IRINJALAKUDA TIMES
ഇരിങ്ങാലക്കുട : കേരള സ്റ്റേറ്റ് എക്സ് സർവീസ് ലീഗ് ഇരിങ്ങാലക്കുട ബ്ലോക്ക് കമ്മിറ്റിയുടെ നേതൃത്വത്തിൽ റിപ്പബ്ലിക് ദിനം വിപുലമായി ആഘോഷിച്ചു.
സ്വാതന്ത്ര്യത്തിനുശേഷം രാജ്യത്ത് നടന്ന മൂന്ന് യുദ്ധങ്ങളിലും പങ്കെടുത്ത 80 വയസ്സിന് മുകളിലുള്ള സീനിയർ അംഗങ്ങളായ രവീന്ദ്രനാഥ്, രാമകൃഷ്ണൻ, രാമൻകുട്ടി എന്നിവരെ പ്രത്യേക ഉപഹാരവും പൊന്നാടയും നൽകി ആദരിച്ചു.
പ്രസിഡന്റ് ക്യാപ്റ്റൻ കെ സോമൻ അധ്യക്ഷത വഹിച്ചു.
എം ടി ജോർജ്ജ്, ജിജിമോൻ കെ റപ്പായി, സി കെ വത്സൻ, ഇ ടി സുരേന്ദ്രൻ, രമ കൃഷ്ണമൂർത്തി തുടങ്ങിയവർ പ്രസംഗിച്ചു.
ഇരിങ്ങാലക്കുട : അരിപ്പാലം സെന്ററിൽ പൂമംഗലം മണ്ഡലം കോൺഗ്രസിൻ്റെ നേതൃത്വത്തിൽ റിപ്പബ്ലിക് ദിനം ആഘോഷിച്ചു.
മണ്ഡലം പ്രസിഡന്റ് എൻ ശ്രീകുമാർ അധ്യക്ഷത വഹിച്ചു.
മുൻ പഞ്ചായത്ത് പ്രസിഡന്റ് അഡ്വ ജോസ് മൂഞ്ഞേലി പതാക ഉയർത്തി ഉദ്ഘാടനം നിർവഹിച്ചു.
മഹിളാ കോൺഗ്രസ് ജില്ലാ ജനറൽ സെക്രട്ടറി രഞ്ജിനി മുഖ്യപ്രഭാഷണം നടത്തി.
ബ്ലോക്ക് കോൺഗ്രസ് ജനറൽ സെക്രട്ടറി യു ചന്ദ്രശേഖരൻ, ബ്ലോക്ക് ട്രഷറർ ടി എസ് പവിത്രൻ എന്നിവർ ആശംസകൾ അർപ്പിച്ചു.
ഭരണഘടനയുടെ ആമുഖം ടി ആർ ഷാജു അവതരിപ്പിച്ചു.
യോഗത്തിൽ വാർഡ് മെമ്പർമാരായ ലാലി വർഗീസ് സ്വാഗതവും കത്രീന ജോർജ് നന്ദിയും പറഞ്ഞു.
ഇരിങ്ങാലക്കുട : യൂത്ത് കോൺഗ്രസ് ഇരിങ്ങാലക്കുട നിയോജക മണ്ഡലം കമ്മറ്റി റിപ്പബ്ലിക് ദിനം ആഘോഷിച്ചു.
നിയോജക മണ്ഡലം പ്രസിഡന്റ് സനൽ കല്ലൂക്കാരൻ ദേശീയ പതാക ഉയർത്തി.
മുൻ നിയോജക മണ്ഡലം പ്രസിഡൻ്റും ബ്ലോക്ക് കോൺഗ്രസ് സെക്രട്ടറിയുമായ വിബിൻ വെള്ളയത്ത് ആശംസകൾ അർപ്പിച്ചു.
