പഹൽഗാമിൽ തീവ്രവാദികളുടെ ആക്രമണത്തിൽ കൊല്ലപ്പെട്ടവർക്ക് ആദരാഞ്ജലി അർപ്പിച്ച് മുരിയാട് മണ്ഡലം കോൺഗ്രസ്

ഇരിങ്ങാലക്കുട : ജമ്മുകാശ്മീരിലെ പഹൽഗാമിൽ തീവ്രവാദികളുടെ ആക്രമണത്തിൽ കൊല്ലപ്പെട്ടവർക്ക് മുരിയാട് മണ്ഡലം കോൺഗ്രസ് കമ്മിറ്റി ആദരാഞ്ജലികൾ അർപ്പിച്ചു.

ദീപം തെളിയിച്ച് പഞ്ചായത്ത് ഓഫീസ് പരിസരത്ത് നടന്ന ചടങ്ങിൽ മണ്ഡലം പ്രസിഡന്റ് സാജു പാറേക്കാടൻ ഭീകരവിരുദ്ധ പ്രതിജ്ഞ ചൊല്ലിക്കൊടുത്തു.

ബ്ലോക്ക് വൈസ് പ്രസിഡന്റ് ശ്രീജിത്ത് പട്ടത്ത്, സെക്രട്ടറിമാരായ വിബിൻ വെള്ളയത്ത്, ജോമി ജോൺ, മഹിളാ കോൺഗ്രസ് മണ്ഡലം പ്രസിഡന്റ് തുഷം സൈമൺ, യൂത്ത് കോൺഗ്രസ് മണ്ഡലം പ്രസിഡന്റ് ജസ്റ്റിൻ ജോർജ്ജ്, പഞ്ചായത്തംഗം നിത അർജുനൻ, മുരളി മഠത്തിൽ, സദാനന്ദൻ കൊളത്താപ്പിള്ളി, ജിന്റോ ഇല്ലിക്കൽ, പ്രേമൻ കൂട്ടാല, ഗോപിനാഥ് കളത്തിങ്കൽ, മുരളി തറയിൽ, ഫിജില്‍ ജോൺ, സി.എസ്. അജീഷ്, യമുന ഷിജു, അഞ്ജു സുധീർ, വിലാസൻ തുമ്പരത്തി, ബാലചന്ദ്രൻ വടക്കൂട്ട് എന്നിവർ നേതൃത്വം നൽകി.

സിവിൽ സർവീസ് തിളക്കത്തിൽ സെൻ്റ് ജോസഫ്സ് കോളെജിലെ പൂർവ്വ വിദ്യാർഥിനിഗംഗ ഗോപി

ഇരിങ്ങാലക്കുട : ഓൾ ഇന്ത്യ സിവിൽ സർവീസ് പരീക്ഷയുടെ റാങ്ക് പട്ടികയിൽ 786-ാം റാങ്ക് നേടി ഗംഗ ഗോപി വിജയത്തിളക്കത്തിൽ നിൽക്കുമ്പോൾ ഇരിങ്ങാലക്കുട സെൻ്റ് ജോസഫ്സ് കോളെജിനും, അവിടത്തെ എൻ.സി.സി. യൂണിറ്റിനും ഇത് അഭിമാനത്തിൻ്റെയും ആഹ്ലാദത്തിൻ്റെയും നിമിഷങ്ങൾ….

മൂത്രത്തിക്കര കോടിയത്ത് വീട്ടിൽ ഗോപിയുടെയും ജയയുടെയും മകളായ ഗംഗ 2017-19 കാലഘട്ടത്തിലാണ് സെൻ്റ് ജോസഫ്സ് കോളെജിൽ പഠിച്ചിരുന്നത്.

പഠനകാലത്ത് എൻ.സി.സി. യൂണിറ്റിൽ സജീവ പ്രവർത്തനം കാഴ്ച്ച വെച്ച ഗംഗ പ്രളയകാലത്തെ സേവന പ്രവർത്തനങ്ങൾ, മലക്കപ്പാറ ആദിവാസി ഊരുകളിലെ ക്ഷേമപ്രവർത്തനങ്ങൾ തുടങ്ങി ഒട്ടേറെ കാര്യങ്ങളിൽ കാര്യക്ഷമമായ ഇടപെടലുകൾ നടത്തിയ വ്യക്തിത്വമാണ്.

