IRINJALAKUDA TIMES
ഇരിങ്ങാലക്കുട : കണ്ഠേശ്വരം ശിവക്ഷേത്രത്തിലും ബ്രഹ്മകുളങ്ങര മഹാവിഷ്ണു ക്ഷേത്രത്തിലും രാമായണ മാസാചരണത്തോടനുബന്ധിച്ച് കർക്കിടകം 1 മുതൽ 31 വരെ രാവിലെ 5.30 മുതൽ 7.30 വരെ രാമായണ പാരായണം ഉണ്ടായിരിക്കും.
കണ്ഠേശ്വരം ക്ഷേത്രത്തിൽ ജൂലൈ 17 മുതൽ 23 വരെ വൈകുന്നേരം 6.30 മുതൽ 7.30 വരെ മാതാജി ദേവി സംഗമേശാനന്ദ സരസ്വതി ഭക്തിപ്രഭാഷണം നടത്തും.
ആഗസ്റ്റ് 16ന് വൈകുന്നേരം 6.30 മുതൽ 7.30 വരെ കെ.ബി. സുരേഷിന്റെ പ്രഭാഷണം അരങ്ങേറും.
കർക്കിടകം 1 മുതൽ 7 വരെ പ്രഭാഷണത്തിനു ശേഷം ക്ഷേത്രത്തിൽ ഔഷധക്കഞ്ഞി വിതരണവും ഉണ്ടായിരിക്കും.
ഇരിങ്ങാലക്കുട : ക്രൈസ്റ്റ് കോളേജിൽ ഗണിതശാസ്ത്രം വിഭാഗത്തിലെ അസിസ്റ്റൻ്റ് പ്രൊഫസർ ആഗ്നസ് പൂവ്വത്തിങ്കൽ ബാംഗ്ലൂർ ക്രൈസ്റ്റ് യൂണിവേഴ്സിറ്റിയിൽ നിന്ന് പി എച്ച് ഡി കരസ്ഥമാക്കി.
കുഴിക്കാട്ടുകോണം പൂവത്തിങ്കൽ പയസ്സിന്റെയും ജോളിയുടെയും മകളും, വൈലത്തൂർ മാറോക്കി ലൂയിസ് ജോസിൻ്റെ ഭാര്യയുമാണ് ആഗ്നസ്.
ഇരിങ്ങാലക്കുട : കൂടൽമാണിക്യം ക്ഷേത്രത്തിലെ സ്വർണ്ണക്കൊടിമരം പുനർ നിർമ്മിക്കും. ഇതേക്കുറിച്ച് ആലോചിക്കുന്നതിനു വേണ്ടി ഭക്തജനങ്ങളുടെ യോഗം നാളെ (ബുധനാഴ്ച്ച) ഉച്ചതിരിഞ്ഞ് 4 മണിക്ക് ക്ഷേത്രത്തിന്റെ പടിഞ്ഞാറെ ഊട്ടുപുരയിൽ ചേരുമെന്ന് ദേവസ്വം ചെയർമാൻ അഡ്വ സി കെ ഗോപി അറിയിച്ചു.
ക്ഷേത്രത്തിന്റെ പടിഞ്ഞാറെ നടപ്പുരയുടെ നവീകരണവും ഇതോടൊപ്പം ചെയ്യാനാണ് ഉദ്ദേശിക്കുന്നതെന്നും ചെയർമാൻ വ്യക്തമാക്കി.
72 അടി ഉയരത്തിലുള്ള കൊടിമരം പൊതിയാൻ ഏകദേശം 15 കോടി രൂപ വിലവരുന്ന സ്വർണ്ണം വേണ്ടി വരുമെന്നാണ് കണക്കാക്കുന്നത്.
കൊടിമരം, പടിഞ്ഞാറെ നടപ്പുര, മറ്റ് നവീകരണ പ്രവർത്തനങ്ങൾ എന്നിവക്ക് മൊത്തം 25 കോടിയോളം ചെലവ് വരും.