മണ്ഡലം പ്രസിഡന്റ് ജോമോൻ മണാത്ത്, നിയോജക മണ്ഡലം സെക്രട്ടറിമാരായ വിനു ആന്റണി, അഡ്വ ഗോകുൽ, എൻ ഒ ഷാർവി, ഡേവിസ് ഷാജു, കെ എസ് യു ജില്ലാ എക്സിക്യൂട്ടീവ് മെമ്പർ ഗിഫ്റ്റ്സൺ ബിജു, മുൻ ടൗൺ മണ്ഡലം പ്രസിഡന്റ് ശ്രീറാം ജയബാലൻ തുടങ്ങിയവർ നേതൃത്വം നൽകി.
ഇരിങ്ങാലക്കുട : ബ്ലോക്ക് കോൺഗ്രസ് കമ്മിറ്റിയുടെ നേതൃത്വത്തിൽ റിപ്പബ്ലിക് ദിന ആഘോഷ പരിപാടികൾ നടത്തി.
ഇരിങ്ങാലക്കുട രാജീവ് ഗാന്ധി മന്ദിരത്തിൽ നടന്ന ചടങ്ങിൽ കെ പി സി സി മുൻ ജനറൽ സെക്രട്ടറി എം പി ജാക്സൺ ദേശീയ പതാക ഉയർത്തി റിപ്പബ്ലിക് ദിന സന്ദേശം നൽകി.
ബ്ലോക്ക് കോൺഗ്രസ് പ്രസിഡന്റ് സോമൻ ചിറ്റേത്ത് അധ്യക്ഷത വഹിച്ചു.
നഗരസഭ ചെയർപേഴ്സൺ മേരിക്കുട്ടി ജോയ്, ഡിസിസി സെക്രട്ടറി സോണിയ ഗിരി, മണ്ഡലം കോൺഗ്രസ് പ്രസിഡന്റ് സി എസ് അബ്ദുൽ ഹഖ്, ബ്ലോക്ക് വൈസ് പ്രസിഡന്റ് ജോസഫ് ചാക്കോ, ബ്ലോക്ക് ഭാരവാഹികളായ കെ സി ജെയിംസ്, വിപിൻ വെള്ളയത്ത്, പി എ ഷഹീർ, യൂത്ത് കോൺഗ്രസ് നിയോജകമണ്ഡലം പ്രസിഡന്റ് സനൽ കല്ലൂക്കാരൻ, നഗരസഭ കൗൺസിലർമാരായ ടി വി ചാർളി, സുജ സഞ്ജീവ്കുമാർ, ജെയ്സൺ പാറേക്കാടൻ, ബിജു പോൾ അക്കരക്കാരൻ, ജസ്റ്റിൻ ജോൺ, മിനി ജോസ് ചാക്കോള, സന്തോഷ് കാട്ടുപറമ്പിൽ, സിജു യോഹന്നാൻ, ഒ എസ് അവിനാഷ്, മിനി സണ്ണി നെടുമ്പാക്കാരൻ തുടങ്ങിയവർ നേതൃത്വം നൽകി.
ഇരിങ്ങാലക്കുട : ഉപജില്ലയിലെ അധ്യാപകർക്കായി ഇംഗ്ലീഷ് എൻറിച്ച്മെൻ്റ് പ്രോഗ്രാം ഗവ എൽ പി സ്കൂളിൽ സംഘടിപ്പിച്ചു.
ഉപജില്ല എച്ച് എം ഫോറം കൺവീനർ സിന്ധു മേനോൻ അധ്യക്ഷത വഹിച്ചു.
സമ്മേളനം ഇരിങ്ങാലക്കുട ബിപിസി കെ ആർ സത്യപാലൻ ഉദ്ഘാടനം ചെയ്തു.
വിദ്യോദയ ഇംഗ്ലീഷ് മീഡിയം സ്കൂൾ എച്ച് എം ഹേമ മുഖ്യാതിഥിയായി.
ഗവ എൽപി സ്കൂൾ ഹെഡ്മിസ്ട്രസ് പി ബി അസീന ആശംസകൾ നേർന്നു.
എൻ എസ് സുമിത സ്വാഗതവും കുളിർമ്മ ബീവി നന്ദിയും പറഞ്ഞു.