ആദിവാസികളുടെ ശാസ്ത്ര സാങ്കേതിക അറിവുകളുടെ ബൗദ്ധിക സ്വത്തവകാശങ്ങൾ – ഒരു പഠനം, കവളപ്പാറ ഉരുൾപൊട്ടൽ ബാധിതർക്കുള്ള അവശ്യ വസ്തുക്കൾ എത്തിച്ചു നൽകൽ തുടങ്ങിയ മികവുറ്റ പ്രവർത്തനങ്ങൾ അക്കാലത്ത് എൻ.സി.സി. നടത്തിയത് ഗംഗയുടെയും മറ്റും നേതൃത്വത്തിലായിരുന്നു.

തൃശൂരിലെ സ്കൂൾ കലോത്സവ കാലത്തും, പരംവീർചക്ര ജേതാവ് ക്യാപ്റ്റൻ യോഗേന്ദ്ര സിങ് യാദവ് കലാലയത്തിലെത്തിയപ്പോൾ സംഘാടനത്തിൻ്റെ മുൻനിരയിലും ഉണ്ടായിരുന്ന ഗംഗയെ ക്യാപ്റ്റൻ ലിറ്റി ചാക്കോ ഓർമ്മിച്ചെടുക്കുന്നത് മികവുറ്റ സംഘാടകയായിട്ടാണ്.

ഒരു പാട് പേർക്ക് പ്രചോദനമാവുന്ന ഗംഗയുടെ ഈ നേട്ടത്തിൽ കോളേജിന് ഏറെ അഭിമാനമുണ്ടെന്ന് പ്രിൻസിപ്പാൾ ഡോ. സി. ബ്ലെസി പറഞ്ഞു.

എല്ലാറ്റിനും പുറമെ, ഗംഗ നല്ലൊരു എഴുത്തുകാരി കൂടിയാണ്. കോളെജിലെ മാഗസിൻ എഡിറ്ററുമായിരുന്നു.

ഗായത്രി ഗോപി സഹോദരിയാണ്.

നിര്യാതയായി

ശാന്ത

ഇരിങ്ങാലക്കുട : പൊറത്തിശ്ശേരി പരേതനായ
രാമംകുളത്ത് വാസു ഭാര്യ ശാന്ത (69) നിര്യാതയായി.

സംസ്കാരം ബുധനാഴ്ച (ഏപ്രിൽ 23) രാവിലെ 11 മണിക്ക് വീട്ടുവളപ്പിൽ

മക്കൾ : വത്സൻ രാമംകുളത്ത് (റവന്യൂ ഇൻഷർമേഷൻ ബ്യൂറോ – തിരുവനന്തപുരം), ശാലിനി

മരുമക്കൾ : ജലജ (റവന്യു മന്ത്രിയുടെ പേഴ്സണൽ സ്റ്റാഫ്), ഉണ്ണി

ലഹരിക്കെതിരെ ബോധവൽക്കരണ ക്ലാസുമായി നക്ഷത്ര റെസിഡൻ്റ്സ് അസോസിയേഷൻ

ഇരിങ്ങാലക്കുട : നഗരസഭ വാർഡ് 35ൽ നക്ഷത്ര റസിഡൻസ് അസോസിയേഷന്റെ നേതൃത്വത്തിൽ നടന്ന ലഹരിക്കെതിരെയുള്ള ബോധവൽക്കരണ ക്ലാസ് മുനിസിപ്പൽ സ്റ്റാൻഡിങ് കമ്മിറ്റി ചെയർമാൻ സി. സി. ഷിബിൻ ഉദ്ഘാടനം ചെയ്തു.

അസോസിയേഷൻ പ്രസിഡന്റ്‌ കെ.ബി. മാഹിൻ അധ്യക്ഷനായി.

