായി ക്രിസ്മസ് ആഘോഷത്തിന് മുന്നോടിയായുള്ള പരിപാടികൾ നടന്നുവരികയായിരുന്നു.
മൂന്നാം ക്ലാസ് അധ്യാപകരും ഐ ടി വിഭാഗവും ചേർന്ന് പരിപാടികൾ ഏകോപിപ്പിച്ചു.
ഇരിങ്ങാലക്കുട : നഗരസഭാ പരിധിയിൽ കൊതുകുകൾ പെരുകുന്നതായി പരാതി.
എന്നാൽ അതിനനുസരിച്ച് കൊതുകു നിവാരണത്തിനാവശ്യമായ പ്രവർത്തനങ്ങൾ യഥാവിധി നടക്കുന്നില്ലെന്ന ആക്ഷേപം ശക്തമാവുകയാണ്. അതിനാൽ തന്നെ പെരുകാനിരിക്കുന്ന രോഗങ്ങളെ
കുറിച്ചോർത്തുള്ള ഭീതിയിലാണ് നാട്ടുകാർ.
ഫോഗിംഗ് ഉൾപ്പെടെയുള്ള കൊതുകു നിവാരണ പ്രവർത്തനങ്ങൾ മുമ്പ് കൃത്യമായി ഇടവേളകളിൽ നടക്കാറുണ്ടെങ്കിലും നിലവിൽ ഇത്തരം പ്രവർത്തികൾ കാര്യക്ഷമമായി നടക്കുന്നില്ല. ഡെങ്കു ഉൾപ്പെടെയുള്ള രോഗങ്ങൾ റിപ്പോർട്ട് ചെയ്യുന്ന ഭാഗങ്ങളിലാണ് ഇപ്പോൾ ഫോഗിംഗും മറ്റും കൃത്യമായി നടത്തുന്നതെന്ന് ചെയർപേഴ്സൺ മേരിക്കുട്ടി ജോയ് വ്യക്തമാക്കി.
വീടുകൾ തോറും ഹരിത കർമ്മ സേനാംഗങ്ങൾ മാലിന്യങ്ങൾ ശേഖരിക്കുന്നതോടൊപ്പം ബ്ലീച്ചിങ് പൗഡറും വിതരണം ചെയ്യുന്നുണ്ട് എന്നതാണ് കൊതുകു നിവാരണവുമായി ബന്ധപ്പെട്ട് നിലവിൽ നടക്കുന്ന ഏക പ്രവർത്തി. ആവശ്യമായ ജോലിക്കാരുടെ കുറവും നിവാരണ പ്രവർത്തനങ്ങളെ പ്രതികൂലമായി ബാധിച്ചിട്ടുണ്ട്.
പരാതികൾ വർദ്ധിക്കുന്ന സാഹചര്യത്തിൽ നഗരസഭയിലെ ആരോഗ്യ വിഭാഗവുമായി ചർച്ച ചെയ്ത് പ്രശ്നത്തിൽ ആവശ്യമായ നടപടി സ്വീകരിക്കുമെന്ന് ചെയർപേഴ്സൺ ഉറപ്പു നൽകി.
ഇരിങ്ങാലക്കുട : ചുവപ്പ് സേനയുടെ മാർച്ചും ഉജ്ജ്വല പ്രകടനത്തോടും കൂടി സി പി എം മാള ഏരിയാ സമ്മേളനം കോണത്തുകുന്ന് എം ഡി കൺവെൻഷൻ സെന്റർ ഗ്രൗണ്ടിൽ പ്രത്യേകം സജ്ജമാക്കിയ സീതാറാം യെച്ചൂരി നഗറിൽ സമാപിച്ചു.
തുടർന്നു ചേർന്ന പൊതുസമ്മേളനം പാർട്ടി സംസ്ഥാന കമ്മിറ്റി അംഗം എൻ എൻ കൃഷ്ണദാസ് ഉൽഘാടനം ചെയ്തു.
ഏരിയ സെക്രട്ടറി ടി കെ സന്തോഷ് അദ്ധ്യക്ഷത വഹിച്ചു.
ജില്ലാ സെക്രട്ടേറിയറ്റ് അംഗം പി കെ ഡേവിസ്, ജില്ലാ കമ്മിറ്റി അംഗങ്ങളായ എം രാജേഷ്, ടി ശശിധരൻ, കെ വി ഉണ്ണികൃഷ്ണൻ, സി എസ് രഘു, സന്ധ്യ നൈസൺ, എം കെ മോഹനൻ, ഇ ആർ മുരളീധരൻ എന്നിവർ പ്രസംഗിച്ചു.