തുടർന്ന് വിവിധ സെഷനുകളിലായി ലാംഗ്വേജ് സ്കിൽ ക്ലാസുകൾ നടന്നു.
ഇരിങ്ങാലക്കുട : വീടെന്ന സ്വപ്നം യാഥാര്‍ത്ഥ്യമായ സന്തോഷത്തിലാണ് നടവരമ്പ് സ്കൂളിലെ മൂന്ന് സഹോദരങ്ങൾ.
അവർക്കായി ഒരുക്കിയ സ്നേഹക്കൂട് വീടിന്റെ ഗൃഹപ്രവേശം മന്ത്രി ഡോ ആര്‍ ബിന്ദു നിര്‍വ്വഹിച്ചു.
“സ്നേഹക്കൂട്” ഭവന പദ്ധതിയിലെ നാലാമത്തെ വീടിന്റെ നിർമ്മാണമാണ് ഇതോടെ പൂർത്തിയായത്.
ഏറെ നാളായി സ്വന്തമായി തല ചായ്ക്കാന്‍ വീടില്ലാതെ ബുദ്ധിമുട്ടിയിരുന്ന കുരുന്നുകൾക്ക് കൈത്താങ്ങായിരിക്കുകയാണ് ഇരിങ്ങാലക്കുട എം എൽ എ യും മന്ത്രിയുമായ ഡോ ആർ ബിന്ദു നേതൃത്വം നൽകുന്ന ‘സ്നേഹക്കൂട്’ പദ്ധതി.
ഇരിങ്ങാലക്കുട മണ്ഡലത്തിലെ ഭവനരഹിതരായ മുഴുവന്‍ കുടുംബങ്ങള്‍ക്കും വീട് വെച്ച് നല്‍കുക എന്ന ലക്ഷ്യത്തോടെ നടപ്പിലാക്കുന്ന പദ്ധതിയാണ് സ്നേഹക്കൂട്.
നടവരമ്പ് അംബേദ്കര്‍ കോളനിയിലെ പരേതനായ നാടന്‍പാട്ട് കലാകാരനായ സുരേന്ദ്രന്റെ കുടുംബത്തിനാണ് സ്‌നേഹക്കൂടിലൂടെ ആശ്വാസ തണല്‍ ഒരുങ്ങിയത്.
നടവരമ്പ് സ്കൂളിലെ വി എച്ച് എസ് ഇ, ഹയര്‍ സെക്കന്ററി, എല്‍ പി എന്നീ ക്ലാസുകളിലാണ് മൂന്ന് സഹോദരങ്ങള്‍ പഠിക്കുന്നത്.
മൂന്ന് കുട്ടികളെയും ഏറെ കഷ്ടപ്പെട്ടാണ് അമ്മയായ സജിനി നോക്കിവരുന്നത്.
ഇരിങ്ങാലക്കുട നടവരമ്പ് ഗവ മോഡല്‍ ഹയര്‍ സെക്കൻ്ററി സ്‌കൂള്‍ എന്‍ എസ് എസ് യൂണിറ്റിന്റെ നേതൃത്വത്തിലാണ് സ്നേഹക്കൂട് ഒരുക്കിയത്.
എന്‍ എസ് എസ് വിദ്യാര്‍ഥികള്‍ വിവിധ ചാലഞ്ചുകളിലൂടെ സമാഹരിച്ചതും സുമനസുകളുടെ സഹായങ്ങളും ചേര്‍ത്താണ് സ്നേഹക്കൂട് ഭവനം നിര്‍മ്മിച്ചത്.
ഉന്നത വിദ്യാഭ്യാസ വകുപ്പിന് കീഴിലുള്ള നാഷണൽ സർവീസ് സ്‌കീമിന്റെ യൂണിറ്റുകളുടെ മുൻകൈയിൽ, പൊതുജനങ്ങളുടെ സഹായങ്ങളും സംയോജിപ്പിച്ചാണ് ഇരിങ്ങാലക്കുട മണ്ഡലത്തിൽ സ്നേഹക്കൂട് പദ്ധതി നടപ്പിലാക്കുന്നത്.