സമൂഹത്തെ കാർന്നു തിന്നുന്ന ഒരു വിപത്തായി ലഹരി മാറി കഴിഞ്ഞു. കുട്ടികളിൽ ചിലർ ആഘോഷത്തിന്റെയും ആനന്ദത്തിന്റെയും ഉപാധികളായി ലഹരിയെ തെരെഞ്ഞെടുക്കുകയാണ്. നാട്ടിൽ നടക്കുന്ന അക്രമങ്ങളും, കൊലപാതകങ്ങളും, വാഹന അപകടങ്ങളും, ലഹരിയുടെ ഉപയോഗം മൂലമാണെന്നാണ് തെളിവുകൾ സൂചിപ്പിക്കുന്നത്. അതിനാൽ ഈ മഹാവിപത്തിനെ നമ്മുടെ നാട്ടിൽ നിന്നും തുടച്ചു മാറ്റുവാൻ നമ്മൾ ഓരോത്തരും ലഹരിക്കെതിരെ അണി ചേരണമെന്നും വാർഡ് കൗൺസിലർ സി. സി. ഷിബിൻ ആഹ്വാനം ചെയ്തു.

സിവിൽ എക്സൈസ് ഓഫീസർ പി. എം. ജദീർ ലഹരിക്കെതിരെയുള്ള ബോധവൽക്കരണ ക്ലാസ്സ്‌
നയിച്ചു.

അസോസിയേഷൻ സെക്രട്ടറി ഗിരിജാവല്ലഭൻ സ്വാഗതവും, വൈസ് പ്രസിഡന്റ്‌ ഷീന ദാസ് നന്ദിയും പറഞ്ഞു.

ഷീജ ശശികുമാർ, വിനോദ് വട്ടപറമ്പിൽ, ഓമന ലോഹിതക്ഷൻ, പ്രസീന സുജോയ്, ഓഫീസ് സെക്രട്ടറി രാധിക എന്നിവർ നേതൃത്വം നൽകി.

ഭാരതീയ അഭിനയ കല ‘നാട്യശാസ്ത്രം’ യുനെസ്കോയുടെ മെമ്മറി ഓഫ് വേൾഡ് രജിസ്റ്ററിൽ

ഇരിങ്ങാലക്കുട : ഭാരതീയ അഭിനയ കലയായ ‘നാട്യശാസ്ത്രം’ യുനെസ്കോയുടെ മെമ്മറി ഓഫ് വേൾഡ് രജിസ്റ്ററിൽ ഉൾപ്പെടുത്തിയെന്ന വാർത്ത പ്രഖ്യാപിച്ചപ്പോൾ ഇരിങ്ങാലക്കുട നടനകൈരളിയിൽ നടന്നു വരുന്ന 124-മത് ‘നവരസ സാധന’ ശില്പശാലയിൽ പങ്കെടുക്കുന്ന ഇന്ത്യയുടെ നാനാഭാഗത്തു നിന്നും എത്തിയിട്ടുള്ള പതിനാല് യുവ നർത്തകരും നടീനടന്മാരും ആവേശത്തിൻ്റെ കൊടുമുടിയേറി.

ഗുരു വേണുജിയുടെ നേതൃത്വത്തിൽ നടന്നു വരുന്ന നവരസ സാധന ശില്പശാല നാട്യശാസ്ത്രത്തിൽ അധിഷ്‌ഠിതമായി ഇന്ത്യയിൽ ഇന്ന് നിലവിലുള്ള ഏക അഭിനയ പരിശീലന കളരിയാണ്.

പതിനെട്ടാം നൂറ്റാണ്ടു മുതൽ കൊടുങ്ങല്ലൂർ കോവിലകത്തു നിലവിൽ വരികയും ഗുരു അമ്മന്നൂർ മാധവചാക്യാർ, പട്ടിക്കാംതൊടി രാവുണ്ണി മേനോൻ എന്നീ അതുല്യ നടന്മാരെ സൃഷ്ടിക്കുകയും ചെയ്ത ‘സ്വരവായു’ എന്ന അഭിനയ പരിശീലന സമ്പ്രദായത്തിൽ നിന്ന് പ്രചോദനമുൾക്കൊണ്ട് 2005-ലാണ് ‘നവരസ സാധന’ വേണുജി രൂപം നൽകുന്നത്.

