ഇരിങ്ങാലക്കുട : മാലിന്യമുക്തം നവകേരളം ക്യാമ്പയിൻ്റെ ഭാഗമായി ജനുവരി 1 മുതൽ 7 വരെ സംസ്ഥാന വ്യാപകമായി സംഘടിപ്പിച്ച ”വലിച്ചെറിയൽ മുക്ത വാരം” ക്യാമ്പയിനോടനുബന്ധിച്ച് ഇരിങ്ങാലക്കുട നഗരസഭയിൽ നഗരസഭ ചെയർപേഴ്സൺ, നഗരസഭ സെക്രട്ടറി, ആരോഗ്യവിഭാഗം ഉദ്യോഗസ്ഥർ തുടങ്ങിയവരെ പങ്കെടുപ്പിച്ചു കൊണ്ടുള്ള പ്രത്യേക യോഗം നടത്തി.
ചെയർപേഴ്സണൻ മേരിക്കുട്ടി ജോയ് ക്യാമ്പയിൻ ഉദ്ഘാടനം ചെയ്തു.
മാലിന്യ ശേഖരണവും സംസ്കരണവും ശാസ്ത്രീയമായ രീതിയിൽ നടത്തേണ്ടതിന്റെ പ്രാധാന്യത്തെ സംബന്ധിച്ച് വിദ്യാർഥികളിൽ അവബോധം സൃഷ്ടിക്കുന്ന തരത്തിലുള്ള പരിപാടികൾ സംഘടിപ്പിക്കുന്നതിനും, മാലിന്യം സ്ഥിരമായി വലിച്ചെറിയുന്ന സ്ഥലങ്ങളിൽ അതിനുള്ള ശാശ്വത പരിഹാരം കാണുന്ന തരത്തിൽ പൊതുജന പങ്കാളിത്തത്തോടുകൂടി നടപടി സ്വീകരിക്കുന്നതിനും യോഗം തീരുമാനിച്ചു.
വലിച്ചെറിയൽ മുക്ത വാരാചരണത്തിൻ്റെ ഭാഗമായുള്ള നഗരസഭാതല സന്ദേശ പ്രചാരണ യാത്രക്ക് ചെയർപേഴ്സൺ മേരിക്കുട്ടി ജോയ് നേതൃത്വം നൽകി.
കൗൺസിലർമാർ, ഇദ്യോഗസ്ഥർ, വിവിധ രാഷ്ട്രീയ, സാമൂഹിക, സംഘടനാ, ക്ലബ്ബ് പ്രതിനിധികൾ, ഹരിതകർമസേന, കുടുംബശ്രീ അംഗങ്ങൾ തുടങ്ങിയവർ മെഗാ റാലിയിൽ പങ്കെടുത്തു.
ഇരിങ്ങാലക്കുട സെന്റ് ജോസഫ് കോളെജ് എൻ എസ് എസ് വൊളൻ്റിയർമാരും, ഡോൺബോസ്‌കോ ഹയർ സെക്കന്ററി സ്കൂളിലെ സ്കൗട്ട് ആൻഡ് ഗൈഡ്‌സ്, എൻ സി സി റെഡ്ക്രോസ് എന്നിവയിൽ പ്രവർത്തിക്കുന്ന വിദ്യാർഥികളും, ക്രൈസ്റ്റ് കോളെജ് എൻ എസ് എസ് വൊളൻ്റിയർമാരും വലിച്ചെറിയൽ വിരുദ്ധ പ്രചാരണ റാലികൾ സംഘടിപ്പിച്ചു.