സാങ്കേതിക കാരണങ്ങളാൽ മറ്റു ഭവനനിർമ്മാണ പദ്ധതികളിൽ ഉൾപ്പെടാതെ പോയവർക്ക് വീടെന്ന സ്വപ്നം സാക്ഷാത്കരിക്കാൻ സഹായിക്കുകയാണ് സ്നേഹക്കൂട്.
കല്ലംകുന്നിൽ നിർമ്മിച്ച വീടിൻ്റെ ഗൃഹപ്രവേശ ചടങ്ങിൽ വേളൂക്കര പഞ്ചായത്ത് പ്രസിഡന്റ് കെ എസ് ധനീഷ് അധ്യക്ഷത വഹിച്ചു.
വെള്ളാങ്ങല്ലൂർ ബ്ലോക്ക് പഞ്ചായത്ത് പ്രസിഡന്റ് സുധ ദീലീപ് മുഖ്യാതിഥിയായിരുന്നു.
ഭവന നിർമ്മാണം ഏറ്റെടുത്ത സുരേഷ് അമ്മനത്തിനെയും ഇംഗ്ലീഷ് അധ്യാപികയും ദീർഘകാലം നടവരമ്പ് സ്കൂളിലെ എൻ എസ് എസ് കോർഡിനേറ്ററുമായിരുന്ന ഷക്കീലയെയും പൊന്നാട അണിയിച്ച് ആദരിച്ചു.
വാർഡ് മെമ്പർ മാത്യു പാറേക്കാടൻ, ജില്ലാ എൻ എസ് എസ് പ്രതിനിധികളായ ഡോ ടി വി ബിനു, ഇ ആർ രേഖ, പി ടി എ പ്രസിഡന്റ് ശ്രീഷ്മ സലീഷ്, ഒ എസ് എ പ്രസിഡന്റ് പ്രദീപ് മേനോൻ, സജീവൻ മാസ്റ്റർ, അരവിന്ദാക്ഷൻ മാസ്റ്റർ, പ്രിൻസിപ്പൽ എം കെ പ്രീതി, എൻ എസ് എസ് പ്രോഗ്രാം ഓഫീസർ ഡോ എസ് സുമ എന്നിവർ പ്രസംഗിച്ചു.
ഇരിങ്ങാലക്കുട : കാപ്പ ഉത്തരവ് ലംഘിച്ച കുപ്രസിദ്ധ ഗുണ്ട വെള്ളിക്കുളങ്ങര അന്നാംപാടം സ്വദേശി നഹാസ് എന്നറിയപ്പെടുന്ന വലിയകത്ത് വീട്ടില്‍ നവാസി(35)നെ വെള്ളിക്കുളങ്ങര പൊലീസ് അറസ്റ്റ് ചെയ്തു.
കാപ്പ ഉത്തരവ് പ്രകാരം എല്ലാ ഞായറാഴ്ചകളിലും വെള്ളിക്കുളങ്ങര പൊലീസ് സ്റ്റേഷന്‍ ഹൗസ് ഓഫീസര്‍ മുന്‍പാകെ നേരിട്ട് ഹാജരാകണമെന്നുള്ള ഉത്തരവ് ലംഘിച്ചതിനാണ് നവാസിനെ അറസ്റ്റ് ചെയ്തത്.
വെള്ളിക്കുളങ്ങര പൊലീസ് ഇന്‍സ്പെക്ടര്‍ കെ കൃഷ്ണന്‍, സബ് ഇൻസ്‌പെക്ടർ എം അഫ്സൽ, ഗ്രേഡ് എ എസ് ഐ ഷിജു, ഗ്രേഡ് സീനിയർ സിവില്‍ പൊലീസ് ഓഫീസർ ഡേവിസ്, പൊലീസ് ഉദ്യോഗസ്ഥരായ
സൈമൺ, ബിജേഷ്, അജിത്ത് കുമാർ എന്നിവരുടെ നേതൃത്വത്തിലുള്ള സംഘമാണ് നവാസിനെ അറസ്റ്റ് ചെയ്തത്.