ഈ വർഷം നിർമ്മാണം ആരംഭിച്ച് അടുത്ത വർഷം ഉത്സവത്തിനു മുമ്പായി പൂർത്തിയാക്കാനാണ് ആലോചിക്കുന്നത്. ബുധനാഴ്ച്ച വൈകീട്ട് നടക്കുന്ന യോഗത്തിനു ശേഷം ശ്രീകോവിലിനു മുൻപിൽ ചെമ്പോല മേഞ്ഞതിന്റെ സമർപ്പണവും നടക്കും.
ഇരിങ്ങാലക്കുട : അലഞ്ഞു തിരിഞ്ഞു നടക്കുന്ന തെരുവുനായയും മറ്റു നായ്ക്കളും തമ്മിലുണ്ടായ കടിപിടിയിൽ തെരുവുനായ ചത്തു. തുടർന്നു നടത്തിയ പോസ്റ്റുമാർട്ടത്തിൽ തെരുവുനായക്ക് പേവിഷബാധ ഉണ്ടെന്ന് തെളിഞ്ഞു. ഇതിന്റെ അടിസ്ഥാനത്തിൽ മറ്റ് നായ്ക്കൾക്ക് വെറ്ററിനറി ഡോക്ടറുടെ നേതൃത്വത്തിൽ ഇന്ന് (ചൊവ്വാഴ്ച്ച) രാവിലെ 10 മണിക്ക് പ്രതിരോധ കുത്തിവെയ്പ്പ് നൽകും.
ഇരിങ്ങാലക്കുട നഗരസഭ 35, 39 വാർഡുകളിൽ പെട്ട കല്ലട ക്ഷേത്രത്തിനടുത്ത് ഞായറാഴ്ച്ച രാത്രിയായിരുന്നു സംഭവം. പുറത്തു നിന്നെത്തിയ തെരുവുനായയും സമീപ പ്രദേശത്തുള്ള ഏഴ് നായ്ക്കളും തമ്മിലായിരുന്നു കടിപിടി.
ആക്രമണത്തിൽ ചത്ത തെരുവുനായയെ തിങ്കളാഴ്ച്ച രാവിലെ നഗരസഭ ആരോഗ്യ വിഭാഗം കൊണ്ടു പോയി പോസ്റ്റുമോർട്ടം ചെയ്തപ്പോഴാണ് പേ വിഷബാധ ഉണ്ടെന്ന് അറിഞ്ഞത്.
ഇരിങ്ങാലക്കുട : തുമ്പൂർ സഹകരണ ബാങ്കിൻ്റെ ആഭിമുഖ്യത്തിൽ “വിത്തും കൈക്കോട്ടും” എന്ന പേരിൽ നടത്തുന്ന ഞാറ്റുവേലച്ചന്തയുടെ ഭാഗമായി സംഘടിപ്പിച്ച സ്ത്രീയരങ്ങ് ജില്ലാ പഞ്ചായത്ത് വൈസ് പ്രസിഡൻ്റ് ലത ചന്ദ്രൻ ഉദ്ഘാടനം ചെയ്തു.
ചടങ്ങിൽ വേളൂക്കര പഞ്ചായത്ത് അംഗം രഞ്ജിത ഉണ്ണികൃഷ്ണൻ അധ്യക്ഷത വഹിച്ചു.
രമിത സുധീന്ദ്രൻ, ആമിന അബ്ദുൾഖാദർ, ജോളി മാത്യു എന്നിവർ സംസാരിച്ചു.
വിവിധ സ്ത്രീ ശാക്തീകരണ സംഘടനകൾ അവതരിപ്പിച്ച തിരുവാതിരക്കളി, ഒപ്പന, നൃത്തനൃത്ത്യങ്ങൾ തുടങ്ങിയവ ചടങ്ങിൻ്റെ മാറ്റു കൂട്ടി.
