IRINJALAKUDA TIMES
ഇരിങ്ങാലക്കുട : കൂടൽമാണിക്യം ക്ഷേത്രത്തിൽ 2025 ജനുവരി 6, 7, 8 തിയ്യതികളിൽ മരാമത്ത് പണികൾ നടക്കുന്നതിനാൽ 6 മണിക്ക് എതൃത്ത് പൂജയും 7.30ന് ഉച്ചപൂജയും കഴിച്ച് 9 മണിയോടു കൂടി ക്ഷേത്ര നട അടക്കുന്നതാണെന്ന് അഡ്മിനിസ്ട്രേറ്റർ അറിയിച്ചു.
വൈകീട്ട് ക്ഷേത്ര നട പുണ്യാഹത്തിന് ശേഷമായിരിക്കും തുറക്കുന്നത്.
ടി ദിവസം അന്നദാനം രാവിലെ 10 മണിക്ക് ആരംഭിക്കുന്നതായിരിക്കും.
അന്നേ ദിവസങ്ങളിൽ വഴിപാട് നടത്താനുള്ളവർ തലേ ദിവസം ബുക്ക് ചെയ്യേണ്ടതാണ്.
ഇരിങ്ങാലക്കുട : തൃശൂര്‍ ജില്ലയിലെ കുപ്രസിദ്ധ ഗുണ്ടകളായ ആറാട്ടുപുഴ പല്ലിശ്ശേരി സ്വദേശി അമ്പാടത്ത് വീട്ടില്‍ രജീഷ് (42), പൊറത്തിശ്ശേരി പുത്തന്‍തോട് സ്വദേശി കുന്നമ്പത്ത് വീട്ടില്‍ അനൂപ് (28), പുല്ലൂര്‍ സ്വദേശി കൊടിവളപ്പില്‍ വീട്ടില്‍ ഡാനിയല്‍ (26) എന്നിവരെ കാപ്പ ചുമത്തി 6 മാസത്തേക്ക് നാടുകടത്തി.
രജീഷ് 3 വധശ്രമക്കേസ്സുകള്‍ ഉള്‍പ്പടെ 5ഓളം കേസ്സുകളിലും, അനൂപ് വധശ്രമം, കഞ്ചാവ് വില്‍പ്പന, കവര്‍ച്ച തുടങ്ങി 7 ഓളം കേസ്സുകളിലും, ഡാനിയല്‍ 4 വധശ്രമക്കേസ്സുകള്‍ ഉള്‍പ്പടെ ആറോളം കേസ്സുകളിലും പ്രതിയാണ്.
തൃശ്ശൂര്‍ റൂറല്‍ ജില്ല പൊലീസ് മേധാവി നവനീത് ശർമ്മ ഐ പി എസ് നൽകിയ ശുപാര്‍ശയുടെ അടിസ്ഥാനത്തില്‍ തൃശൂർ റേഞ്ച് ഡി ഐ ജി ആണ് ഉത്തരവ് പുറപ്പെടുവിച്ചത്.
ഇരിങ്ങാലക്കുട ഇന്‍സ്പെക്ടര്‍ അനീഷ് കരീം, സീനിയര്‍ സിവില്‍ പൊലീസ് ഓഫീസര്‍ വിജയകുമാര്‍, ചേര്‍പ്പ് പൊലീസ് ഇന്‍സ്പെക്ടര്‍ പ്രദീപ്, എ എസ് ഐ ജ്യോതിഷ് എന്നിവര്‍ കാപ്പ ചുമത്തുന്നതിലും, ഉത്തരവ് നടപ്പാക്കുന്നതിലും പ്രധാന പങ്കുവഹിച്ചു.
ഇരിങ്ങാലക്കുട : സി പി ഐ 25-ാം പാർട്ടി കോൺഗ്രസിനോട് അനുബന്ധിച്ച് സി പി ഐ ആളൂർ ലോക്കൽ കമ്മിറ്റിയിലെ താഴെക്കാട് ബ്രാഞ്ച് സമ്മേളനം ജില്ലാ പഞ്ചായത്ത് പ്രസിഡന്റും സി പി ഐ സംസ്ഥാന കൺട്രോൾ കമ്മീഷൻ സെക്രട്ടറിയുമായ വി എസ് പ്രിൻസ് ഉദ്ഘാടനം ചെയ്തു.