നവാസ് 2006ൽ ഇരിങ്ങാലക്കുടയില്‍ ഒരു കവര്‍ച്ചാ കേസ്സിലും, 2007 ൽ ഇരിങ്ങാലക്കുടയില്‍ വ്യാജരേഖ ചമച്ച കേസ്സിലും, 2021ൽ കൊടകരയിലും 2024ൽ വെള്ളിക്കുളങ്ങരയിലും വധശ്രമ കേസ്സിലും ഉള്‍പ്പടെ 13ഓളം കേസ്സുകളിലെ പ്രതിയാണ്.
കൊടുങ്ങല്ലൂർ : എറിയാട് യു ബസാർ വൈദ്യർ ജംഗ്ഷനിൽ പറപ്പിള്ളി സ്വദേശി സുമേഷ് (40), കൂടെയുണ്ടായിരുന്ന ഏറിയാട് സ്വദേശി വിനോദ് (50) എന്നിവരെ ആക്രമിച്ച കേസിലെ പ്രതികൾ അറസ്റ്റിൽ.
എറിയാട് സ്വദേശികളായ മാടവന കൊല്ലത്തു വീട്ടിൽ കബീർ മകൻ ഫർസാൻ (20), കുന്നത്ത് വീട്ടിൽ ശ്രീജിത്ത് മകൻ അഭിജിത്ത് (20) എന്നിവരെയാണ് കൊടുങ്ങല്ലൂർ പൊലീസ് അറസ്റ്റ് ചെയ്തത്.
മുമ്പ് തങ്ങളുമായി വഴക്കുണ്ടാക്കിയ ആളുകളാണെന്നുള്ള തെറ്റിദ്ധാരണയിൽ സുമേഷിനെയും വിനോദിനെയും തടഞ്ഞു നിർത്തി തലയ്ക്കും മുഖത്തും കരിങ്കല്ലു കൊണ്ട് അടിച്ചും മറ്റും ഗുരുതര പരിക്കേൽപ്പിക്കുകയായിരുന്നു.
രക്ഷപ്പെടാനായി സമീപത്തെ വീട്ടിലേക്ക് ഓടിക്കയറിയ വിനോദിനെ വീടിനുള്ളിലേക്ക് അതിക്രമിച്ച് കയറിയാണ് ആക്രമിച്ചത്.
വിനോദിന്റെ തലയ്ക്കും കുപ്പി കൊണ്ടും കരിങ്കല്ലു കൊണ്ടും പ്രഹരമേറ്റ് ഗുരുതര പരിക്കുണ്ട്.
ഇൻസ്‌പെക്ടർ ബി കെ അരുണിൻ്റെ നേതൃത്വത്തിൽ, എസ് ഐ സാലീം, പ്രൊബേഷൻ എസ ഐ വൈഷ്ണവ്, ഉദ്യോഗസ്ഥരായ ഷമീർ, ഗോപേഷ്, വിഷ്ണു എന്നിവർ അന്വേഷണ സംഘത്തിൽ ഉണ്ടായിരുന്നു.
ഇരിങ്ങാലക്കുട : പടിയൂർ വൈക്കം ക്ഷേത്രത്തിലെ വിലപിടിപ്പുള്ള ഉരുളികൾ കവർന്ന മോഷ്ടാക്കൾ പിടിയിൽ.
ജനുവരി 21നാണ് സംഭവം. ക്ഷേത്ര വാതിൽ പൊളിച്ചാണ് പ്രതികൾ മോഷണം നടത്തിയത്.
സി സി ടി വി ദൃശ്യങ്ങൾ പരിശോധിച്ചതിൽ ആക്രി എടുക്കാൻ വരുന്ന ബംഗാൾ സ്വദേശികളാണ് മോഷണം നടത്തിയതെന്ന് കണ്ടെത്തിയിരുന്നു.
