ഇരിങ്ങാലക്കുട: നിര്‍ധന കുടുംബത്തിന് സ്വപ്‌നഭവനം നിര്‍മിച്ചു നല്‍കി സെന്റ് തോമസ് കത്തീഡ്രല്‍ ഇടവകയിലെ സെന്റ് പീറ്റര്‍ കുടുംബ കൂട്ടായ്മ.
പിണ്ടിപ്പെരുന്നാളിന്റെ ആഘോഷങ്ങളില്‍ മിച്ചം വന്ന തുക ഉപയോഗിച്ച് ഒരു നിര്‍ധന കുടുംബത്തിന് വീടു നിര്‍മ്മിച്ച് നല്‍കാമെന്ന് കുടുംബ കൂട്ടായ്മ തീരുമാനിക്കുകയായിരുന്നു.
ഈ തുക മതിയാകില്ലെന്നു മനസിലാക്കിയപ്പോള്‍ കൂട്ടായ്മയിലെ 47 കുടുംബങ്ങളും തങ്ങളാല്‍ കഴിയാവുന്ന തുക സംഭാവനകളായി നല്‍കിയാണ് വീടിന്റെ നിര്‍മ്മാണം പൂര്‍ത്തീകരിച്ചത്.
2025 ജനുവരി 1ന് പുതുവര്‍ഷ ദിനത്തില്‍ കത്തീഡ്രല്‍ വികാരി റവ. ഡോ. ലാസര്‍ കുറ്റിക്കാടന്‍ സ്‌നേഹ ഭവനത്തിന് തറക്കല്ലിട്ടു.
മൂന്നു മാസം കൊണ്ട് വീടിന്റെ പണി പൂര്‍ത്തീകരിച്ച് ഇടവകയിലെ ഒരു നിര്‍ധന കുടുംബത്തിന് കൈമാറി.
ബിഷപ്പ് മാര്‍ പോളി കണ്ണൂക്കാടന്‍ വീടിന്റെ വെഞ്ചിരിപ്പും താക്കോല്‍ ദാനവും നിര്‍വ്വഹിച്ചു.
കുടുംബ കൂട്ടായ്മയുടെ പ്രസിഡന്റ് ബാബു ചേലക്കാട്ടുപറമ്പില്‍, സെക്രട്ടറി വര്‍ഗീസ് റപ്പായി പറമ്പി, ട്രഷറര്‍ ടോമി പോള്‍ പറമ്പി, വൈസ് പ്രസിഡന്റ് രാജമ്മ ലോനപ്പന്‍, ജോയിന്റ് സെക്രട്ടറി ജോയ് മുളരിക്കല്‍ എന്നിവരാണ് നേതൃത്വം നല്‍കിയത്.