മുതിർന്ന നേതാവ് എടത്താട്ടിൽ മാധവൻ മാസ്റ്റർ പതാക ഉയർത്തി.
ലോക്കൽ കമ്മിറ്റി അംഗം പി കെ സദാനന്ദൻ അധ്യക്ഷത വഹിച്ചു.
മണ്ഡലം അസിസ്റ്റന്റ് സെക്രട്ടറി എൻ കെ ഉദയപ്രകാശ്, ജില്ലാ കൗൺസിൽ അംഗം ബിനോയ് ഷബീർ, മണ്ഡലം സെക്രട്ടറിയേറ്റ് അംഗം എം ബി ലത്തീഫ്, ലോക്കൽ സെക്രട്ടറി ടി സി അർജുനൻ, ലോക്കൽ കമ്മിറ്റി അംഗങ്ങളായ ഡിപിൻ പാപ്പച്ചൻ, കെ സി സജയൻ എന്നിവർ പ്രസംഗിച്ചു.
ടി ഡി ഷാജി രക്തസാക്ഷി പ്രമേയവും സി എസ് സിറാജ് അനുശോചന പ്രമേയവും അവതരിപ്പിച്ചു.
ബ്രാഞ്ച് സെക്രട്ടറിയായി ടി ഡി ഷാജിയെയും അസിസ്റ്റന്റ് സെക്രട്ടറിയായി സി എസ് സിറാജിനെയും സമ്മേളനം തെരഞ്ഞെടുത്തു.
എം പി ഷാജി സ്വാഗതവും ടി ഡി ഷാജി നന്ദിയും പറഞ്ഞു.
ഇരിങ്ങാലക്കുട : 2024 ഡിസംബർ 16ന് മൂർക്കനാട് ഇറിഗേഷൻ ബണ്ട് റോഡിൻ്റെ നിർമ്മാണോദ്ഘാടനം കഴിഞ്ഞിട്ടിതുവരെയും നിർമ്മാണ പ്രവർത്തികൾ നടക്കാത്തതിൽ പ്രതിഷേധിച്ച് കരുവന്നൂർ വലിയപാലം സെൻ്ററിൽ പൊറത്തിശ്ശേരി മണ്ഡലം കോൺഗ്രസ്സ് കമ്മിറ്റി പ്രതിഷേധ സംഗമം നടത്തി.
മുൻ എം എൽ എ അഡ്വ തോമാസ് ഉണ്ണിയാടൻ രണ്ട് കോടി ഏഴ് ലക്ഷം രൂപ ചിലവാക്കി നിർമ്മിച്ച റോഡാണിത്. ഈ റോഡിൻ്റെ റീ ടാറിംഗ് മാത്രമാണ് നടത്താനുള്ളത്. ഈ റോഡിൻ്റെ നിർമ്മാണോദ്ഘാടനമാണ് 2 മന്ത്രിമാരും മറ്റു നിരവധി ജനപ്രതിനിധികളും പങ്കെടുത്ത് നടത്തിയതെന്ന് കോൺഗ്രസ്സ് പ്രവർത്തകർ ചൂണ്ടിക്കാട്ടി.
ജനങ്ങളെ അവഹേളിച്ച മന്ത്രി ആർ ബിന്ദുവിൻ്റെയും കൗൺസിലറുടെയും നടപടിയിലും, നിർമ്മാണ പ്രവർത്തി നടക്കാത്തതിലും പ്രതിക്ഷേധിച്ചാണ് പൊറത്തിശ്ശേരി മണ്ഡലം കോൺഗ്രസ്സ് കമ്മിറ്റി പ്രതിഷേധ സംഗമം നടത്തിയത്.
പൊറത്തിശ്ശേരി മണ്ഡലം പ്രസിഡന്റ് പി കെ ഭാസി അധ്യക്ഷത വഹിച്ചു.
ഡി സി സി ജനറൽ സെക്രട്ടറി ആൻ്റോ പെരുമ്പിള്ളി യോഗം ഉദ്ഘാടനം ചെയ്തു.