ചുവപ്പു സേനാ മാർച്ച് കരൂപ്പടന്ന പള്ളിനടയിൽ നിന്നും, പ്രകടനം പുഞ്ചപ്പറമ്പ്, കമ്മ്യൂണിറ്റി ഹാൾ പരിസരം, കൊടക്കാപറമ്പ് ക്ഷേത്ര പരിസരം എന്നീ മൂന്നു കേന്ദ്രങ്ങളിൽ നിന്നുമാണ് ആരംഭിച്ചത്.
ഏരിയ സമ്മേളനത്തിന് അനുബന്ധമായി
നടത്തിയ വനിത പച്ചക്കറി കൃഷിയിൽ വിജയിച്ച
വെള്ളാങ്ങല്ലൂർ നോർത്ത്, പൊയ്യ ലോക്കൽ കമ്മിറ്റികൾ, വിദ്യാർത്ഥികൾക്കായി നടത്തിയ വിവിധ മത്സരങ്ങളിലെ വിജയികൾ എന്നിവർക്കുള്ള ക്യാഷ് അവാർഡും ട്രോഫിയും, ബഹുജന പ്രകടനത്തിൽ നല്ല പ്രകടനം കാഴ്ച്ച വെച്ച ബ്രാഞ്ചുകൾക്കും പി കെ ഡേവിസ്
സമ്മാനങ്ങൾ വിതരണം ചെയ്തു.
ഇരിങ്ങാലക്കുട : ഗവ ഗേൾസ് ഹയർ സെക്കൻഡറി സ്കൂളിന്റെ പൈതൃക മതിൽ മന്ത്രി ഡോ ആർ ബിന്ദു ഉദ്ഘാടനം ചെയ്തു.
പ്രൊഫ കെ യു അരുണൻ എം എൽ എ യുടെ 2018-19ലെ ആസ്‌തി വികസന ഫണ്ടിൽ നിന്ന് 48 ലക്ഷം രൂപ വിനിയോഗിച്ച് തൃശൂർ കേരള സംസ്ഥാന നിർമ്മിതി കേന്ദ്രം നേതൃത്വം നൽകിയാണ് മതിൽ നിർമ്മാണം പൂർത്തീകരിച്ചത്.
ഇരിങ്ങാലക്കുട നഗരസഭ വിദ്യാഭ്യാസ സ്റ്റാൻ്റിംഗ് കമ്മിറ്റി ചെയർപേഴ്സൺ അഡ്വ ജിഷ ജോബി അധ്യക്ഷത വഹിച്ചു.
യോഗത്തിൽ മുൻ എം എൽ എ പ്രൊഫ കെ യു അരുണൻ മുഖ്യാതിഥിയായി.
ക്ഷേമകാര്യ സ്റ്റാന്റിംഗ് കമ്മിറ്റി ചെയർമാൻ സി സി ഷിബിൻ, ആരോഗ്യകാര്യ സ്റ്റാൻ്റിംഗ് കമ്മിറ്റി ചെയർപേഴ്സൺ അംബിക പള്ളിപ്പുറത്ത്, പൊതുമരാമത്ത് സ്റ്റാൻ്റിംഗ് കമ്മിറ്റി ചെയർമാൻ ജയ്സൺ പാറേക്കാടാൻ, വാർഡ് കൗൺസിലർ ഒ എസ് അവിനാഷ്, കൗൺസിലർമാരായ സോണിയ ഗിരി, സന്തോഷ് ബോബൻ, സംസ്ഥാന നിർമ്മിതി കേന്ദ്രം എൻജിനീയർ നിമ, സ്കൂൾ പി ടി എ പ്രസിഡൻ്റ് പി കെ അനിൽകുമാർ, എസ് എം സി ചെയർമാൻ എ വി ഷൈൻ, വി എച്ച് എസ് എസ് വിഭാഗം സീനിയർ അധ്യാപിക സനില, ഹൈസ്കൂൾ വിഭാഗം മുൻ അധ്യാപിക ലേഖ എന്നിവർ പ്രസംഗിച്ചു.
യോഗത്തിൽ പൈതൃക മതിൽ സമയബന്ധിതമായി പൂർത്തീകരിച്ച കോൺട്രാക്ട‌ർ ബോസ് തോമസിന് സ്‌കൂളിൻ്റെ സ്നേഹോപഹാരം നൽകി മന്ത്രി ഡോ ആർ ബിന്ദു ആദരിച്ചു.