ഇരിങ്ങാലക്കുട : ഗവ മോഡൽ ബോയ്സ് ഹയർ സെക്കണ്ടറി സ്കൂൾ എൻ. എസ്. എസ് യൂണിറ്റിന്റെ ആഭിമുഖ്യത്തിൽ സംഘടിപ്പിച്ച വായനാ പക്ഷാചരണത്തിൻ്റെയും പരിസ്ഥിതി ബോധവൽക്കരണത്തിൻ്റെയും സമാപന ചടങ്ങുകൾ നഗരസഭ വിദ്യാഭ്യാസ സ്റ്റാന്റിങ് കമ്മിറ്റി ചെയർമാൻ അഡ്വ. ജിഷ ജോബി ഉൽഘാടനം ചെയ്തു.
ചടങ്ങിൽ പി. ടി. എ. പ്രസിഡന്റ് വി ഭക്തവത്സലൻ അധ്യക്ഷത വഹിച്ചു.
മുഖ്യാതിഥികളായി പങ്കെടുത്ത നഗരസഭയിലെ ഹരിതകർമ്മ സേനാംഗങ്ങൾ മാലിന്യ നിർമ്മാർജനത്തിന്റെ അവശ്യകതകളെ
കുറിച്ചും, രീതികളെ കുറിച്ചും വിശദീകരിച്ചു.
വിവിധ മത്സരവിജയികൾക്കുള്ള സമ്മാനദാനവും അഡ്വ ജിഷ ജോബി നിർവ്വഹിച്ചു.
പ്രിൻസിപ്പാൾ എം കെ മുരളി സ്വാഗതവും, എൻ. എസ്. എസ് പ്രോഗ്രാം ഓഫീസർ എൻ വി വിനുകുമാർ നന്ദിയും പറഞ്ഞു.
ഇരിങ്ങാലക്കുട : അപ്രത്യക്ഷമായി കൊണ്ടിരിക്കുന്ന രംഗകലകളെ തിരിച്ചു കൊണ്ടു വരാനുള്ള ശ്രമങ്ങൾ ഉണ്ടാകേണ്ടതുണ്ടെന്ന് നടനകൈരളി ഡയറക്ടറും പ്രശസ്ത കൂടിയാട്ടം കലാകാരനുമായ വേണുജി അഭിപ്രായപ്പെട്ടു.
സെന്റ് ജോസഫ്സ് കോളേജ് സംഘടിപ്പിക്കുന്ന രണ്ടാമത് “ഋതു” അന്താരാഷ്ട്ര പരിസ്ഥിതി ചലച്ചിത്രമേളയുടെ ഡെലിഗേറ്റ് പാസ്, ഫെസ്റ്റിവൽ ബാഗ് എന്നിവയുടെ വിതരണോദ്ഘാടനം നിർവഹിച്ച് സംസാരിക്കുകയായിരുന്നു അദ്ദേഹം.
പഠനത്തോടൊപ്പം തന്നെ അപൂർവ്വമായ കലകളെ സംരക്ഷിക്കാനും പരിഗണന നൽകാനും വിദ്യാർഥി സമൂഹം ശ്രദ്ധിക്കണമെന്നും വേണുജി പറഞ്ഞു.
കോളേജ് റിസർച്ച് ആൻ്റ് സെമിനാർ ഹാളിൽ നടന്ന ചടങ്ങിൽ “ഋതു” ഫിലിം ഫെസ്റ്റ് ചെയർമാനും കോളേജ് പ്രിൻസിപ്പലുമായ ഡോ. സി. ബ്ലെസി അധ്യക്ഷത വഹിച്ചു.