നാഷണൽ സ്കൂൾ ഓഫ് ഡ്രാമയിലും, സിങ്കപ്പൂരിലെ ഇന്റർ കൾച്ചറൽ തിയറ്റർ ഇൻസ്റ്റിറ്റ്യൂട്ടിലും, നടനകൈരളിയിലുമായി മൂവായിരത്തോളം പേരെ ഇതിനകം നവരസ സാധന അഭ്യസിപ്പിച്ചിട്ടുണ്ട്.

“ലോകത്ത് ഇന്ന് നിലവിലുള്ള ഏറ്റവും ഫലപ്രദമായ അഭിനയ പരിശീലന സമ്പ്രദായങ്ങൾ നാട്യശാസ്ത്രത്തിലുള്ളതാണ്. നിർഭാഗ്യവശാൽ ഡൽഹിയിലെ നാഷണൽ സ്കൂൾ ഓഫ് ഡ്രാമയിലും ഇതര നാടക വിദ്യാലയങ്ങളിലും നാട്യശാസ്ത്രം മുഖ്യ പാഠ്യ വിഷയമല്ല” – വേണുജി അഭിപ്രായപ്പെട്ടു.

നൃത്യ നാട്യ രംഗത്തെ പ്രശസ്തരായ കപിലാ വേണു, മീരാ ശ്രീനാരായണൻ, മലയാള നടിമാരായ കനി കസൃതി, റിമാ കല്ലിങ്കൽ, നവ്യ നായർ എന്നിവർക്കു പുറമെ ആദിൽ ഹുസൈൻ, സന്ധ്യ മൃദുൽ, ഇഷ തൽവാർ എന്നിവരും നവരസ സാധന പരിശീലിച്ചവരിൽ ഉൾപ്പെടുന്നു.

മാതൃകാപരമീ ജയിൽ ജീവിതം : ജയിൽ പാർക്കിൽ ഒന്നാന്തരം ഫ്രഷ് പച്ചക്കറി ഷോപ്പും തുറന്നു

വിയ്യൂർ : സെൻട്രൽ ജയിൽ പാർക്കിൽ പച്ചക്കറികൾ വിൽക്കാൻ ഗാർഡൻ ഫ്രഷ് വെജി ഷോപ്പ് ആരംഭിച്ചു.

പച്ചക്കറി വിളവ് ആവശ്യത്തിലധികം ലഭിച്ചപ്പോഴാണ് സെൻട്രൽ ജയിൽ കവാടത്തിനരികെയുള്ള ഫ്രീഡം പാർക്കിൽ കെട്ടുവള്ളം മാതൃകയിൽ വില്പന കൗണ്ടർ ആരംഭിച്ചത്. 600 ടണ്ണിലധികം വിളവാണ് ഇപ്രാവശ്യം ലഭിച്ചത്.

21 മുതൽ 27 വരെ വില്പന ഉണ്ടാകും.

ചീര, പടവലം, കോവൽ, ചുരക്ക, വള്ളിപയർ, ചക്ക, ഇടിച്ചക്ക, മാങ്ങ, പപ്പായ, വാഴക്കൂമ്പ്, വാഴ പിണ്ടി, മുരിങ്ങയില, ചെങ്കദളി എന്നിവയ്ക്കു പുറമെ ഈർക്കിൽ ചൂൽ, വാഴയില, വാഹനങ്ങൾ ക്ലീൻ ചെയ്യാനുള്ള കോട്ടൺ വേസ്റ്റ് തുടങ്ങിയവയും മിതമായ നിരക്കിൽ ലഭിക്കും.