സ്‌കൂളിൻ്റെ പേരുള്ള ബോർഡ് സ്ഥാപിക്കുന്നതിനുള്ള ചെലവ് മുൻ അധ്യാപിക ലേഖ ടീച്ചർ സ്കൂൾ അധികൃതർക്ക് കൈമാറി.
പ്രിൻസിപ്പൽ ബിന്ദു പി ജോൺ സ്വാഗതവും ഹെഡ്മിസ്ട്രസ് കെ എസ് സുഷ നന്ദിയും പറഞ്ഞു.
കൊടുങ്ങല്ലൂർ : പുല്ലൂറ്റ് ഗവ കെ കെ ടി എം കോളെജിലെ എൻ എസ് എസ് സപ്തദിന ക്യാമ്പ് നഗരസഭ ചെയർ പേഴ്സൺ ടി കെ ഗീത ഉദ്ഘാടനം ചെയ്തു.
കോളേജ് പ്രിൻസിപ്പാൾ പ്രൊഫ ഡോ ടി കെ ബിന്ദു ശർമിള അധ്യക്ഷയായി –
കൊടുങ്ങല്ലൂർ എം എൽ എ അഡ്വ വി ആർ സുനിൽ കുമാർ മുഖ്യപ്രഭാഷണം നടത്തി.
എൻ എസ് എസ് പ്രോഗ്രാം ഓഫീസർമാരായ ഡോ പി ഡി ധന്യ, ഡോ കെ എ കൃഷ്ണകുമാർ, വാർഡ് കൗൺസിലർ പി എൻ വിനയചന്ദ്രൻ, കോളേജ് ഐ ക്യു എ സി കോർഡിനേറ്റർ ഡോ ലൗലി ജോർജ്, പി ടി എ സെക്രട്ടറി ഡോ എസ് വിനയശ്രീ, പി ടി എ വൈസ് പ്രസിഡൻ്റ് സുനിൽ ദത്ത്, കോളേജ് യൂണിയൻ ചെയർമാൻ എം സി ഋഷികേശ് ബാബു, ജൂനിയർ സൂപ്രണ്ട് പി സി ഷാജി എന്നിവർ സംസാരിച്ചു.
സുസ്ഥിര വികസനത്തിനായി യുവത എന്ന വിഷയം ആസ്പദമാക്കി ഡിസംബർ 20 മുതൽ 26 വരെ കൊടുങ്ങല്ലൂർ കെ കെ ടി എം ഗവ ഗേൾസ് ഹയർ സെക്കൻ്ററി സ്കൂളിലാണ് ക്യാമ്പ് സംഘടിപ്പിക്കുന്നത്.
ഇരിങ്ങാലക്കുട : വന നിയമ ഭേദഗതി വിജ്ഞാപനത്തിനെതിരെ കർഷക കോൺഗ്രസ്സ് ഇരിങ്ങാലക്കുട നിയോജക മണ്ഡലം കമ്മിറ്റി പ്രതിഷേധ കനൽ സംഘടിപ്പിച്ചു.
കർഷക കോൺഗ്രസ്സ് സംസ്ഥാന കമ്മിറ്റി അംഗം ജോമി ജോൺ വിജ്ഞാപനത്തിൻ്റെ പകർപ്പ് കത്തിച്ച് ഉൽഘാടനം നിർവ്വഹിച്ചു.
നീയോജകമണ്ഡലം പ്രസിഡൻ്റ് പ്രവീൺസ് ഞാറ്റുവെട്ടി അദ്ധ്യക്ഷത വഹിച്ചു.
കർഷക കോൺഗ്രസ്സ് ജില്ലാ സെക്രട്ടറി ശ്രീധരൻ പൊറത്തിശ്ശേരി മുഖ്യപ്രഭാഷണം നടത്തി.
ഭാസി കാരപ്പിള്ളി, വേണു ഗോപാൽ, പോൾ പറമ്പി, വേണു കാറളം, ഭാസി ഇരിങ്ങാലക്കുട എന്നിവർ സംസാരിച്ചു.
ഇരിങ്ങാലക്കുട : ചെന്നൈ അണ്ണാ യൂണിവേഴ്‌സിറ്റിയിൽ നിന്നും രസതന്ത്രത്തിൽ പി എച്ച് ഡി നേടി ഇരിങ്ങാലക്കുട സ്വദേശിനി സി എ അശ്വതി.