മുൻ കൗൺസിലറും ബ്ലോക്ക് കോൺഗ്രസ്സ് ജനറൽ സെക്രട്ടറിയുമായ കെ കെ അബ്ദുള്ളക്കുട്ടി മുഖ്യപ്രഭാഷണം നടത്തി.
ബ്ലോക്ക് ഭാരവാഹികളായ ജോബി തെക്കുടൻ, അഡ്വ പി എൻ സുരേഷ്, യൂത്ത് കോൺഗ്രസ്സ് നിയോജക മണ്ഡലം സെക്രട്ടറി അഖിൽ കാഞ്ഞാണിക്കാരൻ, മഹിള കോൺഗ്രസ്സ് മണ്ഡലം പ്രസിഡന്റ് ലീല അശോകൻ, മണ്ഡലം ഭാരവാഹികളായ കെ എ അബൂബക്കർ മാസ്റ്റർ, കെ ശിവരാമൻനായർ, ടി എം ധർമ്മരാജൻ, വേലായുധൻ കളത്തുപറമ്പിൽ, പി ഒ റാഫി, കെ എം ജോർജ്, ടി പി ഫ്രാൻസീസ് എന്നിവർ പ്രസംഗിച്ചു.
തൃശൂർ : കേരള വ്യാപാരി വ്യവസായി ഏകോപന സമിതി തൃശ്ശൂർ ജില്ലയിലെ വ്യാപാരികളുടെ മക്കൾക്ക് വിവാഹ ധനസഹായമായി പുതുവർഷം മുതൽ ഒരു ലക്ഷം രൂപ നൽകുമെന്ന് ജില്ലാ കമ്മിറ്റി പ്രഖ്യാപിച്ചു.
കൂനമൂച്ചി യൂണിറ്റിലെ വ്യാപാരിയും യൂണിറ്റ് വൈസ് പ്രസിഡന്റുമായ എ എൽ ജെയിംസിന്റെ മകൾക്ക് ഒരു ലക്ഷം രൂപയുടെ ചെക്ക് കൈമാറിക്കൊണ്ട് ജില്ലാ പ്രസിഡന്റ് കെ വി അബ്ദുൽ ഹമീദ് ഉദ്ഘാടനം നിർവഹിച്ചു.
ഭദ്രം പദ്ധതിയിൽ അംഗങ്ങളായ വ്യാപാരികളുടെ മക്കൾക്കാണ് ഈ ധനസഹായം ലഭ്യമാവുക.
ഈ മാസത്തിൽ തന്നെ ആറ് അംഗങ്ങളുടെ മക്കളുടെ വിവാഹത്തിന് കൂടി ഒരു ലക്ഷം രൂപ വീതം ധനസഹായം കൈമാറും.
ജനുവരി ഒന്നിന് തന്നെ പ്രഖ്യാപിച്ച പദ്ധതി നടപ്പാക്കാൻ കഴിഞ്ഞതിൽ അതിയായ സന്തോഷവും അഭിമാനവും ഉണ്ടെന്ന് ജില്ലാ പ്രസിഡന്റ് പറഞ്ഞു.
ചടങ്ങിൽ ജില്ലാ സെക്രട്ടറിമാരായ വി ടി ജോർജ്, സി എൽ റാഫേൽ, ജില്ലാ സെക്രട്ടറിയേറ്റ് മെമ്പർ ജോജി തോമസ്, നിയോജകമണ്ഡലം വൈസ് ചെയർമാൻ സജി ചിറമ്മൽ, നിയോജകമണ്ഡലം ജനറൽ കൺവീനർ വർഗീസ് പി ചാക്കോ തുടങ്ങിയവർ പങ്കെടുത്തു.