കൃഷി വിജ്ഞാൻ കേന്ദ്രയുടെ 12 തരം പച്ചക്കറി വിത്തുകൾ പാക്കറ്റിന് 10 രൂപ നിരക്കിൽ ലഭിക്കും.

മുൻകൂർ ഓർഡർ ലഭിച്ചാൽ ഫ്രീഡം കോമ്പോ ലഞ്ചും (Rs 100) പാർക്കിലിരുന്ന് കഴിക്കാം.

“കിക്ക് ഔട്ട് ഡ്രഗ്സ് കിക്ക് ഓഫ് ലൈഫ്” : ഫൈവ്സ് ഫുട്ബോൾ ടൂർണമെൻ്റ് ഏപ്രിൽ 26ന്

ഇരിങ്ങാലക്കുട : യൂത്ത് കോൺഗ്രസ്‌ പൊറത്തിശ്ശേരി മണ്ഡലം കമ്മിറ്റിയുടെ നേതൃത്വത്തിൽ “കിക്ക് ഔട്ട് ഡ്രഗ്സ്, കിക്ക് ഓഫ് ലൈഫ്” എന്ന മുദ്രാവാക്യം ഉയർത്തിക്കൊണ്ട് ഏപ്രിൽ 26ന് വൈകീട്ട് 6 മണിക്ക് ഫൈവ്സ് ഫുട്ബോൾ ടൂർണമെൻ്റ് സംഘടിപ്പിക്കും.

ഇംപിരിയ ആക്സിസ് വിന്നേഴ്സ് ട്രോഫിക്കും എ.എം.ആർ. ഇന്റർനാഷണൽ റണ്ണേഴ്സ് ട്രോഫിക്കും വേണ്ടി കാട്ടുങ്ങച്ചിറ യു.ബി.എഫ്. ടർഫിൽ നടത്തുന്ന ടൂർണമെന്റ് മുൻ കെ.പി.സി.സി. ജനറൽ സെക്രട്ടറി എം.പി. ജാക്സൺ ഉദ്ഘാടനം ചെയ്യും.

യൂത്ത് കോൺഗ്രസ് സംസ്ഥാന ജനറൽ സെക്രട്ടറി മിഥുൻ മോഹൻ വിജയികൾക്കുള്ള സമ്മാനദാനം നിർവ്വഹിക്കും.

പൂമംഗലം പഞ്ചായത്തിൽ ഫെസിലിറ്റേഷന്‍ സെന്റര്‍

ഇരിങ്ങാലക്കുട : പൂമംഗലം പഞ്ചായത്തില്‍ ഫെസിലിറ്റേഷന്‍ സെന്റര്‍ പഞ്ചായത്ത് പ്രസിഡന്റ് കെ.എസ്. തമ്പി ഉദ്ഘാടനം ചെയ്തു.

അസിസ്റ്റന്റ് സെക്രട്ടറി എം.എസ്. ബിന്ദു അധ്യക്ഷത വഹിച്ചു.

ഹെഡ് ക്ലാര്‍ക്ക് കെ.വി. ദീപ, പഞ്ചായത്ത് സാക്ഷരതാ പ്രേരക് ഉഷ മധു എന്നിവർ പ്രസംഗിച്ചു.

ക്രൈസ്തവര്‍ക്കു നേരെ ആക്രമണം : കത്തോലിക്ക കോണ്‍ഗ്രസ് പ്രതിഷേധ ജ്വാല സംഘടിപ്പിച്ചു

ഇരിങ്ങാലക്കുട : രാജ്യത്തുടനീളം ക്രൈസ്തവര്‍ക്കും ക്രൈസ്തവ ദേവാലയങ്ങള്‍ക്കും വൈദികര്‍ക്കും നേരെ നടക്കുന്ന ആക്രമണത്തില്‍ കത്തോലിക്ക കോണ്‍ഗ്രസ് കരുവന്നൂര്‍ യൂണിറ്റ് പ്രതിഷേധ ജ്വാല സംഘടിപ്പിച്ചു.