പല സ്ഥലങ്ങളിൽ മാറി മാറി താമസിച്ച് മോഷണം നടത്തി ഉൾവഴികളിലൂടെ മോട്ടോർ ഘടിപ്പിച്ച മുച്ചക്ര സൈക്കിളിലൂടെ രക്ഷപ്പെടുന്നതാണ് ഇവരുടെ രീതി.
മതിലകം പള്ളിവളവിലൂടെ പടിയൂർ ഭാഗത്തേക്ക് മറ്റൊരു മോഷണ ഉദ്ദേശവുമായി പോകുകയായിരുന്ന ഇവരെ വളവനങ്ങാടി സെന്ററിൽ വച്ച് പൊലീസ് വളഞ്ഞു പിടിക്കുകയായിരുന്നു.
പ്രതികളെ ചോദ്യം ചെയ്തതിൽ നിന്ന് ഇവരെ ബംഗാളിൽ നിന്നും കേരളത്തിലേക്ക് കൊണ്ടുവന്ന് പിന്തുണ നൽകി കളവ് മുതലുകൾ വിൽക്കാൻ സഹായിക്കുന്ന രണ്ടു പേരെ കൂടി അസ്മാബി കോളെജിനു സമീപത്ത് നിന്നും പിടികൂടിയിട്ടുണ്ട്.
ഇവർ വിറ്റ തൊണ്ടിമുതലുകൾ പൊലീസ് കണ്ടെടുത്തു.
പ്രതികളെ കൂടുതൽ ചോദ്യം ചെയ്തു വരികയാണ്.
തൃശൂർ റൂറൽ പൊലീസ് മേധാവി ബി കൃഷ്ണകുമാർ ഐ പി എസിൻ്റെ നിർദേശപ്രകാരം ഇരിങ്ങാലക്കുട ഡിവൈഎസ്പി സുരേഷിൻ്റെ നേതൃത്വത്തിൽ കാട്ടൂർ ഇൻപെക്ടർ ഇ ആർ ബൈജു ആണ് പ്രതികളെ പിടികൂടിയത്.
അന്വേഷണ സംഘത്തിൽ എസ് ഐ ബാബു, പ്രൊ എസ് ഐ സനദ്, എസ് ഐ രാധാകൃഷ്ണൻ, എ എസ് ഐ അസാദ്, എസ് സി പി ഒ ധനേഷ്, നിബിൻ, ബിന്നൽ, ശ്രീജിത്ത് എന്നിവരും ഉണ്ടായിരുന്നു.
ഇരിങ്ങാലക്കുട : വെള്ളാങ്ങല്ലൂർ പഞ്ചായത്ത് മുൻ പ്രസിഡന്റും കോൺഗ്രസ് നേതാവുമായിരുന്ന അനിൽ മാന്തുരുത്തിയുടെ അനുസ്മരണം നടത്തി.
കോൺഗ്രസ് കമ്മിറ്റി വെള്ളാങ്ങല്ലൂരിൽ സംഘടിപ്പിച്ച മൂന്നാം
ചരമ വാർഷിക അനുസ്മരണ സമ്മേളനം മുൻ പഞ്ചായത്ത് പ്രസിഡന്റ് കമാൽ കാട്ടകത്ത് ഉദ്ഘാടനം ചെയ്തു.
വാർഡ് മെമ്പർ ബിജു പോൾ അധ്യക്ഷനായി.
ഇ വി സജീവ്, ധർമജൻ വില്ലേടത്ത്, അയൂബ് കരൂപ്പടന്ന, എ ചന്ദ്രൻ, എ എ മുസമ്മിൽ, മായ രാമചന്ദ്രൻ, റസിയ അബു, ജോർജ് തൊമ്മാന, ഹമീദ് എന്നിവർ പ്രസംഗിച്ചു.
കെ കൃഷ്ണകുമാർ, വി മോഹൻദാസ്, സലിം അറക്കൽ, ജാസ്മിൻ ജോയ്, മല്ലിക ആനന്ദൻ എന്നിവർ നേതൃത്വം നൽകി.