ഇരിങ്ങാലക്കുട : ഡോ കെ എൻ പിഷാരടി സ്മാരക കഥകളി ക്ലബ്ബ് അമ്മന്നൂർ ഗുരുകുലത്തിൻ്റെ സഹകരണത്തോടെ സംഘടിപ്പിക്കുന്ന ‘സുവർണ്ണം’ സമാപന പരമ്പരയുടെ അഞ്ചാം ദിനത്തിൽ പ്രസിദ്ധ കൂടിയാട്ട കലാകാരൻ അമ്മന്നൂർ രജനീഷ് ചാക്യാർ നളചമ്പുക്കളെ അധികരിച്ച് ആദ്യമായി ചാക്യാർകൂത്തും തുടർന്ന് മാധവനാട്യഭൂമിയിൽ നടന്നുവരുന്ന കൂടിയാട്ടമഹോത്സവത്തിൻ്റെ ഭാഗമായി ഗുരുകുലം ശ്രുതി അവതരിപ്പിച്ച ‘മധൂകശാപം’ നങ്ങ്യാർക്കൂത്തും അരങ്ങേറി.
മിഴാവിൽ കലാമണ്ഡലം എ എൻ ഹരിഹരൻ, കലാമണ്ഡലം അഭിഷേക്, ഇടയ്ക്കയിൽ ദിനേശ് വാര്യർ, താളത്തിൽ സരിത കൃഷ്ണകുമാർ, ഗുരുകുലം വിഷ്ണുപ്രിയ, ഗുരുകുലം അതുല്യ എന്നിവർ പശ്ചാത്തലമേളമൊരുക്കി. ഡോ പി കെ എം ഭദ്ര ചാക്യാർക്കൂത്തിൻ്റെ വിഷയത്തെ കുറിച്ച് ആമുഖഭാഷണം നടത്തി.
വൈകീട്ട് ‘സംഗമ ഗ്രാമത്തിൻ്റെ സാംസ്കാരിക ഭൂമികയിലെ മേളം’ എന്ന വിഷയത്തിൽ ദിനേശ് വാര്യരും, ”കൂത്ത്, കൂടിയാട്ടം” വിഷയത്തിൽ ഇ കെ കേശവനും പ്രസംഗിച്ചു.
ഇരിങ്ങാലക്കുട : ആനന്ദപുരം ശ്രീകൃഷ്ണ ഹയർ സെക്കന്ററി സ്കൂളിൽ ”വർണ്ണോത്സവം” കിഡ്സ് ഫെസ്റ്റ് സംഘടിപ്പിച്ചു.
പി ടി എ പ്രസിഡന്റ് ടി എസ് മനോജ് കുമാർ അധ്യക്ഷത വഹിച്ചു.
മാനേജ്മെന്റ് പ്രതിനിധി എ എൻ വാസുദേവൻ വർണ്ണോത്സവം ഉദ്ഘാടനം ചെയ്തു.
മുരിയാട് പഞ്ചായത്ത് അംഗങ്ങളായ നിജി വത്സൻ, ശ്രീജിത്ത് പട്ടത്ത്, പി ടി എ വൈസ് പ്രസിഡന്റ് അമ്പിളി ലിജോ, ഹെഡ്മാസ്റ്റർ ടി അനിൽകുമാർ, കോർഡിനേറ്റർ ഡിജോ എസ് തറയിൽ എന്നിവർ പ്രസംഗിച്ചു.
ഡെയ്സി
ഇരിങ്ങാലക്കുട : ചിറയത്ത് അടിയാട്ടിപറമ്പിൽ റാഫേൽ മാസ്റ്റർ ഭാര്യ ഡെയ്സി (76) നിര്യാതയായി.
സംസ്കാരം വ്യാഴാഴ്ച ഉച്ചതിരിഞ്ഞ് 4 മണിക്ക് മൂർക്കനാട് സെന്റ് ആൻ്റണീസ് പള്ളി സെമിത്തേരിയിൽ.
മക്കൾ : മിനി, സുമി, സ്മിത
മരുമക്കൾ : ജെയ്സൻ, ടെന്നിസൻ, സിൻ്റോ
ഇരിങ്ങാലക്കുട : സ്‌നേഹക്കൂട് ഭവന പദ്ധതിയിലെ നാലാമത്തെ വീടിന്റെ താക്കോല്‍ദാനം മന്ത്രി ഡോ ആര്‍ ബിന്ദു നിര്‍വഹിച്ചു.
വീടിന്റെ താക്കോല്‍ മന്ത്രി ഡോ ആര്‍ ബിന്ദു പരേതനായ നാടന്‍ പാട്ട് കലാകാരന്‍ സുരേന്ദ്രന്റെ ഭാര്യ സജിനിയ്ക്ക് കൈമാറി.