കരുവന്നൂര്‍ സെന്റ് മേരീസ് പള്ളിക്ക് മുന്‍വശത്ത് പന്തം കത്തിച്ചു പ്രതിഷേധം രേഖപ്പെടുത്തി.

പ്രസിഡന്റ് ജോസഫ് തെക്കൂടന്‍, വൈസ് പ്രസിഡന്റ് ഷാബു വിതയത്തില്‍, വാള്‍ട്ടന്‍ പോട്ടോക്കാരന്‍ തുടങ്ങിയവര്‍ പ്രസംഗിച്ചു.

ലഹരിയുടെ പ്രചാരകര്‍ ഒരു സമൂഹത്തിന്റെ കൊലയാളിയാണ് : മാര്‍ പോളി കണ്ണൂക്കാടന്‍

ഇരിങ്ങാലക്കുട : ലഹരിയുടെ പ്രചാരകര്‍ ഒരു സമൂഹത്തെയാണ് കൊന്നെടുക്കുന്നതെന്ന് ബിഷപ്പ് മാര്‍ പോളി കണ്ണൂക്കാടന്‍ അഭിപ്രായപ്പെട്ടു.

ഇരിങ്ങാലക്കുട സെന്റ് തോമസ് കത്തീഡ്രല്‍ ഇടവകയിലെ യുവജന സംഘടനകളായ കെ.സി.വൈ.എം., സി.എല്‍.സി., ജീസസ് യൂത്ത് എന്നിവരുടെ നേതൃത്വത്തില്‍ നടന്ന ലഹരിക്കെതിരെയുള്ള സിഗ്‌നേച്ചര്‍ ക്യാമ്പയില്‍ ഉദ്ഘാടനം ചെയ്തു സംസാരിക്കുകയായിരുന്നു ബിഷപ്പ്.

ജീവിതം അമൂല്യമാണ്, അത് തല്ലിക്കെടുത്തരുത്, മയക്കുമരുന്നില്‍ മരുന്നില്ല മരണമാണെന്ന യാഥാര്‍ത്ഥ്യം ഏവരും തിരിച്ചറിയണം.

സര്‍ക്കാരിന്റെയും സന്നദ്ധ സംഘടനകളുടെയും പ്രവര്‍ത്തനങ്ങളില്‍ പങ്കുചേര്‍ന്ന് നിശ്ചയദാര്‍ഢ്യത്തോടും ആത്മവിശ്വാസത്തോടും കൂടെ ലഹരിക്കെതിരെയുള്ള പേരാട്ടം ശക്തമാക്കണം. അതിലൂടെ സുന്ദരമായ ഒരു ഭാവിതലമുറയെ വാര്‍ത്തെടുക്കുവാന്‍ സാധിക്കണമന്നും ബിഷപ്പ് കൂട്ടിച്ചേര്‍ത്തു.

കത്തീഡ്രല്‍ വികാരി റവ. ഡോ. ലാസര്‍ കുറ്റിക്കാടന്‍ അധ്യക്ഷത വഹിച്ചു.

അസിസ്റ്റന്റ് വികാരിമാരായ ഫാ. ഓസ്റ്റിന്‍ പാറയ്ക്കല്‍, ഫാ. ബെല്‍ഫിന്‍ കോപ്പുള്ളി, ഫാ. ആന്റണി നമ്പളം, കെ.സി.വൈ.എം. പ്രസിഡന്റ് ഗോഡ്‌സണ്‍ റോയ്, സി.എല്‍.സി. പ്രസിഡന്റ് അജയ് ബിജു, ജീസസ് യൂത്ത് കോര്‍ഡിനേറ്റര്‍ ബെന്‍സണ്‍ തോമസ്, ട്രസ്റ്റി സി.എം. പോള്‍, കുടുംബ സമ്മേളന കേന്ദ്രസമിതി പ്രസിഡന്റ് ജോമി ചേറ്റുപ്പുഴക്കാരന്‍, കെ.സി.വൈ.എം. ആനിമേറ്റര്‍ ജോസ് മാമ്പിള്ളി എന്നിവര്‍ നേതൃത്വം നല്‍കി.