ഹോളി ഫാമിലി സന്യാസ സഭ മദർ ജനറൽ ഡോ. സി. ആനി കുര്യാക്കോസ്, ഇരിങ്ങാലക്കുട ഫിലിം സൊസൈറ്റി പ്രസിഡണ്ട് മനീഷ് അരീക്കാട്ട്, ഋതു ഫിലിം ഫെസ്റ്റ് പ്രോഗ്രാം കമ്മിറ്റി കൺവീനർ ഷിബിത ഇമ്മാനുവൽ, ഋതു ഫിലിം ഫെസ്റ്റ് കോർ കമ്മിറ്റി കോർഡിനേറ്റർ ശ്രുതി ദീപക്, ഋതു ഫിലിം ഫെസ്റ്റിവൽ കൺവീനർ പി വി അരവിന്ദ് എന്നിവർ സംസാരിച്ചു.
ഇരിങ്ങാലക്കുട : അവിട്ടത്തൂർ ലാൽ ബഹാദൂർ ശാസ്ത്രി മെമ്മോറിയൽ ഹയർ സെക്കണ്ടറി സ്കൂളിലെ ഹയർ സെക്കണ്ടറി 25 -ാം വാർഷികാഘോഷത്തിന്റെ
ഭാഗമായി നടത്തുന്ന രജതോത്സവത്തിന് ലോഗോ ക്ഷണിക്കുന്നു.
താല്പര്യമുള്ളവർ ജൂലായ് 20 ന് മുമ്പ് Ibsm.avittathur @ gmail.com എന്ന ഇമെയിലിലോ 9446828608 എന്ന whatsapp നമ്പറിലോ ‘ലോഗോ’ അയക്കേണ്ടതാണെന്ന് പ്രിൻസിപ്പൽ അറിയിച്ചു.
ഇരിങ്ങാലക്കുട : മാപ്രാണം ഹോളിക്രോസ് ഹയർ സെക്കൻ്ററി സ്കൂളിലെ എൻ.എൻ.എസ്. യൂണിറ്റിൻ്റെ ഓണത്തിന് മുന്നോടിയായി ചെണ്ടുമല്ലി കൃഷിക്ക് തുടക്കം കുറിച്ചു.
സ്കൂൾ മാനേജർ റവ. ഫാ. ജോണി മേനാച്ചേരി ഉദ്ഘാടനം നിർവഹിച്ചു.
കള്ളാപ്പറമ്പിൽ ട്രേഡേഴ്സ് മാനേജിംഗ് ഡയറക്‌ടർ സെബി കള്ളാപ്പറമ്പിൽ ചെണ്ടുമല്ലി കൃഷിക്ക് ആവശ്യമായ സഹായ സഹകരണങ്ങൾ നൽകി.
പി.ടി.എ. പ്രസിഡന്റ് അഡ്വ. സിജു പാറേക്കാടൻ ആശംസകൾ അർപ്പിച്ചു.
സ്കൂൾ പ്രിൻസിപ്പൽ പി.എ. ബാബു സ്വാഗതവും എൻ.എസ്.എസ്. പ്രോഗ്രാം ഓഫീസർ നിഷ ആൻ്റണി നന്ദിയും പറഞ്ഞു.
ആനന്ദപുരം : ആനന്ദപുരം ശ്രീകൃഷ്ണ ഹയർ സെക്കണ്ടറി സ്കൂളിൽ രക്ഷിതാക്കൾക്ക് സ്മാർട്ട് പാരൻ്റിംഗ് ശില്പശാല സംഘടിപ്പിച്ചു.
കരിയർ ട്രെയിനർ സിനി രാജേഷ് ക്ലാസ് നയിച്ചു.
പി.ടി.എ. പ്രസിഡൻ്റ് ടി.എസ്. മനോജ്കുമാർ, ഹെഡ്മാസ്റ്റർ ടി. അനിൽകുമാർ, സ്റ്റാഫ് സെക്രട്ടറി ബി. ബിജു, അധ്യാപകരായ സി.സി. രേഖ, ജൂലി ജോർജ്ജ് എന്നിവർ പ്രസംഗിച്ചു.