എടക്കുളം ചങ്ങനാത്ത് അശോകൻ്റെയും സുന്ദരി അശോകൻ്റെയും മകളാണ്.
ഐക്കരക്കുന്ന് വെള്ളോംപറമ്പത്ത് വീജീഷ് ഹരിദാസൻ്റെ ഭാര്യയാണ് അശ്വതി.
ഇരിങ്ങാലക്കുട : ഇരിങ്ങാലക്കുടയുടെ സംസ്കാരികോത്സവം വർണ്ണക്കുടയുടെ മുന്നോടിയായി 21ന് നടത്തുന്ന വാക്കത്തോണിൽ പങ്കെടുക്കുന്നവർക്ക് നൽകുന്ന ജേഴ്സി പ്രകാശനം ചെയ്തു.
മന്ത്രി ഡോ ആർ ബിന്ദു പ്രവാസി വ്യവസായിയും ജീവകാരുണ്യ പ്രവർത്തകനുമായ നിസാർ അഷറഫിന് ജേഴ്സി നൽകിയാണ് പ്രകാശനം നിർവഹിച്ചത്.
21ന് ശനിയാഴ്ച രാവിലെ 7.30ന് മുനിസിപ്പൽ മൈതാനിയിൽ നിന്നും ആരംഭിക്കുന്ന വാക്കത്തോൺ ചന്തക്കുന്ന് – ഠാണാ- ബസ് സ്റ്റാൻഡ് വഴി മൈതാനിയിൽ സമാപിക്കും.
വർണ്ണക്കുട ജനറൽ കൺവീനർ ജോസ് ജെ ചിറ്റിലപ്പിള്ളി അധ്യക്ഷത വഹിച്ചു.
കോർഡിനേറ്റർമാരായ ടെൽസൺ കോട്ടോളി, പി ആർ സ്റ്റാൻലി, എ സി സുരേഷ്, ദീപ ആന്റണി എന്നിവർ പ്രസംഗിച്ചു.
ഇരിങ്ങാലക്കുട : വയോജനങ്ങൾക്കൊപ്പം
മതസൗഹാർദ്ദത്തിന്റെ സന്ദേശവുമായി സെന്റ് ജോസഫ്സ് കോളെജിൽ ഈ വർഷത്തെ ക്രിസ്തുമസ് ആഘോഷങ്ങൾക്ക് തുടക്കം കുറിച്ചു.
ഇരിങ്ങാലക്കുട രൂപതയിലെ ചാൻസലറും കോളെജിലെ ചാപ്ലിനുമായ ഫാ കിരൺ തട്ല, കൂടൽമാണിക്യം ദേവസ്വം ചെയർമാൻ അഡ്വ സി കെ ഗോപി, ടൗൺ ജുമാമസ്ജിദ് ഇമാം പി എൻ എ കബീർ മൗലവി തുടങ്ങിയവർ ചേർന്ന് പരിപാടി ഉദ്ഘാടനം ചെയ്തു.
കലാലയത്തിലെ വിവിധ വകുപ്പുകളിൽ നിന്നുള്ള വിദ്യാർഥിനികൾ ചേർന്ന് നിർമ്മിച്ച മെഗാ കേക്ക് മുറിച്ച് വയോജനങ്ങൾക്ക് വിതരണം ചെയ്തു.
ക്രിസ്തുമസ് ഗാലയുടെ ഭാഗമായി നടന്ന ക്രിസ്തുമസ് ബസാറിൽ വിദ്യാർഥിനികൾ നിർമ്മിച്ച വിവിധ ഉൽപ്പന്നങ്ങളുടെ വില്പന നടത്തി.
കൂടാതെ കരോൾ ഗാനം, പുൽക്കൂട് നിർമ്മാണം, ക്രിസ്തുമസ് കാർഡ് നിർമ്മാണം എന്നീ മത്സരങ്ങളും സംഘടിപ്പിച്ചു.
ഫാ കിരൺ തട്ല അനുഗ്രഹ പ്രഭാഷണം നടത്തി.
അത്യന്തം ഹൃദയസ്പർശിയായ ഈ ചടങ്ങ് സമാധാനത്തിന്റെയും സാഹോദര്യത്തിന്റെയും സാന്ത്വനത്തിന്റെയും പ്രതീകമാണെന്ന് പ്രിൻസിപ്പൽ ഡോ സിസ്റ്റർ ബ്ലെസി പറഞ്ഞു.