ഇരിങ്ങാലക്കുട നടവരമ്പ് ഗവ മോഡല്‍ ഹയര്‍ സെക്കന്‍ഡറി സ്‌കൂള്‍ എന്‍ എസ് എസ് യൂണിറ്റിന്റെ നേതൃത്വത്തില്‍ നടവരമ്പ് അംബേദ്കര്‍ കോളനിയിലാണ് സ്‌നേഹക്കൂട് ഒരുക്കിയത്.
എന്‍ എസ് എസ് വിദ്യാര്‍ഥികള്‍ വിവിധ ചലഞ്ചുകളിലൂടെ സമാഹരിച്ചതും സുമനസുകളുടെ സഹായങ്ങളും ചേര്‍ത്താണ് സ്‌നേഹക്കൂട് നിര്‍മ്മിച്ചത്.
സ്റ്റേറ്റ് എന്‍ എസ് എസ് ഓഫീസര്‍ ഡോ ആര്‍ എന്‍ അന്‍സര്‍, എൻ എസ് എസ് ജില്ലാ കണ്‍വീനര്‍ എം വി പ്രതീഷ്, ജില്ലാ പഞ്ചായത്ത് പ്രസിഡന്റ് വി എസ് പ്രിന്‍സ്, ജില്ലാ പഞ്ചായത്ത് വൈസ് പ്രസിഡന്റ് ലത ചന്ദ്രന്‍, സ്‌കൂള്‍ പ്രിന്‍സിപ്പല്‍ പ്രീതി, ക്ലസ്റ്റര്‍ കണ്‍വീനര്‍മാര്‍, വാര്‍ഡ് മെമ്പര്‍ വിജയലക്ഷ്മി വിനയചന്ദ്രന്‍ തുടങ്ങിയവര്‍ പങ്കെടുത്തു.
ഇരിങ്ങാലക്കുട : മുരിയാട് എ യു പി സ്കൂളിലെ നിർമ്മാണം പൂർത്തീകരിച്ച പുതിയ കെട്ടിടത്തിൻ്റെയും പാചകപ്പുരയുടെയും സ്റ്റോറിൻ്റെയും ഉദ്ഘാടനം ജനുവരി 3ന് വൈകീട്ട് 4 മണിക്ക് മന്ത്രി ഡോ ആർ ബിന്ദു നിർവഹിക്കും.
60 ലക്ഷം രൂപ ചിലവിൽ 3650 ചതുരശ്ര അടിയിലാണ് പുതിയ കെട്ടിടം നിർമ്മിച്ചിരിക്കുന്നത്.
വിദ്യാഭ്യാസ വകുപ്പിൽ നിന്നുള്ള എഴേമുക്കാൽ ലക്ഷം ഉപയോഗിച്ചാണ് പാചകപ്പുരയും സ്റ്റോറും നിർമ്മിച്ചിട്ടുള്ളത്.
വിരമിക്കുന്ന ഹിന്ദി അധ്യാപിക കെ കെ മഞ്ജുകുമാരിക്ക് ചടങ്ങിൽ യാത്രയയപ്പ് നൽകും.
സംഘാടക സമിതി ചെയർമാനും പഞ്ചായത്ത് പ്രസിഡൻ്റുമായ ജോസ് ജെ ചിറ്റിലപ്പിള്ളി, പ്രധാന അധ്യാപിക എം പി സുബി, വാർഡ് മെമ്പർ ശ്രീജിത്ത് പട്ടത്ത്, പി ടി എ പ്രസിഡന്റ് രജനി ഷിബു, പൂർവ വിദ്യാർഥി പ്രതിനിധി ജോബി പുല്ലോക്കാരൻ, സീനിയർ അസിസ്റ്റന്റ് എം എൻ ജയന്തി, സ്റ്റാഫ് പ്രതിനിധി കെ ആർ രാമചന്ദ്രൻ, കെ ജി മോഹൻദാസ് എന്നിവർ പത്രസമ്മേളനത്തിൽ പങ്കെടുത്തു.
