ഇരിങ്ങാലക്കുട : ഭാരതീയ കലാരൂപങ്ങളെ കുറിച്ചുള്ള പഠനത്തിനും ആഴത്തിലുള്ള ഗവേഷണത്തിനുമായി ഡോ. കെ.എൻ. പിഷാരടി സ്മാരക കഥകളി ക്ലബ്ബിൻ്റെ ആഭിമുഖ്യത്തിൽ സംഘടിപ്പിക്കുന്ന “രംഗകല” കോൺഫറൻസ് രണ്ടാം പതിപ്പിൻ്റെ പ്രഖ്യാപനവും ഫ്ലയർ പ്രകാശനവും ക്രൈസ്റ്റ് കോളെജിൽ നടന്ന പത്രസമ്മേളനത്തിൽ പ്രസിഡൻ്റ് രമേശൻ നമ്പീശൻ നിർവഹിച്ചു.
“ഭാവ രസാനുഭവ” എന്ന പ്രമേയത്തിൽ 2027 ജനുവരി 13 മുതൽ 17 വരെയാണ് രംഗകല കോൺഫറൻസ് നടക്കുക.
ഭാരതീയ ശാസ്ത്രീയ നൃത്ത- നാട്യ പാരമ്പര്യങ്ങളിലെ ശൃംഗാര രസത്തിന്റെ വൈവിധ്യമാർന്ന മാനങ്ങളും സൗന്ദര്യാത്മക ഭാവങ്ങളുമാണ് ഇക്കുറി പ്രധാനമായും ചർച്ചാവിഷയമാകുന്നത്. അന്തർദേശീയ തലത്തിൽ പ്രശസ്തരായ പ്രമുഖ കലാകാരന്മാരും ഗവേഷകരും ആചാര്യന്മാരും കോൺഫറൻസിൽ പങ്കെടുക്കും.
പരമ്പരാഗത കലകളെ കുറിച്ച് സമൂഹത്തിൽ ആഴത്തിലുള്ള ധാരണ വളർത്തുന്നതിനും ഭാവിതലമുറയ്ക്ക് അവയെ ബൗദ്ധികമായി പരിചയപ്പെടുത്തുന്നതിനും കോൺഫറൻസ് ലക്ഷ്യമിടുന്നു.
പുതിയ ദേശീയ വിദ്യാഭ്യാസത്തിൻ്റെ ലക്ഷ്യങ്ങളുമായി പൊരുത്തപ്പെടുന്ന രീതിയിൽ ക്രൈസ്റ്റ് കോളെജിലെ ഐ.കെ.എസ്. സെല്ലിന്റെ “നാട്യപാഠശാല” പാഠ്യപദ്ധതിയുടെ ഭാഗമായാണ് രംഗകല കോൺഫറൻസ് 2027ന്റെ ഉള്ളടക്കം വിഭാവനം ചെയ്യുന്നത്.
ഭാരതീയ ശാസ്ത്രീയ കലകളുടെ പ്രചരണത്തിനും കലാകാരന്മാരെ പിന്തുണയ്ക്കുന്നതിനു മായി പ്രവർത്തിക്കുന്ന സാംസ്കാരിക കൂട്ടായ്മയായ സർവ്വമംഗള ട്രസ്റ്റ് കൂടി രംഗകല കോൺഫറൻസിന്റെ സംഘാടനത്തിൽ സഹകരിക്കും.
കേരളത്തിന്റെ തനത് സംഗീത നൃത്ത നാടകമായ കഥകളി, യുനെസ്കോ പൈതൃക പട്ടികയിൽ ഉള്ള സംസ്കൃത നാടകാവതരണമായ കൂടിയാട്ടം, ലാസ്യ നൃത്ത വിഭാഗത്തിലെ മോഹിനിയാട്ടം എന്നിവയ്ക്ക് പുറമേ ഭരതനാട്യം, കുച്ചിപ്പുടി, ഒഡീസി, കഥക്, മണിപ്പൂരി തുടങ്ങിയ ഭാരതത്തിൻ്റെ മറ്റ് പ്രമുഖ രംഗകലാരൂപങ്ങളും ഈ പഞ്ചദിന അരങ്ങുകളിൽ സമന്വയിക്കും.
ഭാരതീയ രംഗകലകളിലെ ശാസ്ത്രീയ വശങ്ങൾക്കൊപ്പം ഓരോ കലയിലും ഇഴപിരിയാനാവാത്ത വിധം ബന്ധിച്ചു കിടക്കുന്ന മാർഗി, ദേശി സമ്പ്രദായങ്ങളെ അടിസ്ഥാനമാക്കിയുള്ള സെമിനാറുകൾ, ചർച്ചകൾ, സോദാഹരണ പ്രഭാഷണങ്ങൾ, ചൊല്ലിയാട്ടങ്ങൾ, രംഗാവതരണങ്ങൾ എന്നിവയും രംഗകല കോൺഫറൻസിന്റെ ഭാഗമായി അരങ്ങേറും.
കൾച്ചറൽ ടൂറിസത്തിന്റെ ഭാഗമായി വിദേശത്തുനിന്നും നാട്ടിൽ നിന്നുമുള്ള കലാകാരന്മാർക്കും ആസ്വാദകർക്കും പരസ്പരം ഒത്തുകൂടാനും സംവദിക്കാനുമുള്ള വേദിയായും രംഗകല കോൺഫറൻസ് മാറും.
കൂടാതെ വിവിധ കലാസ്ഥാപനങ്ങളിലെ വിദ്യാർഥികൾക്കായി പ്രത്യേക ക്യാമ്പുകളും വിഭാവനം ചെയ്യുന്നുണ്ട്.
കല ആസ്വദിക്കുന്നവർക്കും പഠിക്കുന്നവർക്കും ഭാവിയിൽ ഒരു മികച്ച റഫറൻസ് സ്രോതസ്സായി ഉപയോഗിക്കാൻ തക്കവണ്ണം എല്ലാ പരിപാടികളുടെയും സമഗ്രമായ ഡോക്യുമെന്റേഷനും ഇതിനോടനുബന്ധിച്ച് തയ്യാറാക്കുന്നുണ്ടെന്ന് ഭാരവാഹികൾ വ്യക്തമാക്കി.
സെക്രട്ടറി അഡ്വ. രാജേഷ് തമ്പാൻ, ക്രൈസ്റ്റ് കോളെജ് വൈസ് പ്രിൻസിപ്പൽ ഡോ. സേവിയർ ജോസഫ്, ഐ.കെ.എസ്. സെൽ കോർഡിനേറ്റർ ഡോ. വിനീത ജയകൃഷ്ണൻ, രംഗകല കോൺഫറൻസ് ഡയറക്ടർ ശ്രീലക്ഷ്മി വർദ്ധനൻ എന്നിവരും പത്രസമ്മേളനത്തിൽ പങ്കെടുത്തു.
