ഇരിങ്ങാലക്കുട : മാരക മയക്കുമരുന്നായ എം ഡി എം എയുമായി യുവാക്കൾ അറസ്റ്റിൽ.
എറിയാട് അമ്പലത്ത് വീട്ടിൽ മുഹമ്മദ് മകൻ ഇബിനുൾ മുഹമ്മദ് (24), ചെന്ത്രാപ്പിന്നി കുടംപുളി വീട്ടിൽ മൂസ മകൻ നിഷിക് (32) എന്നിവരെയാണ് കോതകുളത്ത് വച്ച് വലപ്പാട് പൊലീസിന്റെയും ജില്ലാ ഡാൻസാഫിന്റെയും നേതൃത്വത്തിൽ പിടികൂടിയത്.
പ്രതികളിൽ നിന്നും 2.51ഗ്രാം എം ഡി എം എയും പ്രതികൾ സഞ്ചരിച്ച കാറിൽ നിന്നും എംഡിഎംഎയുടെ വിൽപ്പനയ്ക്കായി സൂക്ഷിച്ച കവറുകളും ഉപയോഗിക്കുന്ന ഫണലും കണ്ടെടുത്തു.
പ്രതികൾ ബാംഗ്ലൂരിൽ നിന്നാണ് വില്പനയ്ക്കായി ലഹരിവസ്തുക്കൾ കൊണ്ടുവന്നിരുന്നതെന്ന് പൊലീസ് പറഞ്ഞു.
പ്രതികളിൽ ഇബിനുൾ മുഹമ്മദ് 2022ൽ മതിലകം പൊലീസ് സ്റ്റേഷൻ പരിധിയിലെ ഒരു അടിപിടി കേസിൽ ഉൾപ്പെട്ടിട്ടുള്ളതാണ്.
തൃശ്ശൂർ റൂറൽ ജില്ലാ പൊലീസ് മേധാവി ബി കൃഷ്ണകുമാർ ഐ പി എസിൻ്റെ നിർദ്ദേശപ്രകാരം കൊടുങ്ങല്ലൂർ ഡിവൈഎസ്പി വി കെ രാജുവിന്റെ മേൽനോട്ടത്തിലായിരുന്നു അന്വേഷണം.
വലപ്പാട് എസ്എച്ച്ഒ രമേശ്, എസ് ഐ സദാശിവൻ, എസ് ഐ സിനി, എസ് സി പി ഒ പ്രബിൻ, മനോജ്, റഷീദ്, സിപിഒ സന്ദീപ്, ഡാൻസാഫ് അംഗങ്ങളായ എസ് ഐ ജയകൃഷ്ണൻ, ഷൈൻ, സൂരജ് ദേവ്, ബിജു ഇയാനി, ബിജു, സോണി, സിപിഒ ഷിന്റോ എന്നിവർ അന്വേഷണസംഘത്തിൽ ഉണ്ടായിരുന്നു.
